Dag 195 van 365- Psalm 10-12 en Handelingen 19:1-20

₁MASRA, fu sanede Yu de so fara?

Fu sanede Yu e kibri now di wi de na ini problema?

₂Den ogri-ati sma nanga a heimemre fu den,

de nomo na den mofinawan baka.

Meki densrefi fasi ini a ogri di den ben prakseri fu du.

₃Bika ogri-ati sma e meki bigi fu den sani di den wani du.

Den di e meki moni tapu wan kruktu fasi tapu trawan,

e fluku èn afrontu MASRA.

₄Nanga a heimemre fu den, den e prakseri na densrefi taki:

Gado no o aksi mi fu gi frantwortu.

Den no e prakseri Gado srefsrefi.

₅A gersi leki ala san den e du e waka bun,

ma den no e ferstan srefsrefi fa Gado e krutu libisma.

Den e seki den ede te den e luku den feyanti fu den.

₆Den e prakseri ini densrefi taki:

Mi no o fadon.

Ogri no o miti mi noiti.

₇Fluku nanga bedrigi lai na ini den mofo,

èn den abi a gwenti tu fu e tapu skreki gi sma.

Soso ogri nanga pori e kmoto ini den mofo.

₈Den e didon luru na tiri presi,

na kibripresi den e kiri sma di no du noti.

Den e luku den sma fin'fini di no man yepi densrefi.

₉Den e luru leki wan lew ini bus'busi,

den e luru fu fanga den mofinawan,

den e fanga den nanga den net,

dan den e srepi den tyari gwe.

₁₀Den e bukundu, den e saka sidon lagi,

èn den swakiwan no man du noti te den fadon ini anu fu den.

₁₁Den e prakseri ini densrefi taki:

Gado no e luku srefi,

A e drai En fesi,

noiti A e luku.

₁₂Du wan sani, MASRA,

strafu den mi Gado,

no fergiti den sma di trawan e pina.

₁₃Fa ogri-ati sma kan afrontu Gado?

Fa den kan prakseri taki Gado no o kari den kon fu gi frantwortu?

₁₄Ma Yu e si a pina nanga a sari,

Yu e si en èn Yu sabi fa a hebi.

Den swakiwan e bow na Yu tapu,

Yu na a Yepiman fu den pikin di no abi p'pa nanga m'ma moro.

₁₅Broko a makti fu den ogri-ati sma,

strafu den fu a ogri di den e du,

te leki den no e du no wan ogri moro.

₁₆MASRA na kownu fu têgo èn alaten:

Yu yagi den folku di no e dini Yu puru fu a kondre fu Yu.

₁₇MASRA, Yu si a angri fu a ati fu den sma di trawan e si fu noti,

èn Yu piki den,

Yu e gi den dek'ati èn Yu e kaka Yu yesi fu arki den.

₁₈Yu e meki taki den pikin di no abi p'pa nanga m'ma moro,

nanga den sma di trawan e pina,

kisi den leti.

Tapu a fasi dati sma no man yagi den puru moro fu a kondre.

MASRA na mi kibripresi.

Dan fa un kan prefuru fu taigi mi taki:

“Lowe, frei leki wan fowru go na den bergi.”

₂Bika un yere,

ogri-ati sma e hari den bo span,

den e poti wan peiri na en tapu

dan den e go kibri na dungru presi

fu sutu sma di e du Gado wani.

₃San sma di bun ini Gado ai kan du

te no wan sma no e hori den moro na a wèt?

₄Ma MASRA de ini En santa tempel,

a kownusturu fu MASRA de na heimel,

A e luku ala sani fin'fini,

ala sma na grontapu A e ondrosuku.

₅MASRA e ondrosuku den sma di bun ini En ai

nanga den ogri-ati sma.

A no mus abi not'noti fu sma di e du sani nanga tranga.

₆A e meki faya kroiti nanga krofaya di e bron ete

fadon leki alen tapu den ogri-ati sma,

èn A e meki bun faya winti bron den tu.

₇MASRA e du sani nanga leti,

èn A lobi te sani e du tapu wan leti fasi tu.

Den di e libi leki fa a fiti o si a fesi fu En.

₂Yepi un, MASRA,

bika sma di e tan waka na Yu baka no de moro.

Sma di e tan fertrow na Yu tapu no de fu feni moro mindri libisma.

₃Sma e lei nomo gi densrefi,

den e taki switi, ma nanga tu mofo.

₄MASRA, tyari wan kba kon na a switi taki fu den,

no meki den mofo fu den puru den bigitaki kon moro na doro,

₅den di e taki:

“Nanga un mofo un tranga,

na un mofo e yepi unu,

no wan sma kan taigi un san un mus du.”

₆Fu a pina ini san den mofinawan de,

nanga fu a dyeme fu den pôtiwan,

meki MASRA e taki:

“Mi o du wan sani now.

Mi o tyari yepi gi den di e angri fu dati.”

₇Den sani di MASRA e taki de fu fertrow.

Den soifri leki solfru di den bron seibi leisi,

fu puru ala doti na ini.

₈Kibri den, MASRA,

kibri den fu têgo gi den sortu sma dati.

₉Ala sei ogri-ati sma e waka lontu,

ala sei ogri e panya nomo mindri libisma.