Dag 325 van 365- Ezechiël 16-17 en Jakobus 3

₁MASRA taki nanga mi, A taigi mi taki: ₂Manpikin fu libisma, memre a pipel fu Yerusalem na den groskin sani di den du. ₃Taigi a foto taki: Na disi Masra MASRA e taki: Ini Kanaan yu kumbatitei beri. Yu papa ben de wan Amonitisma èn yu mama ben de wan Hetitisma. ₄Di yu gebore sma no ben de fu koti yu kumbatitei, fu wasi yu puru a brudu na yu skin, fu wrifi sowtu gi yu nanga fu domru yu ini krosi. ₅No wan sma luku yu èn sari yu fu du wan fu den sani dati gi yu. Na ini wan wei den poti yu di yu gebore, bika den no ben si noti na yu.

₆Ne Mi waka psa. Dan Mi si fa yu ben e lolo ini yu brudu. Dan Mi taki: Libi! Iya, di Mi si yu didon drape ini a brudu fu yu, Mi taki: Tan na libi! ₇Dan Mi teki yu èn Mi sorgu gi yu. Yu gro leki koro ini wan pranigron. Yu gro, yu kon bigi èn yu kon moi. Yu kisi moi steifi borsu èn a wiwiri na yu syenpresi ben e gro, ma yu ben de nanga sososkin ete. ₈Di Mi psa baka wan pisten baka, Mi si dati yu ben lepi fu meki lobi. Dat' meki Mi teki yu ondro Mi tiri, dan Mi tapu a sososkin fu yu. Mi sweri gi yu dati yu o man tan bow na Mi tapu, Mi meki wan ferbontu nanga yu, MASRA e taki. Na so yu kon de fu Mi. ₉Dan Mi wasi yu, Mi wasi a brudu puru na yu skin, dan Mi lobi oli gi yu. ₁₀Baka dati Mi weri wan moi krosi gi yu nanga furu kloru, nanga susu na yu futu fu a moro diri leer. Mi weri wan linnen krosi gi yu lontu yu ede, nanga wan kanti duku fu tapu yu fesi. ₁₁Mi weri moi gowtu sani gi yu, bui na yu anu nanga wan keti na yu neki. ₁₂Mi gi yu wan linga gi yu noso, linga gi yu yesi, èn Mi poti wan moi kroon na tapu yu ede. ₁₃Yu ben weri furu gowtu nanga solfru sani, den krosi fu yu ben de fu linnen nanga kanti, moi brei krosi. A nyanyan fu yu ben meki nanga fini blon, nanga oni èn nanga oleif-oli. Dati moi yu sote, iya, yu ben kon gersi wan uma kownu. ₁₄Dan ala folku bigin taki fu yu, fa yu moi, bika fowtu no de fu feni na yu. Na ala den moi sani di Mi weri gi yu poti yu so. Na so Masra MASRA e taki.

