Dag 119 van 365- 1 Koningen 6-7 en Lucas 20:27-47

₁Salomo bigin meki a oso fu MASRA fo yari baka di a tron kownu. Dati ben de fo hondro nanga aititenti yari baka di den sma fu Israel kmoto na Egipte. A bigin bow en ini a mun Siw, a di fu tu mun fu a yari.

₂A oso di kownu Salomo ben e meki gi MASRA, ben langa dritenti meter, a ben bradi tin meter èn a ben hei tin-na-feifi meter. ₃Na fes'sei fu a oso, fesi a bigi kamra wan gadri ben de, di ben langa tin meter leki fa a oso ben bradi èn a ben langa feifi meter go inisei. ₄Dan a meki fensre nanga smara udu lati na den fesi gi a oso. ₅Moro fara a bow ete wan pisi lontu a heri ososkin, lontu a bigi kamra nanga a baka kamra. A pisi dati ben abi difrenti pisi tapu makandra. ₆A ondrosei pisi ben bradi tu nanga afu meter, a mindri pisi dri meter, nanga a tap'sei pisi dri nanga afu meter. A meki den bow en so taki a wan pisi ben bradi moro a trawan fu di a no ben wani taki den postu di ben e hori den ben mus fasi na a ososkin. ₇Di a oso ben e meki, no wan babari fu ambra, noso tra isri wrokosani ben de fu yere. Bika a ben e meki soso nanga ston di ben marki èn koti na fesi kba pe den ben kapu den puru. ₈A doro fu a ondrosei pisi ben de na let'sei fu a oso. A mindri pisi ben abi wan trapu-olo. Bika nanga trapu yu ben e go na a mindri pisi nanga a tap'sei pisi. ₉Di a kba meki a skin fu a oso, a poti wan daki fu sedre-udu postu nanga sedre-udu planga na en tapu. ₁₀Iniwan fu den pisi di a meki lontu a skin fu a oso ben hei sowan tu nanga afu meter, èn den ben fasi na a ososkin nanga sedre-udu postu.

₁₁Dan MASRA taigi Salomo taki: ₁₂“Efu yu du den sani di yu mus tan du, efu yu hori yusrefi na den sani na san yu mus tan hori yusrefi èn efu yu hori yu na ala den gebod fu Mi, Mi o du gi yu san Mi ben pramisi yu p'pa David: ₁₃Taki Mi sa libi na mindri fu den Israelitisma èn Mi no sa gwe libi Mi pipel Israel.”

₁₄Di Salomo kba meki a oso, ₁₅a tapu a heri inisei fu en, fu gron go te na loktu, nanga sedre-udu planga. Tapu a gron a poti planga fu sipres-udu. ₁₆Dan a marki tin meter kmoto fu a ososkin na bakasei kon na inisei, dan a skotu a pisi dati nanga sedre-udu planga, fu gron go te na loktu. A pisi dati tron a baka kamra: a moro santa presi. ₁₇A tutenti meter di ben libi fesi a moro santa presi, tron a bigi kamra. ₁₈A ososkin ben tapu na inisei nanga sedre-udu planga èn bigi lontu froktu nanga bromki ben tyerfi na den tapu. Alasei ben tapu nanga sedre-udu. No wan ston ben de fu si moro.

₁₉Dan Salomo meki den seti a baka kamra fu a oso, fu ben kan poti a santa kisi fu a ferbontu fu MASRA drape. ₂₀A baka kamra ben langa tin meter, a ben bradi tin meter èn a ben hei tin meter. Dan a meki den poti lala gowtu na a heri inisei fu a kamra. Srefi a sedre-udu altari fesi a kamra dati a meki den tapu nanga gowtu. ₂₁Baka dati Salomo meki den tapu a heri inisei fu a oso nanga lala gowtu. Dan a meki den span gowtu keti poti fesi a baka kamra. ₂₂Iya, a meki den tapu a heri inisei fu a oso nanga gowtu. Srefi a heri altari fu a baka kamra a meki den tapu nanga gowtu.

₂₃A meki den meki tu kerub fu oleif-udu gi a baka kamra. Den kerub ben hei feifi meter. ₂₄Ini wan fu den frei fu den ben langa tu nanga afu meter. Fu a bigin fu a wan frei go miti a bigin fu a tra frei ben de feifi meter. ₂₅Den frei fu a tra kerub ben langa a srefi tu: feifi meter, fu a bigin fu a wan frei go miti a bigin fu a tra frei. Ala tu kerub ben bigi a srefi èn den ben meki a srefi fasi tu. ₂₆Ala tu ben hei feifi meter. ₂₇Dan a meki den poti den kerub so wan fasi ini a baka kamra, tak' fu ibri kerub wan frei ben e miti nanga den planga fu a ososkin èn a tra frei ben e miti nanga di fu a tra kerub leti na mindri fu a kamra. ₂₈A meki den tapu den kerub nanga gowtu tu.

