Dag 124 van 365- 1 Koningen 16-18 en Lucas 22:47-71

₅Den tra sani di psa ini a libi fu Basa, den sani di a du nanga den feti di a wini, skrifi poti ini den buku fu a historia fu den kownu fu Israel. ₆Basa dede èn den beri en ini Tirsa. En manpikin Ela teki en presi leki kownu. ₇A boskopu di MASRA ben gi Yehu, a manpikin fu Hanani, ben de gi Basa nanga en heri famiri bika a ben du sani di no bun ini MASRA ai. A ben wiki a atibron fu MASRA, fu di a ben du den srefi sani leki a famiri fu Yerobeam. Boiti dati a ben kiri a heri famiri fu Yerobeam tu.

₈Kownu Asa fu Yuda ben de tutenti-na-siksi yari na makti, di Ela tron kownu fu Israel. Ela ben e libi na Tirsa èn a tan tu yari na makti. ₉Simri, wan knekti fu en ben meki mofo fu kiri en. Simri ben abi a frantwortu abra afu fu den fetiwagi fu kownu. Ela ben sidon e dringi wan leisi na a oso fu Arsa, a edeman fu den knekti fu kownu, te leki a ben drungu. ₁₀Dan Simri kon èn a naki Ela kiri. A sani dati psa di kownu Asa ben de tutenti-na-seibi yari na makti ini Yuda. Dan Simri teki a presi fu Ela leki kownu. ₁₁Fa Simri tron kownu èn a ben abi a makti ini anu, na so a kiri a heri famiri fu Basa. No wan mansma fu a famiri no tan na libi. A kiri ala famiri nanga mati. ₁₂Na so Simri kiri ala den famiri fu Basa, leki fa MASRA ben meki a profeiti Yehu taigi Basa, ₁₃bika Basa nanga en boi Ela ben sondu èn den ben meki den sma fu Israel sondu tu. Tapu a fasi dati den ben wiki a atibron fu MASRA, a Gado fu Israel, nanga den kruktu gado fu den di no abi no wan warti.

₁₄Den tra sani di psa ini a libi fu Ela nanga den sani di a du, skrifi poti ini a buku fu a historia fu den kownu fu Israel.

₁₅Di kownu Asa fu Yuda ben de tutenti-na-seibi yari na makti, Simri tron kownu fu Israel. A ben e libi na Tirsa èn a tan seibi dei nomo na makti. A ten dati a legre fu Israel ben e suku fu teki a foto Gibeton fu den Filistijnsma abra. ₁₆Di den srudati yere tak' Simri meki mofo fu kiri kownu èn taki a naki a kownu kiri trutru tu, den agri leki wan man ini a kampu fu poti Omri, a edeman fu a legre leki kownu fu Israel. ₁₇Dan Omri nanga a legre fu en kmoto na Gibeton fu go lontu a foto Tirsa. ₁₈Di Simri si tak' den ben o teki a foto abra, a go tapu ensrefi ini a tranga kibripresi fu a kownu-oso, dan a sutu faya gi a heri kownu-oso. Na so ensrefi kon dede. ₁₉A dede fu den sondu di a ben du. A ben e du sani di no bun ini MASRA ai èn a ben du den srefi san di Yerobeam ben du èn di a ben meki Israel du tu.

₂₀Den tra sani di psa ini a libi fu Simri nanga a mofo di a ben meki fu kiri kownu, skrifi poti ini a buku fu a historia fu den kownu fu Israel.

₂₁Baka a dede fu Simri, prati kon mindri a pipel fu Israel. Afu fu den ben wani poti Tibni, a manpikin fu Ginat, leki kownu, a tra afu ben tnapu baka Omri. ₂₂Ma den sma di ben e waka baka Omri kon wini a strei fu den sma di ben e waka baka Tibni. Tibni dede èn Omri tron kownu.

