Dag 256 van 365- Spreuken 16-18 en 2 Korintiërs 6

₁Libisma e waka nanga prakseri ini den ede,

ma na MASRA abi a laste wortu.

₂Ala sani di wan sma e du bun na ini en eigi ai,

ma MASRA e luku fu sanede a e du a sani.

₃Te yu wani du wan sani, aksi MASRA fu yepi yu,

dan a sa go bun nanga den sani di yu wani du.

₄MASRA meki ala sani gi wan spesrutu sani,

srefi den ogri-ati sma a meki gi a dei fu strafu.

₅Ibri heimemre sma de leki wan groskin sani gi MASRA,

den o kisi den strafu nomonomo.

₆Wan sma di e sori lobi èn di de fu fertrow e kisi pardon fu en sondu,

wan sma di e lespeki MASRA no e du ogri.

₇Efu MASRA abi prisiri nanga a fasi fa yu e tyari yusrefi,

A e meki den feyanti fu yu srefi kon meki en bun nanga yu.

₈A moro betre yu abi pikinso ma yu e du a wani fu Gado,

dan dati yu abi furu ma yu kisi en wan kruktu fasi.

₉Libisma e prakseri san den o du,

ma na MASRA poti sortu sei a o go.

₁₀Wan kownu e taki nanga a makti di Gado gi en,

te a e koti krutu, a e koti en tapu wan leti fasi.

₁₁MASRA wani taki wan wegi mus soifri,

na En poti o hebi den wegiston mus de.

₁₂A de wan groskin sani gi wan kownu fu du ogri,

bika na soso te den e du a wani fu Gado den e tan kownu.

₁₃Wan kownu e prisiri nanga sma di e taki sani leki fa den de,

a lobi den sma di no e lei.

₁₄A hebi atibron fu kownu na wan boskopu taki dede kan fadon,

ma wan sma di koni e kowru a atibron.

₁₅Wan lafu tapu a fesi fu wan kownu e gi libi,

a bunfasi fu en e tyari nyun libi

leki alen di e fadon baka a ten fu prani.

₁₆A moro betre fu suku koni dan fu abi gowtu.

Fu abi ferstan betre moro solfru.

₁₇Sma di e libi leki fa a fiti e kmoto na pasi gi ogri,

èn a sma di e luku fa a e tyari ensrefi e kibri en libi.

₁₈Te heimemre kon, pori de na baka,

èn wan sma nanga bigifasi, o broko saka.

₁₉A moro betre fu abi sakafasi èn fu libi nanga pôtisma,

dan fu prati ini a gudu fu sma nanga heimemre.

₂₀A sa go bun nanga a sma di sabi arki,

èn a sma di poti en fertrow tapu MASRA, na wan blesi sma.

₂₁Wan sma di e sori nanga a fasi fa e denki taki a koni,

den e kari wan sma nanga ferstan.

èn sma e arki moro esi te wan sma e taki switi.

₂₂Koni de leki wan watrabron di e gi libi gi a sma di abi en,

ma a strafu fu don sma na den eigi donfasi.

₂₃Wan sma di koni e taki nanga ferstan,

èn sma e arki moro esi san a e taki.

₂₄Switi wortu de leki wan onigodo,

den switi èn den de leki dresi gi yu skin.

₂₅Son leisi sma e prakseri taki den e waka tapu a leti pasi,

ma a kba pisi fu a pasi dati na dede.

₂₆Wan wrokoman abi fu wroko fu kan nyan,

bika en bere e bari.

₂₇Wan sma di no bun fu noti e tyari soso trobi kon na fesi,

den sani di a e taki e wroko leki faya.

₂₈Wan sma di e lei e tyari soso trobi,

èn wan sma di e takitaki sani e tyari prati mindri bun mati.

₂₉Wan man di lobi du ogri, e kori en mati

èn a e tyari en tapu a kruktu pasi.

₃₀Te wan sma e pingi en ai, a abi takru prakseri,

te a kwinsi en mofo tnapu, a du a ogri kba.

₃₁Weti wiwiri de leki wan moi kroon tapu a ede fu wan sma,

a de fu feni te yu e du a wani fu Gado.

₃₂Wan sma di abi langa pasensi

betre moro wan dyadya fetiman,

èn wan sma di sabi hori ensrefi,

betre moro wan sma di e teki wan foto abra.

₃₃Libisma e fringi lot,

ma na MASRA e taki fa den e fadon.

₁Betre yu nyan wan drei pisi brede ini ala rostu,

dan fu de ini wan oso pe furu nyanyan de nanga trobi.

₂Wan srafu nanga ferstan sa kisi moro makti

dan a manpikin di e tyari ensrefi tapu wan syenfasi,

èn a sa teki prati ini a gudu

makandra nanga den tra manpikin.

₃Nanga faya sma e krin solfru nanga gowtu,

ma na MASRA e ondrosuku a ati fu libisma.

₄Wan takru sma lobi arki te sma e taki ogri fu trawan,

sma di e lei lobi arki lei.

₅A sma di e teki wan pôtisma meki spotu,

e afrontu a Wan di meki en,

èn a sma di e prisiri te ogri e miti trawan,

o kisi en strafu nomonomo.

₆A grani fu owru sma na den granpikin,

èn a grani fu pikin na den m'ma nanga den p'pa.

₇Leki fa wan don sma no man taki bun sani,

na so wan heihei sma no man puru lei tu ini a mofo.

₈Tyuku de leki diriston gi a sma di gwenti pai en,

a e howpu taki sofasi ala sani sa waka bun gi en ala pe a e go.

₉A sma di e gi tra sma pardon fu den sondu,

e suku fu tan bun nanga trawan,

ma a sma di e tan taki fu fowtu fu trawan,

e lasi mati.

