Dag 25 van 365- Exodus 12-13 en Matteüs 16

₁MASRA taigi Moses nanga Aaron ini Egipte taki: ₂“Bigin fu now a mun disi sa de a fosi mun fu a yari gi unu. ₃Taigi ala sma fu Israel taki: ‘Tapu a di fu tin dei fu a mun disi, ala mansma fu ibri famiri mus teki wan skapu noso wan krabita gi en oso. ₄Efu a meti furu tumsi gi den sma fu wan oso, den kan nyan en makandra nanga sma fu wan tra oso. Ma den mus sorgu taki ala sma kisi nofo. ₅A skapu noso a krabita di den o teki mus de wan manwan fu wan yari. Noti no mus mankeri en. ₆Den mus poti en aparti te leki a di fu tin-na-fo dei fu a mun disi. Dan a heri folku fu Israel mus srakti den meti te son e saka. ₇Ini ala oso pe a meti o nyan den sma mus teki fu a brudu fu a meti dan den lobi en gi den tu postu fu a doro nanga gi a postu tapusei fu a doro. ₈A srefi neti dati den mus nyan a meti. Den mus losi en tapu wan faya dan den nyan en nanga brede di meki sondro dyesi èn nanga bita spesrei. ₉A meti no mus lala èn den no mus bori ini watra tu. A meti mus losi tapu wan faya nanga a heri ede, den bowtu nanga a inibere. ₁₀Noti fu en mus tan te tamara. San tan te tamara den mus bron. ₁₁So den mus nyan en: Den mus nyan en es'esi nanga den susu na den futu, den wakatiki na den anu èn den mus weri krosi fu teki waka. Na wan Paska gi MASRA. ₁₂Bika tide neti Mi o psa ini a kondre Egipte, dan Mi o kiri ala den fosi pikin fu libisma nanga meti. Mi MASRA, o krutu ala den gado fu Egipte. ₁₃A brudu na den ososkin na wan marki pe unu e libi. Te Mi si a brudu, Mi o psa. Dan so un no o fadon ini a hebi strafu nanga san Mi o strafu Egipte.

₁₄A dei disi mus de wan dei di un mus tan memre. Un mus teki en leki wan fesadei fu MASRA. Gi den pikin fu unu di e kon na baka a mus de wan sani di den mus tan du. ₁₅Seibi dei langa un sa nyan brede di meki sondro dyesi. Tapu a fosi dei kba un mus puru a dyesi ini un oso. Bika a sma di nyan wan sani di meki nanga dyesi tapu a fosi dei go miti a di fu seibi dei, den no mus si moro leki wan sma fu Israel. ₁₆Tapu a fosi dei nanga tapu a di fu seibi dei un mus hori wan santa konmakandra. No wan wroko mus du a dei dati. Soso den sani san un o nyan un kan meki klari. ₁₇Un mus tan memre den dei disi, pe un e nyan brede di meki sondro dyesi, leki wan fesadei. Bika tapu a dei disi Mi o puru unu, den lo fu Israel, na ini Egipte. Dat' meki gi ala den pikin fu unu di e kon na baka a mus de wan sani di den e tan du. ₁₈Ini a fosi mun, bigin na a mofoneti fu a tin-na-fo dei, un sa nyan brede di meki sondro dyesi. Un sa nyan en te go miti a mofoneti fu a di fu tutenti-na-wan dei. ₁₉Seibi dei langa dyesi no mus de fu feni ini un oso. Bika a sma di nyan wan sani di meki nanga dyesi, den no mus si moro leki wan sma fu Israel. A no abi trobi efu na wan doroseisma noso wan sma di gebore leki wan sma fu Israel. ₂₀Un no sa nyan noti di meki nanga dyesi. Ini ala oso pe un e tan un sa nyan brede di meki sondro dyesi.’ ”

₂₁Dan Moses seni kari ala den fesiman fu Israel. A taigi den taki: “Un gwe go teki skapu nanga krabita kon gi un famiri fu un srakti gi a Paska. ₂₂Baka dati un mus teki wan bosu hisopwiwiri. Un mus dopu en ini a skarki nanga a brudu, dan un e lobi en gi a postu tapusei fu a doro nanga den tu postu fu a doro. Dan no wan fu unu mus go na dorosei moro te a tamara mamanten. ₂₃Bika MASRA sa psa na ini Egipte fu strafu a kondre. Ma te MASRA si a brudu na a postu tapusei fu a doro nanga den tu postu fu a doro, A sa psa a doro dati. A no sa meki a wan di o strafu kon ini un oso fu kiri unu tu. ₂₄Un mus tan du den sani disi. Unu nanga den pikin fu unu. ₂₅Un mus tan du a sani disi te un doro ini a kondre di MASRA o gi unu, leki fa A ben pramisi. ₂₆Te den pikin fu unu aksi un taki: ‘Fu sanede wi e du a sani disi?’ ₂₇Dan un mus piki den taki: ‘Na wan Paska-ofrandi gi MASRA. Bika di wi ben de na Egipte, MASRA ben strafu den sma fu Egipte, ma A ben waka psa den oso fu den Israelitisma.’ ” Dan a folku kindi èn den gi Gado grani. ₂₈Baka dati den sma fu Israel go du den sani leki fa MASRA ben taigi Moses nanga Aaron taki den mus du en.