₂₃Kownu Asa fu Yuda ben de dritenti-na-wan yari na makti, di Omri tron kownu fu Israel. Omri tan twarfu yari na makti. A tan siksi yari ini Tirsa. ₂₄Dan a bai wan pikin bergi gi sowan seibitenti kilo solfru fu Semer. A bow wan foto tapu a bergi dan a kari a foto Samaria, fu memre a nen fu Semer, a man di ben abi a bergi.

₂₅Omri ben e du sani di no bun ini MASRA ai. A ben e du moro ogri leki den wan di waka na en fesi. ₂₆A ben e du ala den sani di Yerobeam, a manpikin fu Nebat, du. A ben e tan du den sondu di Yerobeam ben meki Israel e du. A ben wiki a atibron fu MASRA, a Gado fu Israel, nanga den kruktu gado fu en di no abi no wan warti.

₂₇Den tra sani di psa ini a libi fu Omri, den sani di a du nanga den feti di a wini, skrifi poti ini a buku fu a historia fu den kownu fu Israel. ₂₈Omri dede èn den beri en ini Samaria. En manpikin Akab teki en presi leki kownu.

₂₉Kownu Asa fu Yuda ben de dritenti-na-aiti yari na makti, di Akab tron kownu fu Israel. Akab ben e libi ini Samaria èn a tan tutenti-na-tu yari na makti. ₃₀Akab, a manpikin fu Omri, ben e du sani di no bun ini MASRA ai. A ben du moro ogri moro ala den trawan di waka na en fesi. ₃₁A ben e du den srefi sondu di Yerobeam, a manpikin fu Nebat, ben du. Ma efu dati no ben sari ete, a teki Isebel, a umapikin fu Etbaal, a kownu fu Sidon, leki en uma. Dan a bigin anbegi Baal tu. ₃₂A meki den bow wan tempel gi Baal na ini Samaria, èn a meki wan altari poti gi en ini a tempel. ₃₃A meki den poti wan postu tu gi wan kruktu gado. Akab ben tan du den sani disi, taki a ben e wiki a atibron fu MASRA, a Gado fu Israel, moro leki ala den tra kownu di waka na en fesi.

₃₄Ini a ten di Akab ben de na makti, Hiyel fu Betel, bow Yeriko baka. Di Hiyel e seti den fundamenti fu a foto, en fosi manpikin Abiram dede. Di a e poti den bigi doro fu a foto, Segub, a moro yongu manpikin fu en, dede. Disi psa leki fa MASRA ben meki Yosua, a manpikin fu Nun, taki na fesi kba.

₁Dan Elia fu Tisbe ini Gilead, taigi Akab taki: “Mi e sweri na a libilibi MASRA, a Gado fu Israel, di mi e dini, tak' den yari di e kon, dow noso alen no o fadon, te leki mi komanderi den fu fadon baka.”

₂Dan MASRA taigi Elia taki: ₃“Kmoto dyaso, go na oostsei go kibri na a Keritkriki, di e fadon ini Yordanliba. ₄Yu kan dringi fu a kriki èn Mi komanderi den fowru fu tyari nyanyan kon gi yu drape.” ₅Dan Elia du san MASRA taigi en. A go kibri na a Keritkriki di e fadon ini Yordanliba. ₆Mamanten, nanga neti, den fowru ben e tyari brede nanga meti gi en. Watra a ben e dringi fu a kriki.