₁₅Ma yu kon kisi heimemre fu di yu ben moi so èn fu di sma ben e taki so fu yu. Dan yu bigin waka e motyo. Yu bigin motyo nanga ibri sma di ben e waka psa. Den ben kan kon teki, a ben de fu den. ₁₆Yu puru yu krosi, yu moi den presi pe yu e tyari ofrandi nanga den dan yu motyo drape gi Mi. Noiti ete so wan sani ben psa èn noiti moro a o psa tu. ₁₇Yu teki den gowtu nanga solfru sani tu di Mi ben gi yu, èn yu meki popki fu mansma nanga den, dan yu motyo nanga den. ₁₈Yu teki den moi brei krosi fu yu tu weri gi den, èn yu tyari a oleif-oli nanga a wierook fu Mi leki ofrandi gi den. ₁₉A nyanyan di Mi ben gi yu, sani di ben meki nanga fini blon, oleif-oli, nanga fu oni, yu gi den leki wan ofrandi nanga wan switi smeri. A kon so fara srefi, Masra MASRA e taki, ₂₀taki yu teki den pikin di Mi meki nanga yu èn tyari den leki wan ofrandi gi den meki den nyan. Fu sanede a motyo di yu motyo gi Mi no ben sari? ₂₁Fu sanede yu ben abi fu srakti den pikin fu Mi, bron den èn gi den tapu so wan fasi abra? ₂₂Na ala den groskin sani dati di yu du, nanga a motyo di yu motyo, yu no prakseri di yu ben yongu, di yu ben de nanga sososkin èn di ben didon e lolo ini yu brudu. ₂₃Èn baka ala den ogri di yu du, ma a kba gi yu tu, a kba gi yu, Masra MASRA e taki, ₂₄yu meki spesrutu presi poti na ibri pren. ₂₅Owktu tapu ala uku pe pasi e miti yu gi a moi fu yu abra. Yu bradi yu futu gi ibri sma di ben e psa èn yu yayo srefsrefi. ₂₆Owktu nanga den sma fu Egiptekondre, den krasi sma fu a kondre na yu sei, yu yayo. Yu yayo sote èn yu du Mi wan hati sani nanga dati. ₂₇Ma yere, Mi tron yu feyanti now. Mi puru wantu fu den reti di yu ben abi, èn Mi gi yu abra na den di no lobi yu srefsrefi fu den du san den wani nanga yu. Dati na den Filistijnuma di e syen fu a doti libi di yu e libi. ₂₈Fu di sani no ben sari yu, meki yu go yayo srefi nanga sma fu Asiria. Iya, yu go motyo nanga den, ma toku a no ben sari gi yu. ₂₉Yu yayo furu tu nanga den Kaldeasma, den sma di e bai nanga seri sani. Ma owktu dati no ben sari gi yu. ₃₀Krasi nomo yu ben krasi so meki yu du ala den sani dati, Masra MASRA e taki. Leki wan motyo yu ben de di no e span nanga no wan sma. ₃₁Tapu ibri uku pe pasi e miti, èn tapu ibri pren yu bow den spesrutu presi fu yu. Ma yu no tyari yusrefi leki wan sma di e seri en skin, bika yu no ben wani moni. ₃₂Yu ben e motyo, yu go na bedi nanga doroseisma, ma yu ben trow. ₃₃Ala motyo e kisi kado, ma yu ben e gi kado na ala den man nanga san yu ben e meki lobi. So yu ben e kori den fu ala sei kon na yu fu yu sribi nanga den. ₃₄Sani ben e go tra fasi na yu leki fa a ben e go na den tra uma. Yu ben de wan motyo, ma man no ben abi fu waka na yu baka, den no ben abi fu pai yu, ma yu ben e pai den. Sani ben de tra fasi na yu.

₃₅Dat' meki, motyo, arki a boskopu fu MASRA. ₃₆Na disi Masra MASRA e taki: Fu di na yu ben broko yusrefi saka, fu di na yu ben puru yu krosi gi den man nanga san yu ben e meki lobi èn go na bedi nanga den, èn fu di yu ben meki a brudu fu den eigi pikin fu yu lon gi ala den groskin kruktu gado fu yu, ₃₇fu dat'ede, yere, Mi o tyari ala den man nanga san yu ben e meki lobi, den man di yu gi prisiri, kon na wan, ala den wan di yu ben lobi, nanga ala den wan di yu no ben man si na ai. Mi o tyari den kon fu ala sei, dan Mi o puru yu krosi na yu skin fu den kan teki den ten luku a sososkin fu yu. ₃₈Mi o leisi a strafu gi yu di fiti motyo nanga kiriman. Mi o fon yu nanga hebi atibron dan ₃₉Mi o gi yu abra ini a makti fu den. Den o broko den spesrutu sani trowe di yu meki. Den o puru yu krosi nanga yu gowtu sani na yu skin èn meki yu tnapu sososkin. ₄₀Den o meki bun furu sma hari kon na yu, sma di o fringi ston na yu tapu èn kapu yu nanga den deigri. ₄₁Den o sutu faya gi den oso fu yu èn den o strafu yu leti fesi furu tra uma. So Mi o meki yu tapu nanga a motyo di yu e motyo, èn nanga a pai di yu e pai den man nanga san yu e sribi. ₄₂Dan fosi a hebi atibron fu Mi o saka èn dan fosi Mi o tapu fu dyarusu. Dan fosi Mi o bro èn dan fosi a hebi atibron fu Mi o kowru. ₄₃Yu fergiti san Mi du gi yu di yu ben yongu, ma yu wiki a faya atibron fu Mi nanga ala den sani di yu du. Na dat' meki Mi meki a fasi fa yu tyari yusrefi drai kon baka tapu yu ede. Na so Masra MASRA e taki. Dan so wan kba kon na a motyo di yu motyo, nanga na den groskin sani di yu du.

