Dag 134 van 365- 2 Koningen 19 - 21 en Johannes 4:1-30

₈Dan a ofisiri drai go na a kownu fu Asur, bika a ben kisi fu yere taki a kownu ben broko en kampu na Lakis dan a hari go feti na a foto Libna. ₉Ma di kownu Sanherib kisi a boskopu taki kownu Tirhaka fu Etiopia e hari kon feti nanga en, a seni boskopuman fu en go na Hiskia nanga a boskopu disi: ₁₀“Na disi un mus taigi Hiskia, a kownu fu Yuda: ‘No meki a Gado fu yu, tapu san yu e fertrow, bedrigi yu fu taigi yu taki Yerusalem no o kon ini anu fu a kownu fu Asur. ₁₁Arki, yusrefi yere san den kownu fu Asur du nanga den kondre di den teki abra. Den broko den pis'pisi te na gron. No wan sma o man ferlusu yu. ₁₂Di den afo fu mi broko den foto Gosan, Haran, nanga Resef, èn di den figi den Edomitisma ini Telasar puru na pasi, den gado fu den no ben man yepi den. ₁₃Pe a kownu fu Hamat de, a di fu Arpad, a di fu Sefarwain, nanga den di fu Hena nanga Iwa?’ ”

₁₄Hiskia teki a brifi na den boskopuman dan a leisi en. Baka dati a go na a oso fu MASRA dan a bradi a brifi opo fesi MASRA. ₁₅Dan a begi taki: “MASRA, Gado fu Israel, Yu di e sidon tapu den kerub, Yu, Yu wawan na Gado fu ala den kondre na grontapu. Na Yu ben meki heimel nanga grontapu. ₁₆Kaka Yu yesi MASRA èn arki, opo Yu ai MASRA èn luku. Arki a boskopu di Sanherib seni kon fu afrontu Yu, a libi Gado. ₁₇A tru MASRA, den kownu fu Asur wai ala den folku dati puru na pasi èn broko den kondre fu den. ₁₈Den bron den gado fu den ini faya, bika den no ben de gado, ma sani fu udu nanga ston di libisma ben meki nanga den anu. Na dat' meki den kownu ben kan bron den. ₁₉Ma MASRA, Gado fu unu, ferlusu wi fu a makti fu en. Dan ala kondre na grontapu o sabi taki Yu, MASRA, Yu wawan de Gado.”

₂₀Dan Yesaya, a manpikin fu Amos, seni a boskopu disi gi Hiskia: “Na disi MASRA, a Gado fu Israel, e taki: Mi yere a begi fu yu fu Mi yepi yu nanga Sanherib, a kownu fu Asur. ₂₁Disi na san MASRA abi fu taigi Sanherib:

₃₅A srefi neti dati wan engel fu MASRA hari gwe, èn a kiri wan hondro dusun aititenti-na-feifi srudati fu a legre fu Asur. Di den opo mamanten soso dedeskin ben didon drape. ₃₆Dan so kownu Sanherib fu Asur broko en kampu èn drai gwe baka na en tanpresi na Nineve. ₃₇Wan leisi di a go boigi ini a tempel gi en gado Nisrok, tu fu den manpikin fu en, Adramelek nanga Sareser, kiri en drape nanga den deigri. Dan den lowe go na a kondre Ararat. En manpikin Esarhadon teki en presi leki kownu.

