Dag 186 van 365- Job 30-31 en Handelingen 13:26-52

₁Ma now sma di yongu bari moro mi,

e teki mi e meki spotu.

Mi no bo wani den p'pa fu den

leki wan fu den dagu fu mi srefi

di e luku den meti fu mi.

₂Boiti dati, sortu wini mi abi na den

now di den lasi ala den krakti kba,

now di den kon swaki sote kba?

₃Pina nanga angri e moro den sote

tak' den e hari psa ini a dreisabana te neti,

e kaw drei rutu di den e feni ini a gron.

₄Den e piki blad fu busi wiwiri èn den e

nyan den rutu srefi fu brembon.

₅Sma no wani den fu libi na den mindri,

den e bari e yagi den leki fufuruman.

₆Den abi fu libi na a lantyi fu den dipi presi mindri den bergi,

ini olo ini a gron nanga olo na bergiskin.

₇Den e dyeme leki meti mindri a busbusi,

ondro a busbusi pe den de makandra,

₈man sondro wan enkri ferstan, di sma e si leki noti,

man di sma yagi nanga fonfon puru fu a kondre.

₉Now den pikin fu den

e teki mi e meki spotu na ini singi,

èn na soso odo den e koti gi mi.

₁₀Fu di den e fisti fu mi, den no e kon krosbei,

noti no e tapu den fu spiti ini mi fesi.

₁₁Fu di Gado puru ala krakti ini mi

èn broko mi saka,

den e du san den wani nanga mi.

₁₂Wan grupu fu den tnapu na mi let'anu sei,

den e trowe mi na gron,

èn den e kon na mi tapu fu puru mi na pasi.

₁₃Den tapu a pasi gi mi fu mi no kan lon,

den e meki ala muiti fu kiri mi,

èn den no abi no wan sma fanowdu fu yepi den.

₁₄Den e broko psa a skotu di mus kibri mi,

leki skwala den e hari psa mindri den ston di e fadon.

₁₅Sani di e frede mi, e miti mi fu alasei,

a grani fu mi wai gwe leki winti,

a koloku fu mi leki wan wolku.

₁₆Now a libi fu mi srefi e kmopo ini mi,

na soso pina mi e pina dei fu dei.

₁₇Te neti a pen e dyuku mi te ini mi bonyo,

a pen di e nyan mi no e kon na wan kba.

₁₈Gado grabu mi na mi krosi

èn A e seki mi nanga tranga,

A e kwinsi mi na a neki fu a krosi fu mi.

₁₉A fringi mi ini a tokotoko,

mi kon tron a srefi leki doti nanga asisi.

₂₀Te mi e bari kari Yu fu Yu yepi mi, Yu no e piki mi.

Te mi tnapu e begi, Yu no e luku mi.

₂₁Yu kenki, now Yu no abi no wan sari-ati nanga mi.

Nanga ala Yu krakti Yu kon na mi tapu.

₂₂Yu e meki a winti opo mi tyari gwe,

Yu e meki a tranga winti du san a wani nanga mi.

₂₃Iya, mi sabi tak' Yu e tyari mi fu mi lasi mi libi,

fu mi go na a presi pe ala sma e moksi di ben de na libi.

₂₄A no abi misi taki no wan sma sa pina wan trawan

di de ini hebi nowtu,

di e bari e suku yepi na ini en problema.

₂₅Mi ben e krei nanga den wan di ben e psa tranga ten

èn mi ben e sari pôtisma.

₂₆Na dat' meki mi ben e ferwakti bun, ma na ogri kon,

mi ben e ferwakti leti, ma na dungru kon.

₂₇Sensi di a benawtu disi miti mi,

mi bere e drai nomonomo.

₂₈Nanga blaka krosi mi e waka lontu,

sondro fu si a faya fu a son,

te mi opo tnapu ini a konmakandra fu den fesiman,

na fu bari suku yepi.

₂₉Mi e bari leki wan bus'meti,

leki wan bus'fowru, di de ini nowtu.

₃₀A buba fu mi kon blaka èn a e piripiri,

korsu srefi e priti mi skin.

₃₁A citer fu mi e prei soso dede-oso singi now,

a froiti fu mi, soso sari singi.”

₁Dan Yob taki moro fara taki:

“Mi meki wan ferbontu nanga mi ai,

tak' mi no o luku yongu uma nanga takru lostu.

₂San un kan ferwakti fu Gado ini heimel?

San a Wan di abi ala makti poti klari e wakti wi?

₃Bigi ogri e wakti den wan di no e libi bun,

èn ongoloku den wan di e du ogri.

₄Gado e luku ala san mi e du,

A e teri ala futu di mi e puru.

₅Mi e sweri tak' noiti mi lei gi sma,

mi no bedrigi sma tu

fu puru mi srefi es'esi na ini wan tori.

₆Gado kan wegi mi na tapu wan soifri wegi,

dan A o si tak' mi no du ogri.