₁₀Wan koni sma e leri moro fu wan enkri warskow,

dan wan don sma fu wan hondro wipi.

₁₁Wan takru sma e tyari soso problema,

dat' meki den e seni wan boskopuman go na en tapu di no abi sari-ati.

₁₂A moro betre fu miti nanga wan uma beer di e suku en pikin,

dan fu miti nanga wan don sma nanga en donfasi.

₁₃Efu yu pai bun nanga ogri,

a ogri no o kmopo moro fu yu oso.

₁₄A bigin fu wan trobi de leki wan olo di wan sma e meki na wan dam.

Dat' meki yu mus tapu en es'esi fosi a no de fu hori moro!

₁₅A sma di e no e leisi strafu gi wan ogri-ati sma,

nanga a sma di e leisi strafu gi wan sma di bun ini Gado ai,

de leki groskin sani gi MASRA.

₁₆A no o du wan don sma no wan bun efu a abi moni,

bika a no abi ferstan, a no o man bai koni nanga en.

₁₇A lobi fu wan mati de fu ala ten,

ma yu brada gebore fu yepi yu te nowtu miti yu.

₁₈A sma di e seki anu fu tnapu dyaranti gi wan trawan,

na wan sma sondro ferstan.

₁₉Wan sma di lobi ogri na wan sma di lobi trobi tu.

Wan sma di abi wan bigi mofo, na wan sma di o broko en neki.

₂₀Wan sma nanga wan kruktu ati no e feni bun,

èn a sma di e lei o miti ogri.

₂₁Wan pikin di don, de wan sari gi en p'pa,

a p'pa fu so wan pikin no sa prisiri.

₂₂Wan ati di e breiti na wan bun dresi gi a skin,

ma wan ati di lasi howpu e swaki a skin.

₂₃Wan ogri-ati sma e teki moni ondro tafra,

èn a e beni a leti.

₂₄Wan sma di abi ferstan e luku nomo pe koni de fu feni,

wan don sma e luku heri grontapu sondro fu sabi san a e suku.

₂₅Wan don pikin e meki en p'pa nyan en niri,

a e gi en m'ma di meki en poti na grontapu sari.

₂₆A no bun fu meki wan sma di no fowtu pai wan butu,

ma a moro ogri fu wipi wan heihei sma.

₂₇Wan sma di abi ferstan no e taki furu,

èn a wan sma nanga ferstan sabi fu hori ensrefi.

₂₈Efu wan don sma hori en mofo, sma e si en leki wan koni sma,

efu a no e taki, sma e si leki en wan sma di abi ferstan.

₁Wan sma di no e moksi nanga trawan e prakseri ensrefi wawan,

a no e teki no wan bun rai.

₂Wan don sma no e si en leki wan prenspari sani fu abi ferstan,

ma a wani taki nomo fa ensrefi e si sani.

₃Pe ogri-ati fasi de, sma no e si sani fu noti tu,

èn wan sma di lasi en grani o kisi syen.

₄Den wortu fu wan bun sma de leki dipi watra,

leki wan kriki pe a watra e lon,

leki wan bron fu koni.

₅A no bun fu teki a sei fu wan ogri-ati sma,

èn fu poti a leti fu wan di no du noti na wan sei.

₆Den sani di don sma e taki e tyari soso trobi,

den e meki taki sma e wani fon den.

₇Den sani di wan don sma e taki nanga en mofo

e meki a broko en eigi neki,

a e fasi ensrefi nanga den sani di a e taki.

₈Den wortu fu sma di e takitaki sani gersi switi sani,

sma e swari den go ini den bere.

₉Wan sma di lesi fu wroko,

nanga wan sma di e tyari pori, na a srefi.

₁₀A nen fu MASRA de leki wan tranga kibripresi,

den sma di bun ini Gado ai e lon go drape èn noti no e miti den.

₁₁Wan guduman e si a gudu fu en leki wan tranga kibripresi,

leki wan hei skotu baka san noti no kan miti en.

₁₂Heimemre e go na fesi, fosi wan sma fadon,

ma sakafasi e waka fesi grani.

₁₃A sma di e piki fosi wan tra sma kba taki,

e du wan don sani èn a e gi ensrefi syen.

₁₄A wani fu wan libisma kan hori en tnapu te siki kon,

ma efu wan ati lasi howpu, suma o man yepi en?

₁₅A ati fu a sma nanga ferstan e kisi sabi,

èn a yesi fu koni sma e suku sabi.

₁₆Wan sma di e gi kado e opo pasi gi ensrefi,

a e meki sowan sma kon mindri heihei man.

₁₇A gersi leki a sma di e taki leki fosiwan na krutu-oso, e abi leti,

te leki a tra sma bigin tyari en tori kon na fesi.

₁₈A lot kan koti wan trobi,

srefi mindri tu tranga man.

₁₉Efu yu du wan trawan ogri a e tapu ensrefi gi yu

moro wan tranga foto.

Trobi de leki a greni fu wan tranga kibripresi.

₂₀Wan sma abi fu tyari a bakapisi fu den sani di a e taki.

A sa nyan den froktu fu en mofo.

₂₁Den sani di wan sma e taki kan tyari dede noso libi,

sma di lobi tak'taki mus tyari a bakapisi fu dati.

₂₂Wan man di feni wan uma, feni wan bun sani.

MASRA sori en a bunfasi fu En.

₂₃Wan pôtisma e aksi nanga sakafasi,

ma a guduman e piki grofu.

₂₄Wan sma di abi furu mati e lasi ala san a abi es'esi,

ma wan trutru mati betre moro wan brada.