Dag 20 van 365- Genesis 49-50 en Matteüs 13:31-58

₁Dan Yakob seni kari ala den manpikin fu en. A taigi den taki: “Un kon tnapu dyaso lontu mi, dan mi sa taigi unu fa sani sa de gi unu ini den ten di de fu kon.

₂₈Disi na den twarfu lo fu Israel. Disi na san den p'pa ben taigi den di a e blesi den. A ben gi ibriwan en eigi blesi.

₂₉Baka dati Yakob komanderi den taki: “Mi o dede go na den bigisma fu mi. Un mus beri mi pe den afo fu mi beri, ini a bergi-olo tapu a gron fu Efron, a Hetitiman. ₃₀Dati na a bergi-olo fu Makpela, di de na abrasei fu Mamre, na ini Kanaan. Na a gron dati Abraham ben bai fu Efron, a Hetitiman, fu a ben kan abi wan eigi berpe. ₃₁Na drape den beri Abraham nanga en frow Sara. Drape den beri Isak nanga en frow Rebeka, èn na drape mi beri Lea. ₃₂Na fu den Hetitisma a gron dati nanga a bergi-olo ben bai.” ₃₃Di Yakob taki ala den sani disi, a hari en futu kon baka tapu en bedi dan en bro koti. A dede go na den bigisma fu en.

₁Yosef trowe ensrefi tapu en p'pa. A krei èn a bosi en. ₂Dan a komanderi den knekti nanga den man di e sreka dede, fu sreka en p'pa. So den man sreka a skin fu Israel. ₃Disi ben o teki fotenti dei, bika na fotenti dei langa den ben o sreka a skin. Dan den sma fu Egipte low seibitenti dei langa gi Yakob.

₄Di den dei fu low ben kon na wan kba, Yosef taigi den wrokoman di ben de ini a oso fu Farao taki: “Efu un lobi mi, dan un go taigi Farao gi mi ₅taki di mi p'pa ben o dede a taigi mi taki: ‘Arki, mi o dede. Ma yu mus beri mi na ini Kanaan, ini a bergi-olo di misrefi kapu opo.’ A meki mi sweri taki mi ben o du a sani disi. Dat' meki mi e aksi primisi fu gwe go beri mi p'pa. Baka dati mi sa drai kon baka.” ₆Ne Farao seni piki taki: “Gwe go beri yu p'pa leki fa yu sweri gi en.”

₇Dan Yosef gwe fu go beri en p'pa. Ala den wrokoman fu Farao, den basi fu den wrokoman nanga den heihei man fu Egipte, ben go nanga en. ₈Ala den ososma fu Yosef, den brada fu en nanga den famiri fu en ben go tu. Soso den pikinwan, den skapu nanga den kaw den ben libi na baka na Gosen. ₉A ben de wan bigi grupu fu di wagi nanga sma tapu asi ben go nanga den.

₁₀Di den doro na Goren Haatad, na abrasei fu a Yordanliba, den hori wan bigi dede-oso. Yosef meki den low seibi dei langa gi en p'pa. ₁₁Di den sma fu Kanaan si fa den e low na Goren Haatad, den taki: “Den sma fu Egipte de ini wan trutru bigi low.” Dat' meki den e kari a presi dati di didon na abrasei fu a Yordanliba, Abel-Misraim.

₁₂Dan den manpikin fu Yakob du san a ben taigi den fu du. ₁₃Den tyari en go na Kanaan, dan den beri en ini a bergi-olo fu Makpela, di de ini a gron na abrasei fu Mamre. Abraham ben bai a gron disi fu Efron, a Hetitiman, fu a ben kan abi wan eigi berpe. ₁₄Baka di a beri en p'pa, Yosef nanga den brada fu en, nanga ala sma di ben go nanga en fu go beri en p'pa, drai go baka na Egipte.

₁₅Di den brada fu Yosef ben sabi now taki den p'pa dede, den taki: “Fa wi o du now efu Yosef wan puru en atibron na wi tapu fu pai wi baka fu ala den ogri di wi du nanga en?” ₁₆Ne den seni a boskopu disi gi Yosef taki: “Fosi yu p'pa dede, a komanderi wi taki: ₁₇‘Wi mus aksi Yosef taki: Tangitangi, gi wi pardon fu den sondu di wi du. Wi sabi taki wi du yu furu ogri. Dat' meki wi e begi yu fu yu gi wi pardon. Wi na knekti fu a Gado di yu p'pa ben e dini.’ ” Yosef krei di den gi en a boskopu. ₁₈Dan den brada srefi kon na en. Den fringi densrefi nanga fesi na gron dan den taigi en taki: “Luku, wi na yu srafu.” ₁₉Ma Yosef taigi den taki: “No frede. Mi a no Gado. ₂₀Un ben wani du mi ogri, ma Gado teki a ogri fu unu fu du wan bun sani leki fa un e si tide. A meki taki wan bigi folku tan na libi. ₂₁Dat' meki un no abi fu frede. Mi sa sorgu gi unu nanga den pikin fu unu.” Tapu a fasi disi Yosef suku fu trowstu den brada fu en, èn wini den ati.

