Dag 331 van 365- Ezechiël 30-32 en 1 Petrus 4

₁MASRA taki nanga mi, A taigi mi taki: ₂“Manpikin fu libisma, taki a boskopu disi di Mi e gi yu fu taki. Taki: ‘Na disi Masra MASRA e taki:

₆Na disi Masra MASRA e taki: Den di e hori baka gi Egipte o fadon, èn a krakti fu den gi san den e meki bigi so o broko. A bigi feti o kiri sma fu Migdol go te na Syene, Masra MASRA e taki. ₇Egipte o didon leki wan broko pranasi na mindri fu kondre di broko tron broko pranasi tu. Den foto fu en o tron bigi ipi broko ston na mindri foto di broko tu. ₈Te Mi poti faya ini Egipte èn bron ala den wan di ben e yepi en, den sma fu en o sabi taki Mi de MASRA. ₉A dei dati Mi o seni boskopu nanga sipi go na den sma fu Nubia di e libi sondro wan broko-ede, èn Mi o meki den beifi. Den o beifi abra den heri skin tapu a dei dati te Mi o strafu Egipte. Èn a dei dati, a e kon!

₁₀Na disi Masra MASRA e taki: Iya, Mi sa meki kownu Nebukadnesar fu Babilon tyari wan kba kon na den bun furu sma fu Egipte. ₁₁Mi o meki en nanga den srudati fu en, den moro ogri-ati wan fu grontapu, hari go drape fu broko a kondre. Nanga den deigri ini den anu den o go feti nanga Egipte èn den o furu a kondre nanga dede. ₁₂Mi o drei a Nijl-liba èn Mi o gi a kondre na man di takru srefsrefi. Mi o meki doroseisma broko a kondre nanga ala san de na en ini. Mi, MASRA, taki dati.

₁₃Na disi Masra MASRA e taki: Mi o puru den kruktu gado na pasi, den soso gado fu Nof no o de fu si moro. Egipte o de sondro tiriman, èn frede o grabu ala den sma fu a kondre dati hori. ₁₄Mi o broko Patros, sutu Soan na faya, èn strafu den sma fu a mamafoto No. ₁₅Mi o lusu a hebi atibron fu Mi abra Sin, a tranga foto fu Egipte. Ala den srudati ini a foto No Mi o kiri puru na pasi. ₁₆Mi o poti faya ini Egipte, Sin o beifi sote, olo o naki ini a skotu fu No, èn feyanti o teki Nof abra, bigibigi dei. ₁₇Den yongu srudati fu On nanga Pi-Beset o dede ini a bigi feti, èn a feyanti o tyari den sma go na den kondre leki strafuman. ₁₈Gi a foto Takpenas a o tron wan dungru dei, bika na drape Mi o broko a makti fu Egipte. Drape Mi o puru a tranga legre fu den na pasi gi san den e meki bigi so. Wan wolku o tapu Takpenas èn a feyanti o tyari den sma gwe leki strafuman. ₁₉Na so Mi o strafu Egipte, èn den o sabi taki Mi de MASRA.’ ”

₂₀MASRA taki nanga mi ini a di fu erfu yari di un ben de leki strafuman ini Babilon, tapu a fosi dei fu a di fu seibi mun. A taigi mi taki: ₂₁“Manpikin fu libisma, Mi broko a anu fu Farao, a kownu fu Egipte. Yere, no wan sma o poti dresi na en èn tai en fu a kon betre. A anu no o kon tranga baka fu kan hori wan deigri. ₂₂Na disi Masra MASRA e taki: Yere, Mi e tron a feyanti fu Farao, a kownu fu Egipte. Mi o broko den anu fu en, a wan di gesontu nanga a wan di broko, èn Mi o naki a deigri fu en puru na ini en anu. ₂₃Mi o panya den go mindri tra folku nanga ini difrenti kondre. ₂₄Mi o meki den anu fu a kownu fu Babilon kon tranga èn Mi o gi en a deigri fu Mi. Ma Mi o broko den anu fu Farao, èn a o dyeme fesi a kownu fu Babilon leki wan man di kisi wan bun hebi mankeri. ₂₅Iya, Mi e meki den anu fu a kownu fu Babilon kon tranga, ma den anu fu Farao o anga na en sei. Te Mi gi a kownu fu Babilon a deigri fu Mi, èn te a o wai abra Egipte, den sma fu Egipte o sabi taki Mi de MASRA. ₂₆Mi o panya den sma fu Egipte go na mindri tra folku nanga ini difrenti kondre. Dan den o sabi taki Mi de MASRA.”

