Gado nanga a pipel fu En
1Wan singi fu Asaf di mus leri wi wan sani.
Mi pipel, un arki a leri fu mi,
un kaka un yesi gi den sani di mi o taki.
2Mi o taki na ini agersitori.
Mi o tyari sani kon na krin di ben kibri bun langa kba.
3Wi ben kisi den fu yere, wi sabi den,
den bigisma fu wi ben ferteri wi den.
4Now wi no wani hori en na baka gi den pikin fu wi,
wi wani ferteri den wan di e kon na wi baka,
den bigi sani di MASRA du,
a makti fu En,
nanga den wondru di A du.
5A poti wan sani gi a pipel fu Israel di den mus tan memre,
A poti wan wèt gi Yakob.
A ben komanderi den afo fu wi
fu leri en na den pikin fu den.
6So den pikin ben o sabi en tu,
fu den fu den sei leri en baka
na den pikin fu den.
7So iniwan fu den kan fertrow tapu Gado,
èn no fergiti den bigi sani di A du,
ma hori den gebod fu En.
8Dan den no sa de leki den afo fu den,
sma di ben trangayesi,
èn di no ben wani du san Gado e taki,
sma di no ben e fertrow Gado trutru,
èn di no ben dini Gado wawan.
9Den srudati fu a lo fu Efraim,
man di ben sabi sutu bo bun,
lon gi den feyanti
di a feti ben e feti.
10Den no hori densrefi na a ferbontu fu Gado,
èn den no ben wani du san a wèt fu En e taki.
11Den fergiti den sani di A du
nanga den wondru fu En,
di A ben meki den si.
12A ben du wondru meki den afo fu den si,
na ini Egipte,
ini a bigi wei fu Soan.
13A prati a watra fu se na tu,
A tyari den psa na mindri,
A meki a watra tnapu leki wan skotu na ala tu sei.
14Deiten A ben waka ini wan wolku na den fesi,
te neti na ini wan krin faya.
15A prati bergiston na tu gi den
ini a bigi dreisabana,
a gi den watra fu dringi
di ben kmoto dipi na ondro gron.
16A meki watra lon kmopo ini a bergiston,
bogobogo watra, leki wan liba.
17Ma den tan sondu,
drape ini a dreisabana den ben kaka futu gi a Moro Hei Gado.
18Den tesi Gado,
fu aksi nyanyan di den ben wani.
19Den afrontu Gado fu taki:
“Gado no o man gi wi bun nyanyan dyaso ini a dreisabana.
20Iya, di A naki tapu a bergiston
bun furu watra kmopo na ini,
ma A o man gi a pipel brede nanga meti tu?”
21Di MASRA yere san den taki' En ati bron,
A lusu En atibron leki wan faya tapu Yakob,
Israel firi a hebi atibron fu En.
22Bika den no ben bribi Gado,
den no ben fertrow na tapu a yepi fu En.
23Ne A komanderi den wolku na loktu,
ne A opo den doro fu heimel.
24A meki manna fadon kon na den tapu,
A gi den graan di kmoto fu heimel.
25Iniwan fu den nyan a brede di engel e nyan,
A gi den nyanyan di ben e furu den bere.
26Dan A meki wan winti wai kmopo na oostsei,
nanga A krakti fu En A meki a winti wai kmopo na zuidsei.
27A meki bun furu fowru fadon na den tapu,
den ben furu leki a santi na sekanti.
28A meki den fadon leti ini a kampu fu den,
lontu ala den tenti fu den.
29Den nyan te a sari den.
A gi den san den ben wani.
30Den no ben nyan ete te a sari den,
a nyanyan ben de ini den mofo ete,
31di Gado lusu a atibron fu En na den tapu.
A kiri den moro trangawan na den mindri,
A meki den yonkuman fu Israel dede.
32Ma a pipel tan sondu,
den no ben wani fertrow den wondru di A e du.
33Dan A tyari wan kba kon na a soso libi fu den,
A tyari wan kba kon na tapu wan bun ogri fasi.
34Te A ben e kiri den fosi,
dan den ben e aksi fu En,
dan fosi den ben drai den libi
èn suku En.
35Dan fosi den ben prakseri baka
taki na Gado na a Trangawan pe den kan kibri,
taki na Gado, a Moro Hei Gado, na a ferlusuman fu den.
36Ma den ben bedrigi En nanga den mofo,
èn den ben lei gi En nanga den tongo.
