Dag 182 van 365- Job 20-21 en Handelingen 10:24-48

₂“Mi mus piki yu fu di den prakseri fu mi e dangra mi.

èn a e kuku na mi inisei.

₃Den sani di mi yere yu taki afrontu mi,

ma fu di mi e ferstan sani bun,

mi sabi fa fu piki yu.

₄Yu mus sabi taki sensi di grontapu meki,

sensi di libisma de na grontapu,

₅tak' a prisiri fu ogri-ati sma

na fu wan syatu pisten nomo,

èn di fu den sma di no wani dini Gado

na fu wan momenti nomo.

₆Awinsi a heimemre fu en e doro te na heimel,

èn a ede fu en e miti den wolku,

₇leki en eigi morsu a o kmopo fu têgo na pasi,

den sma di ben si en o aksi taki: ‘Pe a de?’

₈A o psa gwe leki wan dren,

a no o de fu feni moro,

den e fergiti en

leki sani di sma e si na ini den sribi.

₉Den ai di ben gwenti si en, no e si en moro,

a tanpresi fu en srefi no o si en moro tu.

₁₀Den manpikin fu en

o abi fu go saka densrefi gi den pôtisma,

èn gi den ala a gudu baka

di den p'pa ben puru na den anu.

₁₁A skin fu en kan lai krakti,

leki di fu wan yongusma,

ma a o go nanga en ini en grebi.

₁₂Awinsi a ogri switi na ini en mofo,

awinsi a e kibri en ondro en tongo,

₁₃tapu en drape fu kan tesi en moro langa,

kwinsi en hori na loktusei fu en mofo,

₁₄a e drai en bere te a psa go drape,

a e tron a bita fu wan takru sneki na ini en bere.

₁₅Sma gudu a ben swari,

ma a abi fu puru den kon na doro baka.

Gado srefi e meki a spiti den puru.

₁₆Na a bita fu wan takru sneki a ben e soigi,

wan sneki sa beti en kiri tu.

₁₇A no sa sabi a prisiri fu abi sani bogobogo,

fu liba fu merkilun nanga oni di e lon abra.

₁₈Ala san a ben tyari nanga muiti kon na wan,

a abi fu gi baka, a no kan swari en,

a no o man prisiri tu nanga a moni di a meki.

₁₉Bika a pina pôtisma,

a libi den na ini den benawtu,

teki oso abra, di a no en meki.

₂₀Fu di a gridi fu en e meki tak' sani no e sari en,

a no man kibri no wan fu den gudu fu en.

₂₁A e nyan ala san a abi,

dat' meki a bun ten fu en, no e tan fu langa.

₂₂Awinsi fa a gudu, a de na ini benawtu,

ala ogri di a du sma e miti en.

₂₃Na furu a ben e furu en bere ete,

di Gado lusu a faya atibron fu En leki alen na en tapu.

A e firi en te na ini en inisei.

₂₄A kan lon o tranga a wani gi a isri fetisani,

ma a kopro peiri sa boro en nomonomo.

₂₅A peiri boro a skin fu en, tak' a de fu si na a tra sei

a gari fu en e dropu na mofosei fu a peiri,

frede dede naki en.

₂₆Bigi dungru de klar'klari e wakti en,

wan faya, di a no sma leti, e bron en,

a faya e pori ala tra sani tu di de ini en oso.

₂₇Heimel e tyari den kruktudu fu en kon na krin,

grontapu e sori finga na en tapu.

₂₈Tranga skwala e srepi a oso fu en tyari gwe,

den e srepi en tyari gwe tapu a dei

fu a hebi atibron Gado.

₂₉Na den sani disi Gado kibri gi den ogri-ati sma,

a paiman di Ensrefi poti e wakti en.”

₂“Yere, un arki bun san mi e taki,

meki dati de a trowstu di un e gi mi.

₃Un hori pasensi nanga mi, dan mi sa taki,

dan te mi kba, un kan teki mi meki spotu.