₁MASRA taki nanga mi ini a di fu erfu yari di un ben de leki strafuman ini Babilon, tapu a fosi dei fu a di fu dri mun. A taigi mi taki: ₂“Manpikin fu libisma, taigi Farao, a kownu fu Egipte, nanga a heri pipel fu en taki: ‘Suma de di bigi leki yu?

₁₅Na disi Masra MASRA e taki: A dei di a bon dati dede èn go ini a grontapu na ondrosei, Mi meki a watra fu dipi ondro a gron low fu a bon ede. Mi tapu a lon di a ben e lon. Mi meki a Libanonbergi low tu fu en ede. Fu en ede tu ala den bon ini a kondre ben angri sote fu watra. ₁₆Den folku o beifi te den yere a babari nanga san a bon fadon. Dan Mi o meki a saka go ini dedekondre, na den di saka go ini a grebi. Ma ala den bon fu Eden di de ini a grontapu na ondrosei, den moro moi wan fu a Libanonbergi, di rutu de na bogobogo watra, den o trowstu densrefi. ₁₇Ala den folku di ben libi ini a kowrupe fu en, den folku di ben hori baka gi en, den tu o saka go ini dedekondre, na den di deigri kiri.

₁₈Egipte, tye, no wan bon fu Eden kan tnapu na yu sei fu a moi di yu moi, nanga fu a bigi di yu bigi. Ma yusrefi o fadon na gron, neleki den tra bon fu Eden, èn saka go ini a grontapu na ondrosei, fu didon na mindri den folku di no e dini Mi, na den di a deigri kiri. Na dati o miti Farao nanga a heri folku fu en, Masra MASRA e taki.’ ”

₁MASRA taki nanga mi ini a di fu twarfu yari di un ben de leki strafuman ini Babilon, tapu a di fu twarfu dei fu a di fu twarfu mun. A taigi mi taki: ₂“Manpikin fu libisma, singi wan dede-oso singi gi Farao, a kownu fu Egipte. Singi gi en taki:

₉A ati fu furu folku o de na dyompo, te kondre di yu no sabi o yere fa Mi puru yu na pasi. ₁₀Iya, Mi o wai nanga Mi deigri fesi furu folku nanga den kownu fu den. Dan den o skreki te fu dede èn den skin o gro, bika den sabi san miti yu. Tapu a dei di yu o fadon den o beifi go nanga langa, iniwan gi en eigi libi. ₁₁Bika na disi Masra MASRA e taki:

₁₇MASRA taki nanga mi tu tapu a di fu tin-na-feifi dei fu a srefi mun fu a srefi yari dati. A taigi mi taki: ₁₈“Manpikin fu libisma, singi wan dede-oso singi gi a pipel fu Egipte, singi en nanga den umasma fu folku di abi bigi makti. Na so un o tyari Egipte go na a grontapu na ondrosei, na den di go ini den grebi kba.

₂₂Asur nanga a heri legre fu en de drape tu, den grebi fu den didon na alasei. Den alamala lasi libi ini a feti, deigri kiri den. ₂₃Den grebi fu den de na bakasei fu a grontapu ondrosei, den de lontu a di fu den kownu. Na den ben e meki sma frede sote ini a kondre fu den libiwan. Now densrefi lasi libi, deigri kiri den.

_24-25Na drape den grebi fu ala den srudati fu Elam de. Den de lontu a di fu den kownu. Den alamala dede ini bigi feti, deigri kiri den. Leki sma di no e dini Gado den saka go ini a grontapu fu ondrosei. Wan pisten na den ben e meki sma skreki te fu dede ini a kondre fu den libiwan. Now den abi fu teki a syen makandra nanga den di ben saka go ini a grebi kba.

₂₆Na drape den grebi fu den srudati fu Mesak-Tubal de. Den grebi fu ala den srudati de lontu a di fu den kownu. Na deigri kiri den alamala, sma di no e dini Gado. Iya, na den ben e meki sma skreki te fu dede na alasei ini a kondre fu den libiwan. ₂₇Den no beri na den dyadya fetiman fu langa di psa. Den di beri nanga den deigri ondro den ede nanga den schild tapu den skin. Na den ben de den dyadya fetiman di ben meki den feyanti fu den skreki te fu dede.

₂₈Ma unu, pipel fu Egipte, unu o didon fu bigi mankeri ede mindri den wan di no e dini Gado, den di deigri kiri.

