Dag 144 van 365- 1 Kronieken 22-24 en Johannes 8:31-59

₂Dan David komanderi fu meki ala den doroseisma di ben e libi ini Israel, kon na wan. Dan a gi den a wroko fu go kapu bigi pisi ston puru na den bergi gi a bow fu a oso fu Gado. ₃David sorgu gi bun furu isri tu, fu meki spikri gi den bigi doro, nanga fu meki aka. A sorgu gi so furu kopro tu tak' a no ben de fu wegi. ₄Mora fara gi so furu sedrebon tak' a no ben de fu teri. Bika den sma fu Sidon nanga Tyrus ben e tyari bogobogo kon gi en. ₅David ben e du den sani dati nanga a prakseri taki: “Mi boi Salomo yongu ete, ma a oso di mus meki gi MASRA mus bigi tak' alasei fu grontapu sma mus taki fu en. Dat' meki mi o bigin poti sani klari gi en.” Na so David poti bun furu sani klari fosi a dede.

₆Dan David seni kari en manpikin Salomo, dan a komanderi en fu bow wan oso gi MASRA, a Gado fu Israel. ₇A taigi Salomo taki: “Mi boi, mi ben e waka nanga a prakseri taki na misrefi ben o bow wan oso gi MASRA, a Gado fu mi, pe sma kan anbegi En. ₈Ma MASRA taigi mi taki: ‘Yu meki furu brudu lon èn fa yu feti furu bigi feti. Dat' meki a no yu o bow wan oso gi a nen fu Mi, yu meki tumsi furu brudu lon. ₉Ma yere, yu o kisi wan manpikin di o libi tiri. Mi sa meki tak' freide sa de mindri en nanga ala den feyanti fu en. Dat' meki a sa nen Salomo. Te en sa de na makti Mi sa meki taki freide de ini Israel. Dyugudyugu no sa de. ₁₀Na en sa bow wan oso gi a nen fu Mi. A sa de leki wan manpikin gi Mi èn Mi sa de leki wan p'pa gi en. Mi o sorgu tak' na soso pikin nanga bakapikin fu en sa de kownu fu têgo.’ ₁₁We now, mi boi, meki MASRA de nanga yu, fu sani kan waka bun gi yu te yu e bow a oso fu MASRA, a Gado fu yu, leki fa A taki tak' na yu o du en. ₁₂Meki MASRA gi yu ferstan èn yepi yu fu yu kan si sani krin, taki te MASRA, a Gado fu yu, poti yu leki tiriman fu Israel, yu sa man fu hori den wèt fu En. ₁₃A sa go bun nanga yu te yu hori yusrefi finifini na den sani di yu mus tan du nanga den sani na san yu mus hori yusrefi, den sani di MASRA ben komanderi Moses fu taigi Israel. Hori dek'ati. Yu mus dyadya. No frede èn no lasi ati. ₁₄Yere, nanga bun furu sweti mi seti kba gi a oso fu MASRA: dri milyun kilo gowtu, dritenti milyun kilo solfru, someni kopro nanga isri tak' den no de fu wegi. Mi poti udu nanga ston klari tu. Yu mus sorgu gi moro. ₁₅Bun furu wrokoman de tu fu du a wroko gi yu: man di e kapu ston, mesreman, temreman nanga ala sortu wrokoman di abi koni fu wroko ₁₆nanga gowtu, nanga solfru, nanga kopro èn nanga isri. Den de bun furu.” So bigin dan fu du a wroko! Meki MASRA de nanga yu!

₁₇Dan David komanderi ala den fesiman fu Israel fu yepi en manpikin Salomo. ₁₈A taigi den taki: “MASRA, a Gado fu unu, de nanga unu. Na En meki tak' dyugudyugu no de nanga no wan fu den kondre lontu unu. A gi den sma di ben libi fosi ini a kondre, abra ini a makti fu mi. Den abi fu saka densrefi gi MASRA nanga gi En pipel. ₁₉We, un poti un ati nanga un sili now fu suku MASRA, a Gado fu unu. So un bigin dan so esi leki un man fu bow a santa presi fu MASRA Gado. Dan a santa kisi fu a ferbontu fu MASRA nanga den santa wrokosani fu Gado, kan go ini a oso pe sma kan anbegi MASRA.”

₁Di David ben kon owru èn a ben firi taki a no ben abi langa moro fu libi, a poti en manpikin Salomo leki kownu fu Israel. ₂David meki ala den fesiman fu den Israelitisma, makandra nanga den priester nanga den Lefitiman, kon na wan. ₃Dan a meki den teri ala den Lefitiman, den di ben abi dritenti yari nanga moro owru, wan fru wan. Den ben de dritenti-na-aiti dusun. ₄Ne David taki: “Tutenti-na-fo dusun fu unu o kisi a frantwortu fu a wroko ini a oso fu MASRA. Siksi dusun fu unu mi e poti leki fesiman fu a wroko nanga leki krutubakra. ₅Fo dusun fu unu sa hori wakti èn fo dusun fu unu sa prijse MASRA tapu den instrumenti di mi meki spesrutu fu du dati.”

