Dag 123 van 365- 1 Koningen 14-15 en Lucas 22:21-46

₁A srefi ten dati, Abia, a manpikin fu Yerobeam, kon siki. ₂Dan Yerobeam taigi a frow fu en taki: “Meki yusrefi klari fu go na Silo. Drape a profeiti Akia e tan di ben taigi mi taki mi ben o tron kownu fu a folku disi. Ma yu mus weri so wan fasi taki sma no man si taki na a frow fu mi. ₃Tyari tin brede, wantu rosenkuku nanga wan kroiki oni gi en. A sa taigi yu san o psa nanga a boi.” ₄A wefi fu Yerobeam du san a taigi en. A teki pasi go na Silo èn a go na a oso fu Akia. Akia no ben e si moro. A ben kon owru èn en ai ben kon dungru. ₅Ma MASRA ben taigi en taki: “A wefi fu Yerobeam e kon. A wani aksi yu san o psa nanga a boi fu en di siki. A weri en krosi so wan fasi fu yu no man sabi tak' na en. Ma fa a kon inisei yu mus taigi en den sani disi di Mi o taigi yu.” Dan MASRA taigi a profeiti san a mus taigi en te a kon na inisei.

₆Di Akia yere taki wan sma psa a doro kon na inisei, a taki: “Yu kan kon doro, wefi fu Yerobeam! San meki yu weri so fu sma no sabi taki na yu? A boskopu di mi abi gi yu, no moi srefsrefi. ₇Go taigi Yerobeam taki na so MASRA, a Gado fu Israel, taki: ‘Mi puru yu na mindri fu a pipel èn Mi gi yu wan moro hei presi. Mi poti yu leki tiriman fu Mi pipel Israel. ₈Mi puru a kondre ini anu fu a famiri fu David èn Mi gi yu a kondre. Ma yu no tyari yusrefi leki Mi knekti David di hori ensrefi na den gebod fu Mi, di dini Mi nanga en heri ati èn di du sani di bun ini Mi ai. ₉Ma yu du moro ogri dan den wan di ben de na yu fesi. Yu drai yu baka gi Mi fu go meki tra gado, yu meki gowtu popki èn so yu wiki a atibron fu Mi. ₁₀Fu dat'ede Mi o meki wan bigi ogri miti a famiri fu en. Iya, Mi o kiri ala den manpikin fu Yerobeam ini Israel, bigiwan nanga pikinwan. Mi o figi a famiri fu Yerobeam gwe, leki fa sma e figi doti gwe te leki noti fu en no de fu si moro. ₁₁Dagu o nyan den famiri fu yu di o dede ini a foto, èn tingifowru o nyan den wan di o dede ini a wei. Na mi, MASRA, taki dati.’ ” ₁₂Dan Akia taigi a uma moro fara taki: “Drai go baka na yu oso. Fa yu o poti yu futu ini a foto, na so a pikin o dede. ₁₃Heri Israel sa low gi en, èn beri a dedeskin fu en. Fu a heri famiri fu Yerobeam, na a boi disi wawan sa beri, bika na ini en wawan MASRA, a Gado fu Israel, feni wan bun sani. ₁₄MASRA o poti wan kownu ini Israel, di o figi a famiri fu Yerobeam puru na pasi. Tide srefi dati o psa. ₁₅MASRA sa naki Israel, leki fa a winti e wai a tyengrasi di e gro ini a liba. A sa rutu den Israelitisma puru fu a bun kondre disi di A ben gi den afo fu den. A sa panya den go na tra sei fu a Eufratliba, bika den wiki a atibron fu En nanga den postu di den meki gi den kruktu gado. ₁₆Iya, now En sa drai baka gi Israel, fu den sondu di Yerobeam du èn fu di a meki Israel e sondu tu.”

₁₇Dan a wefi fu Yerobeam drai go baka na Tirsa. Fa a poti en futu ini a oso, na so a boi dede. ₁₈Den beri en èn heri Israel ben low gi en leki fa MASRA ben meki En knekti, a profeiti Akia, taki.

₁₉Den tra sani di psa ini a libi fu Yerobeam, den feti di a feti èn a fasi fa a ben tiri a kondre, skrifi poti ini a buku fu a historia fu den kownu fu Israel. ₂₀Yerobeam tan tutenti-na-tu yari na makti. A dede èn en manpikin Nadab teki en presi leki kownu.

