Dag 31 van 365- Exodus 25-26 en Matteüs 20:17-34

₁MASRA taigi Moses taki: ₂“Taigi den Israelitisma taki den mus piki wan spesrutu ofrandi gi Mi. Ala sma di ati firi fu gi Mi wan sani mus tyari a ofrandi kon gi yu. ₃Disi na den sani di yu mus aksi den fu gi leki spesrutu ofrandi: gowtu, solfru, kopro, ₄blaw katun, dungruredi katun, fayaredi katun, diri linnen krosi, krosi di meki fu krabitawiwiri, ₅skapububa di ferfi redi, krabitabuba nanga acacia-udu. ₆Moro fara oli gi lampu, spesrei fu meki salfu-oli nanga a wierook di e smeri switi, ₇krisoprasston nanga tra diri ston gi a efod nanga gi a saka di e fasi na a efod. ₈A pipel mus meki wan santa presi gi Mi, dan Mi sa libi na de mindri. ₉Mi o sori yu wan eksempre fu a santa tenti nanga ala den wrokosani fu en. Na so yu mus meki en.

₁₀Den mus meki wan kisi fu acacia-udu. A mus langa wan nanga kwart meter èn a mus bradi èn a mus hei drikwart meter. ₁₁Un mus tapu a udu fu a kisi, fu inisei nanga dorosei, nanga lala gowtu. Un mus meki wan gowtu banti lontu a kisi. ₁₂Un mus meki fo gowtu linga di un mus fasi na den fo futu. Tu na ibrisei fu a kisi. ₁₃Un mus meki tiki fu acacia-udu fu syow a kisi. Den tiki disi mus tapu nanga gowtu. ₁₄Un mus sutu den tiki psa ini den linga di fasi na sei a kisi. Dan so un mus syow a kisi. ₁₅Den tiki nanga san un mus syow a kisi mus tan ini den linga. Un no mus puru den ini den linga.

₁₆Mi o gi yu den wortu di mus memre unu na san Mi ben taki. Dan yu mus poti den ini a kisi. ₁₇Un mus meki wan tapun fu lala gowtu gi a kisi. A mus langa wan nanga kwart meter èn a mus bradi drikwart meter. ₁₈Un mus meki tu gowtu kerub gi den lantyi fu a tapun. Den mus meki fu gowtu di un naki plata. ₁₉Wan kerub mus tnapu na a wan sei, a trawan na a tra sei. Den mus de wan pisi nanga a tapun. ₂₀Den kerub mus tnapu abra nanga abra fu densrefi. Den fesi mus luku go na gron, na a tapun fu a kisi. Den tu frei fu den mus bradi opo go na loktu fu kan tapu a tapun fu a kisi. ₂₁Un mus poti a tapun tapu a kisi. Ini a kisi un mus poti den wortu di mus memre un na san Mi ben taki. Mi o gi un den wortu dati. ₂₂Dati na a presi pe mi sa miti nanga yu. Fu a tapun, fu mindri den kerub di de tapu a kisi fu a ferbontu, drape Mi sa taki nanga yu abra ala sani di Mi wani taki den Israelitisma mus du.

₂₃Meki wan tafra fu acacia-udu. A mus langa wan meter, a mus bradi wan afu meter èn a mus hei drikwart meter. ₂₄Un mus tapu a udu fu a tafra nanga lala gowtu èn a mus abi wan gowtu banti lontu en. ₂₅Un mus meki wan lantyi na a tafra. A lantyi mus bradi sowan seibi nanga afu centimeter èn a mus abi wan gowtu banti lontu en. ₂₆Un mus meki fo gowtu linga gi en di mus fasi na den fo uku pe den futu de. ₂₇Den linga mus de krosbei fu a lantyi bika den tiki nanga san a mus syow a tafra mus psa na ini. ₂₈Yu mus meki den tiki dati fu acacia-udu èn a udu mus tapu nanga gowtu. ₂₉Un mus meki skotriki, skarki, kan nanga komki fu kanti sani. Den mus meki fu lala gowtu. ₃₀Tapu a tafra yu mus tan poti santa brede gi Mi.

