Dag 147 van 365- 2 Kronieken 1-3 en Johannes 10:1-23

₁Salomo, a manpikin fu David, ben e tiri a kondre na tapu wan tranga fasi. MASRA, a Gado fu en, ben de nanga en èn A meki a kisi bun furu makti.

₂Dan Salomo seni kari den edeman fu heri Israel: den edeman fu wan dusun nanga fu wan hondro srudati, den krutubakra, ala den fesiman fu a kondre nanga ala den edeman fu den famiri. ₃Dan Salomo nanga ala den sma dati go na a presi pe den ben e tyari ofrandi na Gibeon. Bika drape a tenti ben de pe yu ben kan miti nanga Gado, a tenti di Moses, a knekti fu MASRA, ben meki ini a dreisabana. ₄Ma a santa kisi fu Gado, di David ben puru na Kiryat-Yearim, ben de na Yerusalem, bika David ben meki wan tenti gi en drape. ₅A kopro altari di Besaleyel, a manpikin fu Uri èn granpikin fu Hur, ben meki, ben tnapu fesi a santa tenti fu MASRA. Na a altari dati Salomo nanga ala den sma di ben de nanga en, ben e go. ₆Tapu a kopro altari di ben de fesi a tenti pe yu ben kan miti nanga Gado, drape Salomo tyari ofrandi na MASRA fesi. A bron wan dusun meti leki ofrandi.

₇A neti dati, Gado sori Ensrefi na Salomo. A taigi Salomo taki: “Aksi Mi san yu wani, Mi o du en gi yu.” ₈Salomo piki Gado taki: “Yu sori mi p'pa David bigi lobi èn Yu poti mi leki kownu na en presi. ₉MASRA, mi Gado, meki a sani di Yu pramisi mi p'pa David kon tru now. Bika Yu poti mi leki kownu fu wan folku di furu tak' den no de fu teri. ₁₀Dat' meki mi e aksi Yu fu Yu gi mi koni nanga sabi, fu mi sa man tiri a folku. Bika sondro dati no wan sma sa man fu tiri a bigi folku disi fu Yu.” ₁₁Dan Gado taigi Salomo taki: “A angri fu yu ati no de gudu noso grani. Yu no aksi a libi fu yu feyanti noso langa libi gi yu srefi tu, ma koni nanga sabi fu tiri a folku fu Mi pe Mi poti yu leki kownu. ₁₂Dat' meki Mi o gi yu koni nanga sabi. Boiti dati, Mi o gi yu bun furu gudu nanga grani tu. No wan kownu di ben de na yu fesi ben abi so furu èn no wan di o kon na yu baka o abi so furu tu.” ₁₃Baka dati Salomo drai kmoto fu a tenti pe yu ben kan miti nanga Gado, di ben de na a presi pe den ben e tyari ofrandi na Gibeon. A drai go baka na Yerusalem pe a ben e tiri Israel.

₁₄Salomo ben sorgu taki fetiwagi nanga man di e tyari den fetiwagi ben de. A ben abi wan dusun nanga fo hondro fetiwagi nanga twarfu hondro man di ben e tyari den wagi. Dan a poti afu fu den na en ini Yerusalem nanga afu ini den foto di ben meki spesrutu fu poti den wagi dati. ₁₅Kownu ben meki tu taki solfru nanga gowtu ben furu leki ston na ini Yerusalem. Sedre-udu ben lai tu leki den figabon di e gro bogobogo ini den kontren na den bergifutu. ₁₆Den asi fu Salomo ben e kmoto fu Egipte nanga Kewe. Den bai nanga seriman fu kownu ben e go bai den ini Kewe. ₁₇Den ben e bai wan fetiwagi ini Egipte gi siksi hondro pisi solfru èn gi wan asi wan hondro nanga feifitenti pisi solfru. Den bai nanga seriman ben e tyari asi go seri tu gi ala den kownu fu den Hetitisma nanga di fu den Arameesma.