₂₁Rekabeam, a manpikin fu Salomo, ben tron kownu fu Yuda. A ben abi fotenti-na-wan yari di a tron kownu. Tin-na-seibi yari a ben de na makti ini Yerusalem, a foto di MASRA teki na mindri fu ala den lo fu Israel fu sma kon anbegi En. A m'ma fu Rekabeam ben nen Naama, wan uma fu Amon.

₂₂Den sma fu Yuda ben e du sani di no ben bun ini MASRA ai. Nanga den sondu di den ben e du, den ben e wiki a dyarusu fu En moro leki fa den afo fu den ben du. ₂₃Tapu ala pikin bergi nanga ondro ala bon nanga furu wiwiri, den ben e meki presi fu sma tyari ofrandi noso den ben e poti ston nanga postu tnapu gi kruktu gado. ₂₄Yu ben abi man nanga uma ini a kondre srefi di ben e seri den skin na den presi disi. Den ben e du den srefi groskin sani fu den folku di MASRA ben yagi puru gi den sma fu Israel.

₂₅Di kownu Rekabeam ben de feifi yari na makti, kownu Sisak fu Egipte hari kon feti nanga Yerusalem. ₂₆A teki ala den gudu fu a oso fu MASRA nanga di fu a oso fu kownu. Ala sani a teki. A teki den gowtu schild srefi di Salomo ben meki. ₂₇Kownu Rekabeam meki kopro wan na den presi, dan a poti den ondro a frantwortu fu den edeman fu den spesrutu waktiman di ben e hori wakti na den doro fu a kownu-oso. ₂₈Den waktiman disi ben e tyari den ala leisi kon, te kownu ben e go na a oso fu MASRA. Baka dati den ben e go poti den baka ini a kamra fu den spesrutu waktiman.

₂₉Den tra sani di psa ini a libi fu Rekabeam nanga ala den sani di a du, skrifi poti ini a buku fu a historia fu den kownu fu Yuda. ₃₀Dorodoro feti ben de fu Rekabeam nanga Yerobeam. ₃₁Rekabeam dede èn den beri en na den afo fu en ini a foto fu David. En m'ma ben nen Naama, wan uma fu Amon. En manpikin Abiam teki en presi leki kownu.

₁Di Yerobeam, a manpikin fu Nebat, ben de tin-na-aiti yari na a makti, Abiam tron kownu fu Yuda. ₂Abiam ben de dri yari na makti ini Yerusalem. En m'ma ben nen Maaka, wan umapikin fu Abisalom. ₃Abiam ben e du den srefi sondu di en p'pa ben du. A no ben e dini MASRA, en Gado, nanga en heri ati, soleki en afo David. ₄Ma fu di MASRA, en Gado, ben wani taki wan bakapikin fu David ben mus tan kownu ini Yerusalem, Gado gi en wan manpikin di ben o teki en presi leki kownu. Bika Gado ben wani taki Yerusalem ben mus tan, ₅fu di David ben du san bun ini MASRA ai. En heri libi langa a du san MASRA ben komanderi en, boiti ini a tori fu Uria, a Hetitiman. ₆A feti fu Rekabeam nanga Yerobeam, ben go doro di Abiam ben de na makti.

₇Den tra sani di psa ini a libi fu Abiam nanga ala den sani di a du, skrifi poti ini a buku fu a historia fu den kownu fu Yuda. Abiam nanga Yerobeam feti go doro nanga densrefi. ₈Abiam dede èn den beri en ini a foto fu David. En manpikin Asa teki en presi leki kownu.

₉Di kownu Yerobeam fu Israel ben de tutenti yari na makti, Asa tron kownu fu Yuda. ₁₀Asa tan fotenti-na-wan yari na makti ini Yerusalem. En granm'ma ben de Maaka, a umapikin fu Abisalom. ₁₁Asa ben e du san bun ini MASRA ai, neleki en afo David. ₁₂A yagi den man nanga uma gwe fu a kondre, di ben e seri den skin na den presi pe sma ben e tyari ofrandi èn a puru ala den popki fu den kruktu gado di den afo fu en ben meki. ₁₃A puru a grani di en granm'ma Maaka ben abi leki m'ma fu kownu, fu di a ben meki wan groskin popki fu Asyera. Asa kapu a popki dati pis'pisi, dan a sutu faya gi en ini a Kidrondal. ₁₄Asa tan dini MASRA wawan nanga en heri ati en heri libi langa, ma den presi pe sma ben e tyari ofrandi ben tan. ₁₅Ala den sani di en p'pa nanga di ensrefi ben poti aparti gi MASRA, a tyari go poti ini a oso fu MASRA, sani leki solfru, gowtu nanga ala sortu wrokosani.

