Dag 180 van 365- Job 14-16 en Handelingen 9:23-43

₁Wan libisma e gebore swaki, a no de noti,

a libi fu en syatu èn a furu nanga problema.

₂A de leki wan bromki di e opo,

ma di e flaw gwe,

leki wan schaduw di e psa es'esi,

èn di yu no e si moro.

₃Gado, dan na tapu so wan sma Yu e hori ai?

Na so wan sma Yu e kari kon na krutu?

₄Suma sa man puru wan sani di krin ini wan sani di no krin?

No wan sma!

₅Yu poti na fesi kba olanga wan sma o tan na libi,

omeni dei Yu gi en.

No wan sma kan psa a ten dati di Yu poti.

₆Dan fu sanede Yu no e puru Yu ai na en tapu dan?

Libi a sma meki a de fu en.

Meki a prisiri fu a syatu ten di a de na libi,

leki fa wan man di e wroko dei wroko

e prisiri nanga en pai na a kba fu a dei!

₇Gi wan bon howpu de ala ten.

A kan gro baka efu sma kapu en trowe,

èn a e gi nyun pransun.

₈Awinsi den rutu fu en kon owru ini a gron,

èn a tompu fu en dede ini a doti,

₉a e kisi libi baka leki fa a smeri watra,

èn a e kisi taki baka leki wan yongu bon.

₁₀Ma te wan libisma dede, a e lasi ala en krakti,

te en bro koti, a kba gi en.

₁₁Leki fa a watra fu wan kriki e drei,

èn a watra fu wan liba e tapu lon,

₁₂na so a de nanga wan sma di dede,

pe a didon, a no e opo moro.

Solanga heimel de, a no e opo,

a no e wiki fu a sribi di a e sribi.

₁₃Tye, efu Yu ben sa kibri mi ini dedekondre,

efu Yu ben sa kibri mi drape,

te leki a atibron fu Yu ben saka.

Poti wan ten gi mi fu tan drape,

èn prakseri mi baka na a kba fu a ten dati.

₁₄Te wan sma dede,

a no kan kon na libi baka.

Efu dati ben de so

mi bo abi howpu ini a tranga ten disi,

èn mi bo tan wakti tapu a ten

di mi bo fri fu a pina.

₁₅Dan te Yu bo kari mi, mi bo piki,

èn Yu bo angri baka fu si mi

di Yu ben meki nanga Yu eigi anu.

₁₆Yu bo luku mi tu fu noti no miti mi,

ma Yu no bo hori Yu ai na mi tapu moro

fu luku den sondu fu mi.

₁₇Yu bo poti den sondu fu mi na ini wan saka,

èn tai a saka bun steifi.

Yu bo tapu den kruktudu fu mi.

₁₈Ma leki fa wan bergi e broko pis'pisi te a fadon,

èn bergiston e rutu kmopo fu en presi,

₁₉leki fa liba watra e broko ston di didon ini a liba,

èn leki fa sibibusi e wasi santi tyari gwe

na so Yu e broko a howpu fu libisma.

₂₀Yu e basi en fu têgo èn a e dede gwe.

En fesi e kenki te Yu e seni en gwe.

₂₁Den manpikin fu en e meki nen,

noso den e fadon, a no sabi not'noti.

₂₂Soso en eigi skin-ati a sabi,

èn a kan firi sari gi ensrefi wawan.”

₂“Fa wan kon'koni man kan piki so don?

Den sani di a e taki e fer'feri sma

leki a faya winti di e kmoto fu oostsei.

₃Fa a kan suku en leti nanga den soso taki dati,

nanga wortu di no abi no wan krakti?

₄Boiti dati, yu e broko a bribi di sma abi ini Gado,

èn yu e meki sma lasi lespeki gi En tu.

₅Bika na den kruktudu fu yu e meki yu e taki den sani dati,

èn yu e taki leki den sma di e kori trawan.

₆A no mi, ma na yu eigi mofo e krutu yu,

na den sani di yusrefi e taki e sori taki yu du ogri.

₇Yu a no a fosi sma di gebore,

èn Gado no meki yu tu fosi A meki den pikin bergi.

₈Di Gado ben e hori En konmakandra,

yu no ben drape fu arki san A ben e taki.

A no yu wawan abi ala koni fu grontapu.

₉San yu sabi di wi no sabi?

Sortu koni yu abi di wi no abi?

₁₀Bigisma de na yu oso, ma bigisma de na wi oso tu,

sma di owru moro yu p'pa.

₁₁A gersi tak' a trowstu di Gado e trowstu yu

no sari yu,

èn a switi fasi fa A e meki un taki nanga yu

no bun nofo gi yu.

₁₂Fu sanede meki yu ati e faya so,

tak' yu ai srefi e koti faya?

₁₃Fu sanede yu ati e bron so tapu Gado,

tak' yu e taki den sani dati nanga yu mofo?

₁₄Suma na wan libisma fu prakseri tak' a krin ini Gado ai,

noso wan sma di kmopo ini wan uma tak' a e libi bun?

₁₅Yere, efu Gado no e fertrow den engel srefi,

efu srefi a heimel no krin ini En ai,

₁₆o moro A sa si libisma di pori, leki wan groskin sani,

libisma di e furu ensrefi nanga kruktudu,

leki na watra a e dringi.

₁₇Yob arki, mi wani taigi yu wan sani,

mi wani ferteri yu san mi si.