₁Salomo komanderi tak' wan tempel ben mus bow pe sma kan anbegi MASRA, nanga wan kownu-oso gi ensrefi. ₂Dan Salomo poti seibitenti dusun syowman, aititenti dusun man fu kapu ston puru fu den bergi, nanga dri dusun siksi hondro fesiman fu luku den. ₃Dan Salomo seni a boskopu disi gi Huram, a kownu fu Tyrus: “Seni sedre-udu kon gi mi leki fa yu ben seni gi mi p'pa David di a ben o meki wan kownu-oso fu libi. ₄Now mi wan bow wan oso gi MASRA, a Gado fu mi, pe sma kan anbegi En. A presi dati o de spesrutu gi En. Drape wi o bron wierook nanga switi smeri gi En, dorodoro wi o poti den brede leki ofrandi èn mamanten nanga neti wi o bron meti leki ofrandi, tapu sabatdei, tapu den nyunmun fesa nanga tapu den tra fesadei fu MASRA, a Gado fu wi. Den sani dati na wan plekti na san wi leki Israelitisma mus hori unsrefi fu têgo. ₅A oso di mi o meki mus bigi, bika a Gado fu wi bigi moro ala tra gado. ₆Fu taki leti, no wan sma o man bow wan oso gi En, bika srefi a moro hei heimel no man hori En. Suma na mi dan tak' mi o bow wan oso gi En? Nanga a wan enkri prakseri disi nomo mi kan du en, dati de fu tyari ofrandi gi En drape. ₇Dat' meki mi e aksi yu now, seni wan man kon gi mi di sabi wroko gowtu, solfru, kopro, isri, blaw katun, dungruredi katun, fayaredi katun. A mus sabi tyerfi prenki tu tapu sani, dan a kan wroko makandra nanga den man fu Yuda nanga Yerusalem di sabi a wroko dati tu, den man di mi p'pa David ben poti kba. ₈Seni sedre-udu, sipres-udu nanga sandel-udu fu a Libanonbergi gi mi. Mi sabi dati den knekti fu yu sabi fa fu kapu den bon fu a Libanonbergi. Den knekti fu mi sa yepi den di fu yu fu ₉mi kan feni bun furu udu. Bika a oso di mi wani bow, sa bigi èn sma mus luku en nanga lespeki. ₁₀Yere, mi o pai den man di o kapu den bon neigitenti dusun saka tarwe, neigitenti dusun saka groto, aiti hondro dusun liter win, nanga aiti hondro dusun liter oleifoli.”

₁₁Dan kownu Huram fu Tyrus, seni piki Salomo ini wan brifi taki: “Fu di MASRA lobi a pipel fu En, A poti yu leki kownu fu tiri den.” ₁₂A skrifi moro fara ini a brifi: “Grani fiti MASRA, a Gado fu Israel, di meki heimel nanga grontapu. Bika A gi kownu David wan koni manpikin di abi ferstan, di srapu èn di wani bow wan tempel gi MASRA, nanga wan kownu-oso gi ensrefi. ₁₃Mi o seni wan man gi yu di sabi a wroko, wan man di srapu. A nen Huram-Abi. ₁₄A de a manpikin fu wan uma fu a lo fu Dan, en p'pa ben de wan man fu Tyrus. A sabi wroko gowtu, solfru, kopro, isri, ston, udu, dungruredi katun, blaw katun, soifri linnen nanga faya redi krosi èn a sabi tyerfi prenki tapu sani. A man meki ala sani tu di sma e taigi en fu meki. Makandra nanga den man fu yu di sabi a wroko nanga den di fu yu p'pa, masra David, a o du ala san yu komanderi en. ₁₅We masra, seni a tarwe, a groto, a oli nanga a win kon di yu pramisi den knekti fu yu, ₁₆dan wi sa go kapu someni bon leki yu wani na a Libanonbergi. Wi sa tai den bon dati na wan dan wi o tyari den abra se go na Yafo. Fu drape yu kan tyari den go na Yerusalem.”

₁₇Dan Salomo teri ala den mansma fu den doroseisma di ben e libi ini Israel, neleki fa en p'pa David ben du kba. A sori tak' na wan hondro feifitenti-na-dri dusun nanga siksi hondro mansma ben de. ₁₈Salomo poti seibitenti dusun fu den leki syowman, aititenti dusun a poti fu kapu ston puru na den bergi, nanga dri dusun a poti leki fesiman fu luku tak' den man ben e du den wroko.

₁Salomo bigin nanga a bow fu a tempel tapu a bergi Moria na Yerusalem, pe MASRA ben sori Ensrefi na en p'pa David. David ben besroiti taki a oso ben mus meki na a presi pe a Yebusitiman Ornan ben masi buba puru na a graan. ₂Salomo bigin nanga a bow di a ben de fo yari na makti. Ini a di fu tu mun fu a yari dati a bigin, tapu a di fu tu dei. ₃A ben abi tapu papira fa a ben o bow a oso fu Gado. A oso ben o langa dritenti meter èn a ben o bradi tin meter. A wroko nanga a owru marki. ₄A gadri na fes'sei ben langa tin meter leki fa a oso ben bradi èn a ben hei siksi tenti meter. Salomo meki den tapu en fu inisei nanga lala gowtu. ₅A meki den poti sipres-udu na a heri inisei skin fu a bigi kamra. Baka dati a meki den tapu ala a udu nanga lala gowtu, dan a meki den tyerfi palmbon nanga keti na ini. ₆Fu moi a kamra moro, a meki den poti diri ston ini a gowtu na a skin fu a kamra. A gowtu ben kmoto fu Parwaim. ₇A meki den tapu a heri kamra nanga gowtu. No wawan a kamraskin nanga den doro, ma den postu nanga den kosen tu. Dan a meki den tyerfi kerub ini a gowtu fu a kamraskin. ₈Baka dati a meki a moro santa presi. A kamra dati ben bradi tin meter, neleki a oso, èn a ben langa tin meter tu. Dan a meki den tapu den skin fu a kamra nanga tin-na-aiti dusun kilo lala gowtu. ₉Den spikri ben meki nanga feifi hondro gran gowtu. A meki den tapu den seiplanga fu den kamra na loktusei nanga gowtu tu.

