Dag 258 van 365- Spreuken 22-24 en 2 Korintiërs 8

₁Fu abi wan bun nen betre moro furu gudu,

fu sma lespeki yu betre moro solfru nanga gowtu.

₂Gudusma nanga pôtisma abi wan sani makandra,

na MASRA meki den ala tu.

₃Wan koni sma e si a ogri di e kon, èn a e go kibri,

wan sma di no e denki, e waka go miti en,

èn a e tesi a bakapisi fu en.

₄Gudu, grani nanga langa libi,

na a pai fu abi sakafasi nanga lespeki gi MASRA.

₅A sma di e libi wan kruktu fasi,

e miti soso makamaka tapu en pasi,

nanga sani di sma poti fu fanga en.

A sma di lobi en libi e tan fara fu den.

₆Leri wan pikin yonguyongu fa a mus libi,

dan a o tan libi so, srefi te a kon owru.

₇Wan guduman abi makti abra den pôtiwan,

èn wan sma di e leni fu wan trawan,

e tron a srafu fu a wan di leni en.

₈A sma di e du kruktudu, o miti nanga bigi ogri,

a tiki nanga san a e naki, o broko.

₉Wan bun-ati sma e kisi blesi,

bika a e prati en nyanyan nanga pôtisma.

₁₀Yagi a sma gwe di e meki spotu nanga trawan,

èn a trobi e tapu,

hari taki nanga broko trawan saka,

e tapu wantron.

₁₁A sma di lobi wan soifri ati,

èn di e taki switi,

e abi kownu leki en mati.

₁₂MASRA e sorgu taki a tru no e lasi gwe,

èn A e tyari den lei fu a bedrigiman kon na krin.

₁₃a lesiman e taki: “Wan lew de na dorosei,

efu mi go na strati a o priti mi!”

₁₄A mofo fu wan uma fu wan tra man,

de leki wan dipi peti,

MASRA e meki a man tapu san En ati e bron,

fadon na ini.

₁₅Efu wan pikin e du soso don sani,

a fonfontiki sa puru en gi en.

₁₆A sma di e pina wan pôtisma,

e meki a kon moro gudu,

a sma di e gi wan guduman kado,

e meki a kon pina.

₁₇Kaka yu yesi èn arki den wortu fu koni sma,

poti yu prakseri tapu a sabi fu mi.

₁₈Bika a o gi yu prisiri efu yu hori den na prakseri,

èn efu yu man taki den baka.

₁₉Mi e leri yu den tide, iya yu,

fu di mi wani tak' yu mus fertrow tapu MASRA.

₂₀Dritenti leri mi skrifi poti gi yu,

di furu nanga sabi èn nanga bun rai,

₂₁fu meki yu kan sabi san tru,

èn fu yu man piki tru sani na den wan di seni yu.

₂₂No puru wan sani nanga tranga na a anu fu wan pôtisma,

fu di en na wan pôtisma,

èn no broko a mofinawan saka te a de na fesi krutu.

₂₃Bika MASRA sa feti gi den leti fu en

èn A sa teki a libi fu den sma,

di teki sani puru na den pôtiwan anu.

₂₄No tron mati nanga wan sma di e kisi atibron es'esi,

no teki waka nanga wan man di ati e teki faya gawgaw.

₂₅noso yu o kon tan leki en,

èn poti yusrefi ini bigi problema.

₂₆No de wan fu den sma di e seki anu es'esi leki wan pramisi,

èn di e tnapu dyaranti gi wan paiman fu wan tra sma.

₂₇Efu yu no man pai a moni baka,

den o tyari a bedi srefi gwe tapu san yu e didon.

₂₈No dribi den stonpostu di e sori o bigi wan dyari de,

na den afo fu yu ben poti den drape olanga kba.

₂₉Wan man di e du en wroko fin'fini

sa wroko gi kownu,

so wan man no e wroko gi sma di no abi bigi nen.

₁Efu yu sidon nanga wan prenspari sma na tafra,

yu no mus fergiti suma sidon na yu fesi.

₂Hori yusrefi,

efu yu na wan sma di e nyan furu.

₃No gridi gi den switi nyanyan fu en,

na kori a e kori yu nanga den.

₄No naki yu skin fu kon gudu,

poti a prakseri dati na wan sei.

