Dag 338 van 365- Ezechiël 47-48 en 1 Johannes 3

₁Baka dati a man tyari mi go baka na a doromofo fu a oso fu Masra. We, mi si watra drape di ben e lon kmopo ondrosei fu a stupu. A ben e bigin lon na zuidsei fu a oso fu Masra, a ben e psa sei a altari, psa tapu a tempel dyari go na oostsei. ₂A man tyari mi waka na a doro fu noordsei tyari go na dorosei fu a tempeldyari pe wi beni go na a doro fu oostsei. We, mi si a watra drape e lon na zuidsei fu a doro dati. ₃Dan a man waka go na oostsei, èn nanga a markitiki fu en a marki feifi hondro meter go ini watra. Dan a taigi mi fu waka ini a watra go pe a ben marki. A watra drape ben doro na den enkel fu mi. ₄A man marki feifi hondro meter go moro fara dan a taigi mi fu psa ini a watra go drape. A watra drape doro na den kindi fu mi. A man marki ete feifi hondro meter èn a meki mi psa ini a watra go drape tu. A watra drape doro now te na mi bere. ₅Dan a man marki ete feifi hondro meter. Ma a watra ben kon tron wan liba now pe mi no ben wan waka moro. A ben kon so hei dati na swen nomo sma ben kan swen psa drape. ₆Ne a man taigi mi taki: “Manpikin fu libisma, luku bun san yu si.” Dan a meki mi waka na a syoro go baka na en. ₇Di mi doro na en, we, mi si bun furu bon na den syoro fu a liba.

₈Dan a man taigi mi taki: “A watra disi e lon psa na oostsei go na a bigi lagi presi fu a Yordanliba. Fu drape a e fadon go ini a Dede Se. Èn te a lon go ini a se a e meki a sowtu watra fu en kon gesontu. ₉Bun furu fu ala sortu libi sani nanga fisi o de ala presi pe a watra disi e lon go, bika a o tyari libi nanga bun krin watra gi a Dede Se. ₁₀Sma sa tnapu na a syoro fu a se e fanga fisi, fu Engedi go te na En-Eglaim, èn presi o lai drape pe den e drei den net fu den. Bun furu fu ala sortu fisi o lai ini a se dati, neleki fa den lai ini a Bigi Se. ₁₁Ma den kriki nanga den tra presi pe a watra fu a se e go sidon no o gesontu. Den o tan sowtu fu sma kan kebroiki a sowtu fu den. ₁₂Ala sortu froktubon o gro na den tu syoro fu a liba. Den wiwiri fu den no o flaw èn froktu no o kba na den, ma den o tyari froktu ala mun. Dati o de so fu di a watra e kmopo fu a santa presi. Den froktu fu den bon o bun fu nyan èn den wiwiri fu den o bun leki dresi.”

₁₃Na disi Masra MASRA e taki: Na so den kbapisi mus waka fu a kondre di un o prati gi den twarfu lo fu Israel gi densrefi. A lo fu Yosef mus kisi tu pisi. ₁₄Un kisi en gi unsrefi, iniwan fu unu, a kondre di Mi ben pramisi den afo fu unu nanga wan sweri. A kondre sa de fu unu.

₁₅Disi na den kbapisi fu a kondre na noordsei: A e waka fu a Bigi Se langalanga psa Hetlon te go miti Sedad. ₁₆Dan a e hari psa Hamat, Berota nanga Sibriam, di didon mindri den kontren fu Damaskus nanga Hamat, go miti Kaser-Hatikon na a kbapisi fu Hauran. ₁₇Sobun a kbapisi e waka fu a se go na Kasar-Enon. Noordsei fu en na den kontren fu Damaskus nanga Hamat. Dati na a kbapisi fu a kondre na noordsei.

₁₈A kbapisi fu oostsei e waka mindri Hauran nanga Damaskus, mindri Gilead nanga Israel, langalanga psa na a Yordanliba go te na a Dede Se krosbei fu a foto Tamar. Dati na a kbapisi fu a kondre na oostsei.

₁₉A kbapisi fu zuidsei e waka fu Tamar te go miti den watra fu Meribat-Kades, psa na a kriki, èn go doro na a Bigi Se. Dati na a kbapisi fu zuidsei.

₂₀A kbapisi fu westsei e waka fu a Bigi Se go te pe a pasi go na Hamat e bigin. Dati na a kbapisi fu westsei.

