Dag 323 van 365- Ezechiël 11-13 en Jakobus 1

₁Dan a yeye opo mi tyari go na a Oostpoort fu a oso fu MASRA, di ben e luku go na oostsei. We, mi si tutenti-na-feifi man tnapu drape. Yasanya, a manpikin fu Asur, nanga Pelatya, a manpikin fu Benaya, tu edeman fu a pipel, ben de na den mindri. ₂Dan Gado taigi mi taki: “Manpikin fu libisma, na den man disi de baka den kruktudu di e psa ini a foto disi èn na den e gi den sma takru rai tu. ₃Na den e taki: ‘A no de fanowdu fu un bow oso nownow. A foto de leki wan patu èn wi de leki a meti ini a patu.’ ₄Dat' meki, taigi den san Mi e gi yu fu taki, manpikin fu libisma, taigi den san Mi e gi yu fu taki!” ₅Dan a Yeye fu MASRA kon na mi tapu, èn A taigi mi fu taki: “na disi MASRA e taki: Sma fu Israel, Mi yere san un e taki èn Mi sabi san e kon ini un prakseri. ₆Un kiri someni sma ini a foto disi dati den strati furu nanga dedeskin. ₇Dat' meki, na disi Masra MASRA e taki: A tru taki a foto de leki wan patu, ma na den sma di un kiri de leki a meti ini a patu. Ma unu dati Mi o yagi kmoto fu a foto. ₈Un e frede gi a deigri, we, Mi o meki feyanti kiri unu nanga deigri, Masra MASRA e taki. ₉Mi sa yagi un kmopo fu a foto, gi un abra ini a makti fu folku di un no sabi èn strafu unu. ₁₀Na deigri o kiri unu, ini a kontren fu Israel srefi Mi o strafu unu. Dan un sa sabi dati Mi de MASRA. ₁₁A foto no o de leki wan patu gi unu èn unu no o de leki a meti na en ini. Ini a kontren fu Israel srefi Mi o strafu unu. ₁₂Dan un o sabi dati Mi na MASRA. Un no du den sani fu Mi di un mus tan du, èn un no hori unsrefi na den sani fu Mi na san un ben mus tan hori unsrefi. Ma un teki den gwenti fu den folku di e libi na un lontu.” ₁₃Di Mi e taki san Masra ben gi mi fu taki, Pelatya, a manpikin fu Benaya, fadon dede. Ne mi trowe misrefi na tapu mi fesi na gron èn bari tranga taki: “Tye, Masra MASRA, na kiri Yu o kiri ala den sma fu Israel di tan na baka?”

₁₄MASRA taki nanga mi, A taigi mi taki: ₁₅“Manpikin fu libisma, den sma di de ini Yerusalem e taki fu den trutru brada nanga sisa fu yu, fu den famiri fu yu, nanga fu ala den sma fu Israel di feyanti tyari gwe nanga tranga na den kondre taki: ‘Den de fara fu MASRA, na unu A gi a kondre disi gi unsrefi.’ ₁₆Dat' meki taki disi: ‘Na disi Masra MASRA e taki: Awinsi Mi ben tyari den gwe na tra folku, awinsi Mi ben panya den go na difrenti kondre, èn awinsi den no abi wan tempel ini den kondre pe den de fu den kan dini Mi, ₁₇toku Mi e taigi den tak' na disi Masra MASRA e taki: Mi sa puru unu na mindri den tra folku nanga den kondre pe un ben panya go èn tyari unu kon na wan, èn Mi sa gi unu a kondre Israel baka. ₁₈Dan den sa drai go baka èn den sa puru ala den takru nanga groskin kruktu gado na ini. ₁₉Mi sa gi den wan nyun ati nanga wan nyun yeye na den inisei. Mi sa puru a ati fu den di trangayesi sote, èn Mi o gi den wan ati di o du san Mi wani. ₂₀So den o du den sani fu Mi di den mus tan du èn den o hori densrefi fin'fini na den sani fu Mi na san den mus tan hori densrefi. Den o de a pipel fu Mi èn Mi o de a Gado fu den. ₂₁Ma Mi o meki den wan di seri den ati gi den takru groskin sani pai fu a fasi fa den tyari densrefi, MASRA e taki.’ ”

