Dag 28 van 365- Exodus 19-20 en Matteüs 18:21-35

₁Tapu a fosi dei fu a di fu dri mun baka di den Israelitisma kmoto na ini Egipte, den doro na a dreisabana fu Sinai. ₂Baka di den ben hari kmoto fu Refidim den ben kon doro na a dreisabana fu Sinai. Drape den Israelitisma meki den kampu na ini a sabana leti na Sinaibergi. ₃Dan Moses kren a bergi fu go miti nanga Gado. Ne MASRA kari en dan A taigi en fu a bergi taki: “Disi na san yu mus taigi den bakapikin fu Yakob, den sma fu Israel: ₄‘Un si sa Mi du nanga den sma fu Egipte. Ma leki fa wan aka e tyari en pikin tapu en frei, na so Mi ben tyari un kon na Mi. ₅Dat' meki, efu un du den sani di Mi taigi unu èn efu un hori unsrefi na a ferbontu fu Mi, dan Mi sa teki un leki Mi eigi folku na mindri fu ala den tra folku. Bika heri grontapu na fu Mi. ₆Un o de wan folku fu priester gi Mi. Wan santa folku.’ Disi na san yu mus taigi den sma fu Israel gi Mi.” ₇So Moses go, dan a seni kari den fesiman fu a folku kon. A taigi den ala den sani di MASRA ben taigi en. ₈Ala sma piki leki wan man taki: “Wi sa du ala sani di MASRA taigi unu fu du.” Dan Moses drai go taigi MASRA san den sma ben piki en. ₉Ne MASRA taigi Moses taki: “Arki, Mi o kon na yu ini wan deki wolku, dan a folku kan yere te Mi o taki nanga yu. Disi o meki den tan bribi yu fu têgo.” Dan Moses taigi a folku san MASRA taigi en. ₁₀MASRA taigi Moses moro fara taki: “Go na a folku. Tide nanga tamara den mus santa densrefi èn den mus wasi den krosi. ₁₁Tapu a di fu dri dei den mus klari. Bika tapu a dei dati MASRA o saka kon tapu a Sinaibergi meki a heri folku si. ₁₂Dat' meki yu mus poti marki lontu a bergi o fara a folku kan kon tnapu. Yu mus taigi den taki: ‘Un luku bun taki un no kren a bergi. A bergi futu srefi un no mus fasi. A sma di fasi a bergi mus dede fu tru. ₁₃No wan sma mus fasi a sma di fasi a bergi. Den mus fringi ston kiri en noso den mus sutu en kiri nanga peiri. Awinsi na libisma noso meti. A no sa tan na libi. Baka te den yere a langa babari fu a tutu den kan kren a bergi.’ ” ₁₄Dan Moses saka fu a bergi. A go na a folku, a meki den santa densrefi dan den wasi den krosi. ₁₅A taigi den tu taki: “Abra dri dei un mus tnapu klari. Den dri dei dati no wan man mus sribi nanga wan uma.”

₁₆A mamanten fu a di fu dri dei, di dei e broko, dondru ben e bari èn faya ben e koti na loktu. Wan deki wolku ben de tapu a bergi èn a tranga babari fu tutu ben de fu yere. A heri folku ben e beifi ini a kampu. ₁₇Dan Moses tyari a folku kmoto ini a kampu fu go miti Gado. Den tan tnapu na a futu fu a bergi. ₁₈A heri Sinaibergi ben tapu nanga smoko fu di MASRA ben saka kon na en tapu ini faya. A smoko ben e opo go na loktu leki a smoko fu wan onfu èn a heri bergi ben e beifi. ₁₉A babari fu a tutu ben e kon tranga moro nanga moro. Moses ben e taki èn Gado ben e piki en ini a dondru. ₂₀Dan MASRA saka kon tapu a Sinaibergi. A saka tapu a moro hei pisi fu a bergi. Dan MASRA kari Moses fu a kon drape. So Moses kren go. ₂₁MASRA taigi en taki: “Saka go warskow den sma taki den no mus pruberi fu psa a marki di yu poti, fu si Mi. Noso furu fu den o dede. ₂₂Den priester di e kon krosbei fu Mi mus santa densrefi tu, noso Mi o abi fu strafu den tu.” ₂₃Dan Moses taigi MASRA taki: “A folku no o man kren kon tapu a Sinaibergi bika yu ben warskow wi taki: ‘Poti marki lontu a bergi o fara a folku kan kon tnapu, dan yu e santa en.’ ” ₂₄Ne MASRA taigi en taki: “Saka go baka, dan yu e kren kon nanga Aaron. Ma den priester nanga a folku no mus psa a marki fu kren kon na Mi, noso Mi o abi fu strafu den.” ₂₅Dan Moses saka go taigi a folku.

₁Dan Gado taki ala den wortu disi:

₂“Mi na MASRA, un Gado, di puru unu na ini Egipte pe un ben de srafu.

₃Un no mus dini no wan tra gado boiti Mi.

₄No meki no wan popki noso wan prentyi fu wan sani di de na heimel, di de na grontapu noso di de ini a watra ondro grontapu. ₅No boigi gi den èn no dini den. Bika Mi, MASRA, un Gado, na wan dyarusu Gado. Mi e strafu den pikin, den granpikin nanga den afopikin, fu a ogri di den bigisma fu den du, di no lobi Mi. ₆Ma Mi e sori bigi lobi fu têgo na den bakapikin fu den wan di lobi Mi èn di e hori densrefi na den gebod fu Mi.