₃₁Yu mus meki wan kandelaar. A mus meki fu lala gowtu di naki plata. A futu, a mindri pisi, den kopki di mus hori den lampu, den blad nanga den bromki mus de fu wan pisi. ₃₂Siksi anu mus kmoto na seisei fu a kandelaar. Dri na a wan sei nanga dri na a tra sei. ₃₃Ala den dri anu na a wan sei mus abi dri kopki, blad nanga bromki. A kopki mus meki leki wan amandrabromki. A srefi fasi ala den dri anu na a tra sei mus abi dri kopki di meki leki amandrabromki, blad nanga bromki. Na so den siksi anu mus meki di e kmoto na seisei fu a kandelaar. ₃₄A mindri pisi fu a kandelaar srefi, mus abi fo kopki fu amandrabromki, blad nanga bromki. ₃₅Pe den siksi anu fasi na a mindri pisi, drape wan blad mus de. Wan mus de ondro de tu fosi anu, wan mus de ondro den di fu tu anu, wan mus de ondro den di fu dri anu. Na so a sa de na ala siksi anu di fasi na a kandelaar. ₃₆A heri mindri pisi, den blad nanga den anu mus de fu wan pisi lala gowtu di naki plata. ₃₇Yu mus meki seibi lampu gi en. Den lampu mus poti sowan fasi taki a faya fu den e fadon kon na fesi. ₃₈Den tanga nanga den baki mus de fu lala gowtu tu. ₃₉A kandelaar nanga ala den sani di de fanowdu sa meki fu sowan dritenti-na-feifi kilo lala gowtu. ₄₀Sorgu taki yu meki ala sani leki fa yu si den dyaso tapu a bergi.

₁Yu mus meki a santa tenti nanga tin duku. Den duku mus de fu diri linnen krosi, blaw katun, dungruredi katun, nanga fayaredi katun. Meki sma di sabi du a wroko bun nai kerub na den tapu. ₂Ibri duku mus langa tin-na-fo meter èn a mus bradi tu meter. Ala den duku mus langa a srefi èn den mus bradi a srefi. ₃Yu mus fasi feifi fu den duku kon na wan. A srefi sani yu mus du nanga den feifi trawan. ₄Te yu du dati, yu mus meki ai fu blaw katun na a wan sei lantyi fu ala den tu duku. ₅Yu mus meki feifitenti ai na a wan duku nanga feifitenti ai na a tra duku. Den ai fu den tu duku mus de abra nanga abra. ₆Yu mus meki feifitenti gowtu aka fu aka den tu duku kon na wan, meki den tron wan.

₇Yu mus meki wan tenti tu nanga erfu duku fu krabitawiwiri. A tenti disi mus kon abra a santa tenti. ₈Ala den duku musu langa a srefi èn den mus bradi a srefi. Den mus langa tin-na-feifi meter èn den mus bradi tu meter. ₉Feifi fu den duku yu mus fasi kon na wan. Den siksi trawan yu mus fasi kon na wan tu, ma a di fu siksi duku yu mus fow dobru. A dati mus kon na fes'sei fu a tenti. ₁₀Te yu fasi den feifi duku kon na wan, yu mus meki feifitenti ai na a lantyi fu en. A srefi sani yu mus du te yu fasi den tra siksi duku kon na wan. ₁₁Yu mus meki feifitenti kopro aka. Nanga den aka disi yu mus aka den ai fu den tu duku kon na wan, meki den tu duku tron wan. ₁₂Yu mus meki afu fu a pisi fu a duku di langa psa, anga na a bakapisi fu a santa tenti. ₁₃Yu mus meki a afu meter di bradi psa na ala tu sei, anga abra a santa tenti fu tapu en. ₁₄Fu tapu a tenti yu mus meki wan duku fu skapububa di ferfi redi. Tapu a skapububa wan tra duku mus kon fu krabitabuba.

₁₅Yu mus meki planga fu acacia-udu gi a santa tenti. Den planga disi mus tnapu let' opu. ₁₆Ibri planga mus langa feifi meter èn a mus bradi drikwart meter. ₁₇Ala planga mus abi tu pen fu kan fasi den na makandra. Ala planga fu a santa tenti mus de so. ₁₈Yu mus meki tutenti planga gi a sei fu a santa tenti di de na a zuidsei. ₁₉Meki fotenti futupisi fu solfru. Ibri planga mus abi tu futupisi. Ini den futupisi disi den tu pen fu den planga mus fiti. ₂₀Gi a sei fu a santa tenti di de na a noordsei yu mus meki tutenti planga tu ₂₁nanga fotenti futupisi. Tu futupisi gi ibri planga. ₂₂Gi a bakapisi fu a santa tenti di de na a westsei, yu sa meki siksi planga. ₂₃Gi den uku na bakasei fu a santa tenti yu sa meki tu planga. ₂₄Den tu planga disi o meki den uku. Fu ondrosei go na loktu te na a linga den mus de a srefi. ₂₅Ala nanga ala aiti planga mus de nanga solfru futupisi. Tin-na-siksi solfru futupisi sa de. Tu gi ibri planga.

