1Mi kon na ini mi dyari
mi sisa, mi trowmisi.
Mi piki mi mirre nanga balsem,
mi nyan a oni fu mi onigodo,
mi dringi mi win nanga mi merki.
Nyan, mi mati, dringi
dringi te leki un kon drungu fu lobi.
2Mi ben e sribi, ma mi ati ben wiki.
Yere, mi lobi e naki na a doro.
Mi sisa, mi lobi, opo gi mi,
mi doifi, mi moro moi uma.
Mi ede nati fu a dow
den dropu fu a neti anga na mi wiwiri.
3Mi puru mi krosi kba
yu wani fu mi weri den baka?
mi wasi mi futu kba
yu wani fu mi doti den baka?
4Mi lobi langa en anu kon na inisei,
mi firi fa mi ati bigin naki.
5Mi opo fu go opo a doro gi mi lobi.
Mi anu ben nati nanga mirre,
mirre ben e dropu fu mi finga
tapu a greni fu a doro.
6Mi opo a doro gi mi lobi
ma mi lobi ben gwe, a no ben de fu si moro.
Mi ede ben e drai di mi no si en moro.
Mi luku fu en, ma mi no si en
Mi kari en, ma a no piki.
7Den waktiman, di e waka lontu luku a foto, si mi
den naki mi, gi mi mankeri
den waktiman di e hori wakti na den skotu
hari a duku puru di ben tapu mi fesi.
8Uma fu Yerusalem, sweri en gi mi
te un feni mi lobi,
taigi en gi mi,
taki mi e flaw soso fa mi e angri so tranga fu en.
9Taigi mi, yu moro moi uma di de,
san a lobi fu yu abi moro leki den trawan?
San a lobi fu yu abi moro leki den trawan?
taki yu wani fu wi meki sowan sweri?
10A skin fu mi lobi e brenki, a rediredi
a moi moro tin dusun trawan.
11En ede na fu gowtu, lala gowtu,
a kroru wiwiri fu en blaka trutru.
12Den ai fu en gersi den ai fu den doifi
di de na wan liba pe a watra e lon.
den e wasi na ini merki
na wan liba di furu nanga watra.
13En seifesi na wan dyari nanga balsem
wan switi smeri a e gi,
En mofobuba na wan lelibromki
mirre e dropu kmoto na en.
14En anu na fu gowtu
tarsisston seti na den tapu.
En skin na fu ivoor
nanga lasurston na en tapu.
15En futu na fu marmer
tapu wan futupisi fu lala gowtu.
Te a tnapu a hei leki a Libanon,
hipsi leki den sedrebon.
16En mofo switi
ala sani fu en moi
Uma fu Yerusalem
Na so mi lobi tan, na so mi mati de.
