Dag 268 van 365- Hooglied 6-8 en Galaten 4

₁Pe a lobiwan fu yu go

yu moro moi uma di de?

Sortu sei a lobiwan fu yu go?

wi wani yepi yu suku en.

₂Mi lobi go na en dyari

a go na den bedi fu en

den bedi fu balsem.

drape a go fu prisiri ini en dyari,

fu go broko bromki.

₃Mi na fu mi lobi

mi lobi na fu mi,

a e luku den skapu fu en na mindri den bromki.

₄Mi lobi, yu moi fu tru

yu moi leki Tirsa,

yu moi leki Yerusalem,

ma yu de fu frede leki den legre

den e kon nanga opo fraga

₅Puru yu ai na mi tapu

bika den e bruya mi

A blaka wiwiri fu yu e dansi

leki krabita di e lon saka a Gileadbergi.

₆Yu tifi weti,

weti leki wan grupu uma skapu

di e kmoto ini a watra,

Tu na tu den e kmoto ini a watra,

no wan no e mankeri.

₇Mi e si yu seifesi baka a duku di tapu yu fesi,

a redi, redi leki wan granaki-apra.

₈Siksitenti kownu-uma

aititenti tra uma fu kownu

someni yongu uma taki den no de fu teri.

₉Ma no wan no de leki yu,

mi doifi, mi moro moi uma.

Gi en mama trawan no de.

A popki fu a ai fu a wan di meki en.

Te tra uma si en, den e gi en grani

taki a de wan koloku uma.

Den kownu-uma nanga den tra uma fu kownu

e gi en grani.

₁₀Suma e opo drape so leki a mamanten son?

krin leki a furu mun,

brenki leki a faya son,

ma di de fu frede leki wan legre?

₁₁Mi saka go na a dyari nanga notobon

fu luku den bromki fu den bon ini a dal

fu luku efu den droifibon e gi nyun taki kba

fu luku efu den granaki-aprabon gi bromki kba.

₁₂A gersi mi no ben de fu misrefi moro

Yu ben tyari mi gwe tapu wan wagi

fu mi folku.

₁₃Drai kon na mi, uma fu Sulem, drai kon.

Drai kon, drai kon, meki wi luku yu.

Fu sanede un wani luku a uma disi fu Sulem?

neleki un e luku reidansi fu Makanaim?

₁Luku fa yu futu moi ini yu susu,

kownupikin.

Te yu e waka yu baka e lolo

leki den krara fu wan keti,

a wroko fu wan man di sabi en wroko.

₂Yu kumba na wan moi komki

di furu nanga switi win.

Yu bere na wan ipi karu

di lontu nanga moi bromki.

₃Tu yongu dia,

na dati den borsu fu yu de

wan twelengi fu wan uma dia.

₄Yu neki moi leki wan toren fu ivoor,

yu ai gersi den bron fu Hesbon,

na den bigi doro fu Bat-Rabim.

Yu noso na a toren fu Libanon,

di e luku go na tapu Damaskus.

₅Leki a Karmelbergi,

na so yu ede de na tapu yu neki.

A dungru redi wiwiri fu yu di e brenki,

fanga yu kownu hori, tai en hori na ini.

₆Yu moi trutru, mi lobi.

A moro switi sani di wan sma bo wani.

₇Yu moi leki wan palmbon,

yu borsu na den froktu di anga na en.

₈Ne mi taki: mi wani kren a bon disi

piki den froktu fu en.

Iya, meki den borsu fu yu de leki bosu nanga droifi,

yu bro abi a smeri fu apra,

₉yu tongo de leki a moro switi win

pe mi e wasi den bosi fu mi.

pe mi e sungu mi mofobuba nanga mi tifi.

₁₀Mi na fu mi lobi,

a e angri fu mi.

₁₁Kon, mi lobi,

meki wi go na ini a wei,

meki wi psa a neti na mindri den hennabromki.

₁₂Meki wi go frukufruku na den droifidyari

fu luku efu den droifibon e gi nyun taki kba,

fu luku efu den gi bromki kba,

fu si efu den granaki-apra bon gi nyanyan kba.

Drape mi sa gi yu mi lobi.

₁₃Den lobi-apra e smeri kba

den moro switi froktu anga na un doro

froktu di piki nownowde

froktu di e drei gwe kba.

gi yu, mi lobi, gi yu den ben kibri.

₁Mi winsi taki yu ben de mi pikin brada,

di mi mama ben gi bobi.

Te mi ben miti yu,

mi ben kan bosi yu,

sondro fu wan sma taki wan sani.

₂Mi bo hori yu,

tyari yu,

na ini a oso fu mi mama

na ini a kamra fu a wan di meki mi.

Switi win mi bo gi yu fu dringi

win fu den granaki-apra fu mi.

₃En kruktu anu de ondro mi ede,

nanga en let'anu a brasa mi.

₄Uma fu Yerusalem, sweri en gi mi

taki yu no sa wiki a lobi, yu no sa preiprei nanga en,

te leki ensrefi wani.

₅Suma e kon drape ini a sabana

anga na a anu fu a wan di a lobi?

Ondro a aprabon mi wiki yu,

drape yu mama hori bere fu yu

drape a wani di kisi yu ben hori bere fu yu.

₆Poti mi leki wan stampu tapu yu ati

leki wan stampu na yu anu.

Bika lobi tranga leki dede

a angri fu en yu no man tapu.

Lobi na wan tranga faya

wan faya di e bron ala sani.

₇Furu watra srefi no man kiri a faya fu lobi

liba no man spuru en gwe.

Awinsi den ben wan gi ala tra sani gi lobi,

mi bo drai mi fesi waka gwe.

₈Un abi wan pikin sisa

borsu srefi a no abi ete.

San un o du

te a ten doro fu a trow?

₉Efu a ben de wan skotu

un bo moi a lantyi fu en tapusei nanga solfru.

Efu a ben de wan doro

un bo tapu en nanga planga fu sedre-udu.

₁₀Mi srefi ben de wan skotu

den borsu fu mi ben de toren.

Ma ini en ai mi na wan foto

wan foto pe freide de.

₁₁Salomo ben abi wan droifidyari

wan droifidyari na Baal-Hamon.

A yuru gi sma fu luku en.

den gi en dusun solfru moni

gi a nyanyan fu a gron.

₁₂Ma mi droifidyari, a di fu mi e tan fu mi

Salomo, yu kan hori den dusun solfru moni,

Den sma di ben e luku a dyari kan hori den tu hondro solfru moni.

₁₃Yu di e libi ini a dyari

den mati fu mi wani yere na yu sten

meki mi yere en.

₁₄Mi lobi, go esi-esi

lon leki wan dia,

leki wan pikin dia

tapu den bergi nanga balsemwiwiri.