Surinaams Bijbelgenootschap
Leesplannen
Door de Bijbel in een jaar
Dag 193 van 365- Psalm 4-6 en Handelingen 17:16-34

Dag 193 van 365- Psalm 4-6 en Handelingen 17:16-34

Bijbeltekst(en)

Psalm 4

Wan neti begi

1Gi a tiriman fu a singigrupu fu a tempel. A psalm disi mus singi nanga instrumenti di abi snaar. Wan psalm fu David.

2Gado di e meki mi kisi mi leti,

piki mi te mi e bari suku yepi na Yu!

Te sma e pina mi, Yu e gi mi pasi fu kmopo na ini.

Sori mi a sari-ati fu Yu èn du san mi e begi Yu.

3Un di abi makti,

olanga un o tan afrontu a grani fu mi?

olanga un o lobi den sani di no abi no wan warti,

olanga un o tan waka baka den lei? sela

4Un mus sabi taki MASRA e du bun gi den sma

di e tan waka na En baka.

MASRA e yere te mi e kari En.

5Beifi gi En, ma no sondu.

Te yu didon na tapu yu bedi, prakseri den sani di yu du,

èn tan tiri. sela

6Tyari yu ofrandi soleki fa a fiti,

èn fertrow na tapu MASRA.

7Furu sma e aksi taki:

“Suma o meki un si a bun?”

MASRA, luku wi nanga prisiri.

8A prisiri di Yu e gi mi

bigi moro a prisiri di den abi

te a karu nanga a droifi fu den gi bogobogo nyanyan.

9Ini freide mi e go didon èn fadon na sribi,

bika na Yu wawan MASRA, e meki taki noti no e miti mi.

Psalm 5

Ete wan mamantenbegi

1Gi a tiriman fu a singigrupu fu a tempel. A psalm disi mus singi te den e bro tapu froiti. Wan psalm fu David.

2MASRA, arki te mi e begi,

luku te mi e dyeme.

3Mi Gado nanga mi Kownu,

arki te mi e bari suku yepi,

bika na gi Yu mi e tyari mi begi.

4MASRA, mamanten Yu e yere mi sten,

fruku mamanten mi e poti den tori fu mi na Yu fesi,

dan mi e wakti tapu a piki di Yu o piki mi.

5Yu na wan Gado di no e prisiri nanga kruktudu,

no wan ogri-ati sma kan tan na Yu.

6Sma di abi bigifasi no man kon pe Yu de.

Ala den sma di e du ogri,

Yu no lobi srefsrefi.

7Yu e wai ala den sma puru na pasi di e lei.

MASRA no mus abi not'noti fu kiriman nanga bedrigiman.

8Ma na a bigi lobi fu Yu,

meki taki mi kan go ini a oso fu Yu,

mi kan boigi nanga lespeki ini a santa tempel gi Yu.

9MASRA, Yu di e du sani nanga leti,

tiri mi, fu den feyanti fu mi ede,

grati a pasi gi mi fu mi kan du Yu wani.

10Bika noti san kmoto ini den mofo de fu fertrow,

soso kiri de ini den ati,

den mofo e tyari sma go na den grebi,

nanga den switi taki fu den.

11Gado, meki den butu,

meki den ogri di den ben seti fu du psa nanga den srefi.

Puru den ini a libi makandra, fu den furu kruktudu fu den,

bika den no wani du san Yu e taki.

12Ma ala den sma di e kibri na Yu o breiti,

ala ten den o prisiri fu di Yu e kibri den,

den di lobi a nen fu Yu o prisiri gi Yu.

13MASRA, Yu e blesi den wan di bun ini Yu ai,

nanga lobi Yu e kibri den leki wan schild.

Psalm 6

Wan begi fu kmopo ini anu fu dede

1Gi a tiriman fu a singigrupu fu a tempel. A psalm disi mus singi nanga instrumenti di abi snaar. A mus singi a srefi fasi leki: A di fu aiti.

2MASRA, no strafu mi ini Yu atibron,

no fon mi ini a hebi atibron fu Yu.

3Sori mi a sari-ati fu Yu, MASRA,

bika mi e swaki e gwe.

Dresi mi, MASRA,

bika mi siki te ini mi bonyo.

4Mi e frede taki mi o dede.

Olanga, MASRA, Yu o meki mi wakti?

5Kenki Yu prakseri MASRA èn puru mi ini anu fu dede,

ferlusu mi fu a bigi lobi fu Yu.

6Bika te wan sma dede, a no kan prakseri Yu moro.

Suma o man gi Yu grani ini dedekondre?

7Mi weri sote fu a dyeme di mi e dyeme,

ala neti mi e krei e nati mi sribi presi,

den watra-ai fu mi e sungu a bedi fu mi.