₇Ma baka wan pisten a kriki kon drei fu di alen no ben e fadon ini a kondre. ₈Dan MASRA taigi Elia taki: ₉“Go na Sarefat, krosbei fu Sidon, dan yu e tan wan pisten drape. Mi komanderi wan uma drape, di masra dede kba, fu sorgu gi yu.” ₁₀So Elia go na Sarefat. Di a doro na den bigi doro fu a foto, a si wan uma e piki drei udu. Ne a kari a uma, dan a begi en taki: “Yu kan go teki pikinso watra gi mi fu mi dringi, bika watra e kiri mi.” ₁₁Di a uma ben e go teki a watra, Elia bari aksi en taki: “Mi e begi yu, tyari wan pisi brede kon gi mi tu.” ₁₂Ma a uma piki en taki: “Mi e sweri na a libilibi MASRA, a Gado fu yu, tak' mi no abi not'noti moro na oso, dan pikinso blon ini a patu nanga pikinso oleif-oli ini a kroiki. Na udu mi ben e piki dyaso fu go bori wan sani gi mi nanga mi boi. Baka te wi nyan en, wi o dede fu angri.” ₁₃Ne Elia piki en taki: “No broko yu ede, go na oso go du san yu bo du. Ma baka wan brede fosi gi mi nanga a pikinso oli nanga blon, dan yu e tyari en kon gi mi. Baka dati yu kan go meki wan sani gi yu nanga yu boi. ₁₄Bika MASRA, a Gado fu Israel, e taki disi: ‘A blon no sa kba ini a patu, èn a oli no o kba ini a kroiki, te leki MASRA meki a alen fadon baka.’ ” ₁₅A uma gwe go du san Elia taigi en. Aladei nyanyan ben de, gi Elia, gi a uma, nanga gi en famiri. ₁₆Bika a blon no ben e kba ini a patu èn a oli no ben e kba ini a kroiki, neleki fa MASRA ben meki Elia taki.

₁₇Ma baka wan pisten, a boi fu a uma, di ben teki Elia ini en oso, kon siki. A boi siki so hebi taki a kon dede. ₁₈Ne a uma taigi Elia taki: “Man fu Gado, san mi du yu? Yu kon dyaso fu meki Gado memre mi sondu èn kiri a boi fu mi?” ₁₉Elia piki en taki: “Langa a boi gi mi.” Elia teki a boi na a frow anu, a tyari en go na tap'sei na a kamra pe a ben e tan dan a poti a boi tapu a bedi. ₂₀Dan Elia begi MASRA trangatranga taki: “MASRA, mi Gado, fu sanede Yu meki so wan sani miti a uma, now di mi de dyaso na en? fu sanede Yu meki a boi dede?” ₂₁Elia go didon dri leisi tapu a boi èn a kari MASRA, taki: “MASRA, mi Gado, meki a libibro drai kon baka ini a boi disi.” ₂₂Dan MASRA du san Elia aksi en. A libibro drai kon baka ini a boi èn a boi kon na libi baka. ₂₃Elia opo dan a tyari a boi go na gron. A langa a pikin gi a m'ma dan a taigi en taki: “Luku, a boi fu yu de na libi.” ₂₄Ne a uma piki en taki: “Now mi sabi trutru tak' na Gado seni yu, èn taki sma kan bow na tapu san MASRA e meki yu taki.”

₁Baka wan pisten, di alen no ben fadon dri yari kba, MASRA taigi Elia taki: “Go na Akab, bika Mi wani meki alen fadon baka.” ₂So Elia go na Akab. A pisten dati a angriten ben de so hebi ini Samaria, ₃taki Akab ben seni kari Obadya, a edeman fu den knekti fu kownu. Obadya ben abi dipi lespeki gi MASRA. ₄Di Isebel ben e kiri den profeiti fu MASRA, Obadya ben tyari wan hondro fu den go kibri ini den bergi-olo. A meki tu grupu fu feifitenti, dan a ben e gi den nyanyan nanga dringi. ₅Na a Obadya disi, Akab taigi taki: “Psa na ala den watrabron, nanga ala den kriki fu a kondre. Kande wi kan feni grasi fu hori den asi nanga den buriki na libi. Noso wi o abi fu kiri wantu fu den.” ₆Ibriwan fu den teki wan pisi fu a kondre fu go suku. Akab teki go na a wan sei, Obadya go na a tra sei.