₂₉Mindrineti MASRA kiri ala fosi pikin na ini a kondre Egipte. Bigin na a fosi manpikin fu Farao di ben o teki a presi fu en p'pa leki kownu, te go miti a fosi manpikin fu a strafuman di ben de na dungru-oso. A kiri ala den fosi pikin fu den meti tu. ₃₀Farao, den knekti fu en nanga ala sma fu Egipte ben opo a neti dati. Krei ben e bari ini Egipte. Bika no wan oso no ben de pe wan sma no ben dede.

₃₁A neti dati srefi Farao seni kari Moses nanga Aaron kon. A taigi den taki: “Un meki unsrefi klari. Un nanga den Israelitisma kan kmoto gwe na mindri fu mi folku. Un gwe go dini MASRA leki fa un taki. ₃₂Un kan teki un skapu, un krabita nanga un kaw tu, leki fa un aksi dan un gwe. Ma un blesi mi tu.” ₃₃Den sma fu Egipte ben begi a pipel tangitangi tu fu gwe libi a kondre so esi leki den man. Den ben taki: “Noso un alamala o dede.” ₃₄Den Israelitisma teki a blon di den ben masi kba, ma gi san den no ben poti dyesi ete. Den poti en ini den koba pe den e masi blon, dan den tai den ini krosi anga abra den skowru. ₃₅Den Israelitisma du tu san Moses nanga Aaron ben taigi den. Den aksi den sma fu Egipte solfru sani, gowtu sani nanga krosi. ₃₆MASRA ben meki taki den sma fu Egipte ben feni en bun san a pipel ben aksi den. So den gi den san den ben aksi. Tapu a fasi disi den ben puru gudu na den sma fu Egipte anu.

₃₇Baka dati den Israelitisma kmoto fu Raamses go na Sukot. Den ben de sowan siksi hondro dusun man di ben e waka nanga futu. Den pikin no ben teri. ₃₈Wan lo tra sma di no ben de Israelitisma gwe nanga den tu. Den ben e tyari wan bigi grupu skapu, krabita nanga kaw gwe tu. ₃₉Den baka kuku di ben meki sondro dyesi, fu a blon di den ben tyari kmoto fu Egipte. A blon disi ben masi kba ma den no ben poti dyesi ete gi en fu di den no ben abi ten moro. Bika den sma ben yagi den puru ini Egipte èn den no ben abi ten fu teki nyanyan gi ondropasi.

₄₀Den Israelitisma tan fo hondro nanga dritenti yari ini Egipte. ₄₁Tapu dati, di den ben de fo hondro nanga dritenti yari ini a kondre, ala den lo fu a pipel MASRA kmoto ini a kondre Egipte. ₄₂A ben de wan neti pe MASRA ben e hori wakti gi den fu tyari den kmoto ini Egipte. Dat' meki den Israelitisma nanga ala den bakapikin fu den e hori wakti a neti disi fu gi MASRA grani.

₄₃MASRA taigi Moses nanga Aaron taki: “Disi na den sani di un mus tan du na a Paskanyanyan: No wan sma di no de wan Israelitisma mus nyan fu en. ₄₄Ala srafu di wan sma bai nanga moni kan nyan fu en, baka te a besnei. ₄₅Wan doroseisma di e tan nanga yu no mus nyan fu en. Sosrefi wan knekti di yu yuru fu wroko gi yu. ₄₆A paskanyanyan mus nyan ini a oso pe den meki en klari. Noti fu a meti mus go na dorosei. No wan bonyo fu en un mus broko. ₄₇Ala den Israelitisma mus hori a fesa disi. ₄₈Efu wan doroseisma di e tan na yu wani nyan a Paska fu MASRA, dan en nanga ala mansma fu en oso mus besnei. Baka dati a kan nyan a Paska. Dan den sa si en leki wan sma fu Israel. Ma no wan sma di no besnei mus nyan fu a Paska. ₄₉A srefi wèt sa de gi den sma di gebore leki sma fu Israel nanga gi doroseisma di e tan na un mindri.” ₅₀Dan den Israelitisma du san MASRA taigi Moses nanga Aaron taki den mus du.

₅₁A srefi dei dati MASRA tyari ala den lo fu den Israelitisma kmoto na ini Egipte.

