Efese 5

₁Dat' meki un mus teki a eksempre fu Gado, leki pikin fu En di A lobi. ₂Sori trawan tak' un lobi den soleki fa Kristus sori un lobi. A gi En libi leki wan offer di ben de leki wan switi smeri gi Gado èn di Gado ben feni bun.

₃Leki sma fu Gado un no mus gi unsrefi abra na takru lostu, un no mus libi ala sortu doti libi èn un no mus abi bigi-ai. Den sani disi no mus de na un mindri leki sma fu Gado. ₄A no fiti tu fu un taki dot'taki nanga lawlaw sani, noso fu meki morsu spotu. Ma a moro betre fu gi Gado tangi. ₅Bika un mus sabi bun tak' wan sma di e gi ensrefi abra na takru lostu, di e libi ala sortu doti libi, noso di gridi fu moni, no o kon ondro a tiri fu Kristus nanga Gado. Gridi fu moni na a srefi leki te yu e du afkodrei. ₆No meki sma kon kori unu nanga wortu di no e taki noti, bika na den sani disi e meki Gado ati e bron tapu den sma di no wani du san A taki. ₇No teki prati ini den sani san den e du. ₈Fosi un ben de ini a dungru, ma now un de ini a leti fu di un de wan nanga Masra. So un mus tyari unsrefi leki sma di de fu a leti. ₉Bika a leti e tyari soso bun kon na doro, sani di bun ini Gado ai, nanga sani di taki leki fa den de. ₁₀Suku fu kon sabi san e gi Gado prisiri. ₁₁Un no mus teki prati na ini den soso sani san den sma e du di de ini a dungru. Ma un mus sori tak' den sani dati no bun. ₁₂Bika den sani san den e du kibrikibri, na soso syen sani. A no fiti srefi fu taki abra den. ₁₃Ma te a faya e tyari ala den sani disi kon na krin, dan a de fu si fa den de trutru. ₁₄Bika na a faya e meki ala sani kon na krin. Dat' meki a skrifi taki:

₁₅Fu dat'ede, un mus luku bun fa un e tyari unsrefi. No tyari unsrefi leki sma di no abi ferstan, ma un tyari unsrefi leki sma di koni. ₁₆Un no mus lasi un ten fu soso, bika a ten pe un e libi takru. ₁₇Dat' meki un no mus du leki donman, ma un mus suku fu kon sabi san Masra wani. ₁₈Un no mus dringi win te leki un drungu, bika dati o meki un du sani di no fiti. Ma un mus kon furu nanga a Yeye. ₁₉Un mus taki nanga makandra nanga psalm-singi, singi di e gi Gado grani, èn nanga singi di e opo Gado nen. Un mus singi, iya un singi gi Masra na ini un ati. ₂₀Un mus taki Gado a P'pa tangi ala ten èn fu ala sani ini a nen fu wi Masra Yesus Kristus.

₂₁Un saka unsrefi gi makandra fu di un e lespeki Kristus.

₂₂Frow, un mus saka unsrefi gi un masra, leki fa un e du dati gi Masra. ₂₃Bika a man na a ede fu en frow, leki fa Kristus na a ede fu En gemeente. Na En na a Ferlusuman fu En skin. ₂₄We dan, leki fa a gemeente e saka ensrefi gi Kristus, na so den frow mus saka densrefi gi den masra na ini ala sani.

₂₅Mansma, un mus lobi un frow leki fa Kristus lobi a gemeente. A ben gi En libi gi en, ₂₆fu meki a kon santa. A wasi en kon krin nanga a wortu. ₂₇Na so A o poti en na En fesi leki wan gemeente di e brenki na ala sei, di no abi flaka, ploiploi noso iniwan fu den sortu sani dati. Dan so a gemeente o de santa èn sondro fowtu. ₂₈Na so den man mus lobi den frow tu. Den mus lobi den leki fa den lobi den eigi skin. Suma lobi en frow lobi ensrefi. ₂₉Bika noiti ete wan sma hori en eigi skin na feyanti. Ma a e gi en nyanyan èn a e sorgu bun gi en, soleki fa Kristus e sorgu gi a gemeente. ₃₀Bika wi alamala de wan pisi fu En skin. ₃₁Dat' meki wan man sa libi en m'ma nanga en p'pa fu go libi nanga en frow, èn den tu sma sa kon tron wan enkri skin. ₃₂A kibritori disi dipi. Ma mi e teki en fu sori fa Kristus de nanga a gemeente. ₃₃Ma a e teri fu ibriwan fu unu tu. Wan man mus lobi en frow leki fa a lobi ensrefi, èn wan frow mus abi lespeki gi en masra.