₇Ma di Obadya ben de ondro pasi a miti nanga Elia. Di a si tak' na Elia, a trowe ensrefi na gron èn a taki: “Na yu trutru, mi masra Elia.” Elia piki en taki: “Iya, na mi. ₈Go taigi yu kownu taki: ‘Elia de dyaso.’ ” ₉Ma Obadya aksi en taki: “San mi du yu taki yu e gi mi abra na Akab fu a kiri mi? ₁₀Mi e sweri gi yu na a libilibi MASRA, a Gado fu yu, dati no wan folku noso kondre no de pe kownu no seni suku yu. Efu den ben taki tak' yu no drape, kownu ben e meki a folku noso a kondre dati sweri taki den no ben man feni yu. ₁₁Dan fa yu kan taigi mi fu go taigi kownu taki Elia de dyaso? ₁₂Te mi e go fu go taigi en, a kan taki wan yeye fu MASRA teki yu tyari go na wan presi di mi no sabi. Dan te Akab kon èn a no feni yu, a o kiri mi di e lespeki MASRA sensi di mi yongu. ₁₃Yu no yere san mi du di Isebel ben e kiri den profeiti fu MASRA? Mi teki wan hondro profeiti, tu grupu fu feifitenti, tyari go kibri ini bergi-olo, èn mi sorgu gi nyanyan nanga dringi gi den. ₁₄Dan fa yu kan seni mi fu go taigi kownu taki Elia de dyaso? Na kiri a o kiri mi.” ₁₅Ma Elia piki en taki: “Mi e sweri gi yu na MASRA fu ala sani, di mi e dini, tide ete mi nanga Akab o miti.”

₁₆Dan Obadya go suku Akab èn a gi en a boskopu. Ne Akab go na Elia. ₁₇Fa Akab si Elia na so a taigi en taki: “Na yu Elia, yu di meki a ongoloku disi miti Israel.” ₁₈Ma Elia piki en taki: “A no mi, ma na yu nanga den famiri fu yu p'pa meki a ongoloku disi miti Israel. Bika un poti den gebod fu MASRA na wan sei èn go dini Baal. ₁₉Meki heri Israel kon na mi tapu a Karmelbergi, makandra nanga den fo hondro feifitenti profeiti fu Baal, nanga den fo hondro profeiti fu Asyera, gi san Isebel e sorgu.”

₂₀Dan Akab seni a boskopu gi ala sma ini Israel nanga gi den profeiti fu kon na wan na a bergi Karmel. ₂₁Elia waka go na a pipel di ben kon makandra drape dan a aksi den taki: “Olanga a o tan fosi un teki wan besroiti? Efu na MASRA na a tru Gado, dan un waka na MASRA baka. Ma efu na Baal, dan un waka na Baal baka.” Den sma no piki noti. ₂₂Elia taigi den moro fara taki: “Na mi wawan tan ete fu den profeiti fu MASRA, ma Baal abi fo hondro feifitenti profeiti. ₂₃Un tyari tu yongu bulu kon. Meki den teki sortu wan den wani. Meki den koti en pis'pisi poti tapu udu. Ma den no mus leti faya gi a udu. Mi o du a srefi sani nanga a tra bulu ma mi no o poti faya gi a udu tu. ₂₄Te den du dati, den mus begi a gado fu den èn mi o begi MASRA. A gado di piki nanga faya na a tru Gado.” Ala den sma ben agri nanga dati.