₂₂Baka dati den kerub bradi den frei, den wiel ben de skinskin nanga den, èn a glori fu a Gado fu Israel ben de loktusei fu den. ₂₃Dan a glori fu MASRA opo kmopo na mindri fu a foto go na tapu a bergi di ben de oostsei fu a foto. ₂₄Ini a sani di a Yeye fu Gado ben e sori mi, a Yeye opo mi dan A tyari mi go baka na a kondre fu den Kaldeasma. Drape den kondreman fu mi ben de di den Kaldeasma ben tyari go drape nanga tranga. Dan Gado tapu fu sori mi sani. ₂₅Dan mi ferteri den kondreman fu mi di ben drape ala san MASRA ben sori mi.

₁MASRA taki nanga mi, A taigi mi taki: ₂“Manpikin fu libisma, yu e libi mindri wan folku di no e arki. Den abi ai fu luku, ma den no e si noti. Den abi yesi fu yere ma den no e arki, bika den na wan folku di no e arki. ₃Manpikin fu libisma, lai wantu sani di yu abi fanowdu ini wan saka, leki wan sma di feyanti e tyari gwe nanga tranga go na wan tra kondre. Dan yu e hari gwe deiten, fu den kan si yu. Kande den sa kisi densrefi, bika den na wan folku di no e arki. ₄Tyari den sani kon na dorosei di wan sma e teki fu tyari gwe nanga en te feyanti o tyari en gwe nanga tranga. Yu mus du dati deiten, meki den si san yu e du. Dan te neti fadon yu mus meki den si fa yu e kon na dorosei leki wan sma di feyanti o tyari gwe nanga tranga. ₅Meki den si fa yu meki wan olo na a ososkin, dan yu e kren kon na dorosei. ₆Sorgu dati den e si tu fa yu e poti a saka tapu yu skowru èn fa yu e syow en gwe te a dungru srefsrefi. Yu mus tapu yu fesi fu yu no e si a kondre di yu e gwe libi. A sani dati di yu sa du sa de wan marki gi den sma fu Israel.” ₇Dan mi go du san A komanderi mi. Deiten mi tyari den sani go na dorosei di wan sma e tyari gwe te feyanti o tyari en gwe nanga tranga. Dan di neti e tapu mi meki wan olo nanga mi anu na a ososkin. Di a ben dungru srefsrefi mi poti a saka na tapu mi skowru dan mi hari gwe. Mi sorgu dati ala sma ben kan si mi.

₈A tra mamanten MASRA taki nanga mi. A taigi mi taki: ₉“Manpikin fu libisma, den sma fu Israel, a folku di no e arki, den mus fu aksi yu san yu ben du. ₁₀Taigi den taki: ‘Na disi Masra MASRA e taki: A ben de wan boskopu gi a fesiman di de ini Yerusalem, nanga gi den sma fu Israel di e libi drape. ₁₁Taki disi: San Mi du ben de wan marki gi unu. Den sani di Mi du, na dati o psa nanga den. Feyanti o tyari den gwe nanga tranga, leki strafuman, go na wan tra kondre. ₁₂A fesiman di de na den mindri sa teki en saka poti na tapu en skowru èn go na dorosei te a dungru srefsrefi. Sma o meki wan olo gi en na a skotu fu a foto fu meki a psa drape gwe. A fesiman sa tapu en fesi bika a no o si a kondre disi noiti moro. ₁₃Dan Mi o fringi Mi net abra en èn Mi o fanga en. Dan Mi o tyari en go na Babel, a kondre fu den Kaldeasma, èn a o dede drape sondro fu si a kondre srefi. ₁₄Dan ala den sma di e lontu en, den spesrutu waktiman nanga ala den fetiman fu en Mi o panya go na ala den sei pe a winti e wai go èn Mi o hari go na den baka nanga deigri. ₁₅Dan te Mi panya den go na mindri den folku nanga ini den difrenti kondre den o ferstan dati Mi de MASRA. ₁₆Ma mi o meki wantu fu den tan na libi. Den no o dede ini a bigi feti èn a angriten nanga takrusiki no o kiri den tu. Mi o du dati fu meki den ferteri den folku pe Mi o panya den go ala den groskin sani di den du. Dan owktu den folku dati sa ferstan dati Mi de MASRA.’ ”