₂₆Yu mus meki dwarsbalk fu acacia-udu. Feifi gi a wan sei fu a santa tenti, ₂₇feifi gi a tra sei fu a santa tenti nanga feifi gi den planga na bakasei fu a santa tenti di de na a westsei. ₂₈A di fu dri dwarsbalk mus didon leti na mindri fu den planga èn a mus waka fu a fosi planga go te na a laste wan. ₂₉Yu mus tapu den planga nanga den dwarsbalk nanga gowtu èn yu mus meki gowtu linga gi den planga ini san den dwarsbalk mus kon fasi. ₃₀Dan yu sa opo a santa tenti tnapu, leki fa Mi sori yu dyaso na tapu a bergi.

₃₁Meki wan garden fu blaw katun, dungruredi katun, fayaredi katun nanga diri linnen krosi èn yu mus meki sma di sabi du a wroko bun, nai kerub na en tapu. ₃₂Yu mus anga en nanga gowtu aka na fo postu fu acacia-udu, di tapu nanga gowtu. Den postu mus tnapu tapu fo solfru futupisi. ₃₃Yu mus anga a garden ondro den tra gowtu aka, dan yu e poti a kisi fu a ferbontu baka a garden. A garden sa prati a santa pisi nanga a moro santa pisi. ₃₄Poti a tapun tapu a kisi ini a moro santa presi. ₃₅Yu mus poti a tafra nanga a kandelaar abra nanga abra fesi a garden. A tafra mus de na noordsei fu a santa tenti. A kandelaar mus de na a zuidsei.

₃₆Yu mus anga wan garden na mofodoro fu a tenti tu. A mus meki fu blaw katun, dungruredi katun, fayaredi katun nanga diri linnen krosi èn moimoi sani mus nai na en tapu. ₃₇Gi a garden disi yu mus meki feifi postu fu acacia-udu di tapu nanga gowtu. Yu mus meki gowtu aka gi den tu nanga feifi kopro futupisi.

₁₇Di Yesus ben de na pasi fu go na Yerusalem, A kari den twarfu man fu En kon na wan sei, dan A taigi den taki: ₁₈“Luku, un de na pasi fu go na Yerusalem. Drape den o gi a Manpikin fu Libisma abra na den prenspari priester nanga den sabiman fu Gado wèt. Den man dati sa teki a besroiti taki A mus dede. ₁₉Dan den o gi En abra na den sma di no de Dyu fu den teki En leki spot'popki. Den o wipi En èn den o spikri En na wan kroisi. Ma baka dri dei Gado o meki A kon na libi baka.”

₂₀Dan a uma fu Sebedeus nanga den tu boi fu en kon na Yesus. A kindi na En fesi fu aksi En wan sani. ₂₁Dan Yesus aksi en taki: “San yu wani?” A uma piki En taki: “Pramisi Mi taki den tu boi disi fu mi sa sidon na Yu let'anu sei nanga Yu kruktu-anu sei te Yu o rigeri leki Kownu.” ₂₂Ma Yesus piki den taki: “Un no sabi san un e aksi. Un sa man nyan a pina di Mi o abi fu nyan?” Den piki En taki: “Wi o man.” ₂₃Dan Yesus taigi den taki: “Fu tru, un sa nyan a pina fu Mi, ma a no Mi e taki suma o sidon na Mi let'anu sei nanga Mi kruktu-anu sei. Mi P'pa libi den presi dati gi den sma di En wani fu sidon drape.” ₂₄Di den tra tin man yere a tori disi, den mandi nanga den tu brada. ₂₅Dat' meki Yesus kari den alamala kon, dan A taigi den taki: “Un sabi taki den tiriman fu den folku e rigeri abra den sma fu den, èn den sma di abi makti e dwengi den fu du san den wani. ₂₆Ma unu no mus du leki den. Efu wan fu unu wani de wan prenspari sma, dan a mus dini den trawan. ₂₇Èn a sma di wani de a fosiwan na un mindri, mus de leki wan srafu gi den trawan. ₂₈Bika a Manpikin fu Libisma, no kon fu sma dini En. Ma A kon fu dini trawan èn fu gi En libi fu meki furu sma kon fri.”

₂₉Di Yesus nanga den man di ben e teki leri fu En kmopo fu Yeriko, bun furu sma ben waka na En baka. ₃₀Dan luku, tu breniman ben sidon na seipasi. Di den yere taki Yesus e psa, den bigin bari taki: “Masra, Manpikin fu David, abi sari-ati nanga wi!” ₃₁A heri grupu sma bari den fu den tapu den mofo, ma den man bigin bari moro tranga taki: “Masra, Manpikin fu David, abi sari-ati nanga wi!” ₃₂Ne Yesus tan tnapu. A kari den breniman kon na En, dan A aksi den taki: “San un wani taki Mi mus du gi unu?” ₃₃Den piki En taki: “Masra, un wani si.” ₃₄Dan Yesus firi sari gi den breniman. A fasi den na den ai èn wantron den ben man si. Dan den bigin waka na Yesus baka.