₂₅Dan Elia taigi den profeiti fu Baal taki: “Un fosi teki sortu wan fu den bulu un wani dan un seti en poti, bika un de nanga furu sma. Un begi a gado fu unu, ma un no mus leti faya gi en.” ₂₆Den profeiti fu Baal teki wan fu den tu bulu, den seti en poti dan den begi Baal fu mamanten te leki bakadina. Den ben e taki: “Baal, piki wi.” Ma noti no ben de fu yere èn no wan sma ben e piki den awinsi fa den ben e dyompo lontu a altari di den ben meki. ₂₇Brekten yuru, Elia bigin meki spotu nanga den. A taigi den taki: “Un begi moro tranga, bika en na wan gado. Kande a e prakseri wan sani, kande a wan de en wawan gi wan pisten noso kande a go na waka. Kande un mus wiki en fu di a e sribi.” ₂₈Dan den man bigin begi bun tranga èn soleki fa den ben gwenti, den bigin koti densrefi nanga nefi nanga lansri te leki brudu bigin lon na den skin. ₂₉Te fu kba, den no ben sabi noti moro fu densrefi, te leki dri yuru bakadina. Ma noti no ben de fu yere, no wan sma ben e piki den, noti no ben sori taki wan sma e arki den.

₃₀Ne Elia taigi ala den sma di ben drape taki: “Un kon krosbei.” Di den sma kon moro krosbei, Elia bigin meki a altari fu MASRA baka di ben broko fadon. ₃₁A teki twarfu ston, wan gi iniwan fu den lo, den bakapikin fu den manpikin fu Yakob, a man di MASRA ben taigi taki: “Yu sa nen Israel.” ₃₂Nanga den twarfu ston dati, a bow wan altari gi MASRA. Dan a diki wan gotro fu fotenti meter lontu a altari. ₃₃Baka dati, a seti a udu poti tapu a altari, a koti a bulu pis'pisi èn a poti den pisi tapu a udu. ₃₄Dan a komanderi den sma taki: “Un span fo kroiki nanga watra, dan un kanti en tapu a ofrandi nanga a udu.” Di den du en a taigi den fu a di fu tu leisi taki: “Du en ete wan leisi.” Baka dati a taigi den fu du en fu a di fu dri leisi. ₃₅A watra ben e lon fu a altari taki a ben furu a gotro srefi nanga watra. ₃₆Dan tapu a yuru pe sma e tyari a ofrandi fu neti, profeiti Elia waka pikinso go na fesi dan a begi taki: “MASRA, Gado fu Abraham, Isaak nanga Yakob, sori tide taki Yu wawan na Gado ini Israel, èn taki mi na a knekti fu Yu di Yu komanderi fu du ala den sani disi. ₃₇Piki, MASRA, piki! Meki a pipel disi si taki Yu na a tru Gado èn taki na Yu e drai den ati kon baka na Yu.” ₃₈Ne a faya fu MASRA sutu kon na gron. A bron a ofrandi, a udu, den ston nanga a santi. Srefi a watra ini a gotro drei gwe. ₃₉Di a pipel si san psa, den trowe densrefi na gron èn den bari taki: “MASRA wawan na Gado, MASRA wawan na Gado.”

₄₀Dan Elia komanderi a pipel taki: “Un grabu den profeiti fu Baal, no wan no mus lowe.” Di den grabu den, Elia meki a pipel tyari den profeiti go kiri na a Kisonkriki.

₄₁Baka dati, Elia taigi Akab taki: “Go nyan èn go dringi bika mi e yere fa wan tranga alen e kon kba.” ₄₂Dan Akab gwe fu go nyan nanga dringi. Ma Elia kren go moro hei tapu a Karmelbergi. Drape a boigi nanga en ede mindri en kindi. ₄₃Dan a komanderi a knekti fu en fu kren go moro na loktu èn fu luku go na se. A knekti kren go, a luku dan a taigi Elia taki: “Noti no de fu si.” Ma Elia seni en seibi leisi go baka. ₄₄A di fu seibi leisi, a knekti taigi en taki: “Mi e si wan pikin wolku e opo fu a se, a pikin leki wan libisma anu.” Elia piki en taki: “Go taigi Akab fu a seti en fetiwagi dan a saka kmoto fu a bergi fosi a bigi alen tapu en.” ₄₅A no teki langa di dungru wolku ben de fu si na loktu, winti bigin wai èn hebi alen bigin fadon. Akab kren ini en wagi dan a go na Yisreel. ₄₆Ma MASRA gi Elia spesrutu krakti. A hari en krosi go na loktu dan a lon go te pe a bigi pasi fu Yisreel e bigin fosi a wagi fu Akab ben doro drape.