₁₇MASRA taki nanga mi, A taigi mi taki: ₁₈“Manpikin fu libisma, te yu o nyan brede yu mus beifi èn te yu o dringi watra yu heri skin mus seki fu frede. ₁₉Dan yu e taigi den sma fu a kondre taki: ‘So Masra MASRA e taki fu den sma fu Yerusalem di tan na baka ini Israel: Den o nyan den brede nanga frede èn den o dringi den watra nanga bun broko-ede. Bika a feyanti o fufuru ala sani fu a kondre tyari gwe, èn a kondre o tan na baka leki wan broko pranasi, fu den bigi ogri di den sma ben du ini a kondre. ₂₀Den foto pe sma e libi ete o tron bigi ipi broko ston, èn a kondre o tron wan bigi broko pranasi. Dan un o ferstan taki Mi na MASRA.’ ”

₂₁MASRA taki nanga mi, A taigi mi taki: ₂₂“Manpikin fu libisma, san na a sani di den sma e taki na ini Israel? Den e taki: ‘A ten e psa gwe, ma no wan fu den sani e psa di den profeiti si.’ ₂₃Dat' meki, taigi den taki: ‘Na disi Masra MASRA e taki: Mi o tyari wan kba kon na a taki dati. Sma no o taki en moro langa ini Israel.’ Taigi den taki: ‘A ten doro di ala den sani di den profeiti si o psa! ₂₄Sma no o bedrigi den sma fu Israel moro nanga sani di den e si ma di no tru, èn nanga sani di den e taki dati de fu kon, soso fu kori a pipel. ₂₅Mi, MASRA srefi e taki san o psa, èn na dati o psa tu! Èn na gawgaw den o psa. Unu sma di no e arki, na ini un libiten Mi o taki sani di Mi o meki psa tu. Na dati Masra MASRA taki.’ ”

₂₆MASRA taki nanga mi, A taigi mi taki: ₂₇“Manpikin fu libisma, yere, den sma fu Israel e taki: ‘Den sani di Gado e sori en, nanga den sani di Gado e gi en fu a taki, na fu a ten di de bun fara na wi fesi.’ ₂₈Dat' meki, taigi den taki: ‘Na disi Masra MASRA e taki: No wan fu den sani di Mi taki o tan dan den no psa. A wortu di Mi taki o psa nomonomo. Na dati Masra MASRA taki.’ ”

₁MASRA taki nanga mi, A taigi mi taki: ₂“Manpikin fu libisma, taigi den profeiti fu Israel san Mi e gi yu fu taki, den profeiti di e taki nomo san e kon ini den ede. Taigi den taki: ‘Un arki a boskopu fu MASRA. ₃Na disi Masra MASRA e taki: A kba gi den don profeiti di e taki san den eigi prakseri e gi den fu taki, sondro fu den si wan sani. ₄Israel, den profeiti fu yu de leki krab'dagu di e libi na broko pranasi. ₅Den no warskow den sma fu Israel èn den no kibri den fu den man tan tnapu ini a feti tapu a dei fu MASRA. ₆Den e bedrigi den sma nanga den sani di den e si ma di no tru èn den sani di den taki tak' o psa, no de fu fertrow. Den e taki: Na disi MASRA e taki, sondro fu Mi seni den. Dan den e wakti owktu fu den sani kon tru.

₇Ma na bedrigi un e bedrigi den sma nanga den sani di un si ma di no tru èn den sani di un taki tak' o psa, no de fu fertrow. Bika un e taki: na so MASRA taki, ma Mi no taigi un noti. ₈Dat' meki na so Masra MASRA e taki: yere, fu di un taki sani di no tru èn fu di un si sani di no de fu fertrow, dat' meki Mi o strafu unu. Na dati Masra MASRA taki.

