Wan begi na ini tranga siki
1Wan Singi. Wan psalm fu den Korakitisma. Gi a tiriman fu a singigrupu fu a tempel. A mus singi a srefi fasi leki: Makalat leanot. Wan singi fu Heman, a Esrakitiman, di mus leri wi wan sani.
2MASRA, Gado di e ferlusu mi,
deiten mi e kari trangatranga,
te neti mi e sidon tiri na Yu fesi.
3Meki a begi fu mi doro na Yu fesi,
arki te mi e kari Yu.
4bika den bigi ogri di e miti mi, den furu,
dyonsro mi o doro na ini dedekondre.
5Sma e si mi kba leki wan sma di o dede go ini en grebi,
mi gersi wan man di no abi krakti moro.
6Mi e si misrefi kba makandra nanga dedewan,
leki dede srudati di didon ini wan grebi,
leki wan sma di Yu no e prakseri moro
leki wan sma di Yu no e yepi moro.
7Yu poti mi dipi ini a moro dipi olo,
ini dipi dungru.
8A atibron fu Yu de tranga na mi tapu,
Yu e naki mi leki fa skwala e naki na botoskin. sela
9Yu prati mi nanga den mati fu mi,
Yu meki mi tron wan groskin sani gi den,
mi tapu fu ala sei,
mi no man kmoto fu no wan sei.
10Sari meki den ai fu mi no man si krin moro.
tye MASRA, na Yu mi e kari ala dei,
na Yu mi e langa den anu fu mi.
11Yu no e du wondru gi dedewan,
dedewan no e opo tu èn prijse Yu. sela
12Sma no e taki fu a bigi lobi fu Yu ini a grebi,
noso fa Yu de fu fertrow, ini a presi fu pori.
13Sma no e taki fu den wondru fu Yu na ini a dungru,
ini a kondre pe sma no e prakseri yu moro te yu doro drape,
den no e taki fa Yu e du sani nanga leti.
14Dat' meki mi e kari Yu, MASRA,
te mamanten mi e kon na Yu fesi nanga begi.
15MASRA, fu sanede Yu e yagi mi gwe?
Fu sanede Yu e drai Yu fesi gi mi?
16Mi na wan mofinawan,
a gersi mi e dede gwe sensi di mi yongu.
Mi e nyan a strafu fu Yu,
mi no sabi moro san mi mus du.
17A hebi atibron fu Yu e kon na mi tapu leki skwala,
den strafu fu Yu e kiri mi.
18Heri dei den e lontu mi leki watra,
fu alasei den e tapu mi.
19Yu prati mi nanga den moro bun mati fu mi,
a wan enkri mati fu mi
na a dungru ini san mi e sidon.