₆David prati den Lefitiman na ini grupu. Ibriwan fu den grupu ben de bakapikin fu Gerson, Kehat nanga Merari, den manpikin fu Lefi.

₇Den manpikin fu Gerson ben de Ladan nanga Simi. ₈Ladan ben abi dri manpikin: Yekiyel, a edeman, Setam nanga Yowel. ₉Simi ben abi dri manpikin: Selomit, Hasiyel nanga Haran. Den ben de den fesiman fu a famiri Ladan. ₁₀Simi ben abi fo manpikin: Yakat, Sina, Yehus nanga Beria. ₁₁Yakat ben de a edeman, Sina ben de a di fu tu edeman. Yehus nanga Beria no ben abi furu manpikin, dat' meki den ben e si den sma fu den famiri disi leki wan grupu.

₁₂Den fo manpikin fu Kehat ben de: Amram, Yishar, Hebron nanga Usiyel. ₁₃Den manpikin fu Amram ben de Aaron nanga Moses. Gado ben poti Aaron nanga den manpikin fu en aparti. Fu têgo den ben kisi a frantwortu fu bron ofrandi gi MASRA, fu dini En èn fu blesi a pipel ini a Nen fu En. ₁₄Den manpikin fu Moses, a man fu Gado, den teri leki Lefitisma. ₁₅Den manpikin fu Moses ben de Gersom nanga Eliyeser. ₁₆Wan fu den bakapikin fu Gersom, ben de Sebuel. En ben de a edeman. ₁₇Eliyeser ben abi wan manpikin nomo, Rekabya. En ben de a edeman. Ma Rekabya ben abi bun furu bakapikin. ₁₈A manpikin fu Yishar ben de Selomit. En ben de a edeman. ₁₉Den manpikin fu Hebron ben de: Yeria, a edeman, moro fara Amarya, a di fu tu, Yakasiyel, a di fu dri nanga Yekamam, a di fu fo. ₂₀Den manpikin fu Usiyel ben de Mika, a edeman nanga Yisia, a di fu tu.

₂₁Den manpikin fu Merari ben de Makli nanga Musi. Den manpikin fu Makli ben de Elasar nanga Kis. ₂₂Elasar dede sondro manpikin, soso umapikin a ben abi. Den manpikin fu en brada Kis, trow nanga den umapikin fu en. ₂₃Musi ben abi dri manpikin: Makli, Eder nanga Yeremot.

₂₄Disi ben de den famiri fu den Lefitisma. Den ben prati na ini famiri di ben e wroko ondro wan edeman. Den ben teri iniwan fu den, wan fru wan, fu tutenti yari nanga moro owru, di ben e du wroko na ini a oso fu MASRA. ₂₅David ben taki: “MASRA, a Gado fu Israel, gi En pipel freide. Fu têgo A sa kon libi now ini Yerusalem. ₂₆Now den Lefitiman no abi fu syow moro nanga a santa tenti nanga ala den wrokosani fu en di de fanowdu fu du den wroko.” ₂₇Wan fu den laste komanderi fu David ben de taki den nen fu ala den Lefitiman fu tutenti yari nanga moro owru, ben mus skrifi poti. ₂₈Den ben mus yepi den manpikin fu Aaron nanga a wroko ini a oso fu MASRA. Den ben mus sorgu gi den pren nanga gi den difrenti kamra, den ben mus krin ala den santa wrokosani èn den ben mus yepi den nanga ala tra wroko di ben de fu du ini a oso fu Gado. ₂₉Na den ben abi a frantwortu tu gi den brede di ben e poti spesrutu gi Gado, gi a fini blon fu den graan-ofrandi, gi den kuku di ben e meki sondro dyesi, gi a plaat tapu san sani ben e baka, a blon di ben masi nanga den markikan. ₃₀Moro fara den ben mus tnapu klar'klari ala mamanten nanga ala neti, fu prijse MASRA nanga singi, ₃₁ala sabatdei, tapu a nyunmunfesa nanga tapu den tra fesadei, te den priester ben e bron ofrandi gi MASRA. Ala den Lefitiman di ben mus wroko tapu den dei dati, ben mus drape, èn den ben e du den wroko soleki fa a ben skrifi poti gi den. ₃₂Den Lefitiman ben mus du den wroko na a tenti pe yu ben kan miti nanga Gado, nanga na a santa presi. Den ben e yepi den famiri, den bakapikin fu Aaron, nanga a wroko fu den na a oso fu MASRA.

