Dag 261 van 365- Spreuken 30-31 en 2 Korintiërs 11:1-15

₁Disi na den wortu fu Agur, a manpikin fu Yake.

Disi na a boskopu fu en.

Mi weri sote, mi Gado, mi weri,

mi no man moro.

₂Mi don moro ala tra sma,

mi no abi ferstan srefsrefi.

₃noiti mi ben koni tu,

èn mi no sabi noti fu a Santa Wan.

₄Suma kren go na heimel dan a saka kon baka?

Suma ben man grabu a winti hori nanga en anu?

Suma ben man tai watra hori ini en krosi?

Suma poti pe a kba pisi fu grontapu de?

Efu yu sabi suma na en, taigi mi en nen

nanga di fu a manpikin fu en.

₅Ala sani di Gado taki na tru,

A e kibri den sma di e go kibri na En.

₆No poti noti moro na den sani di A taki,

noso A o strafu yu,

èn a o kon na krin tak' na lei yu e lei.

₇Tu sani mi e aksi Yu,

mi e begi Yu fu du den gi mi fosi mi dede.

₈Meki lei nanga bedrigi fasi tan fara fu mi,

no meki mi pina, ma mi no abi fu gudu tu,

gi mi a nyanyan nomo di mi abi fanowdu.

₉Bika efu mi ben gudu,

kande mi bo du leki mi no sabi Yu,

èn taki: “Suma na MASRA?”

èn efu mi ben e pina,

kande mi bo fufuru,

èn pori a nen fu Yu.

₁₀No taki takru fu wan knekti na en basi,

noso a o fluku yu èn yu o kisi a strafu fu en.

₁₁Yu abi sma di e fluku den p'pa,

èn di no e blesi den m'ma.

₁₂Yu abi sma di e denki taki den krin ini Gado ai,

ma den no wasi krin fu den sondu.

₁₃Yu abi sma nanga heimemre,

di e si trawan leki noti.

₁₄Yu abi sma nanga tifi di srapu leki owru,

di e koti leki nefi,

fu nyan den mofinawan na grontapu,

te leki pôtiwan no de moro na den mindri.

₁₅A kupari abi tu umapikin: Gi mi, nanga gi mi!

Noti no e sari den dri sani disi,

fo sani de di no noiti e taki: “A nofo.”

₁₆Dati na:

dedekondre, wan uma di no man kisi pikin,

a gron di e swari watra nomonomo,

nanga faya di noiti e taki: “A nofo!”

₁₇A sma di e lafu en p'pa,

èn di no e teki san en m'ma e taigi en,

o dede,

fowru o diki den ai fu en puru,

èn tingifowru o nyan a dedeskin fu en.

₁₈Dri sani de di bigi moro mi ferstan,

fo sani de di mi no man grabu:

₁₉fa aka e frei so hei na loktu,

fa sneki e grati psa tapu bergiston,

fa sipi e psa tapu bigi se,

nanga fa wan man e du feni wan yongu uma.

₂₀Na so wan uma di e huru e du:

a e huru, a e wasi en skin,

dan a e taki: “Mi no du ogri.”

₂₁Dri sani de di e seki grontapu,

iya, fo sani de di grontapu no man tyari srefsrefi:

₂₂wan srafu di e tron kownu,

wan lesiman di abi nofo fu nyan,

₂₃wan uma di masra no lobi en moro,

ma di e feni wan tra masra fu trow,

nanga wan umasrafu di e teki a presi fu a uma di ben de en basi.

₂₄Den fo meti disi na den moro pikin meti na grontapu,

ma den koni psa marki:

₂₅den mira. Den no tranga,

ma ini dreiten den e bigin kibri nyanyan poti.

₂₆Den dyinipi. Den na meti di no abi furu krakti,

ma den e meki den olo na ini bergi.

₂₇Den sprenka. Den no abi kownu,

ma te den e hari gwe, no wan pusupusu no de.

₂₈Den kamrawenke. Yu kan kisi den nanga anu,

ma yu kan feni den te ini kownu-oso.

₂₉Dri sani de di abi wan moi fasi fu waka,

iya, fo sani de di e waka tumsi moi:

₃₀a lew. A kownu fu ala den meti,

a no e lon gi noti.

