Dag 173 van 365- Ester 6-8 en Handelingen 6

₁A neti dati kownu no ben man fadon na sribi. Ne a komanderi den knekti fu en, di ben e wroko spesrutu gi en wawan, fu den go teki a buku fu a historia kon, a buku pe den sani ben skrifi di ben psa ini a kondre. Dan den leisi gi kownu. ₂Di den ben e leisi so, den kon doro na a pisi pe Mordekai ben tyari a tori fu Bigtan nanga Teres kon na krin. Den tu man dati ben de prenspari wrokoman fu kownu, di ben abi a frantwortu fu hori wakti na mofodoro fu a kownu-oso. Mordekai ben tyari kon na krin tak' den tu man dati ben wani kiri kownu Ahasveros. ₃Ne kownu aksi den knekti fu en taki: “Sortu pai noso grani Mordekai kisi fu a sani dati?” Den piki kownu taki: “A no kisi not'noti.” ₄Dan kownu aksi taki: “Wan sma de tapu a inisei pren?” A no langa di Haman ben kon tapu a inisei pren fu a kownu-oso fu go taigi kownu tak' a ben o anga Mordekai na a postu di a ben seti gi en. ₅Dat' meki den knekti fu kownu taigi en taki: “Iya, Haman tnapu drape.” Kownu taigi den meki den meki a kon na inisei. ₆Di Haman kon na inisei, kownu aksi en taki: “San musu psa nanga wan man di kownu wani gi grani?” Haman prakseri na ini ensrefi taki: “Na mi nomo kownu sa wani gi moro grani.” ₇Dat' meki Haman piki kownu taki: “Wan sma di kownu wani gi grani? ₈Meki den knekti fu yu tyari wan krosi fu kownu kon, wan di kownu weri kba. Meki den tyari wan asi tapu san kownu srefi e sidon, èn wan kroon mus de tapu a ede fu a asi. ₉Dan den mus gi den sani dati na wan fu den prenspari man fu a kondre, wan di e wroko dyaso ini a kownu-oso. Dan a man dati e weri a krosi gi a man di kownu wan gi grani, èn poti en sidon tapu a asi. A srefi man dati mus hori a titei fu a asi nanga a man na en tapu èn tyari en waka tapu a pren fu a foto. Dan a mus bari taki: ‘Na disi e psa nanga a man di kownu wani gi grani!’ ” ₁₀Ne kownu taigi Haman taki: “Dan yu go es'esi go teki a krosi nanga a asi, èn du soleki fa yu taki nanga Mordekai, a Dyu, di e wroko gi mi na mofodoro fu a kownu-oso. Yu mus du ala san yu taki.” ₁₁So Haman go teki a krosi nanga a asi, a weri a krosi gi Mordekai, dan a meki a rei tapu a pren fu a foto. A ben e bari tu taki: “Na disi e psa nanga a man di kownu wani gi grani!”

₁₂Baka dati Mordekai drai go baka na mofodoro fu a kownu-oso, ma Haman go es'esi na en oso. Soso syen meki a ben tapu en fesi. ₁₃Na oso a ferteri en uma Seres nanga ala den mati fu en, ala san miti en. Dan en uma Seres nanga den mati fu en, di ben de den raiman fu en tu, taigi en taki: “Yu bigin fu lasi a feti kba di yu e feti nanga Mordekai. Fu di a man na wan Dyu, yu no o man nanga en. Na lasi nomo yu sa lasi.”

₁₄Den ben e taki nanga Haman ete, di wantu fu den prenspari wrokoman fu kownu kon teki Haman. Es'esi den tyari en go na a nyanyan di Ester ben meki spesrutu klari.

₁Dan so kownu nanga Haman ben go baka na Ester fu nyan nanga en, ₂fu a di fu tu leisi. Di den ben e dringi win, kownu aksi Ester baka taki: “Ester, san yu wani? San yu wani aksi mi? Mi sa gi yu en. Awinsi na afu fu a kondre fu mi srefi. Mi o du san yu aksi.” ₃Ne frow Ester piki kownu taki: “Efu kownu abi prisiri nanga mi èn efu kownu sa wani, meki kownu kibri mi nanga mi folku fu den no kiri wi. Na dati mi wani èn na dati mi e aksi. ₄Bika den seri mi nanga a folku fu mi, fu kiri wi. Efu na seri den ben seri wi leki srafu nomo, mi no ben o ferferi kownu nanga a sani disi. Ma now den wani kiri wi alamala.” ₅Ne kownu Ahasveros aksi en frow Ester taki: “Suma na a man, èn pe a man de di prefuru fu du sowan sani?” ₆Ester piki taki: “Na wan feyanti di wani pina wi, na Haman, a takru-ati man drape!”