₂₁Na a kondre disi un leki den twarfu lo fu Israel mus prati nanga makandra. ₂₂Dan te un o fringi a lot fu sori suma o kisi pe, un no mus fergiti den doroseisma di e libi èn di kisi pikin na un mindri. Un mus si den leki den gebore leki Israelitisma. Neleki unu den mus kisi gron tu pe den difrenti lo e kisi. ₂₃Na a lo pe den leki doroseisma e libi den sa kisi wan pisi gi densrefi, Masra MASRA e taki.

_1-7Iniwan fu den lo di nen un o kari dyaso o kisi wan pisi fu a kondre di e waka fu a kbapisi fu oostsei go na a Bigi Se. A kbapisi na noordsei e waka psa den foto Hetlon nanga Lebo-Hamat, èn a e tapu na Hasar-Enon, di na a kbapisi di de mindri den bigi foto Damaskus nanga Hamat. Den lo di o kisi wan pisi fu a kondre, a wan sei a trawan, fu noordsei go na zuidsei, na: A lo fu Dan, a lo fu Aser, a lo fu Naftali, a lo fu Manase, a lo fu Efraim, a lo fu Ruben nanga a lo fu Yuda.

₈A pisi di un mus hori aparti de sei a pisi fu a lo fu Yuda, fu oostsei go na westsei. A pisi dati bradi twarfu nanga afu kilometer èn a langa leki den tra pisi di e waka fu oostsei go na westsei. A santa presi sa de leti na mindrisei fu a pisi dati. ₉A pisi di un mus gi MASRA langa twarfu nanga afu kilometer èn a bradi tin kilometer. ₁₀A santa pisi dati na fu den grupu sma disi: Den priester. Na noordsei a pisi fu den sa langa twarfu nanga afu kilometer, na westsei a sa bradi feifi kilometer, na oostsei a sa bradi feifi kilometer, èn na zuidsei a sa langa twarfu nanga afu kilometer. A santa presi fu MASRA sa de leti na mindrisei fu a pisi disi. ₁₁A santa pisi sa de gi den priester, den wan fu a famiri fu Sadok, di tan du a wroko ini a santa presi. Den wan di no gwe libi Mi, leki fa den Lefitisma ben du, a ten di den Israelitisma ben gwe libi Mi. ₁₂Inisei fu a pisi di un gi den e kisi wan pisi di santa srefsrefi. A de sei a di fu den Lefitisma.

₁₃Den Lefitisma e kisi wan pisi leti sei a di fu den priester èn a bigi a srefi. Fu oostsei go na westsei a langa twarfu nanga afu kilometer, èn fu noordsei go na zuidsei a bradi feifi kilometer. Sobun a heri pisi langa twarfu nanga afu kilometer èn a bradi feifi kilometer. ₁₄Den no abi primisi fu seri noso kenki no wan pisi fu a kondre. Na a moro bun pisi fu a kondre èn na Mi abi en.

₁₅San libi fu a pisi dati, wan pisi di langa twarfu nanga afu kilometer èn di bradi dri kilometer, no santa. A pisi dati na fu meki a foto Yerusalem gi Israelitisma fu den libi, èn gi weigron. A foto sa de leti mindri fu a pisi dati. ₁₆A foto sa de wan fokanti: noordsei sa de tu kilometer, zuidsei tu kilometer, oostsei tu kilometer, nanga westsei tu kilometer. ₁₇A foto mus abi wan pranigron na en lontu di mus bradi wan hondro tutenti-na-feifi meter. ₁₈Den pisi di e libi na oostsei nanga westsei, èn di kbapisi de na a santa pisi, langa feifi kilometer. Den sa de pranigron gi den sma di e wroko ini a foto. ₁₉Na den sma fu ala den lo fu Israel di e wroko ini a foto sa wroko a pranigron disi. ₂₀A heri kontren di un gi Mi, makandra nanga a pisi fu a foto, sa de wan fokanti èn iniwan fu den sei sa langa twarfu nanga afu kilometer.

₂₁A pisi di o libi na ala den tu sei fu a pisi di un gi Mi, nanga a pisi fu a foto na fu a tiriman: na oostsei nanga na westsei a pisi dati bradi twarfu nanga afu kilometer èn a e waka makandra nanga den kontren fu den lo. A santa pisi nanga a oso fu Masra sa de na mindrisei fu en. ₂₂Boiti a eigi gron fu den Lefitisma nanga a eigi gron fu a foto, di de leti mindrisei fu a kontren fu a tiriman, ala a gron mindrisei fu a kontren fu a lo fu Yuda nanga fu a lo fu Benyamin, na fu a tiriman.