₄₄Yerusalem, yere, te sma wani koti odo gi yu den o taki: “Leki fa a mama de, na so a umapikin o de tu.” ₄₅Yu na trutru a umapikin fu yu mama di no ben man si en masra nanga den manpikin fu en na ai. Yu de leki den sisa fu yu, di no ben wani sabi not'noti fu den masra nanga den manpikin fu den. Yu mama ben de wan Hetiti-uma èn yu papa ben de wan Amoritiman. ₄₆A bigi sisa fu yu ben de Samaria di ben libi noordsei fu yu nanga den umapikin fu en. A pikin sisa fu yu ben de Sodom, en ben libi zuidsei fu yu nanga den umapikin fu en. ₄₇Yu no libi wawan leki fa den ben e libi, èn yu no du den groskin sani wawan di den ben e du, ma es'esi yu ben kon moro ogri leki den. ₄₈Mi e sweri na Mi eigi libi, MASRA e taki, dati a no abi misi dati yu sisa Sodom nanga a umapikin fu en, no du afu fu san yu nanga den umapikin fu yu du. ₄₉Yere, na disi ben de a kruktudu fu yu sisa Sodom: en nanga den umapikin fu en ben tyari heimemre èn den ben e libi bigi, sondro wan broko-ede. Den wan di no de noti, nanga den mofinawan, den no ben e luku srefsrefi. ₅₀Den ben e waka nanga a prakseri dati den betre moro ibri tra sma, èn den ben e du groskin sani na Mi fesi. Dat' meki Mi kiri den wantron, leki fa Mi si den sani dati. ₅₁Samaria dati no du afu fu den sondu di yu du. Yu du moro groskin sani leki den. Efu yu nanga den tu sisa fu yu tnapu sei nanga sei, a gersi dati den no du noti. ₅₂Tyari a syen fu yu now, yu di meki dati a strafu di den o kisi sori moro lekti. Yu sondu na tapu so wan groskin fasi dati a gersi den taki den no du noti. Yu mus syen, èn yu mus tyari a syen dati tu, bika yu meki a gersi dati den sisa fu yu na bun sma.

₅₃Ma Mi o tyari wan kenki kon gi den, gi Sodom nanga den umapikin fu en, nanga gi Samaria nanga den umapikin fu en, èn Mi o tyari wan kenki kon gi yu tu. ₅₄Dati o de wan syen gi yu, èn a o meki yu syen fu ala den sani di yu du. Èn dati o de wan trowstu gi den. ₅₅Den sisa fu yu, Sodom nanga Samaria, den nanga den umapikin fu den o de baka leki fa den ben de fosi. Yu nanga den umapikin fu yu owktu o de baka leki fa un ben de fosi. ₅₆A ten di yu ben tyari heimemre yu noiti kari a nen fu yu sisa Sodom. ₅₇A ten dati a no ben kon na krin ete, leki fa a kon na krin now, fa yu takru. Now den umasma fu Aram nanga den di fu ala den tra kondre na lontu e teki yu e meki spotu. Owktu den Filistijnuma di e libi na yu lontu e luku yu èn lafu. ₅₈Yu o tyari a bakapisi fu den syen sani nanga den groskin sani di yu du. Na so MASRA e taki.

₅₉Bika, na disi Masra MASRA e taki: Leki fa yu du nanga Mi fu no hori yu na san yu ben pramisi èn fu broko a ferbontu di un ben meki, na so Mi o du nanga yu tu. ₆₀Ma Mi o tan memre a ferbontu di Mi meki nanga yu a ten di yu ben yongu. Dat' meki Mi o meki wan têgo ferbontu nanga yu now. ₆₁Dan yu o prakseri fa yu ben tyari yusrefi èn firi syen te yu bigi sisa nanga yu pikin sisa o kon baka na yu. Mi o gi yu den leki yu umapikin awinsi den no de ini a ferbontu di Mi meki nanga yu. ₆₂Te Mi meki a ferbontu nanga yu, yu o sabi taki Mi de MASRA, ₆₃èn yu o prakseri baka san yu du. Dan yu o syen èn hori yu mofo fu a syen di miti yu. Ma Mi o gi yu pardon fu ala san yu ben du. Na so Masra MASRA e taki.

