Dag 157 van 365- 2 Kronieken 25-27 en Johannes 16

₁Amasya ben abi tutenti-na-feifi yari di a tron kownu. A tan tutenti-na-neigi yari na makti ini Yerusalem. En m'ma ben nen Yehoadan èn a ben de fu Yerusalem. ₂Amasya ben e du san bun ini a ai fu MASRA, ma no nanga en heri ati. ₃Di Amasya ben tnapu tranga leki kownu, a kiri den knekti di ben kiri en p'pa, kownu Yoas. ₄Ma a no kiri den pikin fu den, bika a hori ensrefi na a wèt di skrifi ini a buku fu Moses. Drape MASRA komanderi taki: “Wan p'pa no sa dede fu wan sani di en pikin du, èn wan pikin no sa dede fu wan sani di en papa du. Iniwan sma sa dede fu en eigi sondu.”

₅Baka dati Amasya seni kari den man fu Yuda kon. Dan a meki den lo fu Yuda nanga di fu Benyamin kon tnapu, famiri na famiri, ini grupu fu wan dusun nanga fu wan hondro man. Iniwan fu den grupu dati ben abi en eigi fesiman. A teri den alamala fu tutenti yari nanga moro owru, dan a kon sabi taki dri hondro dusun man ben de di ben fiti fu feti ini a legre nanga lansri nanga schild. ₆A yuru wan hondro dusun fetiman tu fu Israel gi sowan dri dusun kilo solfru. ₇Ma dan wan man fu Gado go taigi en taki: “Kownu, no meki a legre fu Israel hari go nanga yu, bika MASRA no de nanga Israel. A no de nanga no wan fu den Efraimitisma. ₈Yusrefi mus go feti a feti èn feti so tranga leki yu man, noso Gado o meki yu lasi a feti. Bika Gado abi a makti fu yepi yu, ma A abi a makti tu fu meki yu lasi.” ₉Ne Amasya taigi a man fu Gado taki: “San mus psa dan nanga a dri dusun kilo solfru di mi pai a legre fu Israel?” A man fu Gado piki en taki: “MASRA kan gi yu moro leki dati.” ₁₀Dan Amasya prati den legre, fu a legre fu Efraim ben kan drai go baka na oso. Den srudati fu Efraim ben mandi tapu di fu Yuda èn den drai gwe nanga bigi atibron.

₁₁Dan Amasya teki dek'ati èn a hari go leki edeman fu a legre fu en na a Sowtudal pe a kiri tin dusun Edomitisrudati fu Seir. ₁₂Den srudati fu Yuda grabu tin dusun trawan libilibi. Den tyari den go tapu wan bergi, dan den fringi den go na gron meki den dede. ₁₃Ma a legre di Amasya ben seni gwe fu den no hari makandra nanga en go ini a feti, kmoto ini Samaria dan den broko go ini den foto fu Yuda te go miti Bet-Horon. Den kiri dri dusun sma èn den teki bun furu sani tyari gwe.

₁₄Di Amasya drai kon, baka di a wini den Edomitisma, a tyari den popki kon tnapu di den sma fu Seir ben e anbegi leki gado. Dan a boigi gi den èn a bron ofrandi gi den. ₁₅Ne MASRA ati kon bron tapu Amasya. A seni wan profeiti go na en, di taigi en taki: “Fu sanede yu go suku den gado fu a folku dati, den gado di no ben man ferlusu den eigi pipel puru ini a makti fu yu?” ₁₆Ma a profeiti no ben kba taki ete, di Amasya taigi en taki: “Sensi oten den poti yu leki raiman fu kownu? Tapu yu mofo, noso mi o meki den kiri yu.” A profeiti no aksi noti moro, leki a taki nomo taki: “Now di yu taki so èn poti a rai fu mi na wan sei, mi sabi taki Gado teki a besroiti fu puru yu na pasi.”

