Dag 259 van 365- Spreuken 25-26 en 2 Korintiërs 9

₂Gado e kisi grani fu di A no e meki un si ala sani,

kownu e kisi grani fu di den e tyari sani kon na krin.

₃Leki fa sma no man ferstan o hei heimel de,

noso o dipi grontapu de,

na so sma no man ferstan den prakseri fu wan kownu.

₄Puru ala doti ini a solfru,

dan a solfrusmeti kan meki wan sani fu en.

₅Puru den ogri-ati sma di de nanga a kownu,

dan a sa tan tapu en kownusturu

èn du a wani fu Gado.

₆No opo yusrefi te yu de na kownu,

no go tnapu pe den prenspari sma mus tnapu.

₇Bika a moro betre sma taigi yu taki:

“Kon, kon sidon moro na fes'sei,”

dan dati den taigi yu taki yu mus meki presi gi wan prenspari man.

₈No lon tyari wan sma go na krutu-oso es'esi,

efu yu no sabi trutru taki a du wan sani,

bika efu wan tra ketoigi sori bakaten taki a no tru san yu si,

dan na syen yu o kisi.

₉Efu yu nanga wan sma abi trobi,

un meki muiti fu unsrefi seti en,

èn no puru wan trawan bere kon na doro.

₁₀Bika efu yu du dati, sma o yere,

den o gi yu syen,

èn yu o tan abi wan takru nen.

₁₁Den yoisti wortu tapu a yoisti ten,

de leki gowtu apra tapu solfru skarki.

₁₂Wan koni man di e gi warskow na wan yesi di e arki,

de leki wan gowtu linga nanga wan keti fu fini gowtu.

₁₃Wan boskopuman di de fu fertrow, de gi en basi,

leki wan grasi kowru watra gi wan sma,

di e koti nyanyan ini en pranigron.

A e gi nyun krakti baka.

₁₄Wan sma di e pramisi sani nomo ma a no e du den,

de leki wolku nanga winti di no e tyari alen.

₁₅Pasensi e safu a ati fu wan tiriman,

èn awinsi fa wan sma e taki tak' a no wani,

wan safri taki kan kenki dati.

₁₆Efu yu feni oni,

no nyan moro leki san yu man,

bika efu yu nyan tumsi,

yu o puru en kon na doro baka.

₁₇No go tumsi furu na a oso fu yu mati,

noso a o weri fu yu èn a no o wani si yu srefsrefi moro.

₁₈Leki fa wan hebi tiki, wan deigri noso wan srapu peiri kan kiri yu,

na so a de tu nanga wan sma di e lei gi wan trawan na fesi krutu.

₁₉Efu yu poti yu fertrow, te yu de ini problema,

tapu wan sma di no de fu fertrow,

a de a srefi leki te yu e nyan nanga pori tifi ini yu mofo,

noso te yu drai yu futu

ma yu e suku fu waka na en tapu.

₂₀Efu yu e singi gi wan sma di e sari,

a de leki te yu puru en krosi tapu wan kowru dei,

èn neleki yu kanti asin tapu wan soro.

₂₁Efu angri e kiri yu feyanti, gi en nyanyan,

efu watra e kiri en gi en fu a dringi.

₂₂A o firi so wan syen taki a gersi leki na bron a e bron,

èn MASRA sa pai yu.

₂₃Neleki fa kowru winti e tyari alen,

na so taki sma sani bakabaka e tyari atibron.

₂₄A moro betre fu libi ini wan uku tapu a daki fu wan oso,

dan fu libi ini a srefi oso nanga wan uma di lobi meki trobi.

₂₅Bun nyunsu fu wan fara kondre,

na leki kowru watra gi wan drei neki.

₂₆Efu wan bun sma meki wan ogri-ati sma drai en ede

fu du sani di no bun,

dan a de leki wan peti di trubu,

noso wan tokotoko watrabron.