₁MASRA taigi Moses taki: ₂“Ala fosi pikin fu den Israelitisma un mus poti aparti gi Mi. Ala pikin, fu libisma nanga meti, di kmoto leki fosiwan na ini en m'mabere, na fu Mi.”

₃Ne Moses taigi a folku taki: “Un mus memre a dei disi di un kmoto na ini Egipte pe un ben de srafu. Bika nanga en makti MASRA puru un drape. Fu dat'ede un mus nyan no wan sani di meki nanga dyesi. ₄Tapu a dei disi ini a mun Abib wi e gwe. ₅Te MASRA tyari un go na a kondre fu den Kananitisma, den Hetitisma, den Amoritisma, den Hiwitisma nanga de Yebusitisma, un mus tan hori a fesa disi na ini a mun disi. A ben pramisi den afo fu wi taki A bo gi wi a kondre disi. Wan kondre pe merki nanga oni de bogobogo. ₆Seibi dei langa un sa nyan brede di meki sondro dyesi èn tapu a di fu seibi dei un mus hori wan fesa gi MASRA. ₇Seibi dei langa un sa nyan brede di meki sondro dyesi. No wan sani di meki nanga dyesi mus de na un mindri. Ini a heri kondre fu unu dyesi no mus de. ₈Tapu a di fu seibi dei un mus ferteri den pikin fu unu taki: ‘Mi e du disi gi MASRA, fu san A du gi mi di A tyari mi kmoto ini Egipte.’ ₉A mus de leki wan marki tapu un anu nanga un fes'ede, fu a wèt fu MASRA tan na ini un mofo. Bika nanga en makti MASRA ben puru un na ini Egipte. ₁₀Den sani disi di Mi taigi un fu du, un mus tan du ala yari tapu wan fasti ten.

₁₁Te MASRA tyari un go na a kondre fu den Kananitisma, leki fa A ben pramisi den afo fu wi èn A gi wi a kondre, ₁₂dan un mus poti ala fosi pikin aparti gi MASRA. Fu den meti un mus poti ala fosi manwan aparti gi MASRA tu. ₁₃Ma a fosi manpikin fu wan buriki yu sa bai fri nanga wan skapu noso wan krabita. Efu yu no wan du dati dan yu mus drai en neki broko. Ibri fosi manpikin fu wan libisma yu mus bai fri. ₁₄Te den pikin fu unu sa aksi bakaten taki: ‘Fu sanede wi e du a sani disi?’ Dan yu mus piki den taki: ‘Fu di MASRA puru wi nanga en makti ini Egipte, pe wi ben de srafu. ₁₅Bika di Farao ben tranga en yesi fu meki wi go, MASRA kiri ala fosi pikin fu libisma nanga meti ini a kondre Egipte. Dat' meki fu ala meti wi e gi a manwan, di kmoto leki fosiwan ini a m'mabere, leki wan ofrandi na MASRA. Èn ala fosi manpikin fu wi, wi abi fu bai fri. ₁₆A mus de leki wan marki tapu wi anu nanga fes'ede. Bika nanga en makti MASRA ben puru wi na ini Egipte.’ ”

₁₇Di Farao meki a pipel go, MASRA no meki den teki a pasi di ben e psa ini a kondre fu den Filistijnsma, aladi dati ben de a moro syatu pasi. Gado du dati nanga a prakseri taki: “Kande te feti miti a pipel a o hati den taki den ben gwe libi Egipte. Dan den o wani drai go baka.” ₁₈Dat' meki Gado meki a pipel drai teki a pasi fu a sabana di ben e go na a Riet Se.

Den Israelitisma ben waka ini grupu leki srudati kmoto na ini Egipte leki na feti den ben e go. ₁₉Moses ben teki a dedeskin fu Yosef gwe nanga den, bika Yosef ben meki den Israelitisma sweri gi en taki den bo du dati. A ben taigi den taki: “Gado no o fergiti unu. Dan un mus tyari a dedeskin fu mi gwe fu dyaso.”

₂₀Den Israelitisma ben kmoto fu Sukkot dan den meki den kampu na Etam, krosbei fu a sabana. ₂₁Te mamanten MASRA ben e go na den fesi leki wan wolku fu sori den a pasi. A wolku disi ben gersi wan bigi postu. Te neti A ben e krin a pasi gi den leki wan faya di ben gersi wan bigi postu tu. So den Israelitisma ben man waka dei nanga neti. ₂₂Ala dei, dei nanga neti, a wolku nanga a faya ben e go na fesi fu a pipel.