₉Mi o strafu den profeiti di e bedrigi den sma nanga den sani di den e si ma di no tru èn den sani di den taki tak' o psa, no de fu fertrow. Den no sa de moro na mindri a pipel fu Mi, den nen fu den no sa skrifi tu ini a buku fu den sma fu Israel, èn kon srefi den no o kon ini Israel. Dan un o ferstan dati Mi na Masra MASRA. ₁₀Iya, Mi o du dati fu di den profeiti e kori Mi pipel fu taigi den taki: Ala sani e go bun! Ma sani no e go bun srefsrefi. Te a pipel bow wan skotu, den profeiti ben e lobi karki gi en. ₁₁Taigi den di e lobi a karki, taki: A o fadon nomonomo. Wan sibibusi o lon psa, tranga pis'pisi ijs o fadon, èn wan tranga winti o opo. ₁₂Te a skotu fadon sma o aksi un taki: Fu sanede a karki di un lobi gi en no hori en tnapu? ₁₃Dat' meki na disi Masra MASRA e taki: Ini a hebi atibron fu Mi, Mi o meki wan tranga winti opo èn wan sibibusi fadon. Ini a faya atibron fu Mi di e pori ala sani, Mi o meki tranga pis'pisi ijs fadon. ₁₄Mi o broko a skotu di un ferfi weti trowe na gron, èn den fundamenti fu en o kon fu si. A foto o tron bigi ipi broko ston èn un o dede na den ondro. Dan un o sabi dati Mi de MASRA. ₁₅Na so Mi o lusu ala a hebi atibron fu Mi tapu a skotu, nanga tapu den wan di ferfi en weti, èn Mi o taigi den taki: A kba gi a skotu, èn a kba gi den di ferfi en: ₁₆dati na den profeiti fu Israel di ben taki nanga Yerusalem leki na Mi ben gi den sani fu taki èn di ben si sani fu freide aladi freide no ben de. Na so MASRA e taki.’

₁₇Manpikin fu libisma, luku den umasma fu a pipel fu yu, den di e taki leki na Mi e gi den sani fu taki. Yu taigi den now san Mi e gi yu fu taki. ₁₈Taigi den taki: ‘Na disi Masra MASRA e taki: A kba gi den uma di e tai tofru banti lontu a anu fu ibri sma, nanga di e tapu a fesi fu pikinwan nanga bigiwan nanga krosi nanga a prakseri fu fanga a libi fu den. Un no abi fu prakseri dati un o man fanga a libi fu a pipel fu Mi dan unsrefi tan na libi. ₁₉Un e pori Mi nanga a pipel fu Mi gi wantu anu groto nanga wantu pisi brede. Un e lei fesi krutu fu den kan kiri den wan di no du noti èn fu den kan fri den wan di du ogri. ₂₀Dat' meki, na disi Masra MASRA e taki: Yere, Mi e hari den tofru banti koti nanga san un e fanga den sma leki pikin fowru. Mi e hari den koti fu un anu èn Mi e fri a libi fu den sma di un fanga leki fowru. ₂₁Mi o priti den krosi fu unu di un poti tapu a fesi fu den èn Mi o ferlusu den puru ini un anu. Den no o de sma moro di un man fanga. Dan un o sabi dati Mi de MASRA. ₂₂Nanga den lei fu unu, unu furu den sma di e libi bun ini Gado ai nanga sari, A no Mi ben meki den e sari so. Un e hori baka gi ogri-ati sma tu, èn so den no e tapu nanga a ogri di den e du fu den kan tan na libi. ₂₃Dat' meki Mi e tyari wan kba kon na den sani di un e si èn nanga san un e bedrigi den sma, sosrefi nanga den sani di un e taigi den dati de fu kon. Mi o ferlusu a pipel fu Mi puru ini un makti. Dan un o sabi dati Mi de MASRA.’ ”

₁Gi den twarfu lo fu den Dyusma di panya na heri grontapu.

Disi na wan brifi fu Yakobus, wan knekti fu Gado nanga Yesus Kristus. Mi e bari un odi.

₂Brada nanga sisa, un mus si en leki wan prisiri sani te ala sortu tesi e miti unu. ₃Bika un sabi taki efu a bribi fu unu e psa a tesi, un o man hori doro. ₄Ma un mus tan hori doro te leki un kon de soleki fa Gado wani fu un de. Dan sma no o abi no wan enkri sani fu taki na un tapu, èn noti no o mankeri na unu.