₂₉Na a heri skin fu a oso na inisei, ini a baka kamra nanga ini a bigi kamra, a meki den tyerfi kerub, palmbon nanga bromki. ₃₀Salomo meki den poti gowtu tu tapu a gron fu a oso, sobun, tapu a gron fu a baka kamra nanga tapu di fu a bigi kamra. ₃₁A meki den meki doro fu oleif-udu gi a baka kamra. Den postu fu a doro-olo ben abi feifi uku. ₃₂Tapu den tu pisi fu a doro di ben meki fu oleif-udu, a meki den tyerfi kerub, palmbon nanga bromki. Baka dati a meki den tapu den kerub nanga den palmbon nanga gowtu. ₃₃Den postu fu a doro-olo fu a bigi kamra ben meki fu oleif-udu tu, ma den postu dati ben abi fo uku. ₃₄A doro fu a bigi kamra ben meki fu sipres-udu èn a ben abi tu pisi. Iniwan fu den tu pisi dati ben prati baka na tu èn ibri pisi ben e drai. ₃₅Dan a meki den tyerfi kerub, palmbon nanga bromki poti tapu den doro èn a meki den tapu ala sani nanga moi fini gowtu ₃₆A meki den skotu a inisei pren tu. Den hari dri rij ston di ben marki èn koti na fesi, nanga wan rij sedre-udu postu na den tapu.

₃₇Fo yari baka di Salomo tron kownu, ini a mun Siw, den bigin meki a fundamenti fu a oso fu MASRA. ₃₈Ini a di fu erfu yari, ini a di fu aiti mun, a mun Bul, a heri oso ben kba, soleki fa a ben wani meki en. Salomo ben abi seibi yari fanowdu fu bow a oso.

₁A teki Salomo tin-na-dri yari fu meki a kownu-oso fu en. Dati na a ten di a ben abi fanowdu fu meki en te leki a ben kba. ₂A kownu-oso: Busi fu Libanon, ben langa feifitenti meter, a ben bradi tutenti-na-feifi meter, èn a ben hei tin-na-feifi meter. Na ala den fo sei den poti fo rij bigi sedre-udu postu nanga tra sedre-udu postu di ben didon na den tapu. ₃Dan den tapu en nanga wan plata sedre-udu daki di ben rostu tapu den postu. Fotenti-na-feifi bigi postu, dri rij fu tin-na-feifi, ben kraka den postu fu a daki. ₄Na a wan sei fu a oso yu ben abi dri rij fensre tapu makandra. Den ben tnapu abra dri tra rij fensre na a tra sei fu a kamra. ₅Den postu fu den doro nanga den fensre ben abi fo uku, èn a wan fensre ben de wan meter fu a trawan. ₆Dan a meki wan gadri di ben langa tutenti-na-feifi meter èn di ben bradi tin-na-feifi meter nanga bigi sedre-udu postu, ala tu sei fu en. Fesi a gadri a meki wan sortu tenti fu bigi postu nanga wan daki. ₇A meki wan bigi kamra tu pe en leki kownu ben o sidon. Ini a kamra dati a ben o koti krutu tu. Dan a poti sedre-udu na a skin fu a heri kamra dati, fu gron go na loktu. ₈A oso pe Salomo srefi ben o libi ben de baka a kamra dati tapu wan tra pisi fu a dyari, èn a ben meki a srefi fasi leki a kamra. A oso di a meki gi en wefi, a umapikin fu Farao, ben meki a srefi fasi tu leki a kamra. ₉Ala den oso di meki tapu a dyari drape, fu fes'sei go na bakasei, ben meki nanga a moro bun ston, fu den fundamenti te kon miti den daki. Den bigi ston dati ben marki èn den ben koti na fesi kba fu den ben kan fiti wantron. ₁₀Den fundamenti ben meki nanga bigi pisi fu a moro bun ston tu. Sowan fu den bigi ston dati ben langa feifi meter, trawan ben langa fo meter. ₁₁Tapu den fundamenti dati den meki a skotu fu a moro bun ston di ben marki èn koti na fesi kba, nanga sedre-udu postu na den tapu. ₁₂A bigi pren ben skotu nanga dri rij ston di ben marki èn koti na fesi kba, nanga wan rij sedre-udu postu na den tapu. A srefi fasi a skotu fu a inisei pren fu a oso fu MASRA nanga a gadri na fes'sei ben de.

₁₃Dan kownu Salomo seni teki Hiram, wan man fu Tyrus. ₁₄En m'ma ben de fu a lo fu Naftali ma en p'pa ben de wan man fu Tyrus di ben e meki kopro sani. Hiram ben abi furu koni, sabi nanga ferstan fu ben kan meki ala sortu sani nanga kopro. A go wroko gi kownu Salomo èn a meki ala sani di kownu ben aksi fu du.