₁₇Baka dati kownu Amasya fu Yuda taki nanga den raiman fu en èn di den ben agri, den seni wan boskopu gi kownu Yoas fu Israel, di ben de a manpikin fu Yoakas èn granpikin fu Yehu. Den seni taigi en taki: “Kon meki wi feti luku sortu wan fu wi moro tranga.” ₁₈Ma kownu Yoas fu Israel seni piki kownu Amasya fu Yuda taki: “A pikin makabon di e gro tapu a Libanonbergi, seni aksi a sedrebon di e gro tu tapu a Libanonbergi taki: ‘Meki a umapikin fu yu trow nanga a boi fu mi.’ Ma den busimeti waka psa èn den traputrapu a makabon. ₁₉Yu e waka nanga a prakseri nomo taki yu wini Edom. Ma a wini di yu wini den meki taki yu kisi heimemre èn yu e suku grani. Tan na yu oso, bika a trobi di yu e suku o tyari ongoloku gi yu nanga den sma fu Yuda.” ₂₀Ma Amasya no ben wani arki, bika Gado ben wani taki Yuda ben mus kon ini anu fu den feyanti, fu di den go suku den gado fu Edom. ₂₁Ne kownu Yoas fu Israel hari kon nanga a legre fu en, dan en nanga kownu Amasya fu Yuda, feti nanga densrefi na Bet-Semes ini Yuda, fu luku sortu legre moro tranga. ₂₂A legre fu Israel wini a di fu Yuda, èn ala den srudati fu Yuda lon go na den oso. ₂₃Kownu Yoas fu Israel, grabu kownu Amasya fu Yuda, a manpikin fu Yoas èn granpikin fu Akasya, na Bet-Semes, dan a tyari en gwe leki strafuman. Yoas tyari en go na Yerusalem dan a broko sowan tu hondro meter fu a skotu fu Yerusalem, fu a Efraimpoort go te na a Ukupoort. ₂₄Baka dati a teki ala a gowtu, a solfru nanga ala den wrokosani fu a oso fu Gado, den sani gi san Obed-Edom ben de frantwortu. A teki den gudu fu a kownu-oso tu, èn a teki sma leki strafuman tyari gwe di a drai go baka na Samaria.

₂₅Kownu Amasya fu Yuda, a manpikin fu Yoas, libi ete tin-na-feifi yari baka a dede fu kownu Yoas fu Israel, a manpikin fu Yoakas. ₂₆Den tra sani di psa ini a libi fu Amasya, fu a bigin go te na a kba, skrifi poti na ini den buku fu a historia fu den kownu fu Yuda nanga fu Israel. ₂₇Sensi a ten di Amasya drai en baka gi MASRA, sma ben meki mofo fu kiri en na Yerusalem, ma a lowe go na Lakis. Dan den seni sma go na en baka, di kiri en na Lakis. ₂₈Den tyari en go tapu asi baka na Yerusalem èn den beri en na den afo fu en ini a foto fu David.

₁Usia ben abi tin-na-siksi yari, di a heri pipel fu Yuda teki en poti leki kownu na a presi fu en papa Amasya. ₂Baka di en p'pa dede, a meki a foto Elat kon moro tranga èn tyari en kon baka ondro a tiri fu Yuda. ₃Usia ben abi tin-na-siksi yari di a tron kownu. A tan feifitenti-na-tu yari na makti ini Yerusalem. Èn m'ma ben nen Yekolya èn a ben de fu Yerusalem. ₄A ben e du san bun ini MASRA ai, neleki en p'pa Amasya. ₅A ben e suku Gado, solanga Sekarya, di ben e leri en fu lespeki Gado, ben de na libi. Solanga leki a ben e suku MASRA, Gado ben e meki sani waka bun gi en.

₆Usia ben hari go feti nanga den Filistijnsma. A broko a skotu fu den foto Gat, Yabne nanga Asdod. A bow tranga foto tu ini a kontren fu Asdod nanga tra presi ini a kondre fu den Filistijnsma. ₇Gado yepi en di a ben e feti nanga den Filistijnsma, nanga den Arabiri fu Gur-Baal nanga di a ben e feti nanga den Mehunitisma. ₈Den Amonitisma ben e tyari sani gi Usia di a ben ferplekti den fu tyari kon. Te na ini Egipte den ben e yere fu en, bika a makti fu en ben kon bigi srefsrefi.

₉Usia bow tranga toren ini Yerusalem na a Ukupoort, a Dalpoort nanga a Uku. ₁₀A bow toren tu ini a dreisabana èn a diki furu peti ini a kontren na den bergifutu nanga a hei kontren, fu di a ben abi furu meti. A ben abi furu man tu di ben e wroko gron gi en nanga man di ben e prani droifibon fu meki win tapu den bergi nanga na presi pe a gron fatu, fu di a ben lobi prani.

₁₁Usia ben abi wan legre tu nanga srudati di ben de klar'klari fu go na feti. Den ben prati na ini grupu leki fa sekretarsi Yehiyel nanga ofisiri Maaseya ben skrifi den poti. Den tu man disi ben de ondro a tiri fu Hananya, wan heihei wrokoman fu kownu. ₁₂Den edeman fu den famiri di ben e teki prati na ini a legre ben de tu dusun siksi hondro. ₁₃Den ben de edeman fu wan legre fu dri hondro seibi dusun nanga feifi hondro fetiman di ben de klar'klari fu feti, fu yepi kownu nanga den feyanti fu en. ₁₄Usia ben sorgu tak' a heri legre ben abi schild, lansri, fet'ati, isri dyakti, bo nanga ston fu fringi. ₁₅Ini Yerusalem a meki den poti fetisani, di koniman ben meki, tapu den toren nanga den uku fu a skotu fu a foto, di ben man sutu peiri nanga bigi ston. Alasei den ben e taki fu Usia, bika Gado ben e yepi en tapu wan ferwondru fasi te leki a tron wan man nanga makti.