37Den no ben tan waka na En baka,
den no ben e hori densrefi na a ferbontu
di A ben meki nanga den.
38Ma En, A wan di abi sari-ati,
ben meki en bun nanga den.
A no kiri den.
Furu leisi A hori a atibron fu En,
A no wiki a hebi atibron fu En.
39A ben memre taki den na libisma,
wan bro di e psa gwe sondro fu drai kon baka.
40Dorodoro den ben kaka futu gi En ini a dreisabana,
du wan lo sani di hati En ini a drei kontren.
41Den ben e du sani fu luku san Gado ben o du,
èn den tanteri a Santawan fu Israel.
42Den ben fergiti a makti fu En,
den fergiti a dei di A ferlusu den fu den feyanti,
43fa A ben du den marki fu En ini Egipte,
nanga den wondru fu En ini a wei fu Soan.
44A ben meki a watra fu a Nijl-liba tron brudu,
no wan presi den ben man dringi watra moro.
45A ben seni kawfrei go na den mindri
di ben sutu den,
nanga todo di ben e pori ala sani.
46A meki kotikoti nyan den sani di den prani,
sprenka swari den lepi nyanyan ini den gron.
47A meki pis'pisi ijs fadon pori den droifidyari,
hebi kowru pori den figabon.
48A meki pis'pisi ijs kiri den meti di den ben kweki,
a faya di ben koti na loktu bron den kiri.
49A lusu a faya atibron fu En na den tapu,
hebi atibron nanga bigi benawtu,
leki boskopuman di e tyari ogri kon.
50A no meki noti hori En fu lusu a atibron fu En,
A no kibri den fu den no lasi den libi,
ma A meki wan takru siki kiri den.
51A kiri ala den fosi manpikin ini Egipte,
den fosi mansma di gebore ini den tenti fu Ham.
52Leki skapu A meki En pipel hari gwe,
leki wan grupu skapu ini a sabana.
53A tyari den sondro taki wan sani miti den,
den no ben abi fu frede gi noti,
bika ala den feyanti fu den ben dede ini a se.
54A tyari den go na a kondre di A ben poti aparti gi den,
A bergi di Ensrefi ben teki abra.
55A yagi den folku di ben libi drape gwe gi den,
A prati a kondre gi den,
èn A meki den lo fu Israel libi na ini den tenti fu den.
56Ma drape den tesi Gado,
den no ben wani arki a Moro Hei Gado,
den no ben wani libi a fasi fa A leri den.
57Den drai baka gi En,
den tapu fu waka na En baka,
neleki den afo fu den.
Leki fa wan peiri e go en eigi pasi efu a bo kron,
na so den ben e go den eigi pasi tu.
58Den tanteri En nanga den presi pe den ben e tyari ofrandi
èn den wiki a atibron fu En
nanga den popki fu den kruktu gado.
59Gado ben kon sabi ala den sani disi èn En ati bron trutru,
A no ben wani sabi not'noti moro fu Israel.
60A gi a oso fu En ini Silo abra,
a tenti pe A ben libi na mindri libisma.
61A meki a santa kisi fu a ferbontu fu En,
a marki fu a krakti fu En,
A meki a kon ini anu fu feyanti.
62En ati ben bron srefsrefi tapu a pipel di A ben teki gi Ensrefi,
A meki den dede na ini feti.
63Den yonkuman dede ini a faya fu a feti,
den yongu uma no ben abi sma moro fu trow.
64Den priester srefi dede na ini feti,
den uma fu den no ben kisi a okasi fu low.
65Dan Masra opo,
leki wan sma di wiki ini wan dipi sribi,
leki wan dyadya fetiman di ai kon krin
baka di a ben dringi win te a drungu.
66Dan A naki den feyanti meki den go nanga baka,
A gi den syen fu têgo.
67A ben wani sabi not'noti moro fu Yosef,
A no ben wani a lo fu Efraim,
68ma A teki a lo fu Yuda,
A teki a bergi Sion di A lobi.
69A bow a santa presi fu En
hei leki den bergi,
steifi leki grontapu.
70Dan En ai fadon tapu En knekti David,
A puru en na den skapu,
71A puru en na den skapu di ben abi pikin na bobi ete,
A poti en leki tiriman fu Yakob, a pipel fu En,
fu Israel, a folku di A teki gi Ensrefi.
72David ben tiri den nanga wan krin ati,
leki wan sma di ben sabi du dati tu.