₁₅A meki tu bigi kopro postu, di ben hei neigi meter èn di ben bradi siksi meter. ₁₆Dan a meki tu kopro postu-ede fu poti tapu den postu. Den ben hei tu nanga afu meter. ₁₇Dan a meki seibi brei keti gi iniwan fu den postu-ede. Den keti ben drai èn den ben e anga lontu den postu. ₁₈A meki tu rij granaki-apra, di a fasi na den brei keti lontu den postu-ede. ₁₉Den postu-ede di ben de na a fes'sei gadri tapu den postu, ben hei tu meter èn den ben gersi leilibromki. ₂₀Na loktusei fu a lontu pisi pe den brei keti ben de, tu hondro granaki-apra ben anga ini rij lontu iniwan fu den postu-ede. ₂₁Dan Hiram poti den tu bigi postu tnapu na a fes'sei gadri fu a bigi kamra. A postu di a poti tnapu na a let'sei, a kari Yakin. A postu di a poti na a kruktusei a kari Boas. ₂₂Di den poti den postu-ede di ben meki leki leilibromki tapu den postu, a wroko ben kon na wan kba.

₂₃Hiram meki wan bigi kopro beki tu. A beki ben bradi feifi meter fu a wan lantyi go na a trawan, a ben dipi tu nanga afu meter èn a ben lontu tin-na-feifi meter. ₂₄Ondro a lantyi a meki lontu froktu poti lontu a heri beki. Ibri afu meter ben abi tin froktu di ben fasi na ini tu rij na a beki skin. ₂₅A beki ben sidon tapu twarfu kaw: dri fu den ben e luku go na noordsei, dri fu den ben e luku go na zuidsei, dri fu den ben e luku go na oostsei èn dri fu den ben e luku go na westsei. A beki ben e sidon tapu den mindribaka èn den tere fu ala den kaw ben e sori go na inisei ondro a beki. ₂₆A beki ben deki leki fa wan libisma anu bradi. A lantyi ben meki leki a lantyi fu wan kan, leki wan leilibromki. A beki ben man teki fo hondro dusun siksitenti liter watra.

₂₇Baka dati a meki tin kopro baki. Iniwan fu den baki ben langa tu meter, den ben bradi tu meter, èn den ben hei wan nanga afu meter. ₂₈A baki ben meki fu kopro plaat di ben fasi na ini kopro lati. ₂₉Tapu den plaat nanga den lati den meki lew, kaw nanga kerub. Tap'sei nanga ondrosei fu den lew nanga den kaw den ben tyerfi bromki. ₃₀Iniwan fu den baki ben abi fo kopro wiel nanga kopro as. Na den fo uku den meki anu tapu san den beki ben o sidon. Den anu ben ankra fasi sei den bromki. ₃₁A baki ben abi wan lontu olo di ben hei sowan seibitenti-na-feifi centimeter kon na loktu. A olo dati meki fu a beki ben kan sidon. Den meki wan lantyi na a olo èn srefi tapu a lantyi den tyerfi sani poti. A lantyi no ben lontu, ma a ben fokanti. ₃₂Den fo wiel ben de ondrosei fu den plaat èn den forku ben fasi na a baki. Iniwan fu den ben hei seibitenti-na-feifi centimeter. ₃₃Den wiel ben de leki di fu den fetiwagi ma moro pikin. Den forku, den spaak, den velg nanga den olo fu den as, ben meki fu kopro. ₃₄Iniwan fu den baki ben abi fo anu, wan ini ibri uku. Den ben de wan nanga a baki. ₃₅Tap'sei fu a baki ben abi wan lontu lantyi di ben hei sowan tutenti-na-feifi centimeter. Den anu nanga den plaat ben fasi na a lantyi dati. ₃₆Dan Hiram tyerfi kerub, lew nanga palm tapu den plata pisi fu den anu nanga tapu den plaat. Dan a tyerfi bromki lontu den. ₃₇Na so a meki den tin baki. Den alamala ben de fu kopro, den ben bigi a wan èn den ben meki tapu a srefi fasi. ₃₈Dan a meki tin kopro beki, wan gi iniwan fu den baki. Den beki ben langa tu meter, fu wan lantyi go na a trawan, èn den ben kan teki wan dusun aiti hondro liter watra. ₃₉Dan a poti feifi fu den baki na a let'sei fu a oso èn den tra feifi a poti na a kruktusei. A bigi beki a poti na a let'sei fu a oso go na a zuidoostsei.