₁A ten dati Hiskia kon siki te fu dede. Dan a profeiti Yesaya, a manpikin fu Amos, go taigi en taki: “Na disi MASRA e taki: Seti ala sani, bika yu o dede, yu no o kon betre moro.” ₂Hiskia drai en fesi go na a seiplanga, dan a begi MASRA taki: ₃“Tye MASRA, mi e begi Yu, memre fa mi libi na Yu fesi leki wan sma di de fu fertrow, fa mi du Yu wani nanga mi heri ati èn du san bun ini Yu ai.” Dan Hiskia bari krei. ₄Yesaya ben de tapu a mindri pren ete, di MASRA taigi en taki: ₅“Drai go baka, dan yu taigi a tiriman fu Mi pipel taki: Na disi MASRA, a Gado fu yu afo David taki: Mi yere yu begi èn Mi si yu watra-ai. Luku, Mi o meki yu kon betre. Baka dri dei yu o man go baka na a oso fu MASRA. ₆Mi o meki yu libi tin-na-feifi yari ete. Mi o ferlusu yu nanga a foto disi fu a makti fu a kownu fu Asur èn Mi o kibri a foto disi fu Mi ede èn fu Mi knekti David ede.” ₇Dan Yesaya taki: “Un teki wantu drei figa kon.” Den tyari den figa kon dan den poti den tapu a soro. Di den du dati, kownu kon betre. ₈Hiskia ben aksi Yesaya taki: “Sortu marki mi o kisi fu kan sabi tak' MASRA o dresi mi, èn tak' baka dri dei mi o man go baka na a oso fu MASRA?” ₉Yesaya piki en taki: “Disi sa de a marki di MASRA o gi yu, fu yu kan si taki MASRA o du san A taki: San yu wani taki musu psa nanga a schaduw tapu a trapu? A mus go tin tree na loktu noso tin tree na gron?” ₁₀Hiskia piki taki: “A makriki gi a schaduw fu go tin tree na loktu. Nono, meki a go tin tree na gron.” ₁₁Dan a profeiti Yesaya begi MASRA, èn MASRA meki a schaduw go tin tree na gron tapu a trapu di ben meki gi Akas.

₁₂A srefi ten dati, Berodak-Baladan, a kownu fu Babel, di ben de a manpikin fu Baladan, seni boskopuman nanga wan brifi nanga wan kado gi Hiskia fu di a ben yere tak' Hiskia ben siki. ₁₃Di Hiskia arki san den man ben abi fu taki, a sori den ala den kamra pe den gudu fu en ben e tan: a solfru nanga a gowtu, den spesrei, den spesrutu oli, ala den fetisani fu en, nanga ala den tra sani di ben de ini den maksin fu en. Noti ben de ini a kownu-oso nanga ini a heri kondre di Hiskia ben tiri, di a no sori den. ₁₄Dan a profeiti Yesaya go na Hiskia, èn a aksi en taki: “San den man disi taki èn pe den kmopo?” Hiskia piki en taki: “Den kmopo fu Babel, wan bun fara kondre.” ₁₅Dan Yesaya aksi en moro fara: “San den si ini a kownu-oso fu yu?” Hiskia piki: “Den si ala sani di de ini a kownu-oso. Ala san de ini den maksin fu mi, mi sori den.” ₁₆Ne Yesaya piki Hiskia taki: “Arki san MASRA e taki: ₁₇Yere, a ten e kon pe ala san de ini a kownu-oso fu yu èn ala den sani di den afo fu yu tyari kon na wan te tide, o go na Babel. Not'noti o tan na baka. Na so MASRA taki. ₁₈Den o tyari sowan fu den eigi bakapikin fu yu gwe tu, fu go wroko leki knekti na a kownu-oso fu a kownu fu Babel.” ₁₉Ne Hiskia piki Yesaya taki: “A wortu bun di MASRA meki yu taki.” Ma a prakseri ini ensrefi taki: “A no abi trobi, ma freide o de solanga mi de na libi.”

₂₀Den tra sani di psa ini a libi fu Hiskia, den feti di a wini, a watrapeti di a diki èn fa a seti den kokro fu meki a watra kon ini a foto, skrifi poti ini a buku fu a historia fu den kownu fu Yuda. ₂₁Hiskia dede, èn en manpikin Manase teki en presi leki kownu.

