Dag 276 van 365- Jesaja 17-19 en Efeziërs 5:15-33

Yere, Damaskus no o de wan foto moro,

a o broko pis'pisi te na gron

a o tron wan bigi ipi broko ston.

₂Den foto fu Arower leigi.

Den kon tron presi pe meti e nyan grasi,

sondro fu wan sani skreki den.

₃Tranga foto no o de ini Efraim moro,

kownu no o tiri Damaskus moro.

Leki fa Israel lasi en glori,

na so a o de tu nanga den sma fu Aram di tan abra.

Na so MASRA fu ala sani taki.

₄A ten dati Yakob no o abi furu glori moro,

èn wan kba o kon na a bun ten fu en.

₅A o de leki fa den e hori groto nanga wan anu,

dan den e koti en nanga a tra anu.

A o de leki te wan sma e piki a groto di tan na baka ini a Refaimdal.

₆Wanwan nomo o tan abra.

Na leki te sma e seki wan oleifbon puru den froktu,

èn tu noso dri nomo e tan anga na loktusei,

èn fo noso feifi nomo e tan anga na den taki.

Na so MASRA, a Gado fu Israel taki.

₇A ten dati libisma sa luku go na a Wan di meki den,

den sa luku fu a Santa Wan fu Israel.

₈Den no sa go na den altari moro di densrefi ben meki,

èn den sani di den ben meki nanga den eigi anu,

soleki den postu pe den anbegi den gado,

nanga den wierook altari,

den no o luku moro na wan ai.

₉A ten dati no wan sma o de ini den tranga foto fu Yerusalem.

Den o tiri leki wan bigi busi

noso tapusei fu a moro hei pisi fu wan bergi.

Den o didon leki broko pranasi,

leki a ten di den Israelitisma ben broko kon ini a kondre.

₁₀Bika un fergiti a Gado di ferlusu unu,

un no e prakseri a Bergiston moro pe un kan go kibri.

Un meki moi bromki dyari,

un prani pikin taki gi dorosei gado.

₁₁Tapu a srefi dei di un prani den,

un e si tak' den opo.

A srefi mamanten di un dyuku den taki ini a doti,

un si tak' den e sproiti.

Ma ala san gro kon o lasi gwe,

tapu a dei fu siki nanga pen di no o de fu tyari.

₁₂Arki, furu folku e meki opruru,

leki fa a watra fu a se e rigeri.

Kondre e meki babari,

leki fa bigi skwala e meki babari.

₁₃Folku e rigeri leki fa bigi skwala e rigeri.

Ma te Gado piri ai gi den, den e o lon panya,

leki te winti e wai aleisibuba tapu den bergi,

leki te wan draiwinti e opo drei wiwiri drai lontu.

₁₄Yere, te neti tapu,

wantronso, bigi ogri e miti den.

Fosi dei krin, den no de moro.

Dati na san o miti den di e fufuru unu,

dati na san e wakti den di e teki ala un sani tyari gwe.

₁A kba gi a kondre pe den frei fu den pikinpikin sani e naki dorodoro,

a kondre di de na tra sei fu den liba fu Etiopia,

₂di e seni boskopuman go nanga boto abra a watra,

boto di meki fu langa grasi.

Un go, un boskopuman di gaw sote,

un go na a bigiskin folku di buba e brenki,

a folku di sma e frede na alasei,

a tranga folku di no abi sari-ati.

Liba e prati a kondre fu a folku dati ini difrenti pisi.

₃Un alamala di e libi na grontapu,

sma fu grontapu,

un o si te wan fraga opo tapu den bergi,

un o yere te wan tutu o bro.

₄Bika MASRA taigi mi disi:

“Mi o sidon tiri e luku kmoto fu Mi tanpresi,

leki a faya son te brekten,

leki fa dow e fadon

ini a faya ten te sma e go koti nyanyan ini den pranigron.

₅Bika te den bon kba gi bromki

èn den bromki e tron lepi droifi,

A o koti den taki nanga en babun-nefi

èn A o kapu den yongu taki puru,

fosi a ten doro fu puru den droifi na den bon.

₆Den alamala o tan didon gi tingifowru,

nanga gi krasi meti.

Tingifowru o libi fu den ini a dreiten

èn krasi meti o libi fu den ini a kowruten.”

₇A ten dati a bigiskin folku di buba e brenki,

sa tyari kado gi MASRA fu ala sani,

a folku di sma e frede na alasei,

a tranga folku di no abi sari-ati.

Liba e prati a kondre fu a folku dati ini difrenti pisi.

Den o kon na Sionbergi,

a presi pe MASRA fu ala sani, e libi.

Yere, MASRA e rei na tapu wan wolku,

A e rei es'esi go na Egipte.

Den gado fu Egipte e beifi gi En,

den sma fu Egipte e frede te fu dede.

₂Mi o sutu faya mindri den sma fu Egipte,

brada o feti nanga brada,

birtisma nanga birtisma,

foto nanga foto,

kondre nanga kondre.

₃Egipte o lasi en ferstan,

èn Mi o pori den prakseri nanga san a e waka.

Dan den o go suku yepi na den gado fu den,

na den bonuman,

na yeye fu dedesma,

èn na yeye di e taigi sma sani di de fu kon.

₄Mi o gi Egipte abra ini a makti fu wan tiriman

di no abi sari-ati,

wan tranga kownu sa tiri den.

Na so Masra, a MASRA fu ala sani taki.

₅Dan a watra fu a se o drei,

a watra fu a Nijl-liba o kba èn a o lon drei.

₆Den kriki o bigin tingi,

ala a watra fu den tra liba di e bigin na a Nijl-liba o kba,

èn den o drei.

A langa grasi na a syoro fu den srefi o geri.

₇Ala sani di e gro na a syoro fu a Nijl-liba o drei,

den pranigron drape srefi o drei gwe.

A winti o wai ala sani tyari gwe,

noti no o tan abra.

₈Den fisiman o soktu èn den o sari,

iniwan di e fringi en fisi-aka ini a Nijl-liba.

Den wan di e fringi den net ini a liba e lasi ati.

₉Den sma di e wroko nanga vlas nanga den wan di e brei en,

o lasi ati.

₁₀Den sma di e brei a vlas no o sabi san fu du,

ala den sma di ben e feni den deibrede nanga a wroko dati,

o sari srefsrefi.

₁₁Den edeman fu Soan no abi ferstan.

den moro koni raiman fu Farao e gi don rai.

Fa un kan taigi Farao taki:

“Wi na pikin fu koniman,

pikin fu kownu di ben de langa na fesi.”

₁₂Pe den de dan, den koniman fu unu?

Meki den taigi unu dan,

meki den tyari kon na krin gi unu

san MASRA fu ala sani poti tak' o psa nanga Egipte.

₁₃Den edeman fu Soan kon don,

den edeman fu Nof e meki sma kori den.

Den edeman di ben mus tyari Egipte

meki a pipel lasi pasi.

₁₄MASRA bruya a yeye fu den.

Dat' meki den e tyari Egipte tapu wan kruktu pasi

ini ala san a wani du,

leki fa wan drunguman e misi futu

èn fadon ini san a puru kon na doro.

₁₅No wan sma ini Egipte o man du wan sani:

No guduwan, no pôtiwan,

no bigiwan, no pikinwan.