Dag 223 van 365- Psalm 81-83 en Romeinen 11:22-36

₂Un bari gi Gado, a Wan di e kibri wi,

un meki wan babari fu prisiri gi a Gado fu Yakob.

₃Un singi wan singi, meki a tamboerijn de fu yere,

meki switi poku nanga a citer èn nanga a harp.

₄Un bro a tutu gi a nyunmun,

un bro en te a furu mun opo,

un bro en gi a fesa fu wi.

₅Na wan sani di Israel mus tan du,

wan sani fu a Gado fu Yakob

na san den mus tan hori densrefi.

₆A ben poti en fu memre den bakapikin fu Yosef

di den ben hari kmoto fu Egipte.

Mi yere wan sten e taki, wan sten di mi no sabi:

₇“Mi puru a hebi lai fu yu skowru,

Mi puru den hebi mantyi na yu anu.

₈Di un ben de ini benawtu un kari Mi,

èn Mi ferlusu unu.

Mi ben piki unu kmoto fu wan dungru wolku nanga dondru.

Mi luku san un ben o du na den watra fu Meriba. sela

₉Arki Mi, Mi pipel, Mi wani warskow unu,

tye Israel, efu un ben wani arki Mi nomo!

₁₀No wan tra gado mus de na un mindri,

un no sa boigi gi wan gado di un no sabi.

₁₁Na Mi, MASRA, na a Gado fu unu,

na Mi ben puru unu na ini Egipte.

Aksi nomo dan Mi sa gi unu san un abi fanowdu.

₁₂Ma a pipel fu Mi no ben wani arki Mi,

Israel no ben wani du san Mi taki.

₁₃Na dat' meki Mi libi den nanga a trangayesi fu den,

fu den waka baka den eigi pasi.

₁₄Tye, efu a pipel fu Mi ben wani arki Mi nomo,

efu Israel ben wani libi leki fa Mi wani!

₁₅Dan heri esi Mi ben o strafu den feyanti fu den,

feti nanga den wan di ben wan feti nanga den.

₁₆Den di no lobi MASRA, o kon boigi gi En

a strafu fu den o tan fu têgo.

₁₇Ma unu Mi ben o gi a moro bun tarwe,

Iya, Mi ben o gi un bogobogo oni fu a bergiston.”

Gado opo tnapu na mindri den gado na heimel,

A e krutu den gado, taki:

₂“Olanga un o tan leisi strafu na tapu wan kruktu fasi?

Olanga un o go doro fu teki a sei fu den ogri-ati sma? sela

₃Du bun gi den swakiwan,

nanga den pikin di no abi p'pa nanga m'ma moro,

meki den mofinawan nanga den pôtiwan kisi den leti.

₄Ferlusu a swakiwan nanga a pôtiwan,

ferlusu den puru ini a makti fu den ogri-ati sma.

₅Un no sabi noti èn un no e ferstan noti,

na ini dungru un e waka,

na dat' meki grontapu pori so.

₆Mi ben taki wan leisi taki: un na gado,

Mi ben kari un manpikin fu a Moro Hei Gado.

₇Ma un o dede leki libisma,

un o fadon leki den tiriman fu grontapu.”

₈Du wan sani Gado, krutu grontapu,

bika ala folku na fu Yu.

₂Tye Gado, no sidon tiri,

Gado, no tan tiri èn sidon luku nomo.

₃Bika luku, den feyanti fu Yu e meki opruru,

den di no lobi Yu e kaka futu gi Yu.

₄Den e meki mofo fa den o kisi Yu folku tapu wan bedrigi fasi,

den sidon e taki makandra fa den o kisi a wan di Yu lobi.

₅Den e taki: “Kon meki wi kiri a folku disi puru na pasi.

No wan sma mus memre a nen fu Israel moro.”

₆Den agri nanga san den sidon taki makandra,

den meki wan ferbontu fu feti Yu:

₇Den Edomitisma nanga den Ismaelitisma,

den sma fu Moab nanga Hagar,

₈fu Gebal, Amon nanga Amalek,

den di fu Filistea nanga den sma fu Tyrus.

₉Srefi Asur go moksi nanga den,

den go yepi den bakapikin fu Lot. sela

₁₀Du nanga den leki san Yu ben du nanga Midyan,

leki fa Yu ben du nanga Sisera nanga Yabin

na a Kisonkriki.

₁₁Yu kiri den na Endor,

den dedeskin fu den tan didon leki doti.

₁₂Du nanga den edeman fu den

leki fa Yu du nanga Oreb nanga Seeb,

du nanga ala den kownu fu den

leki fa Yu du nanga Sebak nanga Salmuna.

₁₃Den ben taki:

“Wi o teki a kondre dati abra pe a oso fu Gado de.”

₁₄Mi Gado, meki den de leki drei wiwiri,

leki aleisibuba di a winti e wai gwe.

₁₅Leki fa faya e bron wan busi es'esi,

leki fa a e bron ala sani di e gro tapu wan bergi,

₁₆na so Yu mus go na den baka nanga a tranga winti fu Yu,

bruya den nanga wan draiwinti.

₁₇Tye MASRA, meki bigi syen naki den,

dan den sa drai suku Yu.

₁₈Meki den kisi syen fu têgo,

meki den no sabi san fu du,

meki den dede gwe nanga bigi syen.

₁₉So den sa ferstan taki Yu nen na: MASRA,

a Moro Hei Gado fu heri grontapu.