Dag 194 van 365- Psalm 7-9 en Handelingen 18

₂MASRA, Mi Gado, na Yu mi e kon kibri.

Ferlusu mi fu den di de nomo na mi baka,

yepi mi,

₃fu den no priti mi leki wan lew,

fu den no srepi mi tyari gwe,

sondro fu wan sma yepi mi.

₄MASRA, Mi Gado, efu mi du wan sani di no bun

efu mi du wan sma ogri,

₅efu mi pai mi mati ogri fu bun,

noso efu mi ben puru sani nanga tranga

na a anu fu den di de na mi baka,

₆dan meki den feyanti fu mi kon na mi baka èn grabu mi.

Den kan naki mi trowe na gron,

den kan kiri mi,

èn libi a dedeskin fu mi na gron. sela

₇Du wan sani, MASRA, opo ini hebi atibron,

feti den feyanti fu mi di e pina mi nanga atibron.

Kon yepi mi,

Yu di wani taki sma mus libi leki fa a fiti.

₈Tyari den folku kon sidon lontu Yu,

èn teki Yu presi tapu Yu kownusturu fu krutu den.

₉MASRA e krutu den folku.

Meki a leti de na mi sei MASRA,

bika mi e libi soleki fa a fiti,

mi no du ogri.

₁₀Gado, Yu di e du sani na tapu wan leti fasi,

Yu di e ondrosuku un ati nanga un firi,

meki den ogri-ati sma tapu fu du ogri,

ma blesi den sma di e du bun.

₁₁Gado na a schild di e kibri mi,

a Wan di e ferlusu den sma di e du En wani.

₁₂Gado na wan Krutubakra di e krutu sani na tapu wan leti fasi.

A de wan Gado tu di e strafu ogri ala dei.

₁₃Efu wan sma no tapu nanga kruktudu,

dan A e srapu a deigri fu En,

A e hari a bo fu En span, dan A e marki na en tapu.

₁₄A e marki na en tapu nanga En fetisani di e kiri,

A e sutu nanga En faya peiri.

₁₅Leki fa wan umasma e hori bere,

na so a sma di e meki kruktudu kon ini en,

e furu nanga ogri tu,

èn san a e puru kon na doro na soso lei.

₁₆A e diki wan dipi olo gi wan trawan,

ma ensrefi e fadon ini a peti di a diki.

₁₇Den ogri di a du e drai kon tapu en eigi ede,

a ogri fu en o fadon leti na tapu en eigi mindri ede.

₁₈Mi sa gi MASRA tangi fu di A e du sani nanga leti,

èn mi sa opo a nen fu MASRA, a Moro Hei Gado,

nanga psalmsingi.

₂O MASRA, wi Masra,

heri grontapu sabi fa Yu bigi.

Yu, di glori de fu si na heimel.

₃Nanga a singi fu pikin nanga di fu nyunyun pikin

Yu e bow wan skotu fu tapu den feyanti fu Yu,

fu puru den wan di e feti Yu na pasi.

₄Te mi e luku heimel, di Yu meki nanga Yu anu,

a mun nanga den stari, di Yu poti tapu den presi,

₅mi e aksi misrefi taki:

san na libisma, taki Yu e prakseri en,

san na libisma, taki Yu e luku fu en?

₆Ma toku di Yu meki en,

Yu meki en taki pikinso moro a ben de leki wan gado.

Yu meki en fu de leki kownu

èn Yu gi en glori nanga grani.

₇Yu e meki a tiri den sani di Yu meki,

ala sani Yu poti ondro en makti:

₈skapu, kaw, ala den meti,

srefi den krasi meti,

₉den fowru di e frei na loktu,

den fisi fu a se,

ala den sani di e swen ini a se.

₁₀O MASRA, wi Masra,

heri grontapu sabi fa Yu bigi.

₂MASRA, mi sa prijse Yu nanga mi heri ati,

mi sa ferteri fu ala den wondru fu Yu.

₃Mi breiti èn mi e prisiri fu den sani di Yu du,

mi sa singi fu gi Yu grani,

Yu, a Moro Hei Gado.

₄Bika den feyanti fu mi hari go nanga baka,

den fadon èn den dede na Yu fesi.

₅Di Yu teki presi tapu a sturu fu krutu,

Yu gi mi leti,

bika Yu na wan krutubakra di e krutu sani

na tapu wan leti fasi.

₆Yu bari den folku,

Yu puru den ogri-ati sma na pasi,

Yu figi a nen fu den fu têgo puru na grontapu.

₇Feyanti no de moro,

prakseri srefi sma no o prakseri den moro.

Yu wai den foto fu den puru na pasi,

fu têgo den broko èn didon na gron.

₈Ma MASRA na kownu fu têgo,

A seti a krutusturu fu En fu koti krutu.

₉Iya, A e krutu grontapu na tapu wan leti fasi,

A e krutu folku soleki fa a fiti.

₁₀MASRA na wan tranga kibripresi

gi sma di trawan e pina,

wan tranga kibripresi ini ten fu nowtu.

₁₁Dat' meki den di sabi Yu e fertrow na Yu tapu.

Bika MASRA, noiti Yu libi den sma di e suku Yu.

₁₂Singi fu prijse MASRA di e rigeri ini Sion,

ferteri den folku fu den wondru fu En.

₁₃A e strafu den sma di ben kiri trawan,

A e memre den dedewan.

A no e fergiti a kari fu den mofinawan.

₁₄MASRA, sori mi a bun-ati fu Yu,

luku fa den di no lobi mi e pina mi,

Yu di e yepi mi fu mi no dede.

₁₅Dan mi kan ferteri fu ala den bigi wroko fu Yu,

èn taki nanga prisiri na den bigi doro fu Sion

taki Yu ferlusu mi.

₁₆Den folku fadon ini a olo di densrefi diki,

den futu fasi ini den sani

di densrefi ben kibri poti fu fanga trawan.

₁₇MASRA e sori suma A de,

A e koti krutu na tapu wan leti fasi,

den ogri-ati sma e fasi ini den sani di densrefi seti. higgajon, sela

₁₈Ogri-ati sma, na dede pasi den de,

ala den folku di no e dini Gado.

₁₉Ma Gado no e fergiti den mofinawan fu têgo,

a howpu di den swakiwan abi no de fu soso.

₂₀Du wan sani, MASRA,

no meki libisma wini wi,

krutu den folku te den tnapu na Yu fesi.

₂₁Skreki den MASRA,

meki den folku ferstan taki den na libisma,

di o dede gwe wan dei. sela