₄₀Moro fara Hiram meki patu, bigi spun nanga beki. Na den sani disi a ben musu meki gi kownu gi a oso fu Masra: ₄₁den tu bigi postu, den tu postu-ede, den tu keti di a brei poti na den postu-ede. ₄₂den fo hondro granaki-apra na den tu brei keti, tu rij granaki-apra gi iniwan fu den brei keti fu ben poti na den postu-ede, ₄₃den tin baki, den tin beki ini den baki, ₄₄a bigi beki, den twarfu kaw ondro a beki, ₄₅den patu, den bigi spun nanga beki. Ala den sani disi di Hiram meki gi kownu Salomo gi a oso fu MASRA, ben de fu brenki kopro. ₄₆Ini a kontren fu a Yordanliba mindri Sukkot nanga Saretan, kownu ben meki den kanti a kopro ini tranga kleidoti pe den ben meki marki fu den sani. ₄₇Salomo no wegi den sani di meki. Den ben furu sote tak' den no wegi luku omeni kopro ben de fanowdu fu meki den.

₄₈Salomo meki ala den sani tu di ben mus de ini a oso fu MASRA, soleki: a gowtu altari, a gowtu tafra gi den santa brede, ₄₉nanga den kandelaar di ben meki nanga lala gowtu. Feifi fu den ben tnapu na a let'sei nanga feifi ben tnapu na a kruktusei fesi a baka kamra. Den gowtu bromki, den gowtu lampu nanga den tanga, ₅₀den skarki, nefi, beki, den skotriki, den embre fu lala gowtu gi a krofaya, sosrefi den gowtu greni fu den doro fu a baka kamra, a moro santa presi fu a tempel, nanga di fu den doro fu a bigi kamra.

₅₁Di kownu Salomo kba du ala a wroko na a oso fu MASRA, a tyari ala den sani di en p'pa David ben poti aparti gi Gado, go poti na ini. A solfru, a gowtu nanga ala den tra sani a tyari go poti ini den kamra fu a oso fu MASRA pe den gudu ben e tan.

₂₇Wantu Saduseiman kon na Yesus fu aksi En wan sani. Den man disi no ben e bribi taki dedesma o kon na libi baka. ₂₈Den taki: “Meister, Moses ben skrifi taki efu wan man di abi wan brada trow, èn a dede sondro fu a kisi pikin, dan en brada mus trow nanga a uma fu meki pikin gi en brada di dede. ₂₉Now seibi brada ben de. A fosi wan trow, ma a dede sondro fu libi pikin na baka. ₃₀Dan a brada di waka na en baka trow nanga a uma, ₃₁dan a di fu dri, te leki ala den seibi brada ben trow nanga en. Ma den alamala dede sondro fu kisi pikin. ₃₂Te fu kba, a uma srefi kon dede.” ₃₃Dan den aksi Yesus taki: “Te den dedesma o kon na libi baka, sortu wan fu den brada sa abi a uma disi leki en trow-uma? Bika ala seibi man ben trow nanga en.” ₃₄Yesus piki den taki: “Den sma fu a ten disi e trow nanga makandra. ₃₅Ma den sma di Gado feni warti fu opo baka na dede, èn libi ini a ten di e kon, no o trow nanga makandra. ₃₆Den no o dede moro, bika den o de leki den engel. Den o de pikin fu Gado, fu di den kon na libi baka. ₃₇Moses srefi sori krinkrin tak' dedesma o kon baka na libi. Ini a tori fu a pikin bon di ben teki faya sondro fu bron, Moses kari Gado: a Gado fu Abraham, Isak, nanga Yakob. ₃₈Ini Gado ai, den sma dati e libi. So un e si taki Gado a no Gado fu dedesma, ma fu sma di e libi.” ₃₉Dan wantu fu den sabiman fu Gado wèt taigi Yesus taki: “Meister, Yu piki bun.” ₄₀Èn den no ben prefuru moro fu aksi En wan sani.

₄₁Dan Yesus aksi den sma taki: “Fa den sma kan taki tak' a Mesias na wan bakapikin fu kownu David? ₄₂Bika David srefi skrifi ini wan fu den Psalm taki: ‘Masra Gado taigi mi Masra taki: Kon sidon na Mi let'anu sei, ₄₃te leki Mi meki den feyanti fu Yu tron Yu futubangi.’ ₄₄We, efu David kari a Mesias en Masra, dan fa A kan de en bakapikin dan?”

₄₅A ten di a heri folku ben e arki san A e taki, Yesus taigi den sma di e teki leri fu En taki: ₄₆“Un mus luku bun nanga den sabiman fu Gado wèt. Den lobi fu weri langa krosi e koiri, èn den lobi te sma e gi den lespeki odi na wowoyo. Den lobi fu sidon na den moro bun presi ini den kerki, èn den wani sidon na den moro prenspari presi te den go nyan na sma oso. ₄₇Den e puru den oso na a anu fu den uma di masra dede kba, dan den e begi langabere begi fu sma denki taki den bun. Dat' meki a strafu fu den o moro hebi.”