_23-27A pisi fu a kondre gi den tra lo fu Israel sa de zuidsei fu a pisi di un gi Mi. Iniwan fu den lo dati sa kisi wan pisi fu a kondre di e waka fu a kbapisi na oostsei fu Israel go na Bigi Se na westsei. Den lo di o kisi den pisi fu a kondre, a wan sei a trawan, fu noordsei go na zuidsei, na: a lo fu Benyamin, a lo fu Simeon, a lo fu Isakar, a lo fu Sebulon nanga a lo fu Gad. ₂₈A kbapisi fu a kontren fu a lo fu Gad na owktu a kbapisi fu a heri kondre. A o bigin na a foto Tamar, dan a o go na zuidwestsei na den watrabron krosbei fu Meribat-Kades, fu drape a o psa sei a kriki na a kbapisi nanga Egipte, fu kon doro na a Bigi Se. ₂₉Disi na a kondre di un mus prati mindri den lo fu Israel. Un mus meki a lot sori un suma mus kisi pe, Masra MASRA e taki.

_30-34A foto Yerusalem sa abi twarfu doro, dri na ibriwan fu den fo sei fu a skotu. Den twarfu doro disi sa nen leki fa den twarfu lo fu Israel nen. Den doro di e tyari den nen fu Ruben, Yuda nanga Lefi, sa de na a noordsei. Den di e tyari den nen fu Yosef, Benyamin nanga Dan sa de na oostsei. Den di e tyari den nen fu Simeon, Isakar nanga Sebulon sa de na zuidsei. Nanga den di e tyari de nen fu Gad, Aser nanga Naftali sa de na westsei. Iniwan fu den fo sei fu a skotu fu a foto sa langa tu kilometer,

₃₅A heri skotu langa aiti kilometer.

A nyun nen fu a foto sa de: MASRA de drape.

₇Mi pikin, un no meki no wan sma kori unu. A sma di e du san bun ini Gado ai, de leki fa Kristus de. ₈Ma a sma di e tan du sondu, na fu didibri, bika sensi na a bigin didibri sondu. Ma a Manpikin fu Gado ben kon na grontapu fu wai den wroko fu didibri puru. ₉Ibri sma di kon tron wan pikin fu Gado, no e tan du sondu, bika a krakti fu Gado di e gi libi, de ini en. A no man tan du sondu bika a de wan pikin fu Gado. ₁₀Na so yu kan sabi suma na den pikin fu Gado èn suma na den pikin fu didibri. A sma di no e du san bun ini Gado ai, ma owktu a sma di no lobi en brada, no de fu Gado.

₁₁Disi na a boskopu san un ben yere sensi na a bigin, taki wi mus lobi makandra. ₁₂Un no mus de leki Kain, di ben de fu didibri èn di kiri en brada. Fu sanede a kiri en brada dan? Na fu di a ben e du kruktu sani, ma en brada ben e du san bun ini Gado ai. ₁₃Brada nanga sisa, un no mus ferwondru efu sma fu grontapu no man si un na ai. ₁₄Wi sabi taki wi kmoto fu dede kon ini a libi, fu di wi lobi tra bribisma. A sma di no abi lobi, e tan dede. ₁₅A sma di no man si wan tra bribisma na ai, na wan kiriman. Èn un sabi taki no wan kiriman abi a libi fu têgo ini en. ₁₆A dede di Kristus dede gi wi, meki wi kon sabi san na lobi. Dat' meki wi srefi mus de klar'klari fu dede gi tra bribisma. ₁₇Efu wan sma si taki wan tra bribisma e pina, ma a no abi sari-ati nanga en aladi a abi nofo fu libi, dan fa a lobi fu Gado e tan ini en?

₁₈Mi pikin, wi no mus taki nanga mofo wawan tak' wi lobi trawan, ma wi mus du sani tu di e sori dati trutru. ₁₉Na so wi o sabi taki wi sabi a tru leri, èn wi o man tnapu sondro frede na Gado fesi, ₂₀awinsi wi konsensi e krutu wi. Bika Gado bigi moro wi konsensi, èn A sabi ala sani. ₂₁Lobiwan, efu wi konsensi no e krutu wi, dan wi o abi dek'ati te wi tnapu na Gado fesi. ₂₂Wi o kisi ala sani san wi e aksi fu En, fu di wi e hori wisrefi na den gebod fu En, èn fu di wi e du san A lobi. ₂₃Disi na a gebod fu Gado: Wi mus bribi ini a nen fu En Manpikin Yesus Kristus, èn wi mus lobi makandra leki fa A taigi wi taki wi mus fu du. ₂₄A sma di e hori ensrefi na den gebod fu Gado, e tan wan nanga Gado èn Gado e tan wan nanga en. Èn wi sabi taki A e tan wan nanga wi, bika A gi wi a Santa Yeye.