₁₀Salomo meki den meki tu kerub gi a moro santa presi. Den ben meki fu udu dan a meki den tapu den nanga gowtu. _11-12Makandra den frei fu den kerub ben langa sowan tin meter. Ibri frei ben langa tu nanga afu meter. Fu ibri kerub wan frei ben e miti nanga den planga fu a oso èn a tra frei ben e miti nanga di fu a tra kerub. ₁₃Sobun, makandra den frei fu den tu kerub ben langa tin meter. Den ben tnapu let'opu nanga den fesi go na a bigi kamra. ₁₄Baka dati Salomo meki den meki wan garden fu blaw katun, dungruredi katun, fayaredi katun nanga soifri linnen. A meki den poti prenki fu kerub tapu a garden tu.

₁₅Dan Salomo meki tu bigi postu di ben tnapu fesi a oso. Ibri postu ben hei tin-na-seibi nanga afu meter hei nanga wan postu-ede fu tu nanga afu meter. ₁₆A meki keti fu poti na den lantyi fu den postu-ede. A meki wan hondro granaki-apra tu di den ben mus fasi na den keti. ₁₇A poti den postu na fes'sei fu a tempel, wan na a let'sei èn wan na a kruktusei. A wan na a let'sei a kari Yakin, san wan taki: Na En e poti tnapu. A wan na a kruktusei a kari Boas, san wan taki: Ini En krakti de.

₁“Fu tru Mi e taigi un taki: A sma di no psa na a doro fu kon ini a skapupen, ma di kren wan tra presi kon inisei, na wan fufuruman nanga wan abani. ₂A sma di e psa na a doro fu kon inisei, na a skapuman. ₃A waktiman e opo a doro gi en, èn den skapu e arki en sten. A e kari den skapu fu en na den nen, èn a e tyari den go na dorosei. ₄Baka te a tyari ala den skapu fu en go na dorosei, a e waka na den fesi, dan den skapu e waka kon na en baka, bika den sabi en sten. ₅Ma den no ben o waka baka wan sma di den no sabi. Den ben o lon gwe fu di den no sabi en sten.” ₆Yesus ferteri den a agersitori disi, ma den no ben ferstan san A ben wani taki.

₇Dat' meki A taigi den baka taki: “Fu tru Mi e taigi unu: Mi na a doro fu den skapu. ₈Ala sma di ben kon na Mi fesi na fufuruman nanga abani, ma den skapu no arki den. ₉Mi na a doro. Efu wan sma psa na Mi kon inisei, Mi sa ferlusu en. A sa go kon èn a sa feni nyanyan. ₁₀A fufuruman e kon soso fu fufuru, fu kiri, èn fu pori sani. Mi kon fu gi sma libi, èn fu sorgu taki den abi en bogobogo.

₁₁Mi na a bun skapuman. A bun skapuman de klari fu dede gi den skapu fu en. ₁₂Ma wan wrokoman di den yuru fu luku den skapu, no de leki a skapuman di abi den skapu. Te a si taki wan tigri e kon, a e libi den skapu dan a lon gwe. So a tigri kan grabu wan skapu, dan a panya den trawan. ₁₃A wrokoman e lon gwe bika na yuru den ben yuru en, èn a no abi firi gi den skapu. ₁₄Mi na a bun skapuman. Mi sabi den skapu fu Mi èn den skapu sabi Mi, ₁₅soleki fa a P'pa sabi Mi èn Mi sabi a P'pa. Èn Mi de klari fu dede gi den skapu. ₁₆Mi abi tra skapu tu san no de fu a skapupen disi. Mi mus tyari den kon tu. Den o arki Mi sten, dan den tu grupu skapu o tron wán, èn den o abi wán skapuman. ₁₇Mi P'pa lobi Mi, bika Mi e gi Mi libi abra fu dede, fu Mi teki en baka. ₁₈No wan sma e teki Mi libi. Na Mi srefi e gi en abra. Mi abi makti fu gi Mi libi abra, èn Mi abi makti fu teki en baka. Disi na san Mi P'pa ben taigi Mi tak' Mi mus du.”

₁₉Di Yesus taki den sani disi, wan prati kon baka mindri den Dyusma. ₂₀Furu fu den taki: “Un no mus arki a man disi. A law èn A abi wan takruyeye na En tapu.” ₂₁Ma trawan fu den taki: “Wan sma di abi wan takruyeye na en tapu, no e taki leki fa a man disi e taki. Èn wan takruyeye no man meki wan brenisma si baka.”

₂₂A ben de a kowruten èn a ben de a ten fu a Hanukafesa na ini Yerusalem. ₂₃Yesus ben e waka ini a tempel na a presi di den kari a Gadri fu Salomo.