₅Bika na luku yu e luku en wawan,

èn a no de fu si moro.

A gersi leki na frei a kisi

èn frei leki wan aka go na loktu.

₆No go sidon nyan makandra nanga wan gridiman,

no meki gridi gi a switi nyanyan fu en.

₇Bika so wan sma e sidon teri ala sani san yu e nyan.

A e taki: “Yu kan nyan, yu kan dringi,”

ma a no e kmopo ini en ati.

₈Ala san yu nyan, yu o puru kon na doro baka,

èn ala den switi wortu fu yu o de fu soso.

₉No lasi yu ten fu taki nanga wan don sma,

bika a o hari en noso gi den bun sani di yu o taigi en.

₁₀No dribi den stonpostu di e sori o bigi wan dyari de,

den postu di drape olanga kba,

èn no puru a pranigron na a anu fu pikin,

di no abi p'pa nanga m'ma moro.

₁₁Bika a Wan di o strei gi den, tranga,

na En o feti gi den leti fu den.

₁₂Arki te sma e warskow yu,

èn kaka yu yesi fu leri sabi.

₁₃No frede fu leri yu pikin fa a mus libi,

awinsi yu fon en nanga tiki,

a no o dede fu en.

₁₄Yu e fon en nanga wan tiki,

ma na kibri yu e kibri en fu a no dede.

₁₅Mi boi, efu yu e denki koni,

mi sa prisiri srefsrefi.

₁₆Mi sa furu nanga prisiri,

te mi e yere yu e taki bun sani.

₁₇No dyarusu tapu sondusma,

ma tan lespeki MASRA ala dei fu yu libi.

₁₈Dan trutru sani sa go bun ini a ten di didon na yu fesi,

èn yu howpu no sa de fu soso.

₁₉Arki mi, mi boi, èn kon koni,

teki a besroiti fu waka tapu a yoisti pasi.

₂₀No teki waka nanga sma di e dringi tumsi furu win,

nanga sma di lobi nyan fu gridi.

₂₁Bika wan sma di e dringi tumsi,

nanga wan sma di e nyan fu gridi,

o pina,

èn efu yu e sribi heri dei,

yu o abi soso owru krosi na yu skin.

₂₂Arki yu p'pa di meki yu,

èn no si yu m'ma leki noti te a kon owru.

₂₃Meki ala muiti fu kon sabi san na tru

èn tan hori en,

meki muiti tu fu kon koni,

fu abi ferstan,

èn arki te trawan e warskow yu.

₂₄Wan pikin di e du san bun ini Gado ai,

e gi en p'pa bigi prisiri,

wan p'pa di meki wan koni pikin,

e breiti trutru nanga en.

₂₅Meki yu p'pa nanga yu m'ma breiti nanga yu,

meki a mama di meki yu prisiri nanga yu.

₂₆Mi boi, poti yu prakseri tranga na mi tapu,

èn teki wan eksempre na a libi fu mi.

₂₇Bika wan motyo de leki wan dipi olo,

wan uma di e yayo leki wan smara peti.

₂₈A e didon luru leki wan fufuruman,

èn a e meki taki moro nanga moro sma no e tan waka baka Gado.

₂₉Suma e soktu èn dyeme ala ten?

Suma e kragi èn meki trobi ala ten?

Suma e gi ensrefi mankeri fu soso?

Suma ai noiti no krin?

₃₀Na den sma di e sidon te lati e dringi win,

den sma di lobi tesi nyun sopi.

₃₁No meki win kori yu fu dringi en,

awinsi fa a redi kloru fu en moi ini a grasi,

awinsi fa a e brenki so moi,

awinsi fa e grati makriki go ini yu bere.

₃₂Ma te fu kba a e beti leki wan sneki,

leki a beti fu wan takru sneki.

₃₃Dan yu o si sani di no tru,

èn yu o taki lawlaw sani nanga yu mofo.

₃₄Yu e firi leki yu didon na mindri fu a se,

leki yu de ini a moro hei pisi fu wan sipi.

₃₅Dan yu o taki:

“Den naki mi, ma mi no ben sabi srefi,

den gi mi wan steifi fonfon, ma mi no ben firi noti.

Ma te mi wiki mi o go suku wan dringi baka.”