₄₇Yesus no ben kba taki ete, di wan bigi grupu sma doro. Yudas, wan fu den twarfu man di ben e teki leri fu Yesus, ben e waka na den fesi. A waka kon na Yesus fu gi En wan bosi. ₄₈Ma Yesus aksi en taki: “Yudas, nanga wan bosi yu e seri a Manpikin fu Libisma?” ₄₉Di den man di ben de nanga Yesus si san ben o psa, den taki: “Masra, un mus teki un owru feti nanga den?” ₅₀Dan wan fu den kapu a let'sei yesi puru fu a knekti fu a granpriester. ₅₁Ma Yesus taki: “A nofo!” A fasi a yesi fu a man, dan a man kon betre. ₅₂Yesus taigi den prenspari priester, den edeman fu den man di e hori wakti gi a tempel, nanga den fesiman fu a folku di kon fu grabu En taki: “Un kon nanga tiki nanga owru, neleki un kon teki wan bigi ogriman. ₅₃Ala dei Mi ben de nanga unu ini a tempel, ma un no grabu Mi. Ma disi na a yuru fu unu, pe a makti fu dungru e rigeri.”

₅₄Dan den grabu Yesus, tyari En go na a oso fu a granpriester. Petrus ben e waka fara na den baka e kon. ₅₅Dan den man meki wan faya mindrisei fu a dyari, den go sidon nanga makandra èn Petrus go sidon na den mindri. ₅₆Dan wan uma di ben wroko drape, si Petrus sidon sei a faya. A luku Petrus bun, dan a taki: “A man disi ben de nanga Yesus tu.” ₅₇Ma Petrus lei taki: “Uma, mi no sabi En!” ₅₈Wan syatu pisten baka dati, wan tra sma si Petrus, dan a taki: “Yu na wan fu den man di ben e teki leri fu En tu.” Ma Petrus taki: “No, a no mi!” ₅₉Baka wan yuru so, wan tra man ben hori nomonomo e taki: “A tru. A man disi ben de nanga En tu, bika en na fu Galilea.” ₆₀Ma Petrus piki taki: “No, mi no sabi san yu e taki!” A srefi momenti di Petrus ben e taki, wan kakafowru bari. ₆₁Dan Masra drai luku Petrus. Ne Petrus memre taki Masra ben taigi en taki: “Fosi kakafowru bari tide, yu o taki dri leisi taki yu no sabi Mi.” ₆₂Dan Petrus go na dorosei, dan a bari wan krei.

₆₃Den man di ben hori wakti gi Yesus, teki En leki spot'popki, èn den naki En. ₆₄Den tapu En ai nanga wan krosi, dan den taigi En taki: “Sori unu tak' Yu na wan profeiti. Taigi unu suma naki Yu.” ₆₅Dan den taki wan lo tra sani fu afrontu Yesus.

₆₆Di dei opo, a grankrutu fu den Dyusma kon makandra, sobun den prenspari priester nanga den sabiman fu Gado wèt. Den tyari Yesus go na fesi den man disi, ₆₇dan den taigi En taki: “Efu Yu na a Mesias, taigi un dan!” A piki den taki: “Awinsi Mi taigi unu, un no o bribi. ₆₈Èn awinsi Mi aksi un wan sani, un no o piki. ₆₉Ma bigin fu now, a Manpikin fu Libisma o sidon na a let'anu sei fu Gado di abi Makti.” ₇₀Dan den man aksi En taki: “Na Yu na a Manpikin fu Gado dan?” Yesus piki taki: “Na unu srefi e taki tak' Mi na En.” ₇₁Dan den man taki: “Un no abi kotoigi fanowdu moro. Un srefi yere san A taki nanga En eigi mofo!”