Dag 189 van 365- Job 36-37 en Handelingen 15:22-41

₂“Hori pikinso pasensi ete,

dan mi o meki yu si sani moro krin,

bika sani de ete di Gado wani fu yu yere.

₃A koni fu mi kmopo fu difrenti presi,

èn mi o sori yu tak' a Wan di meki mi abi leti.

₄Den sani di mi e taki tru,

na wan bun koniman tnapu dyaso na yu fesi.

₅Yere, Gado makti,

ma A no e si no wan sma leki noti,

èn noti no de di A no e ferstan.

₆A no e meki ogri-ati sma tan na libi

èn A e gi den mofinawan a leti di den fiti fu kisi.

₇A no e puru En ai tapu den sma di e libi bun,

ma A e opo den,

leki kownu na tapu kownusturu,

A e gi den wan hei presi fu têgo.

₈Ma efu keti tai son sma

èn den de na ini bigi benawtu,

₉Gado e tyari den wroko fu den kon na krin,

den sondu fu den, di meki den kisi heimemre.

₁₀A e meki tak' den e gi yesi na den warskow fu En,

èn A e komanderi den fu den tapu nanga kruktudu.

₁₁Efu den arki èn teki a besroiti fu dini En,

den o psa den dei fu den ini bun,

den yari fu den na ini koloku.

₁₂Ma efu den no wani yere,

den o abi fu koti a liba abra

di e tyari sma go na den grebi.

Den o dede fu di den no e ferstan sani.

₁₃Sma di no wani dini Gado e tan tranga den ati,

srefi te A e strafu den,

den no e aksi En fu A yepi den.

₁₄Den e dede yonguyongu,

leki bakapisi fu a yayo èn syen libi fu den.

₁₅Gado e leri sma sani fu tyari nowtu

kon na den pasi,

A e poti den na ini benawtu fu meki

den kan arki En.

₁₆Yob, na a srefi fasi

Gado puru yu na ini problema,

A meki taki yu ben kan libi fri,

èn taki ini freide yu ben kan nyan fu a tafra fu yu

di ben span nanga a moro bun nyanyan.

₁₇Ma a strafu di Gado leisi gi yu

na a hebi pina di yu e pina

èn yu no o man kmopo na ini.

₁₈Luku bun, no meki a atibron fu yu

meki yu teki sma meki spotu,

noso tak' wan bigi tyuku meki taki yu no koti krutu

tapu wan leti fasi.

₁₉No a gudu fu yu,

no ala a muiti di yu e meki

o man puru yu na ini a nowtu disi.

₂₀No angri fu neti kon,

di e teki folku wantronso tyari gwe.

₂₁De na ai, no drai fu go du ogri,

bika a tesi disi kon na yu pasi fu kibri yu

fu no go na a sei dati.

₂₂Yere, Gado bigi èn A tranga,

suma kan gi sma leri leki En?

₂₃No wan sma kan taigi En san A mus du,

no wan sma kan teki a prefuru fu taigi En taki:

‘Yu du ogri.’

₂₄Ma memre tak' un mus gi Gado grani

fu den sani di A du,

den sani di sma teki meki singi.

₂₅Ala sma e si den wroko fu En,

den e luku den fu fara.

₂₆Yere, Gado bigi èn wi no man ferstan En,

wi no man tak' o owru A de.

₂₇A e hari watra dropu go na loktu ini den wolku,

A e meki den tron alen,

₂₈dan A e meki den wolku trowe a alen

dati kon na gron,

a e fadon bogobogo tapu furu sma.

₂₉Suma sa man ferstan

fa den wolku e hari psa na loktu,

nanga fa a dondru e bari na heimel

₃₀A e meki faya koti ala sei na En lontu,

ma A libi a dipi fu a se na ini dungru.

₃₁Na so A e sorgu gi sma

èn meki tak' den abi bogobogo nyanyan.

₃₂A e grabu a faya di e koti nanga En anu,

dan A e meki a koti pe A e komanderi en.

₃₃A babari di a dondru e meki

e warskow tak' wan tranga winti e kon.

Den meti srefi e firi tak' wan tranga winti e kon.

₁Iya, a tranga winti e meki a ati fu mi srefi beifi,

tak' a gersi leki a wani dyompo kmopo fu en presi.

₂Un alamala, un arki,

un arki a sten fu Gado di gersi dondru,

un arki fa a babari di e kmopo ini En mofo.

₃A e meki a dondru bari ondro a heri heimel,

èn A e meki a faya fu En koti abra a heri grontapu.

₄A sten fu En e bari baka a faya di e koti,

a hebi dondru di de fu yere,

èn A no e hori a faya srefsrefi na baka

te A e meki a sten fu En bari.

₅Te Gado e taki, a gersi leki na a dondru e bari

èn dati de wan ferwondru sani.

A e du bigi sani di wi no man ferstan.

₆Bika a sneeuw A e taigi taki:

‘Fadon na grontapu!’

a hebi alen: ‘Fadon nanga ala yu krakti!’

₇So A e meki tak' no wan libisma man wroko,

den alamala abi fu taki nomo o bigi A de.

₈Srefi den bus'meti e go ini den kibripe,

den tan didon fu den ini den olo.

₉A tranga winti e kmopo kon fu zuidsei,

a kowru fu noordsei.

₁₀Te Gado bro, watra e tron ijs,

a watra fu a se e kon tranga leki isri.

₁₁A e span den dungru wolku nanga watra,

faya e koti na den mindri.

₁₂Den e koti go den e koti kon na alasei,

soleki fa En wani,

alasei fu grontapu den e du

san A e komanderi den.

₁₃Efu na fu strafu grontapu,

noso leki wan marki fu a bigi lobi fu En,

A e meki a psa.

₁₄Yob, arki san mi o taigi yu,

tan tiri èn teki yu ten luku

den wondru fu Gado.

₁₅Yu kan taigi mi fa Gado e tiri den wolku

èn fa A e meki faya koti na den?

₁₆Yu kan taigi mi fa den wolku e dribi

èn fa a Wan di sabi ala sani

e du den wondru fu En?

₁₇Yu no o man, yu di e smuru ini yu krosi

te a faya winti e wai kon fu zuidsei.

₁₈Yu no bo man yepi En di A ben e

bradi a heimel,

di A meki En so tranga leki wan kopro spikri.

₁₉Taigi un dan fa unu mus tyari un kragi fesi Gado,

bika fu di a dungru ini wi ferstan,

un no sabi fa fu du.

₂₀Mi no o aksi fu taki nanga Gado.

Suma o wani fu Gado puru en na pasi?

₂₁Son leisi sma no man si a son,

aladi a de leti baka den wolku,

ma dan a winti e wai psa

èn a e krin loktusei.

₂₂Gado e kmopo fu noordsei e kon,

A e brenki leki gowtu.

A glori fu En de fu frede.

₂₃A Wan di abi ala makti abi bigi krakti,

wi no man kon krosbei fu En.

A krakti fu En bigi

èn A e koti krutu nanga leti,

A no o broko wan sma

di bun sote gi trawan.

₂₄Na dat' meki sma abi lespeki gi En,

ma sma di koni na ini den eigi ai,

A no e luku srefsrefi na wan ai.”