Dag 236 van 365- Psalm 116-118 en 1 Korintiërs 7:1-24

₁Mi lobi MASRA,

bika A e yere mi sten,

A e arki te mi e begi en tangitangi.

₂A kaka En yesi fu arki mi,

na dat' meki mi sa kari En

mi heri libi langa.

₃Mi ben fasi ini den titei di dede ben seti gi mi,

mi ben frede sote taki mi ben o dede,

mi ben de na ini benawtu nanga sari.

₄Ne mi kari MASRA, mi taki:

“Tye MASRA, ferlusu mi fu mi no lasi mi libi!”

₅MASRA abi bun-ati,

A e krutu sani na tapu wan leti fasi,

a Gado fu wi e sorgu gi wi.

₆MASRA e kibri den sma di no man yepi densrefi,

mi ben kon swaki, ma A ferlusu mi.

₇Mi sili, now yu kan de tiri fu yu baka,

bika MASRA ben bun gi yu.

₈Yu kibri mi fu mi no dede,

Yu meki mi ai no lon watra moro,

Yu kibri mi fu mi no fadon.

₉Mi sa tan waka na MASRA fesi,

ini a kondre pe sma de di e libi.

₁₀Mi tan bribi, srefi di mi taki:

“Mi de ini hebi benawtu.”

₁₁Ini mi benawtu mi taki:

“No wan sma de fu fertrow.”

₁₂Fa mi sa pai MASRA baka

fu ala den bun di A du gi mi?

₁₃Mi sa kanti win leki wan ofrandi,

mi sa opo a nen fu MASRA.

₁₄Mi sa du san mi pramisi MASRA,

leti fesi a heri pipel fu En.

₁₅Na wan tranga sani gi MASRA,

fu si te den wan di tan waka na En baka

e dede.

₁₆Tye MASRA, mi na Yu knekti,

mi e dini Yu leki fa mi m'ma ben dini Yu,

Yu lusu den banti di ben tai mi.

₁₇Mi sa tyari wan ofrandi fu gi Yu tangi,

èn mi sa opo a nen fu MASRA.

₁₈Mi sa du san mi ben pramisi MASRA,

leti fesi a heri pipel fu En,

₁₉tapu a dyari fu a oso fu MASRA,

leti na mindri fu Yerusalem.

Haleluya!

₁Folku, un alamala, un prijse MASRA,

kondre, un alamala, un gi En grani,

₂bika a lobi di A e sori wi bigi fu tru,

èn un kan bow na En tapu fu têgo.

Haleluya!

₁Prijse MASRA, bika A bun,

a lobi fu En na fu têgo.

₂Meki Israel tak' now taki:

“A lobi fu En na fu têgo.”

₃Meki den bakapikin fu Aaron tak' now taki:

“A lobi fu En na fu têgo.”

₄Meki den sma di e lespeki MASRA tak' now taki:

“A lobi fu En na fu têgo.”

₅Di mi ben de na ini benawtu mi kari MASRA,

MASRA piki mi èn A puru mi ini a benawtu.

₆MASRA de nanga mi, dat' meki mi no e frede,

san libisma o man du mi?

₇MASRA de na mi sei fu yepi mi,

dat' meki mi e si den feyanti fu mi leki noti.

₈A moro betre fu kibri na MASRA

dan fu fertrow tapu libisma.

₉A moro betre fu kibri na MASRA

dan fu fertrow tapu prenspari sma.

₁₀Ala den folku ben lontu mi,

ma ini a nen fu MASRA mi puru den na pasi.

₁₁Den ben lontu mi, tapu mi fu alasei,

ma ini a nen fu MASRA mi puru den na pasi.

₁₂Leki waswasi den ben lontu mi,

ma den dede gwe es'esi leki te makamaka teki faya.

Ini a nen fu MASRA mi puru den na pasi.

₁₃Un ben naki mi trowe,

pikinso moro un ben kiri mi,

ma MASRA yepi mi.

₁₄MASRA na mi krakti, na En e meki mi e singi,

na En ferlusu mi.

₁₅Arki! Babari fu prisiri nanga singi de fu yere

ini den tenti fu den sma di bun ini Gado ai:

A let'anu fu MASRA e du bigi sani,

₁₆a let'anu fu MASRA e opo mi,

a let'anu fu MASRA e du bigi sani!

₁₇Mi no sa dede, ma mi o libi,

èn mi o ferteri fu den sani di MASRA du.

₁₈MASRA strafu mi hebi,

ma A no libi mi meki mi dede.

₁₉Opo den doro fu a tempel gi mi,

fu mi go na inisei,

fu prijse MASRA.

₂₀Disi na a doro fu go na MASRA,

den sma di bun ini Gado ai e psa drape kon na ini.

₂₁Mi e taki Yu tangi fu di Yu piki mi,

èn Yu tyari ferlusu kon gi mi.

₂₂A ston di den mesreman feni taki no bun,

na a srefi ston dati tron a moro prenspari ston

fu a heri oso.

₂₃Disi na Masra wroko,

èn wi e ferwondru fu si dati.

₂₄Disi na a dei di MASRA wini a feti,

meki wi prisiri, meki wi breiti fu dati.

₂₅Tye MASRA, tyari wini gi wi,

tye MASRA, meki sani waka bun gi wi.

₂₆A sma di e kon ini a nen fu MASRA,

na wan blesi sma.

Fu a oso fu MASRA wi e blesi yu.

₂₇MASRA na Gado,

na En meki sani waka bun gi wi baka.

Tai den ofrandi nanga titei

na den tutu fu a altari.

₂₈Yu na mi Gado, na Yu mi e gi tangi

mi Gado, mi sa taki fa Yu bigi.

₂₉Prijse MASRA, bika A bun,

a lobi fu En na fu têgo!