₇Un no mus kari a nen fu MASRA, un Gado, fu soso, bika MASRA no o libi a sma dati fu soso tu.

₈Un memre taki a sabatdei na wan spesrutu dei. ₉Siksi dei de fu wroko, fu un du ala sani san un abi fu du. ₁₀Ma a di fu seibi dei na a sabatdei fu MASRA, un Gado. A dei dati un no mus wroko. No unu, no den manpikin fu unu, no den umapikin fu unu, no den man nanga uma di e wroko gi unu, no den meti fu unu èn no den doroseisma di e libi ini a kondre fu unu. ₁₁Bika na ini siksi dei MASRA meki heimel nanga grontapu, a se nanga ala den sani di de ini den, dan A rostu tapu a di fu seibi dei. Dat' meki MASRA blesi a sabatdei dan A poti en leki wan spesrutu dei.

₁₂Lespeki un m'ma nanga un p'pa, fu un kan libi langa na ini a kondre di MASRA, un Gado, o gi unu.

₁₃No kiri.

₁₄No huru.

₁₅No fufuru.

₁₆No lei gi wan trawan fesi krutubakra.

₁₇No abi bigi ai tapu a oso fu wan trawan. No abi bigi ai tapu a frow fu wan trawan, tapu den man nanga uma di e wroko gi en, tapu en kaw, en buriki noso iniwan sani san na fu wan trawan.”

₁₈A heri folku ben yere fa a dondru ben e bari èn den ben si fa faya ben e koti na loktu. Den ben yere a babari tu fu a tutu èn den ben si fa a bergi ben e puru smoko. Di den sma si den sani disi den ben e frede, dan den tan tnapu fara. ₁₉Dan den taigi Moses taki: “Taki nanga wi, wi sa arki. Ma no meki Gado taki nanga wi, noso wi o dede.” ₂₀Ne Moses piki den taki: “No frede, bika Gado kon fu luku san un o du, fu un kan abi lespeki gi En, fu un no sondu.” ₂₁Den sma ben tan tnapu fara, ma Moses ben go moro krosbei fu a dungru wolku ini san Gado ben de.

₂₂Dan MASRA taigi Moses taki: “Disi yu mus taigi den Israelitisma: ‘Un si fa Mi taki nanga unu kmoto fu heimel. ₂₃Fu dat'ede un no mus dini no wan tra gado boiti Mi. No meki no wan solfru noso gowtu gado. ₂₄Wan altari fu santi un mus meki gi Mi. Tapu a altari disi un mus srakti den skapu, krabita nanga kaw di un o bron leki ofrandi gi Mi èn di un o tyari leki freide-ofrandi gi Mi. Ala presi pe Mi taigi unu fu un anbegi Mi, Mi sa kon èn blesi unu. ₂₅Efu un meki wan altari fu ston gi Mi, un no mus meki en nanga ston di un kapu. Bika efu un kap'kapu en nanga wrokosani, dan sowan ston no bun moro fu meki wan altari gi Mi. ₂₆A altari no mus abi trapu tu fu kren go na loktu noso sma kan si un syenpresi.’ ”

₂₁Dan Petrus kon aksi Yesus taki: “Masra, omeni leisi mi mus gi mi brada pardon te a du mi wan sani? ₂₂Te nanga seibi leisi?”

Yesus piki en taki: “Mi e taigi yu taki: A no seibi leisi nomo, ma seibitenti tron seibi leisi. ₂₃Bika a fasi fa Gado e tiri den sma fu En, de leki wan kownu di seni kari ala den knekti fu en di ben mus pai en. ₂₄Di a du dati, den tyari wan man kon di ben mus pai en tin dusun gowtumoni. ₂₅Ma a man no ben man pai a paiman. Dat' meki a kownu teki a besroiti fu seri en, en uma, den pikin fu en, nanga ala sani san a ben abi fu a kan kisi en moni baka. ₂₆Ma a knekti fadon tapu en kindi, dan a begi a kownu taki: ‘Abi pasensi nanga mi. Mi o pai yu ala baka.’ ₂₇Ne a kownu kisi sari-ati nanga a man. A meki a gwe èn a no ben abi fu pai a moni moro. ₂₈Ma di a man dati e gwe, a miti nanga wan tra knekti di ben mus pai en wan hondro kopromoni. A grabu en na en neki, dan a taigi en taki: ‘Gi mi a moni san yu mus pai mi.’ ₂₉Now a tra knekti fadon tapu en kindi, dan a begi en taki: ‘Abi pasensi nanga mi. Mi sa pai yu baka.’ ₃₀Ma a man di ben mus kisi a moni no ben wani. A tyari en go sroto, te leki a ben man pai a moni baka. ₃₁Di den tra knekti si san psa, a hati den. Dan den go ferteri a kownu. ₃₂Ne a kownu seni kari a man, dan a taigi en taki: ‘Yu lagiman yu! Di yu begi mi tangitangi, mi taigi yu taki yu no abi fu pai mi moro. ₃₃Fu sanede yu no sari a tra man leki fa mi sari yu?’ ₃₄Ne a kownu ati bron nanga a man. A meki den grabu en, tyari gwe go strafu te leki a ben man pai ala a moni.” ₃₅Dan Yesus taigi den man di ben e teki leri fu En taki: “Na so Mi P'pa di de na heimel sa du nanga ibriwan fu unu, efu un no e gi trawan pardon nanga un heri ati.”