19San un denki taki mi wani taki nanga dati? Taki wan sani san gi leki ofrandi na wan kruktu gado na wan spesrutu sani? Noso taki wan kruktu gado na wan trutru gado? 20Kwet'kweti! San mi wani taki na taki a ofrandi san den e tyari, na wan ofrandi gi takruyeye. A no gi Gado. Èn mi no wani fu un moksi nanga takruyeye. 21Un no kan dringi fu a kan fu Masra èn fu a kan fu takruyeye tu. Un no kan teki prati na a tafra fu Masra èn na a tafra fu takruyeye tu. 22Na wani un wani taki Masra dyarusu na un tapu? Un denki taki un tranga moro En?
No meki sma taki na un tapu
23Un kan du ala sani, ma ala sani no bun fu du. Un kan du ala sani, ma a no ala sani e bow a bribi. 24No luku wawan san bun gi yu, ma luku tu san bun gi trawan. 25Un kan nyan ala meti di de fu seri na srakti-oso. Un konsensi no abi fu fon unu, fu un aksi pe a kmoto. 26Bika grontapu nanga ala sani san de na ini, na fu Masra. 27Efu wan sma di no de wan bribisma aksi un fu kon nyan èn un go, dan un kan nyan ala sani san a gi un fu nyan. Un konsensi no abi fu fon unu, fu un aksi pe a kmoto. 28Ma efu wan sma taigi yu taki: “Un ben gi a meti disi leki wan ofrandi,” dan yu no mus nyan en fu a sma ede di taigi yu, nanga fu konsensi ede. 29Mi no e taki fu yu eigi konsensi, ma fu a di fu a tra sma. Bika fu sanede a konsensi fu wan tra sma ben o tapu mi fu du wan sani san mi feni taki mi kan du? 30Efu mi taki Gado tangi fu a sani san mi e nyan, dan fa sma kan krutu mi fu wan sani gi san mi taki Gado tangi? 31Dat' meki efu un e nyan, efu un e dringi, noso awinsi san un e du, un du ala sani fu gi Gado grani. 32Un no mus du noti san o meki den Dyusma, den Grikisma, noso a gemeente fu Gado taki na un tapu. 33Du san mi e du, mi srefi e du ala sani fu meki ala sma prisiri. Mi no e luku san bun gi mi, ma mi e luku san bun gi furu trawan, fu Gado kan ferlusu den.
