Dag 255 van 365- Spreuken 13-15 en 2 Korintiërs 5

₁Wan manpikin di koni e arki te en p'pa e leri en fa a mus libi,

ma wan sma di e meki spotu no e arki warskow.

₂Na den sani di wan sma e taki kan meki taki a abi en bun.

ma den sma di no e waka na Gado baka, e angri fu du trawan ogri.

₃A sma di e denki bun fosi a taki, no sa lasi en libi es'esi,

ma a sma di abi wan tak'taki mofo, e suku problema gi ensrefi.

₄Na fu soso wan lesiman e angri fu abi sani,

ma wan sma di e wroko tranga e abi furu.

₅A sma di bun ini Gado ai no lobi lei srefsrefi,

ma wan ogri-ati sma e meki taki sma no lobi en srefsrefi

èn a e kisi syen.

₆Fu du a wani fu Gado e kibri a sma tapu san trawan no man sori finga,

ma sondu e meki ogri-ati sma lasi den libi.

₇Son sma e meki leki den gudu, ma den no abi noti,

tra sma e meki leki den pôti ma den gudu psa marki.

₈A gudu fu wan guduman kan meki a pai fu sma no kiri en,

ma wan pôtisma no e kisi fu yere taki den wan kiri en.

₉Sma di bun ini Gado ai de leki wan krin faya,

ma a faya fu a lampu fu wan ogri-ati sma e dede gwe.

₁₀Sma di denki taki den sabi en moro betre e meki soso trobi,

ma koni sma e teki rai.

₁₁Gudu di yu kisi sondro fu wroko fu en e kba es'esi,

ma a sma di e wroko fu kan abi, e kon gudu.

₁₂Wan sma di e howpu langa fu wan sani e siki,

ma te a kisi san a ben wani a e kisi libi baka.

₁₃A sma di e poti bun rai na wan sei, sa firi a bakapisi fu en,

ma a sma di e sori lespeki te a kisi rai, o kisi pai fu dati.

₁₄A leri fu wan koni sma na wan bron fu libi,

den e puru yu ini den sani di dede ben seti fu fanga yu.

₁₅Nanga prisiri sma e yepi wan sma nanga ferstan,

ma a libi tranga gi wan sma di no e waka baka Gado.

₁₆Ala koni sma e denki bun fosi den du wan sani,

ma wan don sma e meki ala sma si fa a don.

₁₇Wan boskopuman di no de fu fertrow e tyari dyugudyugu,

ma wan boskopuman di de fu fertrow e tyari yepi.

₁₈Pina nanga syen e wakti wan sma di no wan leri fa a mus libi,

ma a sma di e arki te trawan e warskow en, e kisi grani.

₁₉A switi te yu kisi wan sani fu san yu ben e angri,

ma a de wan bigi ogri gi don sma fu no du ogri.

₂₀A sma di e waka nanga koni sma, e kon koni,

ma a sma di e waka nanga don sma, o broko en neki.

₂₁Ogri e tan waka baka sondusma,

ma soso bun e miti den sma di bun ini Gado ai.

₂₂Bun sma e libi gudu gi den pikin

nanga gi den granpikin fu den na baka,

ma a gudu fu den sondusma

na gi den sma di bun ini Gado ai.

₂₃Te wan pôtiman drai a pranigron fu en

a kan gi furu nyanyan,

ma kruktudu e meki a lasi ala sani baka.

₂₄A sma di no e fon en pikin, no lobi en pikin,

ma a sma di lobi en pikin e bigin sori en frukufruku fa a mus libi.

₂₅A sma di bun ini Gado ai e nyan te a sari en,

ma a bere fu a ogri-ati sma e tan leigi.

₁Wan koni uma e hori en ososma na wan,

ma wan don uma e broko en eigi oso.

₂A sma di e libi leki fa a fiti, abi lespeki gi MASRA,

ma a sma di e waka tapu kruktu pasi, no wani sabi not'noti fu En.

₃Don sma e taki sani di de leki wan fonfontiki gi den eigi heimemre,

ma den sani di koni sma e taki e kibri den.

₄Pe bulu no de fu drai a doti, maksin e tan leigi,

ma pe tranga bulu de pranigron e gi furu nyanyan.