₁₆Solanga di Asa ben de kownu fu Yuda èn Basa ben de kownu fu Israel, feti ben de fu den tu kownu disi. ₁₇Kownu Basa fu Israel, hari go feti nanga Yuda. A meki a foto Rama kon moro tranga fu a ben kan tapu a pasi fu sma no go noso kmoto fu Yuda. ₁₈Dan Asa teki ala a solfru nanga gowtu, di ben de ete ini a oso fu MASRA, ini den kamra pe den gudu ben e tan, nanga di fu a kownu-oso. A langa den gi den knekti fu en dan a seni den go nanga den sani disi na Benhadad, a kownu fu Aram, di ben e libi na Damaskus. Benhadad ben de a manpikin fu Tabrimon nanga a granpikin fu Hesyon. Den knekti ben mus taigi Benhadad taki: ₁₉“Den p'pa fu wi ben meki wan ferbontu, meki wi meki wan tu. Luku, mi e seni wan kado gi yu: solfru nanga gowtu. Broko a ferbontu fu yu nanga Basa, a kownu fu Israel. Dati sa dwengi en fu a puru den srudati fu en ini mi kondre.” ₂₀Benhadad du san kownu Asa aksi en. A komanderi den edeman fu a legre fu en fu hari go na den foto fu Israel. Dan den teki den foto Iyon, Dan, Abel-Bet-Maaka, a heri kontren Kineret nanga a kontren fu Naftali, abra. ₂₁Fa Basa yere a nyunsu, na so a tapu a wroko di a ben e du na Rama fu meki a foto disi kon moro tranga dan a drai go baka na Tirsa. ₂₂Kownu Asa fu ensei, seni kari ala mansma fu Yuda, no wan ben mus tan na baka. A meki den puru ala den ston nanga ala den udu nanga san kownu Basa ben meki a foto Rama kon moro tranga, dan a meki den foto Geba ini Benyamin nanga Mispa kon moro tranga.

₂₃Den tra sani di psa ini a libi fu Asa, ala den feti di a wini, ala den sani di a du nanga den foto di a bow, skrifi poti ini a buku fu a historia fu den kownu fu Yuda. Di a kon owru, a kon siki na en futu. ₂₄Asa dede èn den beri en na den afo fu en ini a foto David. En manpikin Yosafat teki en presi leki kownu.

₂₅Di kownu Asa fu Yuda ben de tu yari na a makti, Nadab, a manpikin fu Yerobeam, tron kownu fu Israel. A tan tu yari na makti ini Israel. ₂₆Nadab ben e du san no bun ini MASRA ai. A ben teki a eksempre fu en p'pa èn a ben e du den srefi sondu di en p'pa ben meki Israel du. ₂₇Dan Basa, a manpikin fu Akia, fu a lo fu Isakar, meki mofo fu kiri Nadab. A naki Nadab kiri di Nadab nanga a legre fu Israel ben lontu a foto Gibeton fu den Filistijnsma. ₂₈Basa kiri Nadab, di kownu Asa ben de dri yari na makti, èn a tron kownu na Nadab presi. ₂₉Fa Basa tron kownu, na so a meki den kiri ala den famiri fu Yerobeam. No wan sma fu a famiri a meki tan na libi leki fa MASRA ben meki En knekti Akia fu Silo, taki. ₃₀Dati psa fu den sondu di Yerobeam ben du èn di a ben meki Israel du nanga fu di a ben wiki a atibron fu MASRA, a Gado fu Israel.

₃₁Den tra sani di psa ini a libi fu Nadab nanga ala den sani di a du, skrifi poti ini a buku fu a historia fu den kownu fu Israel. ₃₂Solanga di Asa ben de kownu fu Yuda èn Basa ben de kownu fu Israel, feti ben de fu den tu kownu disi.