8Mi ai kon dungru fu a krei di mi e krei,

na den feyanti fu mi meki den ai fu mi kon swaki so.

9Un kmopo na mi tapu, un alamala di e du ala sortu ogri!

Bika MASRA yere mi tranga krei.

10MASRA yere a begi di mi e begi En,

MASRA arki a begi fu mi.

11Ala den feyanti fu mi o kon na syen,

den o skreki te fu dede,

ini wan pingi fu wan ai den lon gwe fu soso syen.

Psalm 4-6STB16In Bijbellezer openen

Boskopuman 17

Paulus ini a foto Atena

16Di Paulus ben e wakti tapu Silas nanga Timoteus ini Atena, a no ben switi gi en di a si fa a foto lai nanga popki di den sma ben e anbegi leki gado. 17Dat' meki a go na a Dyukerki fu taki nanga den Dyusma nanga den tra sma di ben e anbegi Gado. Ala dei a ben e go na wowoyo tu fu taki nanga den sma di a ben miti drape. 18Dan wantu Epikurian nanga Stoika koniman hari taki nanga Paulus. Sonwan fu den taki: “San a man disi prakseri taki a e kon leri unu?” Trawan fu den taki: “A gersi tak' a e gi leri fu gado di unu no sabi ete.” Bika a ben ferteri den a bun nyunsu fu Yesus èn tak' dedesma o kon na libi baka. 19Den tyari Paulus go na a Areopagus, dan den taigi en taki: “Un wani sabi moro fu a nyun leri di yu e tyari kon. 20Bika yu e ferteri wi sani di wi no sabi, èn wi wani sabi san den wani taki.” 21Now a ben de so taki ala den sma fu Atena nanga den doroseisma di ben libi drape, no ben abi no wan tra sani fu du, leki fu taki fu nyun sani di den kisi fu yere.

22Dan Paulus opo tnapu fesi den man fu a Areopagus èn a taki: “Sma fu Atena, ala sani e sori mi tak' un abi bigi lespeki gi furu gado. 23Bika di mi waka lontu ini a foto e luku den sani san un e anbegi, mi ai fadon tu tapu wan altari pe a skrifi taki: Gi wan Gado di wi no sabi. A Gado di un e anbegi sondro fu un sabi En, na fu a Gado dati mi e ferteri unu. 24A Gado di meki grontapu nanga ala sani di de na en tapu, na En na Masra fu heimel nanga grontapu. A no e libi ini tempel di libisma meki. 25A no e mankeri noti tu, dat' meki A no abi sma fanowdu fu sorgu gi En. Bika na En srefi meki taki ala sani e libi. A e gi den bro nanga ala sani san den abi fanowdu. 26Fu wan sma nomo A meki ala den folku fu libi na heri grontapu. A ben seti na fesi tu olanga den ben o libi, nanga pe den ben o libi. 27Gado du ala den sani disi fu libisma sa suku En èn firifiri den pasi fu feni En. Bika A no de fara fu wi alamala. 28Na En meki taki wi e libi èn beweigi, èn taki wi de na grontapu. Leki fa sonwan fu un eigi powema-man taki: ‘Wi na pikin fu En.’ 29Fu di wi na En pikin, dan wi no mus prakseri taki Gado na wan popki fu gowtu, solfru, noso ston di libisma prakseri èn meki nanga en eigi koni. 30Gado no e luku na den dei di wi no ben sabi En. Ma now A e taigi ala sma na heri grontapu tak' den mus fu drai den libi. 31Bika Gado poti wan dei pe A o meki wan man krutu ala libisma fu grontapu tapu wan leti fasi. Fu sori taki na Ensrefi poti a man disi, A meki a kon na libi baka di a dede.”

32Sonwan fu den sma bigin meki spotu di Paulus taki fu wan sma di opo baka na dede. Ma trawan taigi en taki: “Un sa taki wan tra leisi fu a tori disi.” 33Dan Paulus gwe libi den. 34Ma wantu fu den sma bribi en èn den bigin waka na en baka. Yu ben abi wan man fu a Areopagus di ben nen Dionisius, wan uma di ben nen Damaris, nanga wantu tra sma moro.

Boskopuman 17:16-34STB16In Bijbellezer openen

surinamebiblesoc.org

Contact

Surinaams Bijbelgenootschap

Henck Arronstraat 39

Paramaribo

Suriname

Telefoon: (+597) 47 43 38 / (+597) 47 85 07

Whatsapp: (+597) 88 46 993

E-mail: info@surinamebiblesoc.org

Download onze app
Android
iOS
Surinaams Bijbelgenootschapv.4.26.9
Volg ons