₁Disi na den grupu fu den bakapikin fu Aaron.

Den manpikin fu Aaron ben de: Nadab, Abihu, Eleasar nanga Itamar. ₂Nadab nanga Abihu dede fosi den p'pa èn den no ben libi manpikin na baka. Dat' meki na soso Eleasar nanga Itamar ben e du a priester wroko. ₃David prati a wroko gi den bakapikin fu Aaron, makandra nanga Sadok, wan bakapikin fu Eleasar, nanga Akimelek, wan bakapikin fu Itamar. ₄Drape a kon na krin tak' den bakapikin fu Eleasar ben abi moro famiri-edeman dan den bakapikin fu Itamar. Dat' meki den poti tin-na-siksi edeman fu den bakapikin fu Eleasar, nanga aiti fu den di fu Itamar. ₅Den meki a lot sori oten den bakapikin fu Eleasar ben mus wroko nanga oten den di fu Itamar, bika na ini ala den tu famiri yu ben abi edeman fu a santa presi nanga edeman di ben e dini Gado. ₆Semaya, a manpikin fu Netanel, wan Lefitiman, ben de a sekretarsi fu a kownu-oso. Na en ben e skrifi den nen poti leti fesi kownu, den edeman, priester Sadok, priester Akimelek, a manpikin fu Abyatar, den edeman fu den famiri fu den priester nanga den edeman fu den famiri fu den Lefitisma. Den ben e hari lot gi wan famiri fu Eleasar dan baka dati gi wan fu a famiri fu Itamar.

₇A fosi lot sori Yoyarib nanga a di fu tu Yedaya. ₈A di fu dri sori Harim nanga a di fu fo Seorim. ₉A di fu feifi sori Malkia nanga a di fu siksi Miamin. ₁₀A di fu seibi sori Hakos nanga a di fu aiti Abia. ₁₁A di fu neigi sori Yesua nanga a di fu tin Sekanya. ₁₂A di fu erfu sori Elyasib nanga a di fu twarfu Yakim. ₁₃A di fu tin-na-dri sori Hupa nanga a di fu tin-na-fo sori Yesebab. ₁₄A di fu tin-na-feifi sori Bilga nanga a di fu tin-na-siksi Imer. ₁₅A di fu tin-na-seibi sori Hesir nanga a di fu tin-na-aiti sori Hapises. ₁₆A di fu tin-na-neigi sori Petakya nanga a di fu tutenti Yekeskel. ₁₇A di fu tutenti-na-wan sori Yakin nanga a di fu tutenti-na-tu Gamul. ₁₈A di fu tutenti-na-dri sori Delaya nanga a di fu tutenti-na-fo Maasya. ₁₉Na a fasi disi den man disi ben mus kon du den wroko ini a oso fu MASRA. Den ben mus hori densrefi na den sani di MASRA, a Gado fu Israel, ben komanderi Aaron, a afo fu den, fu skrifi poti.

₂₀Lefi ben abi tra bakapikin ete:

Fu Amram yu ben abi Subael. A manpikin fu Subael ben de Yekdeyahu. ₂₁Fu Rekabya yu ben abi Yisia, di ben de wan edeman. ₂₂Fu Yisha yu ben abi Selomot. Fu Selomot yu ben abi Yakat. ₂₃Fu Hebron yu ben abi Yeria, a edeman, moro fara Amarya, a di fu tu, Yakasiyel ben de a di fu dri nanga Yekamam a di fu fo. ₂₄Fu den bakapikin fu Usiyel yu ben abi Mika. Fu den bakapikin fu Mika yu ben abi Samir. ₂₅A brada fu Mika ben de Yisia. Fu den bakapikin fu Yisia, yu ben abi Sekarya. ₂₆Fu den bakapikin fu Merari, yu ben abi Makli nanga Musi. Den ben de manpikin fu Yaasiahu, a manpikin fu Merari. ₂₇Tra bakapikin fu Yaasiahu, a manpikin fu Merari, ben de: Soham, Sakur nanga Ibri. ₂₈Fu den bakapikin fu Makli yu ben abi Elasar. Elasar no ben abi manpikin. ₂₉Fu den bakapikin fu Kis yu ben abi Yerakmeel. ₃₀Fu den bakapikin fu Musi yu ben abi Makli, Eder nanga Yerimot. Dati ben de fa den tra bakapikin fu Lefi ben prati na ini den famiri fu den. ₃₁Neleki den famiri, den bakapikin fu Aaron, densrefi hari a lot leti fesi kownu David, Sadok, Akimelek nanga den edeman fu den famiri fu den priester nanga den Lefitiman. Den du en sondro fu luku efu na famiri fu den edeman noso famiri fu den pikin brada fu den edeman.