₁MASRA taki nanga mi, A taigi mi taki: ₂Manpikin fu libisma, gi a pipel fu Israel a laitori disi, ferteri den a agersitori disi: ₃Taigi den taki: “Na disi Masra MASRA e taki: Wan leisi wan bigi gonini frei go na a Libanonbergi. Den frei fu en ben langa èn den ben brada, èn a ben abi furu wiwiri nanga difrenti kloru. Fu loktusei fu wan fu den sedrebon tapu a bergi ₄a gonini broko wan yongu taki dan a tyari en go na wan kondre pe bai nanga seriman e libi. Drape a poti en ini wan fu den foto fu den man dati. ₅Baka dati a teki wan tiki ini Israel, wan fu den tiki di yu e poti fu sproiti, dan a poti en ini wan wei pe sani e gro bun. A poti en pe ben abi furu watra. A prani en pe sma e prani den wilgebon. ₆A tiki sproiti èn a tron wan droifibon, di gro bradi ma di tan krosbei fu a gron. So a tiki sproiti tron wan droifibon nanga taki di gro go na alasei.

₇Ma yu ben abi wan tra bigi gonini nanga bradi frei èn nanga furu wiwiri. Dan luku, a droifitiki drai den rutu fu en ini a gron pe a ben prani, a drai den go na a gonini, owktu den taki fu en a langa go na en. A ben wani watra fu a gonini, no fu a bedi tapu san a ben prani. ₈Ma a ben prani tapu wan bun wei, pe watra ben de bogobogo. Drape ben bun nofo fu a gi taki, fu a gi froktu, fu a tron wan moi droifitiki.”

₉Taigi a pipel tu taki: “Na disi Masra MASRA e taki: San o de a bakapisi gi a droifitiki? Sma sa rutu en puru èn hari den froktu fu en trowe. A o drei gwe èn furu krakti noso furu sma no o de fanowdu fu hari en nanga ala den rutu fu en puru ini a gron.

₁₀Bika luku, a droifitiki prani, ma a no sa go bun nanga en. A o drei leki fa a faya winti fu oostsei o miti nanga en. Na drei a o drei leti drape tapu a bedi pe a prani.”

₁₁Dan MASRA taki nanga mi, A taigi mi taki: ₁₂“Taigi a trangayesi pipel disi taki: Un sabi san a agersitori wani taki? A kownu fu Babilon kon na Yerusalem fu teki a kownu nanga den tra tiriman fu a kondre tyari go na Babel leki strafuman. ₁₃Baka dati a teki wan sma fu a famiri fu kownu, a meki wan ferbontu nanga en èn a meki a sweri dati a o tan saka ensrefi gi en. Te fu kba a teki ala den heihei sma fu a kondre tyari gwe tu. ₁₄Bika a ben wani dati a kondre ben mus tron wan swaki kondre di no ben o man broko nanga en, èn di ben o abi fu hori en na a ferbontu. ₁₅Ma toku a kownu dati broko nanga en. A dati seni boskopuman go na Egipte fu seni aksi fu asi nanga furu srudati. A sani di a ben wani du no ben o waka bun. Sani no sa waka bun gi a man di du so wan sani, di broko a ferbontu. ₁₆Mi e sweri na Mi eigi libi, Masra MASRA e taki, a sa dede ini Babel, drape ini a tanpresi fu a kownu di ben poti en leki kownu. Bika a si a sweri di a meki leki noti èn a broko a ferbontu di den ben meki. ₁₇A farao fu Egipte no o kon yepi en tu nanga wan bigi legre te den srudati fu Babel e poti bigi ipi santi nanga den sani leki bigi trapu na a skotu fu Yerusalem fu go kiri furu sma. ₁₈Iya, a si a sweri di a meki leki noti, a broko a ferbontu. Luku, aladi a meki wan sweri toku a du ala den sani dati. A sa kisi en strafu nomonomo.

₁₉Dat' meki, na disi Masra MASRA e taki: èn Mi e sweri disi na a eigi libi fu Mi, a broko di a broko a sweri di a meki ini Mi nen èn a hori di a no hori en na a ferbontu di a meki nanga Mi, o drai kon tapu en eigi ede. ₂₀Mi o fringi a net fu Mi abra en èn Mi o fanga en. Dan Mi o tyari en go na Babel èn leisi strafu gi en drape fu di a no hori ensrefi na a ferbontu. ₂₁Owktu den srudati fu a legre fu en di ben man lowe o feni den dede. Den di sa tan na libi Mi o panya go na ala sei pe a winti e wai go. Dan un o sabi taki Mi, MASRA, taki dati.