₁Manase ben abi twarfu yari di a tron kownu. A tan feifitenti-na-feifi yari na makti ini Yerusalem. En m'ma ben nen Hefsiba. ₂Manase ben e du san no bun ini MASRA ai. A ben e du den groskin sani fu den folku di MASRA ben yagi puru fu a kondre gi den Israelitisma. ₃A meki den presi baka pe sma ben e tyari ofrandi, den presi di en p'pa Hiskia ben broko puru. A meki altari gi Baal èn a poti postu tnapu gi kruktu gado soleki fa kownu Akab fu Israel ben du. A ben e boigi tu gi a son, a mun nanga den stari èn a ben e dini den. ₄A meki altari gi kruktu gado ini a oso fu MASRA, aladi MASRA ben taki: “Yerusalem na a foto di Mi teki leki a presi pe sma kan anbegi Mi.” ₅A meki altari tu gi a son, a mun nanga den stari tapu den tu pren fu a oso fu MASRA. ₆Iya, a bron en eigi manpikin leki ofrandi, a ben e du tofruwroko, a ben e koti luku fu sabi sani èn a ben poti sma di ben man aksi yeye fu dedesma noso tra yeye rai. A du furu sani di no bun ini MASRA ai, èn a afrontu MASRA nanga den sani dati. ₇A meki wan popki fu Asyera tu poti ini a oso, aladi MASRA ben taigi David nanga en manpikin Salomo taki: “Na ini a oso disi, dyaso na Yerusalem a foto di Mi teki na mindri ala den lo fu Israel, sma kan anbegi Mi fu têgo. ₈Efu den Israelitisma du fin'fini ala san Mi komanderi den, èn hori a heri wèt di Mi meki Mi knekti Moses gi den, Mi no sa gi no wan sma pasi moro fu puru den fu a kondre disi di Mi ben gi den afo fu den.” ₉Ma den no ben wani arki bika Manase ben e kori den fu den du moro ogri leki den folku di MASRA ben puru na pasi gi den Israelitisma. ₁₀Na dat' meki MASRA ben meki den knekti fu En, den profeiti, taki disi: ₁₁“Nanga den groskin sani di kownu Manase fu Yuda du, a du moro ogri leki ala den sani di den Amoritisma du di ben libi fosi den Israelitisma ini a kondre. A meki den sma fu Yuda sondu tu nanga den popki fu den kruktu gado fu en. ₁₂Fu den sani disi ede, meki MASRA, a Gado fu Israel, e taki disi: Luku, Mi o tyari bigi ongoloku kon abra Yerusalem nanga Yuda, tak' no wan sma di yere san psa, o wani bribi. ₁₃Den srefi sani di Mi teki fu krutu Samaria, Mi o teki fu krutu Yerusalem, èn a srefi strafu di Mi gi den famiri fu Akab, Mi o gi den. Mi o figi den sma fu Yerusalem puru na pasi leki te wan sma e figi wan preti puru a doti, dan a drai en tapu. ₁₄Mi o puru den wan di tan abra fu Mi eigi pipel, na Mi tapu, èn Mi o gi den abra ini a makti fu den feyanti, fu den feyanti fufuru den sani fu den èn teki ala san den abi tyari gwe. ₁₅Bika sensi a dei di den afo fu den kmoto fu Egipte, te tide, den e du soso sani san no bun ini Mi ai èn den sani dati wiki a atibron fu Mi.”

₁₆Boiti a sondu di Manase ben meki den sma fu Yuda du, fu du san no bun ini MASRA ai, Manase meki someni brudu lon fu soso tu taki a ben e lon fu a wan sei fu Yerusalem go na a tra sei. ₁₇Den tra sani di psa ini a libi fu Manase, ala den sani di a du nanga den sondu fu en, skrifi poti ini a buku fu a historia fu den kownu fu Yuda. ₁₈Manase dede èn den beri en tapu a dyari fu a kownu-oso fu en, a dyari fu Usa. En manpikin Amon teki en presi leki kownu.

₁₉Amon ben abi tutenti-na-tu yari di a tron kownu, èn a tan tu yari na makti ini Yerusalem. En m'ma ben nen Mesulemet, wan umapikin fu Harus, èn a ben de fu Yotba. ₂₀Amon ben e du san no bun ini MASRA ai, neleki en p'pa Manase. ₂₁A du den srefi sondu di en p'pa ben du. A ben e dini den kruktu gado di en p'pa ben e dini èn a ben e boigi gi den. ₂₂A drai en baka gi MASRA, a Gado fu den afo fu en, èn a no ben e libi leki fa MASRA wani. ₂₃Den knekti fu Amon meki mofo fu kiri en, èn den kiri en ini en kownu-oso. ₂₄Ma den sma fu a kondre, kiri ala den sma di ben meki mofo fu kiri kownu. Dan den poti en manpikin Yosia leki kownu ini en presi. ₂₅Den tra sani di psa ini a libi fu Amon nanga den sani di a du, skrifi poti ini a buku fu a historia fu den kownu fu Yuda. ₂₆Den beri en ini a grebi fu en tapu a dyari fu Usa. En manpikin Yosia teki en presi leki kownu.