₂₇Leki fa a no bun fu nyan tumsi furu oni,

na so a no bun tu fu suku grani gi yusrefi.

₂₈Wan sma di no man hori ensrefi,

de leki wan foto pe den naki ala den skotu broko.

₁Neleki fa a no fiti fu sneeuw fadon ini waranten,

nanga alen ini dreiten,

na so grani no fiti wan don sma tu.

₂Wan fluku di yu no fiti fu kisi,

de leki wan pikinfowru di e frei lontu nomo,

leki wan zwaluw di e hari psa.

₃A wipi na fu a asi,

a titei gi a mofo fu a buriki,

a tiki gi a mindribaka fu a don sma.

₄No piki wan don sma wan lawlaw fasi,

noso yu nanga en na a srefi.

₅Ma piki en ini a don fu en,

fu a no prakseri taki a koni.

₆A sma di seni wan don sma fu tyari wan boskopu,

de leki wan sma di kapu en eigi futu,

èn di suku bigi problema gi ensrefi.

₇Wan leri di kmoto ini a mofo fu wan don sma,

de leki den futu fu wan lan sma.

A no abi no wan krakti.

₈Fu gi wan don sma grani,

de leki te yu tai wan ston fasi ini wan slinger.

₉Leki fa wan drunguman no e firi a maka di dyuku en ini en anu,

na so a leri di e kmoto ini a mofo fu wan don sma no e du noti tu.

₁₀A basi di e teki don sma nanga drunguman fu wroko gi en,

de leki wan man di e sutu nanga bo

sondro fu luku pe a e sutu go.

₁₁Leki fa dagu gwenti nyan san den e puru kon na doro,

na so don sma gwenti meki den srefi fowtu.

₁₂Howpu de moro gi wan don sma,

dan gi wan sma di koni ini en eigi ai.

₁₃A lesiman e taki: “Wan lew de na dorosei,

wan lew de na strati.”

₁₄Leki fa wan doro e drai fu a wan sei go na a tra sei,

na so wan lesiman drai ini en bedi.

₁₅Awinsi a lesiman dipi en anu go ini wan skarki,

a lesi srefi tumsi fu tyari en go na en mofo.

₁₆Wan lesiman e si en srefi moro koni,

dan seibi sma di e piki tapu wan koni fasi.

₁₇Wan sma di e sutu en mofo te tu tra sma abi trobi,

de leki wan sma di e grabu wan dagu di e psa na den yesi fu en.

₁₈Leki fa wan lawman e sutu faya peiri e kiri sma,

₁₉na so wan sma de tu di e bedrigi en mati,

dan a e taki: “Na spotu mi e meki.”

₂₀Efu udu no de moro, a faya e dede,

efu sma no de di e taki sma sani,

trobi e tapu.

₂₁Neleki fa krofaya nanga udu e meki a faya kon moro bigi,

na so wan sma di e suku trobi e meki trobi kon moro bigi.

₂₂Den wortu fu sma di e takitaki sani, gersi switi sani,

sma e swari den go ini den bere.

₂₃Switi wortu di e kmopo fu wan takru ati,

den de leki wan kleipatu nanga solfru na en tapu.

₂₄A no e de fu yere ini a taki fu wan sma

taki a no lobi a trawan srefsrefi,

ma ini en ati a wani du en ogri.

₂₅Awinsi a e taki switi nanga yu,

no fertrow en,

bika soso groskin prakseri de ini en ati

fu san a wani du nanga yu.

₂₆Awinsi a e lei fu kibri taki a no lobi yu srefsrefi,

a o kon na krin gi ala sma.

₂₇A sma di diki wan olo gi wan trawan,

o fadon srefi na ini,

èn a sma di lolo wan ston fu masi wan trawan,

a srefi ston dati o masi en.

₂₈Wan sma di e lei, no lobi den sma gi san a e lei srefsrefi,

ma wan sma di e taki switi e tyari pori tu.