Dag 206 van 365- Psalm 37-39 en Handelingen 26

Un no mus nyan un niri nanga sma di e du kruktudu,

no dyarusu tu tapu sma di e du trawan ogri.

₂Bika den e dede gwe es'esi,

leki fa grasi e drei gwe es'esi,

leki fa sani di prani e flaw gwe es'esi

te den no feni watra.

₃Ma un mus fertrow tapu MASRA èn un du san bun,

un libi ini a kondre pe ogri no sa kon na un pasi.

₄Un suku un prisiri na MASRA,

dan A o gi un san un ati e angri.

₅Poti yu libi ini a anu fu MASRA

èn fertrow na En tapu,

A o yepi unu.

₆Leki fa a mamanten son de fu si gi ala sma te a e opo,

na so A o meki a de fu si tu gi ala sma taki un no du ogri,

èn leki fa a son e de krin fu si te bakadina,

na so A o meki a de krin fu si tu taki un abi leti.

₇Un de tiri èn un wakti tapu MASRA,

un no nyan un niri nanga den sma di abi en bun ini a libi,

den di e du sani tapu wan ogri fasi.

₈Un o kisi atibron gi den,

un no rigeri nanga den,

un no nyan un niri tu,

den sani dati e tyari soso problema.

₉Bika sma di e du ogri o lasi den libi,

ma den di poti den howpu tapu MASRA,

o kisi a kondre.

₁₀No langa moro,

dan den ogri-ati sma no o de moro,

un o luku fu den,

ma den no o de fu si moro.

₁₁Ma den sma di trawan e si fu noti o kisi a kondre,

na den o libi switi, ini freide,

èn den o abi bogobogo fu ala san den abi fanowdu.

₁₂Ogri-ati sma e sidon prakseri

fu du den sma ogri di bun ini Gado ai,

den e luku nanga atibron tapu den fesi.

₁₃Ma Masra e lafu den,

A e si a dei kba pe den o lasi den libi.

₁₄Ogri-ati sma e puru den deigri kon na doro,

den e hari den bo fu den span,

fu kiri den pôtiwan nanga den mofinawan,

èn fu srakti den di e libi leki fa a fiti.

₁₅Ma a deigri fu den sa boro den eigi ati,

èn den bo fu den sa broko.

₁₆A pikinso fu wan sma di bun ini Gado ai,

bun moro a gudu fu furu ogri-ati sma.

₁₇bika a makti fu ogri-ati sma o broko,

ma MASRA e kraka den sma di bun ini En ai.

₁₈MASRA e sorgu ala dei gi den sma tapu san trawan no man sori finga,

a kondre fu den o tan fu têgo.

₁₉Ini tranga ten den no o kon na syen,

ini angriten den o abi nyanyan.

₂₀Ma den ogri-ati sma o dede fosi den yuru kisi,

den feyanti fu MASRA de leki den bromki fu a wei

den o wai gwe leki smoko.

₂₁Ogri-ati sma e leni èn den no e gi baka,

ma sma di bun ini Gado ai e gi fu di den abi sari-ati.

₂₂Den sma di Masra blesi o kisi a kondre,

ma den di A fluku o lasi den libi.

₂₃Te MASRA abi prisiri nanga a libi fu wan sma,

A e meki a sma dati tnapu tranga.

₂₄Te sowan sma misi futu a no e fadon,

bika MASRA e hori en na en anu.

₂₅Mi ben yongu, now mi kon owru,

ma mi no si ete pe Gado gwe libi wan sma di bun ini En ai,

noso taki den pikin nanga bakapikin fu en e pina nyanyan.

₂₆Ala leisi baka a sma di bun ini Gado ai e gi

fu di a abi sari-ati,

a e tan leni sma di e aksi en

èn gi den pikin nanga bakapikin fu en a de wan blesi.

₂₇Un no mus du ogri, ma un mus du bun,

dan un o tan libi fu têgo ini a kondre.

₂₈Bika MASRA lobi te sani e psa na tapu wan leti fasi,

èn A no e gwe libi den sma di e tan waka na en baka.

Fu têgo A e kibri den,

ma A e puru den pikin nanga bakapikin fu ogri-ati sma na pasi.

₂₉Na den sma di bun ini Gado ai o kisi a kondre,

na den o libi drape fu têgo.

₃₀Wan sma di bun ini Gado ai e taki koni,

a e taki sani tapu wan leti fasi.

₃₁A wèt fu Gado de ini en ati,

a no e misi futu.

₃₂A ogri-ati sma e seti luru gi a sma di bun ini Gado ai,

a e suku wan okasi fu kiri en.

₃₃Ma MASRA no e gi en abra ini en makti.

Te den go na fesi krutu,

A e sorgu taki a sma di bun ini En ai no e kisi strafu.

₃₄Poti yu howpu tapu MASRA

èn tan tapu En pasi,

dan A o gi yu grani fu yu kan kisi a kondre,

èn nanga prisiri yu o luku fa A o puru den ogri-ati sma na pasi.

₃₅Mi si wan ogri-ati sma,

wan di e du sani nanga tranga,

mi si fa a ben e gro kon,

leki wan bon ini bun doti.

₃₆Di mi psa wan tra leisi a no ben de moro,

mi suku en, ma a no ben de fu feni.

₃₇Ma teki yu ten luku a sma di e tan waka baka gado,

hori ai na tapu a sma di e libi leki fa a fiti,

bika na sma di lobi freide o abi bakapikin.