₄A no nanga wan libisma mi abi en di mi e kragi so.

Efu dati ben de so mi ben sa abi pasensi.

₅Un luku mi fin'fini, dan un o ferwondru sote,

tak' un o tnapu nanga opo mofo.

₆Te misrefi e prakseri san miti mi, mi e frede,

èn mi heri skin e beifi.

₇Fu sanede ogri-ati sma e libi so langa?

O moro den e owru, o moro den e kisi makti.

₈Den e si fa den pikin fu den e tron wan sani,

den e si den granpikin fu den srefi.

₉Den e libi ini freide ini den oso,

den no e frede noti,

èn a wipi fu Gado no e miti den.

₁₀Te den bulu fu den dyompo den kaw,

a no abi misi tak' den kaw e hori bere,

èn te den e kisi den pikin, den no e lasi no wan.

₁₁Den pikin fu den ogri-ati sma

e lon go prei fu den na dorosei,

leki pikin skapu den e dyompodyompo lontu.

₁₂Den e singi èn den e prisiri

tapu a poku fu tamboerijn, citer nanga froiti.

₁₃Sani e go den ogri-ati sma bun, den heri libi langa,

èn te den e dede, den e dede ini freide.

₁₄Ma Gado den e taigi taki:

‘Libi un meki un de fu unu,

un no wani libi leki fa Yu wani!

₁₅Suma na a Wan di abi ala makti

tak' un mus anbegi En?

Sortu wini un o abi efu un begi?’

₁₆Ma yere, a go di a libi e go den bun,

no de ini den eigi anu.

Dat' meki mi e tan fara fu a fasi fa den e denki.

₁₇Omeni leisi un e si tak' ogri-ati sma

e dede fosi den yuru kisi,

tak' bigi ogri e miti den,

noso tak' Gado e meki den e pina

fu di En ati e bron na den tapu?

₁₈Oten un e si tak' winti e wai den gwe leki dreigrasi,

noso tak' tranga winti e bro den tyari gwe leki aleisibuba?

₁₉Un e taki: ‘Gado e meki den pikin fu den

pai fu den sondu di den du.’

Ma mi e winsi tak' Gado

sa meki densrefi pai fu den sondu,

fu den kan firi en.

₂₀Densrefi mus si sortu pori sondu e tyari,

densrefi mus firi a atibron fu a Wan di abi ala makti.

₂₁Bika te den yuru kisi èn den dede,

den no e span moro san e psa nanga den famiri.

₂₂Suma sa man leri Gado wan sani?

En di e leisi strafu gi den wan di de ini heimel?

₂₃Son sma e dede gesontu,

den e dede ini freide, sondro wan broko-ede.

₂₄A skin fu den e sori tak' den ben e nyan bun,

den bonyo fu den de steifisteifi ete.

₂₅Tra sma baka e dede nanga wan broko ati,

sondro fu ben sabi san na prisiri.

₂₆Ma den ala tu e didon ini a doti,

èn woron e tapu den.

₂₇Un yere, mi sabi san un e prakseri.

Mi sabi san un wani du tu fu du mi ogri.

₂₈Un e aksi taki:

‘Pe a oso fu a guduman de?

Pe den ogri-ati man e libi?’

₂₉Un aksi den sma di e go na difrenti presi,

èn un kan bribi san den e taki.

₃₀Te bigi nowtu de na wan presi,

noti no e psa nanga ogri-ati sma.

Den e tan na libi te kon miti a dei

fu a bigi atibron fu Gado.

₃₁Suma e bari en ini en fesi fu a fasi fa a e libi?

Suma e strafu en te a e du ogri?

₃₂Ma nanga ala lespeki den e tyari en go beri,

èn sma e hori wakti na a grebi fu en.

₃₃Kowru safri a e didon fu en ondro gron,

bun furu sma ben go na en fesi,

èn den wan di kon na en baka no ben de fu teri.

₃₄Ma a trowstu fu unu, no wani taki noti.

Den sani di un e piki mi na soso lei.”