Dag 233 van 365- Psalm 107-109 en 1 Korintiërs 4

₁Prijse MASRA, bika A bun,

a lobi fu En na fu têgo.

₂Meki den sma di MASRA ferlusu taki so,

den sma di A ferlusu fu a makti fu a feyanti,

₃den sma di A puru ini den kondre tyari kon na wan,

fu a oostsei nanga fu a westsei,

fu a noordsei nanga fu a zuidsei.

₄Sonwan ben de di ben e waka lontu ini a dreisabana,

den wawan tapu wan pasi,

ma den no ben man feni wan foto fu den go libi.

₅Angri nanga watra ben e kiri den,

den ben de fu dede.

₆Dan den kari MASRA ini den nowtu,

èn A ferlusu den ini a benawtu ini san den ben de.

₇A sori den wan bun pasi,

wan pasi di tyari den go na wan foto fu den go libi.

₈Meki den prijse MASRA fu a lobi fu En,

nanga fu den wondru di A du gi libisma.

₉A gi watra na den sma di watra ben e kiri,

nanga nyanyan na den sma di angri ben e kiri.

₁₀Sonwan ben de ini dipi dungru,

den ben tai nanga keti,

₁₁bika den ben poti den wortu fu Gado na wan sei,

èn den ben si a rai fu a Moro Hei Gado leki noti.

₁₂Dat' meki A meki den boigi ondro hebi wroko,

den fadon, ma den no ben abi no wan sma fu opo den.

₁₃Dan den kari MASRA ini den nowtu,

èn A ferlusu den ini a benawtu ini san den ben de.

₁₄A puru den na ini a dipi dungru,

A broko den keti di ben tai den.

₁₅Meki den prijse MASRA fu a lobi fu En,

nanga fu den wondru di A du gi libisma,

₁₆bika A naki kopro doro opo,

A naki isri greni broko.

₁₇Son donwan ben de di ben e nyan pina

fu di den ben e libi wan sondu libi

èn fu di den ben e du kruktudu.

₁₈Den no ben lostu no wan nyanyan,

èn den no ben abi langa moro fu libi.

₁₉Dan den kari MASRA ini den nowtu,

èn A ferlusu den ini a benawtu ini san den ben de.

₂₀A seni a wortu fu En, A dresi den,

èn A kibri den fu den no dede.

₂₁Meki den prijse MASRA fu a lobi fu En,

nanga fu den wondru di A du gi libisma.

₂₂Meki den tyari ofrandi gi En fu gi En tangi,

meki den ferteri nanga prisiri fu den sani di A du.

₂₃Sonwan fu den ben e go nanga den sipi tapu den liba,

den ben bai nanga seri sani na tapu den bigi watra.

₂₄Den si den wroko fu MASRA,

nanga den wondru fu En tapu a se.

₂₅A taki èn wan tranga winti bigin wai,

di ben e opo den skwala go na loktu.

₂₆A ben opo den sipi go na heimel,

dan A ben en meki den fadon go baka ini a se,

den sipiman ben lasi ati srefsrefi.

₂₇Den ben misi futu èn fadon leki drunguman,

a koni di den ben abi no ben man yepi den.

₂₈Dan den kari MASRA ini den nowtu,

èn A ferlusu den ini a benawtu ini san den ben de.

₂₉A meki a tranga winti tron wan safri winti,

den skwala go didon tiri fu den.

₃₀Den ben breiti taki den skwala ben kon tiri,

dan Gado tyari den go na a lanpe pe den ben wani go.

₃₁Meki den prijse MASRA fu a lobi fu En,

nanga fu den wondru di A du gi libisma.

₃₂Meki den gi En grani te a pipel de makandra,

prijse En na mindri fu den fesiman.

₃₃A meki liba tron dreisabana,

A meki watrabron tron presi pe watra no ben de.

₃₄A meki a gron di ben fatu tron wan gron di sowtu,

fu a ogri di den sma ben e du di ben e libi drape.

₃₅A meki dreisabana tron presi nanga furu watra,

presi pe watra no ben de tron watrabron.

₃₆A meki sma go libi drape di angri ben e kiri,

èn den meki wan foto fu libi na ini.

₃₇Den sai pranigron èn den prani droifidyari,

èn den koti furu nyanyan.

₃₈A blesi den èn den kon furu,

A meki den meti fu den kon moro furu tu.

₃₉Ma te A no ben e blesi den

feyanti ben wini den èn broko den saka,

den ben kwinsi den èn pina den.

₄₀Dan A ben e meki bigi syen naki den sma nanga makti,

A meki den waka lontu ini a sabana

sondro fu sabi fa fu kmoto na ini.

₄₁Ma A kibri den mofinawan fu sma no pina den,

A meki den famiri fu den kon bigi srefsrefi.

₄₂Den sma di e libi leki fa a fiti e si dati èn den e prisiri

den sma di e du kruktudu no man taki noti.

₄₃Meki den sma di koni teki den sani disi na ati,

Meki libisma poti prakseri tapu a bigi lobi fu MASRA.

₂Mi ati sidon, mi Gado,

mi wan singi,

singi wan psalmsingi nanga ala san de ini mi.

₃Meki yusrefi klari, harp nanga citer,

mi wani wiki fosi dei broko.