₃₃Di kownu Asa fu Yuda ben de dri yari na makti, Basa, a manpikin fu Akia, tron kownu fu Israel. A ben e libi ini Tirsa èn a ben de tutenti-na-fo yari na makti. ₃₄A ben e du san no bun ini MASRA ai. A ben teki a eksempre fu Yerobeam èn a ben e du den srefi sondu di Yerobeam ben meki Israel e du.

₂₁Ma un arki: A sma di o seri Mi, de dya nanga Mi na tafra. ₂₂Bika a Manpikin fu Libisma sa dede leki fa a ben skrifi kba na fesi. Ma a man di seri En mus luku bun!” ₂₃Dan den bigin aksi makandra sortu wan fu den sa du sowan sani.

₂₄Den man di ben e teki leri fu Yesus bigin krutu nanga makandra sortu wan fu den moro prenspari. ₂₅Dan Yesus taigi den taki: “Den kownu fu den folku e basi den, èn den wan di abi makti, den sma e kari: sma di e du bun gi a folku. ₂₆Ma unu no mus de so. A moro prenspari sma na un mindri mus tyari ensrefi leki a moro pikinwan, èn a fesiman fu unu mus tyari ensrefi leki a sma di e dini trawan. ₂₇Suma moro prenspari? A sma di de na tafra, noso a sma di e poti a nyanyan tapu a tafra. Na a sma di de na tafra moro prenspari. Ma Mi de na un mindri leki a sma di e dini trawan.

₂₈Unu ben de ala ten nanga Mi di tesi ben miti Mi. ₂₉Dan soleki fa Mi P'pa gi Mi a leti fu rigeri, na so Mi e gi unu a srefi leti tu. ₃₀Unu o nyan èn dringi na Mi tafra te Mi sa rigeri leki Kownu, èn unu o sidon na tapu kownusturu fu tiri den twarfu lo fu Israel.”

₃₁Dan Yesus taki: “Simon, Simon, luku bun! Satan kisi primisi fu seki unu leki fa yu e wai graan, fu a kan tesi a bribi fu unu. ₃₂Ma Mi begi gi yu fu yu no lasi bribi. Dan te yu drai kon baka na Mi, yu mus kraka den trawan.” ₃₃Dan Petrus taigi Yesus taki: “Masra, mi de klar'klari fu go nanga Yu na ini straf'oso, èn fu dede srefi nanga Yu!” ₃₄Ma Yesus taki: “Petrus, Mi e taigi yu taki: Fosi kakafowru bari tide, yu o taki dri leisi taki yu no sabi Mi.”

₃₅Yesus aksi den taki: “Di Mi ben seni unu fu go panya a bun nyunsu, sondro fu un tyari moni, wan saka noso susu, un ben mankeri wan sani?” Den piki taki: “Nono, un no ben mankeri noti.” ₃₆Ne Yesus taki: “Ma now, a sma di abi moni mus tyari en, èn a mus tyari wan saka tu. A sma di no abi wan owru mus seri en dyakti fu bai wan. ₃₇Bika a skrifi taki: ‘Den si en leki wan abani,’ èn Mi kan taigi unu taki na dati o psa nanga Mi. Bika san skrifi fu Mi musu psa.” ₃₈Dan den man taigi En taki: “Masra, luku tu owru dyaso.” Yesus piki den taki: “A nofo!”

₃₉Yesus kmopo na ini Yerusalem, dan A go na a Oleifbergi, soleki fa A ben gwenti. Den man di ben e teki leri fu En go nanga En. ₄₀Di Yesus doro drape A taigi den taki: “Un begi fu un no kon na ini tesi.” ₄₁Dan Yesus kmopo na den mindri, go pikinso moro fara. A kindi na gron dan A begi taki: ₄₂“P'pa, efu Yu wani, puru a kan disi na Mi fesi, meki Mi no nyan a pina disi. Ma a no san Mi wani, ma na san Yu wani musu psa.” ₄₃Dan wan engel kmopo fu heimel kon na En fu gi En krakti. ₄₄Yesus ben frede te fu dede, dan A bigin begi moro tranga èn a sweti fu En ben dropu na gron leki brudu. ₄₅Di Yesus kba begi, A opo go na den man di ben e teki leri fu En, dan A si taki den fadon na sribi soso fa den ben sari. ₄₆A aksi den taki: “Sanede un e sribi? Un opo, dan un begi fu un no kon na ini tesi.”