₅Efu wan fu unu no abi nofo koni, dan a mus begi Gado fu A gi en. Bika Gado e gi ala sma sondro fu hori wan sani na baka, èn sondro fu taki na den tapu. ₆Ma a sma mus begi nanga bribi. A no mus begi nanga tu ati. Bika efu a e du dati, a de leki wan skwala fu a se di winti e seki go seki kon. ₇Sowan sma no mus prakseri taki Masra o gi en wan sani. ₈Bika a e kenki prakseri ala leisi. Tide a wani du so, tamara a wani du dati.

₉Wan pôti bribisma mus prisiri taki a abi wan hei presi ini Gado ai. ₁₀Ma wan gudu bribisma mus prisiri taki Gado gi en wan lagi presi. Bika neleki fa bromki na sei pasi de fu wan syatu pisten nomo, na so ensrefi de fu wan syatu pisten tu. ₁₁Te a son kon faya, a e bron a bromki. A bromki e drei gwe, a e fadon, èn noti no de fu si moro fu a moi fu en. So a de tu nanga a guduman. Ini a wroko di a e wroko, a e dede.

₁₂A sma di e tan hori doro te tesi miti en na wan blesi sma. Bika te a psa den tesi, Gado o gi en a libi fu têgo leki wan grani. Gado pramisi ala sma di lobi En a sani disi. ₁₃Te wan sma e psa wan tesi, a no mus taki: “Na Gado poti mi ini a tesi disi.” Bika soleki fa ogri no man tesi Gado, na so Gado no e tyari sma kon na ini tesi. ₁₄Ma te wan sma e psa wan tesi, a de so taki den takru lostu fu en e kari en, den e hari en. ₁₅Dan te a gi ensrefi abra na den takru lostu disi, den e meki wan sondu. Te a sondu disi kon gro kba, a e tyari dede kon.

₁₆Lobi brada nanga sisa, no meki sma kori unu. ₁₇Ala sani di bun èn di no e mankeri noti, e kmopo na loktu fu Gado a P'pa di meki a son, a munkenki nanga den stari. Gado no e kenki, A faya fu En no e kenki kon dungru. ₁₈Gado ben teki a besroiti fu meki un kon sabi a tru boskopu, fu un kon kisi a nyun libi. Disi meki taki wi teki a fosi presi na mindri ala den sani di A meki.

₁₉Mi lobi brada nanga sisa, disi na wan sani san un mus sabi: Ibri sma mus gaw fu yere, ma a no mus gaw fu taki èn a no mus gaw fu kisi atibron. ₂₀Bika wan sma di kisi atibron, no e du san bun ini Gado ai. ₂₁Dat' meki un mus poti ala doti fasi nanga ala takru fasi fu libi na wan sei. Nanga sakafasi un mus teki a boskopu di Gado poti ini un ati, a boskopu di kan ferlusu un sili. ₂₂Un no mus arki wawan san Gadowortu e taki, ma un mus du en tu. Noso un e kori unsrefi. ₂₃Bika a sma di e arki a wortu, ma di no e du san a wortu e taki, gersi wan man di e luku ini wan spikri fu si fa en eigi fesi tan. ₂₄Di a du dati, a gwe, èn a srefi momenti a fergiti fa en fesi tan. ₂₅Ma a sma di e tan ondrosuku a boskopu fu Gado di no abi fowtu èn di e meki sma kon fri, na wan blesi sma. Gado o blesi en ini den sani san a e du efu a no fergiti san a yere, èn efu a e du san a boskopu e taki. ₂₆Efu wan sma prakseri taki a e dini Gado, ma en mofo e tak'tak' sani, dan a e kori ensrefi. A dini san a e dini Gado no abi warti. ₂₇A soifri fasi fu dini Gado a P'pa sondro fowtu, na te yu e yepi sma ini den nowtu, soleki pikin di no abi m'ma nanga p'pa moro, uma di masra dede kba, nanga te yu e sorgu taki yu no e du den ogri sani san den sma fu grontapu e du.