₅Wan ketoigi di de fu fertrow no e lei,

ma wan di no de fu fertrow e taki soso lei.

₆Wan sma di e meki spotu noiti no o feni koni,

ma sabi makriki fu feni gi wan sma di abi ferstan.

₇Tan fara fu don sma,

bika yu no o leri noti fu den.

₈A koni fu wan koni sma e meki a sabi sortu pasi a mus waka,

ma a donfasi fu don sma e meki den kori densrefi.

₉Don sma e meki spotu nanga sondu,

ma sma di e libi leki fa a fiti abi prisiri nanga makandra.

₁₀Wan sma no man firi o dipi a sari fu wan trawan de,

noso o bigi a prisiri fu en de.

₁₁A oso fu ogri-ati sma sa broko,

ma a sa go bun nanga a oso fu sma di e libi leki fa a fiti.

₁₂Son leisi sma e prakseri taki den e waka tapu a leti pasi,

ma a kbapisi fu a pasi dati na dede.

₁₃Srefi efu wan sma e lafu en ati kan firi sari,

èn baka a prisiri a sari de ete.

₁₄Wan sma di e waka kruktu pasi o kisi a pai fu den sani di a e du,

ma wan bun sma sa kisi wan moro betre pai.

₁₅Wan sma di no abi ferstan e bribi ala sani,

ma wan sma di koni, e prakseri fosi.

₁₆Wan koni sma e luku bun èn a no e du ogri,

wan don sma no e du nomo leki noti no man psa nanga en.

₁₇A sma di ati e bron esi, e du don,

èn sma no sa lobi a man di e sidon prakseri fa fu du ogri.

₁₈Den sma di no abi ferstan o kon moro don,

ma wan koni sma o kisi moro sabi.

₁₉Takru-ati sma o abi fu saka den srefi gi bun sma,

den ogri-ati sma sa naki na a doro fu den sma di bun ini Gado ai.

₂₀Efu yu na wan pôtisma den mati fu yu srefi no lobi yu,

ma wan guduman abi furu mati.

₂₁A sma di e si wan trawan leki noti, e sondu,

ma a sma di e yepi pôtisma na wan blesi sma.

₂₂Sma di e sidon prakseri fa den o du ogri, e kmoto fu a bun pasi,

ma sma sa lobi yu di e du bun, èn den sa fertrow yu.

₂₃Ala muiti di wan sma e meki abi en pai,

ma wan sma di e tak'taki nomo, o pina.

₂₄A grani di koni e gi na gudu,

a grani fu don sma na moro donfasi.

₂₅Wan ketoigi di de fu fertrow kan meki sma tan na libi,

ma wan di e lei na wan bedrigiman.

₂₆A sma di e lespeki MASRA no e frede noti,

srefi gi den pikin fu en Gado de wan kibripe.

₂₇Lespeki gi MASRA na wan bron fu libi,

a e puru yu ini den sani di dede ben seti fu fanga yu.

₂₈Wan bigi folku e gi wan kownu grani,

a makti fu wan kownu sondro knekti sa kon es'esi na wan kba.

₂₉Wan sma nanga furu ferstan no e kisi atibron es'esi,

ma wan sma di ati e teki faya es'esi e sori moro nanga moro fa a don.

₃₀Efu noti no e trobi wan sma, a o de gesontu,

ma dyarusu de leki wan takru siki di e nyan en fu inisei.

₃₁A sma di e pina wan pôtisma, e afrontu a Wan di meki en,

ma a sma di e sorgu gi wan mofinawan, e gi En grani.

₃₂Wan ogri-ati sma e broko den eigi neki nanga a ogri di a e du,

ma a sma di bun ini Gado ai e feni wan kibripresi te a dede.

₃₃Koni e libi ini a ati fu a sma nanga ferstan,

srefi den sma sondro ferstan sabi dati.

₃₄Fu du a wani fu Gado e gi wan folku grani,

ma sondu na wan syen gi iniwan folku.

₃₅Wan kownu e sori en bunfasi na wan knekti nanga ferstan,

ma en ati o bron tapu wan knekti di e gi en syen.

₁Wan switi piki e kowru atibron,

ma wan wortu di e hati kan meki wan ati teki faya.