₃₁Dan Yesus taigi den Dyusma di bribi ini En taki: “Efu un e tan du san Mi taki, dan un o de trutru sma fu Mi. ₃₂Dan un sa sabi san na tru, èn na dati o meki un kon fri.” ₃₃Ma den sma taigi En taki: “Un na bakapikin fu Abraham. Noiti un ben de srafu fu wan sma. Fa Yu kan taki dan taki un sa kon fri?” ₃₄Yesus piki den taki: “Fu tru Mi e taigi unu: Ibri sma di e sondu, na wan srafu fu sondu. ₃₅Wan srafu no e tan fu têgo ini a famiri, ma a manpikin e tan fu têgo. ₃₆Fu dat'ede efu a Manpikin meki un kon fri, dan un o fri fu tru.

₃₇Mi sabi taki un na bakapikin fu Abraham. Ma un e suku fu kiri Mi, fu di un no wani teki san Mi e taki. ₃₈Mi e ferteri unu san Mi si na Mi P'pa, ma unu e du san un yere fu un p'pa.” ₃₉Den piki En taki: “Abraham na wi p'pa.” Yesus piki den baka taki: “Efu un ben de pikin fu Abraham un ben o du den sani san Abraham ben e du. ₄₀Ma now un e suku fu kiri Mi, Mi di ferteri unu den tru sani san Mi yere fu Gado. Abraham no ben o du sowan sani. ₄₁Ma unu e du san un p'pa e du.” Den taigi En now taki: “Na Gado wawan na wi P'pa. Wi a no doroseipikin.” ₄₂Yesus taigi den taki: “Efu Gado ben de un P'pa un ben o lobi Mi, bika Mi kmopo fu Gado. Mi no kon fu Misrefi, ma na En seni Mi kon. ₄₃Un sabi fu sanede un no e ferstan san Mi e taigi unu? Na fu di un no man teki san Mi e taki. ₄₄Didibri na un p'pa, èn un lobi fu du san a wani. Sensi na a bigin a de wan kiriman. A no man taki wan sani san tru, bika a no sabi san na tru. Te a e lei, a e taki leki fa ensrefi de, bika a de wan leiman èn na en meki lei. ₄₅Ma fu di Mi e taki san na tru, meki un no e bribi Mi. ₄₆Suma kan sori taki Mi du wan sondu? Efu Mi e taki san tru, fu sanede un no e bribi Mi dan? ₄₇A sma di de fu Gado, e arki san Gado e taki. Ma unu a no sma fu Gado, dat' meki un no e arki.”

₄₈Den Dyusma taigi Yesus taki: “Un ben abi leti di un taki tak' Yu na wan Samariasma èn tak' Yu abi wan takruyeye na Yu tapu!” ₄₉Ma Yesus piki den taki: “Mi no abi no wan takruyeye na Mi tapu. Mi e gi Mi P'pa grani, ma unu e broko Mi saka. ₅₀Mi no e suku grani gi Misrefi. Wan Trawan de di e suku grani gi Mi, èn na En e krutu libisma. ₅₁Fu tru Mi e taigi un taki: A sma di e du san Mi taki, no sa dede noiti.” ₅₂Dan den Dyusma taigi En taki: “Now wi sabi trutru taki Yu abi wan takruyeye na Yu tapu. Abraham nanga den profeiti dede. Ma Yu e taki tak' a sma di e du san Yu taki, no sa dede noiti. ₅₃Yu denki taki Yu bigi moro un afo Abraham? A dede, èn den profeiti srefi dede tu. San Yu e prakseri fu Yusrefi?” ₅₄Yesus piki den taki: “Efu Mi e suku grani gi Misrefi, dan a no abi warti. A Wan di e gi Mi grani na Mi P'pa. Un e kari En un Gado, ₅₅ma un no sabi En. Mi sabi En, èn efu Mi ben sa taki tak' Mi no sabi En, dan Mi ben o de wan leiman leki unu. Ma Mi sabi En èn Mi e du san A wani. ₅₆Un afo Abraham ben wakti nanga prisiri fu si a dei fu Mi. A si a dei dati èn a ben breiti.” ₅₇Dan den Dyusma taki: “Fa a kan taki Yu si Abraham? Yu no abi feifitenti yari ete!” ₅₈Yesus piki den taki: “Fu tru Mi e taigi un taki: Fosi Abraham gebore, Mi ben de!” ₅₉Dan den sma teki ston fu fringi na En tapu, ma Yesus kibri fu den no si En, dan A kmoto ini a tempel.