₂₂Yosef nanga den famiri fu en tan libi na Egipte. Yosef libi wan hondro nanga tin yari. ₂₃A libi te leki a si pikin nanga granpikin fu Efraim. A hori den pikin fu Makir, a manpikin fu Efraim, srefi na tapu en kindi. ₂₄Dan Yosef taigi den brada fu en taki: “Mi o dede. Ma Gado no sa fergiti unu. A sa tyari un kmoto fu a kondre disi go na a kondre di a pramisi Abraham, Isak nanga Yakob. A ben sweri dati.” ₂₅Yosef meki den manpikin fu Israel sweri taki te Gado sori den taki A no fergiti den, den ben mus tyari a dedeskin fu en gwe tu. ₂₆Dan Yosef dede ini Egipte. A dede di a ben abi wan hondro nanga tin yari. Den sreka a skin fu en, dan den poti en na ini wan dedekisi.

₃₁Yesus gi den a agersitori disi tu. A taki: “Un kan si a fasi fa Gado e tiri libisma, leki wan mosterdsiri di wan sma prani ini en gron. ₃₂A de a moro pikin siri san de, ma te a gro kon, a bigi moro ala den tra spesreibon di sma e prani. A e tron wan bon pe pikinfowru kan frei go meki den nesi.”

₃₃A gi den wan tra agersitori taki: “Un kan si a fasi fa Gado e tiri libisma leki dyesi di wan uma teki poti ini bun furu blon. Dan a dyesi e meki ala a blon kon sweri.”

₃₄Yesus ferteri a bigi grupu sma ala den sani disi nanga agersitori. Tra fasi A no ben taki nanga den. ₃₅Na so a sani san a profeiti ben taki kon tru. A ben taki: “Mi sa leri den sma nanga agersitori. Mi sa tyari den sani kon na krin san ben kibri sensi di grontapu meki.”

₃₆Baka dati Yesus seni a bigi grupu sma gwe, dan A go na oso. Dan den man di ben e teki leri fu En kon aksi En taki: “Yu kan taigi unu san a agersitori fu a grasi ini a gron wani taki?” ₃₇Yesus piki den taki: “A Manpikin fu Libisma na a man di e sai a bun siri. ₃₈A gron na grontapu. Den bun siri na den sma di Gado e tiri. ₃₉A grasi na den sma di e waka na didibri baka. A feyanti di sai a grasi na didibri. A ten fu koti den lepi nyanyan na a kba fu a ten disi. Den sma di o koti den lepi nyanyan na den engel. ₄₀Leki fa den e tyari a grasi kon na wan fu bron ini faya, so a sa de na a kba fu a ten disi. ₄₁A Manpikin fu Libisma sa seni den engel fu En go mindri den sma di Gado e tiri. Den sa puru ala sani san e meki den sma sondu, nanga ala sma di e du kruktu. ₄₂Den engel sa fringi den go ini a faya onfu, pe den sa krei èn kaw den tifi. ₄₃Ma den sma di bun ini Gado ai, sa brenki leki a son te den P'pa na heimel o tiri libisma. Suma abi yesi, meki a yere!”

₄₄“Un kan si a fasi fa Gado e tiri libisma, leki wan gudu di beri ini wan gron. Wan man feni en, èn a beri en baka. A breiti sote taki a e go seri ala sani san a abi, èn a e bai a gron.

₄₅Un kan si a fasi fa Gado e tiri libisma, leki wan man di e suku moi parelkrara fu bai. ₄₆Di a feni wan san warti furu, a go seri ala sani san a abi, èn a bai en.

₄₇Un kan si a fasi fa Gado e tiri libisma, leki wan fis'neti san den fringi go ini se, èn san e fanga ala sortu fisi. ₄₈Te a furu, den e hari en kon na syoro. Dan den sma e sidon puru ala fisi di bun fu nyan, poti ini baskita. Ma den wan san no bun fu nyan, den e trowe. ₄₉Na so a sa de na a kba fu a ten disi. Den engel sa go fu puru den sma di no e du Gado wani na mindri den sma di bun ini En ai. ₅₀Dan den sa fringi den go ini a faya onfu, pe den sa krei èn kaw den tifi.”

₅₁Dan Yesus aksi den man di ben e teki leri fu En taki: “Un ferstan ala den sani disi?” Den piki: “Iya, Masra.” ₅₂Dan Yesus taigi den taki: “Ibri sabiman fu Gado wèt di e teki leri fu a fasi fa Gado e tiri libisma, de leki wan man di abi wan maksin fu pe a e tyari nyun sani nanga owru sani kon na doro.”

₅₃Di Yesus kba taki den agersitori disi, A kmoto pe A ben de, ₅₄dan A go na a foto pe A ben kweki. Drape A gi den sma leri ini a kerki fu den. Di den sma yere fa A e gi leri, den tnapu nanga opo mofo. Den taki: “Pe A feni a koni disi? Èn pe A feni a makti fu du den bigi sani? ₅₅A p'pa fu En na a temreman. A m'ma fu En na Maria, èn den brada fu En na Yakobus, Yosef, Simon nanga Yudas. ₅₆Ala den s'sa fu En e libi dya. Pe A kmopo nanga ala den sani disi dan?” ₅₇Dat' meki den no ben wani yere noti fu En.

Ma Yesus taigi den taki: “Ala sma e lespeki wan profeiti, boiti den sma fu a foto pe a kweki nanga den ososma fu en.” ₅₈So Yesus no du furu bigi sani drape, bika den sma no ben e bribi.