Mi bun mati tron mi feyanti
1Gi a tiriman fu a singigrupu fu a tempel. A psalm disi mus singi nanga instrumenti di abi snaar. Wan singi fu David di mus leri wi wan sani.
2Tye Gado, arki a begi fu mi,
no drai Yu fesi gi mi te mi e begi Yu fu yepi mi.
3Luku mi èn yepi mi.
Mi no sabi san fu du, mi e waka lontu nomo e dyeme,
4fu a bari di den feyanti e bari sani gi mi.
Ogri-ati sma e pina mi,
den e tyari ogri nomo kon na mi pasi,
den e naki mi nanga atibron.
5A ati fu mi e naki bun tranga na mi inisei,
mi e frede te fu dede,
6mi e frede, mi e beifi,
mi heri skin e gro.
7Mi taki: Tye, mi winsi taki mi ben kan frei leki wan doifi,
dan mi ben o frei gwe fu suku wan tra tanpresi.
8Iya, mi ben o frei gwe fara,
dan mi ben o psa a neti ini a bigi dreisabana. sela
9Es'esi mi ben o suku wan kibripresi,
wan kibripresi gi a bun tranga winti,
gi a sibibusi.
10Bruya den Masra,
meki taki den no man ferstan densrefi te den e taki.
Bika mi e si sma e rigeri ini a foto,
mi e si opruru.
11Na a dyugudyugu dati e psa ini a foto nomo, dei nanga neti,
leti mindri a foto ogri nanga trobi e psa.
12Pori e psa na en ini,
den strati furu nanga sma di e pina èn di e bedrigi trawan.
13Ma a no de wan feyanti di e tanteri mi,
efu dati ben de so mi ben o man teki en.
A no wan sma di no lobi mi, di e opo fu feti mi,
efu dati ben de so mi ben o kmopo na pasi gi en.
14ma na yu, wan libisma nanga san mi gwenti,
mi mati, yu di de leki wan brada gi mi.
15Fa a ben switi te un ben de makandra,
te un ben go nanga wan heri ipi sma na a oso fu Gado.
16Den sortu mati dati kan fadon dede.
Meki den saka go libilibi ini dedekondre.
Bika na ini den, na ini a ati fu den, ogri e libi.
17Ma mi, mi e kari Gado,
na MASRA o ferlusu mi.
18Te neti, te mamanten nanga te bakadina mi e kragi, mi e dyeme,
èn A e arki mi.
19A o ferlusu mi puru ini a strei, noti no o miti mi,
awinsi omeni e feti mi.
20Gado, a Wan di de kownu ten na ten, e yere. sela
A sa broko den saka,
den di no wan tapu nanga a ogri fu den,
èn di no e lespeki Gado.
21Na wan fu den sortu sma dati seri en mati,
a broko a banti di den ben abi leki mati.
22A tongo fu en grati moro oli,
ma na feyantifasi de ini en ati.
Den wortu fu en safu moro botro,
ma den e dyuku leki nefi.
23Gi MASRA den problema fu yu,
A o sorgu gi yu.
Noiti A sa meki taki wan sma di bun ini En ai misi futu.
24Ma Gado, den kiriman nanga den bedrigiman dati,
Yu o meki den saka go ini a olo fu dedekondre.
Den no o doro afu fu a libi fu den.
Ma mi dati e fertrow na Yu tapu.