₂₉Na drape a pipel fu Edom de tu, makandra nanga den kownu nanga den tra tiriman. Awinsi fa den ben tranga den didon now sei den wan di deigri kiri. Densrefi didon now na den wan di no e dini Gado, na den di saka go ini a grebi.

₃₀Na drape ala den tiriman fu noordsei, nanga ala den sma fu Sidon de tu. Na den wan di dede ini bigi feti den saka go, nanga syen, awinsi na den ben meki sma skreki te fu dede gi a makti di den ben abi. Den didon drape, den di no ben e dini Gado, nanga den di deigri kiri èn den e tyari den syen na den di ben saka go ini a grebi kba.

₃₁Te a Farao si den a o de wan trowstu gi en fu a lasi di a lasi a heri folku fu en. Owktu a Farao nanga a legre fu en sa lasi den libi, Masra MASRA e taki. ₃₂Na Mi ben meki a Farao skreki sma te fu dede ini a kondre fu den libiwan. Ma now en nanga a folku fu en o didon na mindri fu den wan di no ben e dini Gado, nanga mindri den di deigri kiri, Masra MASRA e taki.”

₁Fu di Kristus nyan pina leki libisma, dan unu srefi mus de klar'klari tu gi dati. Bika a sma di teki pina leki libisma, tapu nanga sondu. ₂Dan so a no o libi moro fa en ati firi, ma ini a ten san a abi fu libi ete, a o libi leki fa Gado wani. ₃Bika un libi nofo leki fa den sma di no sabi Gado e libi. Un ben e libi wan yayolibi, èn un ben e du san un ati ben e firi fu du. Un ben e dringi drungu, un ben e gi fesa nomo, èn un ben e du ala sortu takru afkodrei. ₄Den sma di no sabi Gado no man ferstan taki un no wani libi a srefi doti libi disi moro nanga den. Dat' meki den e taki takru fu unu. ₅Ma den o abi fu gi frantwortu na a Wan di tnapu klar'klari fu krutu den libiwan nanga den dedewan. ₆Bika na fu dat'ede den dedewan yere a bun nyunsu tu. Leki libisma den ben mus kisi strafu na libisma fasi, ma gi Gado den e libi na yeyefasi.

₇A kba fu ala sani de krosbei. Dat' meki un mus kisi unsrefi. Un mus de na un krin ferstan fu un kan begi. ₈A moro prenspari sani na taki un lobi makandra tranga, bika lobi e tapu furu sondu. ₉Un mus opo un oso gi makandra, sondro fu knoru. ₁₀Ibri sma mus dini den trawan nanga a presenti di Gado gi en, leki sma di e wroko bun nanga den difrenti sortu presenti di Gado gi wi. ₁₁Efu wan sma e tyari wan wortu, meki a de so taki a wortu e kon fu Gado srefi. Efu wan sma e dini trawan, meki a de so taki a e dini nanga a krakti san Gado gi en. Disi o meki tak' fu Yesus Kristus ede, Gado o kisi grani fu ala sani. Na En mus kisi ala grani nanga ala krakti fu têgo èn ala ten! Amen.

₁₂Lobiwan, un no mus ferwondru fu a bigi tesi di e miti unu, neleki na wan spesrutu sani psa nanga unu. ₁₃Ma o moro un e teki prati ini a pina fu Kristus, o moro un mus breiti. Dan un sa breiti srefsrefi tapu a dei di A o sori En glori. ₁₄Unu na blesi sma efu un e nyan pina fu a nen fu Kristus ede. Bika a Yeye fu Gado, di de a Yeye fu glori, de na un tapu. ₁₅Sorgu taki no wan fu unu abi fu nyan pina leki wan kiriman, leki wan fufuruman, leki wan abani, noso fu di a e bemui na ini tra sma tori. ₁₆Ma efu wan fu unu e nyan pina fu di a de wan Kristensma, dan a no abi fu firi syen. Ma meki a gi Gado grani fu di a e tyari a nen disi.

₁₇Bika a ten fu krutu doro kba, èn a o bigin na ini a oso fu Gado. So efu a e bigin na wi fosi, dan fa a sa waka nanga den sma di no wani bribi a bun nyunsu fu Gado? ₁₈Efu nanga muiti Gado e ferlusu den sma di bun ini En ai, san o psa dan nanga den sma di no e dini Gado èn nanga den wan di e sondu? ₁₉Dat' meki den sma di mus nyan pina fu di Gado wani dati, mus tan du san bun èn den mus poti den libi ini anu fu Gado. Na En meki den èn A de fu fertrow.