Dag 213 van 365- Psalm 57-59 en Romeinen 4

₂Sori mi Yu bun-ati, mi Gado,

sori mi Yu bun-ati

bika na Yu mi e kibri.

Iya, na ini a schaduw fu den frei fu Yu mi sa kibri,

te leki a bigi ogri psa.

₃Na Gado mi e kari, a Moro Hei Gado,

na Gado, di e tyari ala sani kon na wan kba gi mi.

₄Fu heimel A e seni ferlusu gi mi,

A meki den sma di de na mi baka kon na syen. sela

Iya, Gado sa sori mi En bigi lobi èn taki A de fu fertrow.

₅Na mindri lew mi didon,

mindri meti di e swari libisma,

den tifi fu den de leki lansri nanga peiri,

den tongo fu den na srapu nefi.

₆Tye Gado, sori a makti nanga a glori fu Yu,

sori en na heimel nanga grontapu.

₇Den ben seti wan ogri tapu mi pasi fu miti mi,

mi ben lasi ala howpu.

Den ben diki wan olo fu mi fadon na ini,

ma na densrefi fadon na ini. sela

₈Mi ati sidon, tye mi Gado, mi ati sidon.

Mi wani singi, iya, singi wan singi.

₉Meki yusrefi klari, mi sili,

meki yusrefi klari nanga harp nanga citer,

mi wani wiki fosi dei broko.

₁₀Mi o prijse Yu, Masra, na mindri fu den folku,

singi gi Yu, meki ala kondre yere.

₁₁MASRA, a lobi fu Yu bigi moro leki wi kan ferstan,

a bow di sma kan bow na Yu tapu no de fu marki.

₁₂Mi Gado, sori a makti nanga a glori fu Yu,

sori en na heimel nanga tapu heri grontapu.

₂Unu di abi makti, un no e krutu sani nanga leti.

Un no e krutu den tori fu den sma na tapu wan leti fasi.

₃Un e du ogri na ini un ati

èn alasei na grontapu un e du sani nanga tranga.

₄Den ogri-ati sma teki a kruktu pasi sensi di den gebore,

den leiman lasi pasi sensi di den ben de ini den m'ma bere.

₅Den ogri leki takrusneki,

den dofu leki wan labaria di tapu en yesi,

₆gi a sten fu a sma di e tiri en,

awinsi o bun a sma sabi du dati.

₇Tye Gado, broko den tifi ini den mofo,

naki den ukutifi fu den lew dati broko MASRA.

₈Meki den sma dati no de fu si moro,

meki den de leki watra di e lon gwe,

meki den de leki peiri di broko

fosi den sutu gwe fu a bo.

₉Meki den de leki wan pakro di e dede gwe

te leki soso pikinso loli tan na baka,

leki wan pikin di gebore dededede

èn di no si a krin fu dei.

₁₀Meki den de leki wan makamaka taki,

fosi a bigin bron fu waran a patu,

wan tranga winti e wai en gwe.

₁₁Ma den sma di bun ini Gado ai o prisiri,

te den e si fa den e kisi den pai.

Den o wasi den futu ini a brudu fu den ogri-ati sma.

₁₂Sma sa taki:

“Iya, den sma di bun ini Gado ai e kisi san den fiti fu kisi,

Gado e krutu sani na tapu wan leti fasi na grontapu.”

₂Tye mi Gado, ferlusu mi fu mi feyanti,

kibri mi gi den di e feti mi.

₃Ferlusu mi fu den di e du kruktudu,

puru mi ini a anu fu den kiriman.

₄Bika luku, den e luru mi fu kiri mi,

den trangawan e kon na mi tapu fu feti mi,

sondro taki mi du ogri,

sondro taki mi sondu, MASRA.

₅Den e lon kon na mi tapu fu feti mi,

sondro taki mi du kruktudu.

Opo Gado, kon yepi mi èn si fu Yusrefi.

₆Yu, MASRA, Gado fu ala sani,

Gado fu Israel,

opo, kon strafu ala den folku

no sari den ogri sma di seri unu. sela

₇Ala neti den e drai kon baka,

den e krei leki dagu,

den e waka lontu ini a foto.

₈Arki, fa den e broko mi saka nanga den sani di den e taki,

den wortu fu den e koti leki nefi,

den e prakseri taki: no wan sma e yere san wi e taki.

₉Ma Yu, MASRA, e lafu den,

Yu e teki den folku meki spotu.

₁₀Yu na mi krakti,

na tapu Yu mi hori mi ai,

bika Yu na mi tranga kibripresi.

₁₁Gado o kon yepi mi nanga a bigi lobi fu En,

Gado o meki taki nanga prisiri mi o luku den sma di e pina mi.

₁₂No kiri den ete,

noso a pipel fu mi kan fergiti fa Yu e strafu Yu feyanti.

Meki den waka lontu nomo,

naki den trowe nanga Yu krakti,

Masra, Yu de leki wan schild gi wi.

₁₃Den e sondu nanga den sani di den e taki,

nanga den wortu di e kmoto ini den mofo.

Meki den tan fasi ini a heimemre fu den,

fu a fluku di den e fluku,

nanga fu a lei di den e lei.

₁₄Kiri den na ini Yu atibron,

kiri den alamala.

Dan den sa sabi taki Gado na kownu ini Yakob,

nanga heri grontapu. sela

₁₅Ala neti den e drai kon baka,

den e krei leki dagu,

den e waka lontu ini a foto.

₁₆Den e waka lontu e suku nyanyan,

den e knoru efu den no feni nofo fu nyan.

₁₇Ma mi sa singi fu a krakti fu Yu,

te mamanten mi sa prisiri fu a bigi lobi fu Yu,

bika Yu de wan tranga kibripresi gi mi,

wan presi pe mi kan lon go

te mi de na ini benawtu.

₁₈Yu na mi krakti, gi Yu mi e singi.

Gado na mi tranga kibripresi,

a Gado di e sori mi a bigi lobi fu En.