₁₈Na wan sani di koniman e taki,

wan sani di den bigisma fu den no kibri gi den,

₁₉den bigisma di Gado ben gi a kondre gi den wawan,

a ten di no wan doroseisma ben boro kon na den mindri:

₂₀Ogri-ati sma e libi den heri libi langa na ini benawtu,

sosrefi a syatu pisten di den sma e libi di e pina trawan.

₂₁Den e yere sani nanga den yesi di e frede den,

te den e prakseri tak' noti no kan miti den,

den feyanti fu den e broko kon na den tapu.

₂₂Den sabi tak' na so nomo a libi fu den o waka,

den sabi tak' den o dede wan takru dede.

₂₃Den sabi taki na tingifowru o nyan a dedeskin fu den,

den sabi tak' den o lasi den libi her'esi.

₂₄Soso problema nanga frede e naki den,

den e firi leki sma ini wan foto

di wan kownu nanga en legre o teki abra.

₂₅Bika den kaka den futu gi Gado,

gi a Wan di abi ala makti.

₂₆Nanga drei ai den e lon go na En tapu nanga wan bun tranga schild.

₂₇Den lobi fatu gi den fesi,

nanga gi den bere.

₂₈Den go libi na ini foto di Gado ben fluku,

ini oso pe sma no ben e libi moro,

oso di kan broko fadon ibri momenti.

₂₉Den no o tan gudu, a gudu fu den o kba.

A gudu no o go nanga den te den o go na dedekondre.

₃₀Den no o man kmopo gi a dungru fu dedekondre.

Den o de leki bon di taki teki faya,

èn a bro fu Gado o wai den tyari gwe.

₃₁Efu den e fertrow na tapu a makti fu den,

den o kon na syen,

bika a makti dati o kori den.

₃₂Den e dede gwe fosi den ten,

sondro fu kisi a okasi fu gro wan bun fasi.

₃₃Den de leki wan droifibon

di e lasi en froktu fosi den lepi,

leki wan oleifbon

di e trowe den bromki fu en.

₃₄Bika a grupu sma disi di no wani dini Gado,

den sa dede sondro fu libi pikin na baka.

Faya sa bron den oso fu den sma di ben lobi teki tyuku.

₃₅Leki fa wan uma e hori bere èn meki pikin,

na so den sma disi inisei furu nanga kruktudu

èn den e puru ogri kon na doro.

Soso bedrigi furu den inisei.”

₂“Mi yere den sani di un e taki furu leisi kba.

Prefu un e trowstu mi, un e meki mi firi moro ogri.

₃Un no man tapu nanga den soso sani di un e taki?

San e trusu yu so tak' yu wani piki nomonomo

tapu den sani di mi e taki?

₄Efu un ben de ini mi presi,

mi bo man taki a srefi fasi nanga un tu.

Mi bo man taigi un wan lo sani,

mi bo man seki mi ede gi un tu.

₅Ma mi no bo du dati.

Den sani di mi bo taigi unu bo gi un dek'ati,

den wortu fu mi bo meki un firi moro bun.

₆Ma noti no e lekti a pen fu mi,

awinsi mi taki, awinsi mi tan tiri.

₇Gado, Yu meki mi lasi ala mi krakti,

Yu wai mi heri famiri puru na pasi.

₈Den marki di e sori san Yu du nanga mi

de leki wan kotoigi fu krutu mi.

Mi no abi no wan meti moro na mi skin,

dati srefi wani sori tak' mi du ogri.

₉Gado e priti mi na ini hebi atibron

èn A no wani sabi not'noti fu mi.

A e kaw na tapu En tifi gi mi,

mi Feyanti e piri En ai e luku mi.

₁₀Sma e lafu mi na ini mi fesi,

den e teki mi e meki spotu

te den e naki mi na ini mi fesi,

den e bondru tu fu du mi ogri.

₁₁Gado e gi mi abra na sondusma,

na sma di e du ogri.

₁₂Mi ben e libi tiri fu mi, ne Gado naki mi broko pis'pisi.

A grabu mi hori na mi neki, dan A fringi mi trowe na gron.

Yu teki mi leki a sani tapu san Yu e marki,

fu sutu den peiri fu Yu.

₁₃Fu alasei den peiri fu En e sori kon na mi tapu,

dan sondro fu sari mi pikinso srefi,

A sutu den niri fu mi boro,

a gari fu mi fadon na gron.

₁₄Leki wan dyadya fetiman A e lon kon na mi tapu,

a wan mankeri A e gi mi baka a trawan.

₁₅Na soso mi lowkrosi mi e weri,

mi fesi fadon èn mi lasi ala mi krakti.

₁₆Mi fesi sweri fu a krei di mi e krei,

lontu den ai fu mi blaka.

₁₇Ma mi no du no wan sma ogri,

èn mi ben e begi nanga wan krin ati.

₁₈Tye, santi, no tapu a brudu fu mi di e lon fu soso,

no wan sma no mus tapu mi tu,

te mi e kari fu kisi mi leti!

₁₉Ma luku, srefi now mi abi wan kotoigi ini heimel,

mi afkati, de leti drape.

₂₀Now di den mati fu mi e teki mi e meki spotu,

mi e suku mi yepi na Gado nanga ala mi watra-ai.

₂₁A kotoigi fu mi sa tak' nanga Gado gi mi,

leki fa wan sma e meki tu trawan kon bun baka.

₂₂Bika na wantu yari nomo mi abi fu go ete,

dan mi sa abi fu waka a pasi

fu pe mi no kan drai kon moro.”