Haman skreki srefsrefi fesi kownu nanga en frow. ₇Kownu opo nanga bigi atibron, a libi a win dan a go tapu a dyari fu a kownu-oso. Ma Haman ben tan tnapu fu begi Ester gi en libi. Bika a ben si tak' kownu ben o kiri en. ₈Dan a srefi momenti di kownu e drai kon baka fu a dyari fu a kownu-oso kon ini a bigi kamra, pe a nyanyan ben poti klari, Haman ben fringi ensrefi tapu a bradi bangi pe Ester ben de. Ne kownu bari taki: “Dan yu wani du mi frow ogri ete, leti pe mi de na ini mi kownu-oso?” Fa kownu taki dati, na so den domru wan duku lontu a fesi fu Haman. ₉Dan Harbona, wan fu den prenspari wrokoman di ben wroko spesrutu gi kownu wawan, taigi kownu taki: “Luku, Haman ben seti wan postu fu tutenti-na-feifi meter poti na en oso, fu anga Mordekai, di ben tyari a tori fu kownu kon na krin.” Ne kownu komanderi taki: “Un anga Haman na a postu.” ₁₀Dan den anga Haman na a postu di a ben seti poti gi Mordekai. Di dati psa a atibron fu kownu kon saka.

₁Tapu a srefi dei dati kownu Ahasveros gi Ester ala sani di Haman, a feyanti fu den Dyusma, ben abi. A pisten dati Ester taigi kownu tu tak' en nanga Mordekai ben de krosbei famiri. A sani dati ben meki taki Mordekai ben man kon na kownu. ₂Dan kownu puru a linga nanga a stampu fu en na en finga dan a langa en gi Mordekai. Baka dati Ester gi Mordekai a frantwortu abra den sani di Haman ben abi.

₃Wan syatu pisten baka dati, Ester go baka na kownu. Nanga watra-ai a fadon na kownu futu èn begi en fu a meki tak' a ogri di Haman, a bakapikin fu Agag, ben prakseri fu du nanga den Dyusma, no go doro. ₄Kownu langa a gowtu kownutiki fu en go na Ester. Dan Ester opo tnapu fesi kownu, ₅èn a taigi en taki: “Efu kownu feni en bun èn efu kownu abi prisiri nanga mi, efu kownu si tak' na a yoisti sani fu du èn efu kownu lobi mi, dan meki kownu seni wan brifi gwe di mus meki den fosi brifi no teri moro, di Haman, a manpikin fu Hamedata èn bakapikin fu Agag, ben seni gwe na ala den pisi fu a kondre fu puru ala den Dyusma na pasi. ₆Bika fa mi o man luku a ogri di o miti a folku fu mi? Fa mi o man si fa den e kiri den famiri fu mi?” ₇Dan kownu Ahasveros taigi Ester nanga a Dyu Mordekai taki: “Luku, mi gi Ester ala san Haman ben abi èn Haman srefi den anga na wan postu, fu di a ben wani kiri den Dyusma. ₈Unu skrifi brifi now ini mi nen èn un stampu den nanga a linga fu mi. Un kan skrifi na ini den brifi san un si tak' bun gi den Dyusma. Ma mi no man teki no wan sani baka di skrifi ini mi nen èn di abi a stampu fu mi na en tapu.”

₉Dan Ester nanga Mordekai seni kari den skrifiman fu kownu wantron. A ben de a tutenti-na-dri dei fu a di fu dri mun, dati na a mun Siwan. Dan den skrifiman skrifi ala sani san Mordekai komanderi den. Den brifi ben de gi den Dyusma, gi den heihei man di kownu ben poti fu tiri difrenti pisi fu a kondre fu en, gi den komsarsi fu iniwan pisi fu a kondre nanga gi den edeman fu den difrenti pisi fu a kondre, fu India te go miti Etiopia, wan hondro tutenti nanga seibi pisi. Ala den pisi fu a kondre kisi a brifi tapu a fasi fa den e skrifi èn ala folku kisi en ini den eigi tongo. Den Dyusma kisi en tu ini den eigi fasi fa den e skrifi nanga ini den eigi tongo. ₁₀Den skrifiman skrifi den brifi ini a nen fu kownu Ahasveros èn den poti a stampu fu a linga fu kownu na den tapu. Dan den seni den brifi gwe es'esi nanga spesrutu boskopuman tapu asi di ben e lon esi, asi di ben e kweki gi kownu srefi. ₁₁A ben skrifi na ini den brifi tak' kownu gi den Dyusma fu iniwan foto, a leti fu bondru densrefi èn fu feti gi den libi. Den ben abi a leti fu kiri iniwan grupu sma di ben kon nanga fetisani na den tapu fu kiri den, den uma nanga den pikin, awinsi fu sortu folku noso pisi fu a kondre den grupu dati ben kmopo. Te den ben kiri den, den ben kan go teki den sani tu di den ben abi. ₁₂A leti disi di kownu Ahasveros ben gi den Dyusma, ben o de gi wàn dei ini ala den pisi fu a kondre. A ben de gi a di fu tin-na-dri dei, fu a di fu twarfu mun, a mun Adar. ₁₃Den brifi ben mus panya ini ala den pisi fu a kondre. Den sani di ben skrifi na ini ben mus tron wèt èn ala den folku ben mus kisi den sani dati fu yere. Den Dyusma ben mus meki densrefi klari gi a dei dati fu ben feti nanga den sma di ben wani kon feti nanga den. ₁₄Den spesrutu boskopuman tapu den asi fu kownu di ben e lon esi, ben tyari den brifi gwe es'esi, soleki fa kownu ben komanderi. Den sani di skrifi na ini a brifi ben tron wan wèt tu na ini fort Susan.