₂₂Na disi Masra MASRA e taki: Misrefi o puru wan pikin yongu taki na loktusei fu a bigi sedrebon. Dan Mi o prani en tapu wan bun hei bergi. ₂₃Tapu a moro hei bergi fu Israel Mi o prani en. A o kisi taki, a o meki froktu èn a o tron wan tumsi moi sedrebon. Fowru o go libi ini a bon dati, ini a kowrupe fu den taki fu en. Ala sortu fowru o de drape. ₂₄Dan ala den bon fu a wei sa sabi taki Mi, MASRA, e trowe wan hei bon èn e meki wan pikin bon gro, taki Mi e meki wan bon di gesontu drei gwe èn di e meki wan bon di drei gwe gro baka. Mi, MASRA, e du san Mi taki.”

₁Mi brada nanga sisa, un alamala no mus suku fu tron sma di e gi leri. Bika un sabi taki Gado sa luku moro fini te A e krutu wi di e gi leri. ₂Wi alamala e meki fowtu someni leisi. Ma a sma di no e meki fowtu ini san a e taki, na wan sma di kon de soleki fa a mus de, èn di man hori ensrefi ini ala sani tu. ₃Efu wi wani meki wan asi du san wi e taki, wi e poti wan titei ini en mofo. So a mus fu go pe wi wani. ₄Luku den sipi tu. Den bigi èn tranga winti e trusu den go na fesi. Ma nanga wan pikin sani leki wan pari di fasi na bakasei fu a sipi, a man di e tyari a sipi e tyari en go pe a wani. ₅Na so a de nanga a tongo tu. Na wan pikin pisi fu a skin, ma a e taki bradi. Luku fa wan pikin faya kan bron wan bigi busi. ₆Un tongo na wan faya tu. Soso ogri a e puru kon na doro. Fu ala den pisi fu a skin, a tongo na a wan di e pori a heri skin. A e sutu faya gi a heri fasi fa wi e libi èn na hel srefi e leti en. ₇Libisma man tiri ala sortu meti èn den e du dati tu. Den e tiri bus'meti, fowru di e frei, meti di e kroipi, nanga meti di e libi na se. ₈Ma no wan libisma man basi a tongo. Na wan ogri sani, yu no sabi na fesi san a o du. A ogri san a e du, na leki te takru sneki beti yu. ₉Nanga en wi e opo a nen fu Masra Gado wi P'pa, èn nanga en wi e fluku libisma di Gado meki leki fa Ensrefi de. ₁₀Nanga a srefi mofo di wi e blesi, wi e fluku sma tu. Mi brada nanga sisa, a no mus de so. ₁₁A no kan taki bun watra nanga sowtuwatra de makandra ini wan peti. ₁₂Wan figabon no e gi oleif, èn wan droifibon no e gi figa. Na so wan sowtuwatra peti no man gi bun watra fu dringi.

₁₃Sortu wan fu unu koni èn sabi sani? We, meki a de fu si dan na a bun fasi fa yu e libi. Sma di koni e du sani tapu wan safri fasi. ₁₄Ma efu ini un ati un kon bita fu di un dyarusu, èn efu un e prakseri soso unsrefi, dan un no mus meki bigi tak' un koni. Un mus kba fu lei, èn un mus taki den sani leki fa den de. ₁₅A koni disi no kmopo fu Gado. Na wan grontapu sani, na wan sani di kmoto fu libisma, na wan didibri sani. ₁₆Bika pe dyarusu de èn pe sma e prakseri soso densrefi, drape soso bruya de èn sma e du ala sortu takru sani. ₁₇Ma ini a fosi presi, a koni di kmoto fu Gado e meki sma e libi wan krin libi. Moro fara a e meki den e pruberi fu hori freide, a e meki den abi switi maniri, a e meki den e arki san trawan e taki, a e meki den abi furu sari-ati nanga trawan, a e meki den e du furu bun, a e meki den no e teki a sei fu son sma, èn a e meki den e taki den sani leki fa den de. ₁₈Den sma di e tyari freide kon na trawan mindri, e sai ini freide. Èn a froktu fu en na wan libi di bun ini Gado ai.