₃₁A kakafowru di e kaka en ede te a e waka,

a bokoboko,

nanga wan kownu di hari go na fesi fu en legre.

₃₂Efu yu ben don so fu meki bigi gi yusrefi,

dan yu mus prakseri fosi,

dan yu hori yu mofo.

₃₃Bika efu yu seki a merki,

a o tron botro,

efu yu naki wan sma tapu en noso,

a o brudu,

èn efu yu naki wan sma di ati e bron,

a o tyari feti.

₁Disi na wortu gi kownu Lemuel,

nanga san en m'ma warskow en.

₂San mi mus taigi yu, mi boi,

iya, mi boi di mi tyari,

mi boi, gi san mi meki pramisi,

san mi mus taigi yu?

₃No lasi yu krakti soso nanga uma,

No lasi yu ten nanga uma di e meki kownu broko den neki.

₄Lemuel, a no fiti taki kownu e dringi tumsi furu win,

a no fiti,

a no fiti tu taki tiriman lobi tranga sopi.

₅Bika te den dringi, den kan fergiti a frantwortu di den abi,

èn kenki den leti fu den pôtiwan.

₆Meki den sma di de fu dede, dringi tranga sopi,

èn meki sma di de ini dipi sari, dringi win.

₇Meki den dringi fu den fergiti a pina ini san den de,

èn fu den fergiti den problema fu den.

₈Ma yu mus taki gi sma di no man taki gi densrefi,

feti gi a leti fu den sma di trawan e si leki noti,

₉Opo yu mofo, leisi strafu tapu wan leti fasi.

Meki den pôtiwan nanga den di abi yepi fanowdu feni den leti.

₁₀Wan dyadya uma tranga fu feni.

A warti moro parelkrara.

₁₁En masra e fertrow nanga en heri ati na en tapu,

soso wini a masra abi na en.

₁₂A no e du en masra ogri, ma soso bun,

solanga a de na libi.

₁₃Nanga prisiri a e teki en ten fu meki krosi,

gi a kowruten nanga gi a waranten.

₁₄Leki fa sipi fu den bai nanga seriman e go teki lai farawe tyari kon,

na so a uma e go farawe go bai en nyanyan.

₁₅A e opo te a dungru ete,

a e meki nyanyan klari gi en famiri,

èn a e gi den umasrafu a wroko di den mus du.

₁₆Efu a poti ini en ede taki a o bai wan pisi gron,

a e bai en,

nanga moni di a wroko nanga en eigi anu

a e prani wan droifidyari.

₁₇Na wan uma di e wroko tranga,

en anu no e weri fu wroko.

₁₈A e si taki ala san a e du e go bun,

a e wroko heri neti.

₁₉A e meki en eigi titei,

èn a e meki en eigi krosi.

₂₀Nanga densrefi anu dati a e yepi pôtisma,

nanga den di abi yepi fanowdu.

₂₁No wan sma ini en oso abi fu frede te a kowru ten doro,

bika a meki krosi fu hori den alamala waran.

₂₂A e meki sribikrosi,

den krosi di a e weri meki fu fini linnen nanga redi purper.

₂₃Den e lespeki a masra fu en mindri den prenspari sma,

te a e sidon drape mindri den edeman fu a foto.

₂₄A uma e meki linnen krosi nanga banti,

fu seri gi den bai nanga seriman.

₂₅Te yu e luku en, yu e si taki na wan tranga uma di fiti fu lespeki,

nanga prisiri a e luku den dei di de fu kon.

₂₆A e taki nanga koni,

a e gi leri na tapu wan switi fasi.

₂₇A e luku taki ala sani e go bun ini en oso,

A no e sidon sondro fu du noti.

₂₈Ala den pikin fu en e prijse en,

en masra e gi en grani taki:

₂₉“Yu abi furu dyadya uma,

ma yu bun moro den alamala.”

₃₀A moi skin fu wan uma kan bedrigi,

a moi fesi fu en no de fu têgo,

ma wan uma di e lespeki MASRA,

fiti fu kisi grani.

₃₁Meki a nyan den froktu fu den sani di a e du,

meki ala sma gi en grani fu den sani di a e du!