₁₆Ma di Usia tron wan man nanga makti, a kisi so wan heimemre di ben o tyari dede gi en, fu di a no hori ensrefi na den sani fu MASRA, a Gado fu en, ma a go ini a tempel fu MASRA fu go bron wierook tapu a altari pe wierook e bron. ₁₇Ma granpriester Asarya waka go na kownu Usia baka, makandra nanga aititenti priester fu MASRA, di ben abi dek'ati. ₁₈Den tapu pasi gi kownu Usia dan den taigi en taki: “Usia, a no yu wroko fu bron wierook gi MASRA, ma na a wroko fu den priester, den bakapikin fu Aaron, di Gado poti aparti fu bron wierook. Kmoto ini a santa presi, bika yu hori yu na den sani fu Gado. MASRA Gado no o prisiri nanga a sani di yu du.” ₁₉Ne Usia atibron. A pan nanga a switismeri di a ben o bron ben de ini en anu. A ben e meki trobi nanga den priester di wantronso gwasi broko na en fes'ede, leti fesi den priester, ini a oso fu MASRA, na a altari fu bron wierook. ₂₀Di granpriester Asarya nanga den tra priester luku en bun, den si tak' gwasi ben broko na en fes'ede. Ne den yagi en wantron puru drape. Ensrefi ben lon gwe es'esi, bika MASRA ben naki en nanga a siki dati. ₂₁Kownu Usia tan gwasi te leki a dede. A libi leki wan gwasi man ini wan aparti oso èn tapu a dyari fu a oso fu MASRA a no ben kan go srefsrefi. En manpikin Yotam ben e sorgu taki sani ben e waka bun ini a kownu-oso èn a ben e tiri a kondre.

₂₂A profeiti Yesaya, a manpikin fu Amos, skrifi den tra sani di psa ini a libi fu Usia, fu a bigin go te na a kba. ₂₃Di Usia dede, den beri en pe den afo fu en beri. Ma den beri en ini a wei sei a berpe fu den kownu, fu di a ben gwasi. En manpikin Yotam teki en presi leki kownu.

₁Yotam ben abi tutenti-na-feifi yari di a tron kownu èn a tan tin-na-siksi yari na makti ini Yerusalem. En m'ma ben nen Yerusa èn a ben de a umapikin fu Sadok. ₂Yotam ben e du san bun ini MASRA ai, neleki en p'pa Usia. Ma en no go ini tempel fu MASRA. A pipel ben e tan sondu.

₃Yotam meki a Tap'seipoort na a oso fu MASRA. A du furu wroko tu na a skotu fu a foto ini a kontren fu Ofel. ₄A bow tranga foto ini a bergikontren fu Yuda. A bow presi tu di ben tranga fu teki abra nanga toren ini den busi. ₅A feti nanga a kownu fu den Amonitisma èn a wini en. A yari dati den Amonitisma gi en dri dusun kilo solfru, fotenti-na-feifi dusun saka tarwe nanga fotenti-na-feifi dusun saka groto. Den du dati ete tu yari baka dati. ₆Yotam kon tron wan man nanga makti, bika a tan libi soleki fa MASRA, a Gado fu en, ben wani.

₇Den tra sani di psa ini a libi fu Yotam, ala den bigi feti di a feti nanga den sani san a du, skrifi poti ini a buku fu a historia fu den kownu fu Israel nanga Yuda. ₈A ben abi tutenti-na-feifi yari di a tron kownu. A tan tin-na-siksi yari na makti ini Yerusalem. ₉Yotam dede èn den beri en ini a foto fu David. En manpikin Akas teki en presi leki kownu.

₁Mi taigi un den sani disi fu un no lasi bribi. ₂Den o yagi un puru fu den kerki. Iya, wan ten o kon pe a sma di kiri unu o prakseri taki a e dini Gado nanga dati. ₃Den o du disi fu di den no sabi a P'pa èn fu di den no sabi Mi. ₄Mi taigi un ala den sani disi now, fu te den e psa, un kan memre taki Mi ben taigi unu. Ma Mi no ben taigi unu na a bigin, fu di Mi ben de nanga unu.”