₁Den Fariseiman ben kisi fu yere taki moro furu sma e waka baka Yesus, èn taki A e dopu moro furu sma leki Yohanes. ₂Ma a no Yesus srefi ben e dopu den sma, ma na den man di ben e teki leri fu En. ₃Di A yere dati, A kmoto fu Yudea dan A drai go baka na Galilea. ₄Ma A ben musu psa ini Samaria. ₅Dan A doro na wan foto fu Samaria di den ben e kari Sikar. A ben de krosbei fu a pisi gron san Yakob ben gi en manpikin Yosef. ₆Drape a peti fu Yakob ben de. Yesus ben weri fu a langa waka san A waka, so A saka sidon na a peti. A ben de twarfu yuru ten so. _7-8A pisten di den man di ben e teki leri fu Yesus ben go ini a foto fu bai nyanyan, wan Samaria-uma kon na a peti fu teki watra. Dan Yesus taigi en taki: “Gi mi pikinso watra fu dringi.” ₉A Samaria-uma piki En taki: “Fa Yu leki wan Dyusma kan aksi mi leki wan Samaria-uma fu gi Yu pikin watra fu dringi?” Bika Dyusma no e bemui srefsrefi nanga Samariasma. ₁₀Ma Yesus piki en taki: “Efu yu ben sabi san Gado abi fu gi yu, èn efu yu ben sabi suma e aksi yu pikin watra fu dringi, dan na yu ben o aksi En watra èn A ben o gi yu watra san e gi libi.” ₁₁A uma piki En taki: “Masra, a peti dipi èn Yu no abi embre. Dan pe Yu o feni a watra san e gi libi? ₁₂Yu denki taki Yu bigi moro wi afo Yakob? Na en libi a peti disi na baka gi wi. A ben dringi fu en, èn den boi nanga den meti fu en ben dringi fu a peti disi tu.” ₁₃Yesus piki en taki: “Ala sma di e dringi fu a watra disi, sa kisi dreineki baka. ₁₄Ma a sma di e dringi fu a watra san Mi o gi en, no o kisi dreineki noiti moro. Bika a watra dati o tron wan peti ini a sma, di e tan gi watra san o gi en a libi fu têgo.” ₁₅Dan a uma taigi En taki: “Masra, gi mi a watra dati fu watra no kiri mi moro. Dan mi no abi fu kon dya moro fu teki watra.” ₁₆Yesus taigi en taki: “Go kari yu masra kon.” ₁₇A uma piki taki: “Mi no abi masra.” Yesus piki en taki: “Yu abi leti di yu taki tak' yu no abi masra. ₁₈Bika na feifi man yu ben abi kba, èn a man di yu abi now, a no yu masra tu. So na wan tru sani yu taki.” ₁₉Dan a uma taki: “Masra, mi e si taki yu na wan profeiti. ₂₀Den afo fu wi ben e anbegi Gado na tapu a bergi disi. Ma un Dyusma e taki tak' na Yerusalem na a presi pe sma mus anbegi Gado.” ₂₁Dan Yesus piki en taki: “Uma, yu kan bribi Mi: A ten e kon taki sma no o anbegi a P'pa tapu a bergi disi. Den no o anbegi En ini Yerusalem tu. ₂₂Un Samariasma no sabi san un e anbegi, ma wi sabi san wi e anbegi. Bika a Ferlusuman e kmopo fu den Dyusma. ₂₃Ma a ten e kon, èn a de kba, pe den sma di e anbegi a P'pa trutru sa anbegi En nanga den yeye èn tapu wan tru fasi. Bika Gado wani sma di sa anbegi En tapu a fasi disi. ₂₄Gado na yeye, èn den sma di e anbegi En mus anbegi En nanga den yeye èn tapu wan tru fasi.” ₂₅Dan a uma taki: “Mi sabi taki a Mesias o kon, a wan di den e kari Kristus. Te A kon, A sa leri un ala sani.” ₂₆Ne Yesus piki en taki: “Na Mi di e taki nanga yu, na a man dati.”

₂₇A srefi pisten dati den man di ben e teki leri fu Yesus doro èn den ben ferwondru fu si taki A e taki nanga wan uma. Ma toku no wan fu den no aksi En taki: “San Yu wani nanga a uma?” noso: “Fu sanede Yu e taki nanga en?” ₂₈A uma libi en kroiki dan a go na a foto go taigi den sma taki: ₂₉“Kon nanga mi, kon luku wan sma di taigi mi ala sani di mi ben du! Kande na En na a Mesias.” ₃₀Dan den sma kmopo fu a foto kon na En.