₁₅Di Mordekai kmoto fu a kownu-oso, a ben weri krosi di kownu e weri. A krosi fu en ben meki fu blaw katun nanga linnen. A langa dyakti di a ben weri tapu a dati, ben meki fu fini linnen krosi nanga purper. A ben weri a banti nanga gowtu na ini, lontu en ede tu. Den sma fu a foto Susan ben meki prisiri èn den ben breiti trutru. ₁₆Gi den Dyusma wan bun ten ben broko pe den ben kisi grani nanga prisiri. ₁₇Ini ala den pisi fu a kondre nanga den foto, pe a boskopu ben doro di kownu ben komanderi, èn di ben tron wan wèt, den Dyusma ben breiti èn den ben e meki prisiri. A dei dati ben de wan bun dei gi den. Den ben e hori fesa nanga furu nyanyan nanga dringi. Furu sma fu tra folku tron Dyusma tu, bika den ben kon frede now gi den Dyusma.

₁Den bribisma ben kon moro furu èn den wan di ben e taki Grikitongo ben e krutukrutu tapu den wan di ben e taki Hebrewtongo. Den ben feni taki den uma fu den di masra dede kba, no ben kisi a moni di den ben mus kisi ala dei fu bai den nyanyan. ₂So den twarfu boskopuman fu Yesus kari ala den bribisma kon makandra. Dan den taigi den taki: “A no de wan bun sani tak' wi no abi ten fu preiki a wortu fu Gado, fu di wi mus luku nomo tak' tra sani e waka bun. ₃Brada nanga sisa, dat' meki un mus suku seibi man na un mindri di den sma sabi leki bun sma. Den mus koni èn den mus furu nanga a Santa Yeye, fu wi kan poti den fu du a wroko disi. ₄Dan wi fu wi sei sa go doro fu begi èn fu preiki a wortu fu Gado.” ₅Ala den bribisma ben agri nanga a sani disi. So den teki seibi man na den mindri. Den man dati ben de Stefanus, di ben abi wan tranga bribi èn di ben furu nanga a Santa Yeye. Moro fara den teki Filipus, Prokorus, Nikanor, Timon, Parmenas nanga Nikolaus fu a foto Antiokia. A man disi no ben de wan Dyusma, ma fosi a tron wan bribisma, a ben teki a Dyubribi. ₆Dan den tyari den seibi man disi gi den boskopuman fu Yesus, di begi gi den èn poti anu na den tapu. ₇So a wortu fu Gado ben panya go moro fara, èn a grupu fu den bribisma ini Yerusalem ben kon moro bigi. Bun furu priester srefi ben teki bribi ini Masra Yesus.

₈Gado ben sori Stefanus En bun-ati psa marki èn A gi en krakti. So Stefanus bigin du wondru èn a sori a pipel bigi marki. ₉Ma wantu sma ben feni taki a leri fu Stefanus no bun. Den sma dati ben kmopo fu den foto Sirena nanga Aleksandria, èn den ben de fu a kerki di ben nen: A kerki fu den Libertijnsma. Makandra nanga tra Dyusma fu Silisia nanga Asia, den man dati go na Stefanus fu hari taki nanga en. ₁₀Ma den no ben man piki noti tapu den koni sani di a Yeye ben meki Stefanus taki. ₁₁So den pai wantu man fu ferteri lei fu Stefanus. Den man dati taki: “Un yere fa a afrontu Moses nanga Gado.” ₁₂Na so den tyari dyugudyugu mindri a pipel, den fesiman fu a folku, nanga den sabiman fu Gado wèt. Dan den grabu Stefanus èn den srepi en tyari go fesi a grankrutu fu den Dyusma. ₁₃Dan den tyari tra sma kon di ben lei gi Stefanus. Den taki: “A man disi no e kba fu taki takru fu a santa presi disi nanga a wèt fu Moses. ₁₄Bika wi yere fa a taki tak' Yesus fu Nasaret o broko a presi disi puru èn kenki den gwenti di Moses ben leri wi.” ₁₅Dan ala den man fu a grankrutu di ben sidon fu krutu Stefanus, hori ai na en tapu èn den si fa en fesi ben gersi di fu wan engel.