₃₈Ma den sma di e broko a wèt fu Gado,

o lasi den libi,

den bakapikin fu den ogri-ati sma

o dede gwe.

₃₉Na MASRA e ferlusu den sma di bun ini En ai,

na En den e go kibri te den de na ini benawtu.

₄₀MASRA e yepi den èn A e ferlusu den,

A e meki den kmopo ini a makti fu den ogri-ati sma,

A e ferlusu den,

bika na En den e kibri.

₂MASRA, no strafu mi ini Yu atibron,

no fon mi ini a hebi atibron fu Yu.

₃Bika den peiri fu Yu go dipi ini mi skin,

Yu e strafu mi hebi.

₄A hebi atibron fu Yu meki taki noti no bun moro na mi skin,

den sondu fu mi meki taki ala den bonyo fu mi broko.

₅Bika den kruktudu fu mi gro psa mi ede,

den de leki wan hebi lai,

di mi no man tyari moro langa.

₆Den soro fu mi e tingi,

den e puru doti watra

fu a don libi di mi ben libi.

₇Te mi e waka mi abi fu beni mi baka,

mi abi fu beni mi baka bun dipi,

mi e sari heri dei,

leki wan sma di e low.

₈Korsu e priti mi skin,

noti no bun moro ini mi skin.

₉Mi weri, mi e firi leki mi broko pis'pisi,

Mi no sabi san mi mus du, a e gi mi fu bari.

₁₀MASRA, Yu sabi san mi ati e angri,

a soktu fu mi no kibri gi Yu.

₁₁Mi ati e naki moro esi, mi krakti gwe libi mi,

srefi si mi no e si bun moro.

₁₂Den mati fu mi nanga sma di sabi mi

no e kon krosbei fu mi moro,

srefi mi famiri e tan fara fu mi.

₁₃Den sma di wani kiri mi,

e seti ogri fu miti mi,

den di wani meki bigi ogri miti mi,

e taki fa den o du en,

heri dei den e waka e gi mi pori nen.

₁₄Ma mi e meki leki mi dofu, mi no e yere den,

mi e meki leki mi babaw, mi no e piki den.

₁₅Mi e meki leki wan sma di dofu,

èn mi no e hari taki nanga den srefsrefi.

₁₆Bika MASRA, tapu Yu mi e howpu,

Masra, mi Gado, na Yu sa piki den.

₁₇Mi e begi Yu nomo fu den no prisiri fu mi ede,

fu den no lafu te mi e misi futu.

₁₈Mi e si leki a libi fu mi e kon na wan kba,

mi skin e nyan mi nomonomo.

₁₉Mi e taigi Gado den kruktudu fu mi,

den sondu fu mi e meki mi e frede.

₂₀Ma den feyanti fu mi e libi, den tranga,

èn den furu sote,

den di no man si mi na ai srefsrefi

sondro taki mi du den wan sani.

₂₁Den e pai mi ogri fu bun,

èn den e feti mi, aladi na bun mi e du.

₂₂MASRA, no gwe libi mi,

mi Gado, no tan fara fu mi!

₂₃Kon esi kon yepi mi,

Masra, na Yu e ferlusu mi.

₂Mi ben prakseri na misrefi taki:

Mi o luku fin'fini fa mi o tyari misrefi,

fu mi no sondu nanga mi mofo.

Mi o kwinsi mi mofo tapu,

solanga den ogri-ati sma tnapu na mi fesi.

₃Mi hori mi mofo tu, no wan wortu mi no taki

mi tan tiri, wan bun sani srefi mi no taki.

Ma mi no ben e firi bun fu inisei.

₄A ben e bron na mi inisei fu taki wan sani,

a gersi wan faya ben leti na mi inisei,

dan mi bigin taki:

₅“MASRA, meki mi sabi oten a libi fu mi e kon na wan kba,

meki mi sabi olanga mi abi fu libi ete,

meki mi ferstan taki na psa a libi fu mi e psa gwe.

₆Mi sabi taki na wan syatu ten Yu gi mi fu libi,

taki den yari fu mi no de not'noti gi Yu,

iya, a libi fu iniwan sma de leki wan bro, sela

₇leki wan schaduw a e psa gwe.

Libisma e feti baka sani di abi no wan warti,

den e tyari gudu kon na wan sondro fu sabi gi suma.”

₈We, dan san mi mus ferwakti MASRA?

Ala mi howpu de na Yu tapu.

₉Fri mi fu ala mi sondu,

no meki don sma teki mi e meki spotu.

₁₀Mi no man taki noti, mi e hori mi mofo,

bika Yu e du san fiti.

₁₁Ma tapu fu fon mi so,

mi o dede efu Yu e tan naki mi so.

₁₂Te Yu e piri ai gi wan sma èn strafu en fu en kruktudu,

Yu e pori ala sani di a lobi,

leki fa kakalaka e pori krosi.

Iya, libisma no de noti moro leki wan bro. sela

₁₃MASRA, Yere mi begi,

arki te mi e kari Yu,

du wan sani te Yu e si fa mi e krei,

bika mi de leki wan doroseisma na Yu,

leki wan sma di drape fu wan syatu pisten nomo,

leki ala den afo fu mi.

₁₄No luku mi nanga atibron moro,

dan mi kan prisiri baka,

fosi mi dede gwe,

fosi mi no de moro.