₄Mi sa prijse Yu, MASRA, na mindri den folku,

singi psalmsingi gi Yu meki ala kondre yere.

₅MASRA, a lobi fu Yu bigi moro leki wi kan ferstan,

a bow di sma kan bow na Yu tapu no de fu marki.

₆Mi Gado, sori a makti nanga a glori fu Yu,

sori en na heimel nanga grontapu.

₇Ferlusu den lobiwan fu Yu,

meki a krakti fu Yu gi wi a wini,

piki wi.

₈Gado taki na ini En santa presi taki:

“Mi o prisiri te Mi o prati a kontren fu Sikem,

te Mi o marki a Sukotdal.

₉Gilead nanga Manase, na Mi abi den,

Efraim na a fet'ati di Mi weri tapu Mi ede,

Yuda a tiki nanga san Mi rigeri.

₁₀Moab na a beki pe Mi e wasi,

tapu Edom mi e fringi Mi susu,

Mi bari fu di Mi wini Filistea.”

₁₁Suma sa tyari mi go na a tranga foto?

Suma sa tyari mi go na Edom?

₁₂Na Yu, Gado, di ben poti wi na wan sei,

Na Yu, Gado, o hari go nanga a legre fu wi?

₁₃Yepi wi nanga den feyanti fu wi,

bika a yepi fu libisma na noti.

₁₄Nanga Gado wi sa wini,

bika Ensrefi sa traputrapu den feyanti fu wi.

Tye Gado, Yu di mi e prijse,

no tan tiri!

₂Bika ogri-ati sma nanga bedrigiman e taki na mi tapu,

den e taki wan lo lei fu mi.

₃A de fu yere ini den sani di den e taki

taki den no lobi mi srefsrefi,

den e feti mi sondro taki mi du den wan sani.

₄Den e piki a lobi fu mi nanga feyantifasi,

ma mi e tan begi.

₅Den e pai a bun fu mi nanga ogri,

mi e sori den lobi, ma den no man si mi na ai.

₆“Meki wan ogri-ati krutubakra krutu a tori fu en,

meki wan sma tnapu na en let'anu fu krutu en.

₇A mus fiti fu kisi strafu te den krutu en,

Gado no mus arki a begi fu en.

₈Meki a dede fruk'fruku,

meki wan tra sma du a wroko fu en.

₉Meki den pikin fu en tan sondro p'pa,

a uma fu en sondro masra.

₁₀Meki den pikin fu en e waka begi nomo,

meki den suku nyanyan ini den oso di broko didon na gron.

₁₁Meki den sma di a mus pai

kon teki ala san a libi na baka,

meki sma di a no sabi

kon fufuru ala sani gi san a naki en skin.

₁₂Meki no wan sma tan sori en lobi,

meki no wan sma abi sari-ati nanga den pikin fu en.

₁₃Meki ala den pikin nanga bakapikin fu en dede gwe,

meki sma di e gebore na en baka no sabi not'noti fu en.

₁₄Meki MASRA tan memre den kruktudu fu den afo fu en,

meki A no fergiti den sondu fu a m'ma fu en.

₁₅Meki MASRA tan si den na en fesi,

meki no wan sma na grontapu memre a nen fu den moro.

₁₆Bika a no ben prakseri fu sori lobi tu,

ma a ben go na baka den mofinawan, den pôtiwan

nanga den sma di ben lasi ati,

te leki den dede.

₁₇A ben lobi fu fluku trawan

meki den fluku kon now tapu ensrefi

a no ben lobi blesi trawan

meki blesi tan fara fu en tu.

₁₈Meki fluku de na en tapu leki fa krosi e tapu wan sma skin,

meki den furu en inisei leki a watra di a e dringi,

meki den go te ini en bonyo leki a oli.

₁₉Iya, meki a fluku de na en tapu leki a krosi na en skin,

leki a banti di a tai lontu en bere ala dei.”

₂₀Meki dati de a pai di MASRA e gi den feyanti fu mi,

den di e winsi fu ala den ogri disi miti mi.

₂₁Ma Yu, MASRA Masra, du bun gi mi fu Yu nen ede,

ferlusu mi, fu a bigi lobi fu Yu.

₂₂Mi na wan mofinawan èn mi pôti,

mi ati soro na mi inisei.

₂₃A libi e kmopo ini mi leki fa wan schaduw e gwe te neti e fadon,

leki wan sma e seki wan sprenka puru na en skin.

₂₄Den kindi fu mi kon swaki fu a faste di mi e faste,

mi kon mangri, no wan fatu no de moro na mi skin.

₂₅Na dati meki den e teki mi e meki spotu,

te den e si mi den e seki den ede.

₂₆MASRA, mi Gado, yepi mi,

ferlusu mi fu Yu bigi lobi ede.

₂₇Dan den sa kon sabi taki na Yu anu de ini a tori

taki na Yu, MASRA, du en.

₂₈Blesi mi, awinsi den e fluku mi,

meki den kisi syen, awinsi den e opo densrefi,

ma meki Yu knekti abi prisiri.

₂₉Meki syen naki den feyanti fu mi,

meki a syen de na den tapu leki wan krosi.

₃₀Ma mi sa prijse MASRA nanga tranga sten,

singi gi En na mindri fu furu trawan,

₃₁bika A de wan yepi gi den pôtiwan,

A e puru den ini anu fu den wan di e krutu den.