₅“Now Mi e go na a Wan di ben seni Mi kon, ma no wan fu unu e aksi Mi pe Mi e go. ₆Ma fu di Mi taigi unu den sani disi, meki un e sari. ₇Mi e taigi unu tru taki a moro bun gi unu efu Mi gwe. Bika efu Mi no go, dan a Trowstuman no o kon na unu. Ma efu Mi gwe, dan Mi o seni En kon gi unu. ₈Te A kon, A o sori den sma fu grontapu san na sondu, san bun ini Gado ai, nanga san Gado e krutu. ₉A o sori den san na sondu, fu di den no e bribi ini Mi. ₁₀A o sori den san bun ini Gado ai, fu di Mi e go na a P'pa èn unu no o si Mi moro. ₁₁A o sori den san Gado e krutu, bika Gado krutu a wan kba di e basi a grontapu disi.

₁₂Mi abi furu sani fu taigi unu ete, ma now a o hebi tumsi gi unu. ₁₃Ma te a Yeye kon di e taki san na tru, A o sori unu a pasi fu sabi ala sani san tru. Bika A no sa taki fu Ensrefi, ma A sa taki san A yere, èn A sa taigi unu san de fu kon. ₁₄A sa gi Mi glori, bika ala sani san A sa ferteri unu, A abi fu Mi. ₁₅Ala san Mi P'pa abi, na fu Mi. Dat' meki Mi taigi unu taki: Ala sani san A sa ferteri unu, A abi fu Mi.”

₁₆“Ete wan syatu pisten, dan un no sa si Mi moro, ma pikinso baka dati, un o si Mi baka.”

₁₇Dan sonwan fu den man di ben e teki leri fu Yesus aksi makandra san A ben wani taki di A taigi den tak' baka wan syatu pisten dan den no o si En moro, ma pikinso baka dati den o si En baka. Den aksi tu san A ben wani taigi den di A taki tak' A o go na a P'pa. ₁₈Den taki: “San na wan syatu pisten? San A wani taki nanga dati? Un no sabi san A e taki.” ₁₉Yesus si taki den ben wani aksi En wan sani. Dat' meki A taigi den taki: “Na aksi un e aksi unsrefi san Mi ben wani taki di Mi taigi unu: ‘Wan syatu pisten dan un no sa si Mi moro, ma pikinso baka dati, un o si Mi baka?’ ₂₀Fu tru Mi e taigi un taki: Un o krei èn un o bari, ma den grontapusma o breiti. Un o sari, ma a sari fu unu o tron prisiri. ₂₁Te a ten doro fu wan uma meki a pikin, a abi furu skin-ati. Ma te a pikin gebore, a no e prakseri a benawtu moro ini san a ben de, fu di a breiti taki a tyari wan pikin kon na grontapu. ₂₂Na so a de nanga unu tu. Nownow un e sari. Ma Mi o si un baka. Dan un o breiti, èn no wan sma o man pori a prisiri fu unu. ₂₃A ten dati un no o aksi Mi noti moro. Fu tru Mi e taigi un taki: Efu un aksi a P'pa wan sani ini Mi nen, A sa gi unu. ₂₄Te leki now un no ben aksi noti ini Mi nen. Aksi, dan unu sa kisi, fu un kan breiti srefsrefi.

₂₅Mi ben taki ini agersitori nanga unu. Ma wan ten e kon pe Mi no o taki so moro. Dan Mi o ferteri unu krin fu Mi P'pa. ₂₆A ten dati, un srefi o aksi sani ini Mi nen. Mi no e taki tak' Mi o aksi a P'pa gi unu, ₂₇bika a P'pa srefi lobi unu fu di un lobi Mi, èn fu di un bribi taki Mi kmopo fu Gado. ₂₈Mi ben kmopo fu a P'pa kon na grontapu. Now Mi e gwe libi grontapu fu drai go baka na a P'pa.”

₂₉Dan den man di ben e teki leri fu En taki: “Now Yu e taki fu wi ferstan. Yu no e taki ini agersitori moro. ₃₀Now un kan si taki Yu sabi ala sani èn a no de fanowdu fu wan sma aksi Yu wan sani. Fu a sani disi ede un e bribi taki Yu kmoto fu Gado.” ₃₁Yesus piki den taki: “Now fosi un e bribi? ₃₂Luku, a yuru o kon èn a doro kba, tak' un o panya go waka un eigi pasi dan un libi Mi wawan. Ma toku Mi no de Mi wawan, bika a P'pa de nanga Mi. ₃₃Mi ferteri un den sani disi fu un kan feni freide na Mi. Na grontapu den sma o pina unu. Ma hori dek'ati, bika Mi wini grontapu kba.”