₂Den sani di wan koni sma e taki furu nanga sabi,

ma a mofo fu wan don sma e tyari soso don sani kon na doro.

₃Den ai fu MASRA de na alasei,

A e luku san ogri-ati sma nanga bun sma e du.

₄Wortu di e trowstu e gi libi,

ma wortu di no tru e kan du wan sma bigi ogri.

₅Wan don sma e si en leki noti te en p'pa e leri en fa a mus libi,

ma a sma di e teki warskow na wan koni sma.

₆Furu gudu de ini a oso fu a sma di bun ini Gado ai,

ma san wan ogri-ati sma e tyari kon na wan, e gi soso problema.

₇A mofo fu koni sma e prati sabi,

ma don sma no man du dati srefsrefi.

₈A ofrandi fu ogri-ati sma na wan groskin sani gi MASRA,

ma a begi fu den sma di e libi leki fa a fiti e gi En prisiri.

₉A fasi fa ogri-ati sma e libi na wan groskin sani gi MASRA,

ma A lobi den sma di e du a wani fu En.

₁₀A sma di gwe libi a leti pasi, o kisi hebi strafu.

A sma di no lobi srefsrefi te trawan e warskow en, o dede.

₁₁Efu dedekondre de opo-opo gi MASRA,

dan san na a ati fu libisma gi En?

₁₂A sma di e meki spotu no lobi te sma e warskow en.

A no o go na koni sma go suku rai.

₁₃Wan ati di breiti e tyari wan lafu kon tapu a fesi,

ma wan ati di e sari e meki a sma lasi howpu.

₁₄A ati fu wan sma di koni e suku sabi,

ma a mofo fu don sma e taki soso dondon sani.

₁₅Wan pôtisma e psa soso tranga ten,

ma gi wan sma di e prisiri, en heri libi gersi wan fesa.

₁₆A moro betre fu abi pikinso ma yu e lespeki MASRA,

dan taki yu abi furu gudu nanga furu dyugudyugu.

₁₇A moro betre fu nyan wan preti nanga gruntu pe lobi de,

dan bun furu meti pe sma no wani sabi not'noti fu densrefi.

₁₈Wan sma di ati e bron es'esi e meki sma kisi trobi,

ma wan sma nanga langa pasensi e kowru trobi.

₁₉A pasi fu wan lesi sma lai nanga makamaka,

ma a pasi grati fu den sma di e libi leki fa a fiti.

₂₀Wan boi di koni e gi en p'pa prisiri,

ma wan don pikin e si en m'ma fu noti.

₂₁Don sma e prisiri nanga a donfasi fu den,

ma wan sma di abi ferstan e du san bun.

₂₂Den sani di wan sma wani du no o go bun

efu a no sidon prakseri bun fosi a du en,

ma nanga furu raiman sani e go bun.

₂₃A de wan prisiri fu kan gi a yoisti piki tapu a yoisti ten.

Yoisti wortu tapu a yoisti ten na wan bun sani.

₂₄A pasi di wan koni sma e waka e gi langa libi,

tapu a fasi disi a e kmopo na pasi gi dedekondre.

₂₅MASRA e broko a oso trowe fu sma nanga heimemre,

ma a e sorgu taki noti e lasi fu a uma di masra dede kba.

₂₆Den prakseri fu ogri-ati sma na groskin sani gi MASRA,

ma bun wortu no e bedrigi sma.

₂₇A sma di e suku fu kon gudu tapu wan kruktu fasi,

e broko en eigi oso.

ma a sma di no e teki kado fu du sani gi sma,

sa libi langa.

₂₈Wan sma di bun ini Gado ai e prakseri bun fosi a piki,

ma soso ogri e kmoto ini a mofo fu ogri-ati sma.

₂₉MASRA de fara fu ogri-ati sma,

ma A e yere a begi fu den sma di bun ini En ai.

₃₀Wan fesi di e lafu e meki yu prisiri,

èn bun nyunsu e meki a skin firi bun.

₃₁A sma di e arki warskow di kan meki a abi langa libi,

sa de na mindri koniman.

₃₂A sma di no wani arki te sma e sori en tapu en fowtu no lobi en libi.

A sma di e arki warskow e kon moro koni.

₃₃A sma di e lespeki MASRA e kon moro koni,

èn sakafasi e waka fesi grani.