₁No dyarusu tapu sma di e du ogri,

no angri fu tron mati nanga den.

₂Bika soso ogri de ini den prakseri,

den e taki fa den o go poti tra sma na ini problema.

₃Nanga koni sma e bow wan oso,

nanga ferstan den e poti en tnapu.

₄Na sabi e meki kamra e furu

nanga ala sortu moi èn diri sani.

₅Wan man di koni na wan tranga man,

èn wan man nanga sabi e kon moro tranga.

₆Bika fosi yu go feti wan bigi feti,

yu mus prakseri bun fosi,

a wini didon na den furu raiman di yu abi.

₇Koni hei tumsi fu wan don sma ferstan en,

a no o man opo en mofo na den doro fu a foto,

te prenspari sani e taki.

₈A sma di e prakseri soso fu du ogri,

den e kari wan abani.

₉Den sani di wan don sma e prakseri na sondu,

èn a sma di e teki trawan meki spotu,

na wan groskin sani gi libisma.

₁₀Efu yu lasi ati te yu de na ini problema,

dan yu na wan sma di no abi furu krakti.

₁₁Yepi den sma di den wani seni go kiri fu soso,

du ala san yu man du fu yepi den.

₁₂No taki: “Mi no ben sabi.”

Bika a Wan di e ondrosuku den ati, sabi,

a Wan di e luku yu, e si,

èn A e pai libisma fu den sani di den e du.

₁₃Yu kan nyan oni, mi boi, bika a bun gi yu,

oni di dropu fu a godo, switi tapu yu tongo.

₁₄Na so koni de tu gi yu libi.

Efu yu feni en, dan sani sa go bun

ini a ten di didon na yu fesi,

èn yu howpu no sa de fu soso.

₁₅Un ogri-ati sma,

un no go didon luru na a oso fu sma di bun ini Gado ai,

no go broko a tanpresi fu en.

₁₆Bika awinsi omeni leisi sani e miti wan sma di bun ini Gado ai,

a o opo baka,

ma te sani miti wan ogri-ati sma,

a no e opo moro.

₁₇No prisiri te sani e miti yu feyanti,

no breiti te a e fadon.

₁₈Bika MASRA no o feni en wan bun sani te a si dati,

èn dati bo kowru a atibron fu En di A ben abi tapu yu feyanti.

₁₉No meki yu atibron tapu ogri-ati sma,

èn no dyarusu na den tapu.

₂₀Bika sani no o go den bun

ini a ten di didon na den fesi,

den ogri-ati sma de leki a faya fu wan lampu

di e dede gwe.

₂₁Mi boi, abi lespeki gi MASRA nanga gi kownu,

èn no moksi nanga sma di no wani saka densrefi gi den.

₂₂Bika wantronso a ongoloku kan miti den,

èn no wan sma no sabi fa a ongoloku dati kan bigi.

Te wan krutubakra e koti krutu

a no kan teki a sei fu wan fu den sma.

₂₄Ala sma sa fluku en,

ala folku sa taki na en tapu,

efu a taigi a sma di fiti fu kisi strafu taki: “Yu no du noti.”

₂₅Ma a sa go bun nanga den wan di e koti krutu tapu wan leti fasi,

wan blesi sa de na den tapu,

èn den sa abi en bun.

₂₆Wan tru piki, de leki wan bosi tapu yu mofo.

₂₇Wroko yu pranigron fosi,

prani sani na tapu,

dan baka dati yu kan go bow yu oso.

₂₈No lei fu soso gi wan trawan na fesi krutubakra,

no lei gi en.

₂₉No taki: “Mi o du nanga en baka, leki fa a ben du nanga mi.

Mi o pai en fu den sani di a du.”

₃₀Mi waka psa a pranigron fu wan lesiman,

a droifidyari fu wan sma di no abi ferstan.

₃₁A ben gro tapu nanga grasi nanga makamaka,

èn a ston skotu ben broko fadon.

₃₂Di mi si dati, mi prakseri bun san mi si,

di mi luku, mi teki leri fu en.

₃₃Sribi pikinso fu yu ete,

dyonko pikinso ete,

didon fow yu anu fu yu tapu yu borsu.

₃₄Dan pina o teki yu es'esi,

mofinafasi o kon na yu tapu,

leki wan fufuruman nanga en fetisani ini en anu.