₁Den Fariseiman nanga den Saduseiman ben kon na Yesus. Dan fu tesi En, den aksi En fu sori den wan marki di kmopo fu Gado. ₂Ma Yesus piki den taki: “Efu mofoneti a heimel redi, dan unu sabi taki tamara un o abi wan moi dei. ₃Ma efu mamanten a heimel redi èn a dungrudungru, dan un e sabi taki alen o kon. Fa unu man luku loktu fu sabi fa a dei o de, ma unu no man ferstan den sani san un e si now? ₄Soso takru-ati sma leki unu, di no e du san Gado wani, e suku wan marki. Ma a wan enkri marki san un o kisi, na a marki fu Yona.” Dan Yesus waka gwe libi den.

₅Di den man di ben e teki leri fu Yesus koti a meer abra, den ben fergiti fu tyari brede. ₆Ne Yesus taigi den taki: “Un mus luku bun nanga a dyesi fu den Fariseiman nanga den Saduseiman.” ₇Dan den man bigin taki a tori nanga makandra. Den taki: “Na fu di un no tyari brede meki A taki so.” ₈Ma Yesus ben sabi san den e taki, dat' meki A taigi den taki: “A bribi fu un pikin! Fu sanede un e taigi makandra taki brede no de? ₉Un ai no man opo ete? Un no e memre taki nanga feifi brede Mi gi moro leki feifi dusun sma fu nyan? Un fergiti tu omeni baskita un ben furu di den sma kba nyan? ₁₀Un no e memre taki nanga seibi brede Mi gi moro leki fo dusun sma fu nyan? Un fergiti tu omeni baskita un ben furu di den sma kba nyan? ₁₁Fa un no man ferstan taki a no fu brede Mi ben taki, ma taki un mus luku bun nanga a dyesi fu den Fariseiman nanga den Saduseiman!” ₁₂Dan fosi den kon ferstan taki A no ben taki fu dyesi fu meki brede, ma taki den mus luku bun nanga a leri fu den Fariseiman nanga den Saduseiman.

₁₃Di Yesus doro ini a birti fu a foto Sesarea Filipi, A aksi den man di ben e teki leri fu En taki: “Suma den sma e taki tak' a Manpikin fu Libisma de?” ₁₄Den taigi En taki: “Son sma e taki: Yu na Yohanes a Dopuman. Tra sma e taki: Yu na Elia. Trawan baka e taki: Yu na Yeremia noso wan fu den tra profeiti.” ₁₅Dan Yesus aksi den taki: “Ma unu, suma unu e taki tak' Mi de?” ₁₆Ne Simon Petrus piki En taki: “Yu na a Mesias, a Manpikin fu a libi Gado.” ₁₇Yesus piki en taki: “Simon, manpikin fu Yona, yu na wan blesi sma. Bika a no libisma tyari a sani disi kon na krin gi yu, ma na Mi P'pa di de na heimel. ₁₈Dat' meki Mi o kari yu Petrus. Bika tapu a ston disi Mi sa bow Mi gemeente èn dede srefi no sa man wini en. ₁₉Mi sa gi yu a makti fu tyari sma kon ondro a tiri fu Gado. San yu no wani fu psa na grontapu, Gado no o meki psa, èn san yu wani fu psa na grontapu, Gado o meki psa.” ₂₀Dan Yesus warskow den man di ben e teki leri fu En krin fu den no taigi no wan sma taki En na a Mesias.

₂₁Sensi a ten dati, Yesus bigin sori den man di ben e teki leri fu En taki A mus go na Yerusalem. Drape A o nyan furu pina fu den fesiman fu a folku, fu den prenspari priester, nanga den sabiman fu Gado wèt. A sori den taki sma o kiri En, ma tapu a di fu dri dei Gado o meki A kon na libi baka. ₂₂Ma Petrus kari Yesus go na wan sei, dan a taigi En taki: “Masra, Yu no mus taki so! Gado no o meki den sani dati miti Yu srefsrefi.” ₂₃Ma Yesus drai taigi Petrus taki: “Kmoto na Mi tapu, Satan! Yu e tapu pasi gi Mi. Bika yu no e prakseri den sani fu Gado, ma na libisma sani yu e prakseri.”

₂₄Dan Yesus taigi den man di ben e teki leri fu En taki: “Efu wan sma wani waka na Mi baka, a mus poti en eigi wani na wan sei. A mus de klar'klari fu nyan pina, èn a mus kon nanga Mi. ₂₅Bika a sma di wani tan libi fa a wani, o lasi en libi. Ma a sma di e poti en libi na wan sei fu Mi ede, o feni en. ₂₆Bika san yu e wini efu yu kisi ala sani fu grontapu, ma yu lasi yu libi? Èn san wan sma o man gi fu kisi en libi baka? ₂₇Bika a Manpikin fu Libisma o kon nanga a bigi makti fu En P'pa, makandra nanga den engel fu En, dan A o krutu ibri sma fu den sani san a ben du. ₂₈Fu tru Mi e taigi un taki: Son sma de dya na un mindri di no sa dede fosi den si a Manpikin fu Libisma kon fu tiri sma.”