₇Efu mi futu kmopo tapu a pasi fu En,

mi ati waka baka den lostu fu mi ai,

èn sondu flaka den anu fu mi,

₈tra sma kan nyan den nyanyan di mi koti,

meki den rutu ala den sani puru di mi prani.

₉Efu mi ati meki mi angri na wan wefi,

efu a meki mi go seti luru gi a uma fu a man

di e tan na mi sei,

₁₀a uma fu mi kan tron srafu fu wan tra man,

èn tra man kan didon na en tapu.

₁₁Bika dati bo de wan bigi ogri, wan kruktudu,

gi san krutubakra srefi ben sa leisi strafu gi mi.

₁₂A no abi misi tak' a huru di mi bo huru,

bo de leki wan faya di bo tyari mi go na mi grebi,

èn di bo bron ala san mi abi.

₁₃Efu mi no ben wani sabi not'noti fu den leti

fu den mansrafu nanga mi umasrafu fu mi,

te un no ben agri fu wan tori,

₁₄fa mi bo du te Gado bo opo fu koti krutu?

San mi bo piki En te A bo ondrosuku a tori?

₁₅En di ben meki mi ini a bere fu mi m'ma,

meki den owktu.

Na a srefi Gado seti un poti drape.

₁₆Mi ben e gi pôtisma ala ten san den ben e aksi,

uma di masra dede kba, mi ben e gi howpu.

₁₇Mi no ben e nyan mi wawan,

ma mi ben e prati en nanga pikin

di no abi p'pa nanga m'ma moro.

₁₈Mi heri libi mi ben de leki wan p'pa gi den,

mi heri libi mi sorgu tu fu uma di masra dede kba.

₁₉Te mi ben e si wan sma di ben de fu dede,

fu di a no ben abi krosi fu weri,

noso wan pôtisma di no ben abi noti fu tapu en skin,

₂₀a ben e blesi mi nanga en heri ati,

bika mi ben e gi en krosi di ben e gi en waran,

krosi di ben meki nanga a wiwiri fu den eigi skapu fu mi.

₂₁Efu mi ben opo mi anu fu tapu skreki

gi wan pikin di no abi p'pa nanga m'ma moro,

fu di mi sabi tak' den krutubakra na a bigi doro fu a foto

ben o teki a sei fu mi,

₂₂mi skowru kan kmopo fu en presi

èn mi anu kan broko na tu.

₂₃Bika wan sani mi e frede:

fu Gado meki bigi ongoloku miti mi,

mi no bo man du noti efu A bo sori mi a makti fu En.

₂₄Noiti mi poti mi howpu tapu gowtu,

noiti mi taigi fini gowtu taki: Tapu yu mi e bow.

₂₅Noiti mi prisiri fu a bigi gudu fu mi,

noso fu di mi anu tyari someni gudu

kon na wan.

₂₆Noiti mi meki a son,

te a ben e tnapu ini ala en krakti na loktu,

noso a moi munkenki,

te a ben e psa,

₂₇kori mi ati wan kibrifasi

fu fringi bosi gi den fu anbegi den.

₂₈Dati srefi bo de wan kruktudu

di bo meki krutubakra srefi leisi strafu gi mi,

bika nanga dati mi bo drai baka gi Gado.

₂₉Noiti mi prisiri tu te ongoloku ben miti mi feyanti,

noso bari lafu te a ben de na ini benawtu.

₃₀Nono, mi hori misrefi fu no sondu nanga mi mofo,

èn mi no winsi dede gi en.

₃₁Den ososma fu mi e taki fu mi taki:

‘Ala sma ben kan nyan meti te a sari en.’

₃₂Mi no ben meki no wan doroseisma sribi na strati,

èn mi ben e opo mi doro gi sma

di ben e go fu a wan presi na a trawan.

₃₃Mi no kibri mi sondu tu, soleki fa tra sma e du,

fu tapu den fowtu fu mi poti ini mi krosi.

₃₄Efu mi ben du dati, mi bo abi fu frede

te bun furu sma ben de makandra,

te den difrenti famiri bo broko mi saka.

Ma mi no ben abi fu hori mi mofo

èn tapu misrefi ini mi oso.

₃₅O, efu wan sma ben sa wani arki mi!

Mi kan gi a dyaranti tak' ala san mi taki tru.

A de now na a Wan di abi ala makti fu A piki mi.

Efu a wan di tyari mi go na krutu

ben sa skrifi den kragi fu en poti tapu papira,

₃₆a no abi misi tak' mi bo poti den tapu mi skowru,

fu ala sma ben kan si den,

èn tai den leki wan banti fu diri ston lontu mi ede.

₃₇Mi kan gi En frantwortu fu ala sani san mi du,

waka miti En leki wan dyadyaman.

₃₈Efu na fufuru mi ben fufuru a pranigron fu mi,

èn den bedi na en tapu ben e krei,

₃₉efu mi nyan den sani di a gi sondro fu pai

èn tyari den gronman ini wan kwinsi,

₄₀dan makamaka kan opo prefu tarwe

èn grasi prefu groto.”