Dag 347 van 365- Hosea 12-14 en Openbaring 4

₁Nanga soso lei Efraim kon na Mi tapu, a folku fu Israel kon nanga bedrigifasi na Mi. Yuda e tan libi wan hurulibi na fesi Gado nanga a Santa Wan di de fu fertrow. ₂Efraim e lon baka soso sani, heri dei a e lon baka a oostenwinti. Den lei fu en nanga den ogri di a e du e kon moro furu dei fu dei. Den e meki ferbontu nanga Asur, den e tyari oli go na Egipte. ₃MASRA e tyari Yuda go na krutu. A o strafu Yakob fu a fasi fa a e libi. A o strafu en fu den sani di a du. ₄Ini en mamabere a ben bedrigi en brada, di a ben kon tranga leki wan man a feti nanga Gado. ₅A feti nanga wan engel dan a wini. A krei èn a begi Gado fu sori en a bun-ati fu En. Dan Gado miti nanga en na Betel. Drape Gado taki nanga unu. ₆MASRA fu ala sani. MASRA, na En nen. ₇Dat' meki un mus drai kon na un Gado baka. Du sani nanga lobi nanga tapu wan leti fasi, èn tan wakti na tapu un Gado.

₈Kanaan e bedrigi sma te den e bai noso seri sani. A lobi fu pina trawan. ₉Efraim e taki: “Fu tru, mi kon gudu, mi kon abi furu gudu. Ma nanga ala a gudu di mi abi, no wan kruktudu no de fu feni na mi di sma kan kari sondu.” ₁₀Ma Mi na MASRA, un Gado, sensi na Egipte. Mi sa meki un libi na ini tenti baka leki a ten di un ben e konmakandra. ₁₁Mi sa taki nanga den profeiti. Mi sa meki den si furu sani. Mi sa meki den profeiti taki nanga unu na ini agersi tori. ₁₂Gilead di ben de so wan ogri foto, no de notinoti moro. Den ben tyari furu bulu na ini Gilgal leki ofrandi, ma den altari fu den sa tron ipi ston na a lantyi fu den pranigron.

₁₃Yakob ben lowe go na Aram. Fu wan uma ede Israel ben tan wroko. A ben e hori ai na tapu den meti fu wan uma. ₁₄MASRA meki wan profeiti tyari Israel kmoto na ini Egipte. A meki wan profeiti luku den.

₁₅Nanga den sani di Efraim du a afrontu Gado. Ma MASRA sa meki a gi frantwortu fu a brudu di a ben meki lon. A sa strafu den fu a syen di den gi En.

₁Ala sma ben e frede, te Efraim ben e taki. Den ben abi bigi lespeki gi en na ini Israel. Ma a meki wan fowtu fu go dini Baal, dan a dede gwe. ₂Te nanga now den e tan sondu. Den e safu a solfru dan den e meki popki fu en. Afkodreipopki, leki fa densrefi wani en. A wroko fu sma di sabi du den wroko disi. Na fu den sma e taki: Den sma di e tyari ofrandi e bosi den yongu kaw. ₃Dat' meki den o gersi a dow di e de te mamanten, leki a dow di e gwe es'esi te fruku mamanten, leki buba di e wai gwe fu a presi pe den e masi a buba puru na a graan, leki smoko di e kmoto na ini wan fensre.

₄Ma Mi na MASRA, un Gado, sensi na Egipte. Un no sa dini wan tra gado boiti Mi, èn boiti Mi no wan trawan de di e ferlusu unu. ₅Mi ben sorgu gi unu di un ben de ini a dreisabana, ini wan drei kondre. ₆Di den doro na bun gron, den nyan te den bere furu. Ma di den bere furu, den kisi bigi fasi dan den drai den baka gi Mi. ₇Dat' meki Mi e du now leki wan lew, Mi e sidon luru sei a pasi leki wan tigri. ₈Mi e lon kon na den tapu leki wan uma beer di lasi en pikin. Mi e priti den borsu opo, Mi e swari den leki wan uma lew. Krasi meti o priti den.

₉Sani no o waka bun gi yu, Israel, fu di yu drai yu baka gi Mi, yu Yepiman. ₁₀Pe a kownu fu yu de? A wan di bo ferlusu yu di bo luku den foto fu unu fu noti no miti den. Pe den tiriman fu unu de? Un di ben aksi taki: Gi un wan kownu, gi un tiriman. ₁₁Nanga atibron Mi o gi un wan kownu, ma nanga atibron Mi o teki en baka.

₁₂Den kruktudu fu Efraim kibri bun den sondu fu en poti bun gwe na wan sei. ₁₃Tranga bere-ati ben e go na fesi fosi a kon gebore. Ma en na wan don pikin. Te a ten fu en doro, a no man feni a pasi fu kon na doro. ₁₄Fu sanede Mi bo ferlusu den dan fu den no dede? Noso puru den na ini dedekondre? Dede, pe den takru siki fu yu de? Dedekondre, pe a pori fu yu de? Mi no sa abi sari-ati moro. ₁₅Awinsi a e gro so moi na mindri den brada fu en. MASRA o meki a winti fu En, wan winti fu oostsei wai kmoto fu a dreisabana. A o meki ala den peti fu en kon drei no wan watrabron o abi watra moro. Dan den o kon fufuru ala den gudu fu en.

₁Samaria mus butu, fu di a kaka en futu gi en Gado. Feti owru o kiri den. Den o naki den pikin fu den kiri. Den o priti a bere opo fu den uma di de nanga bere.

₂Drai kon baka Israel, drai kon na MASRA, yu Gado. Bika na den kruktudu fu yu meki yu fadon. ₃Kon, dan yu e taki sortu sondu yu du. Drai kon na MASRA, dan yu e aksi En taki: “Gi wi pardon fu den kruktudu fu wi, sori wi Yu bun-ati. Teki den wortu di wi taki leki bulu di wi tyari kon leki ofrandi. ₄Asur no o man ferlusu unu. Wi no sa bow moro tapu asi. Wi no sa taigi den sani moro di wi meki nanga wi eigi anu taki: yu na wi gado. Bika na Yu e sori den pikin di no abi papa nanga mama moro Yu bun-ati.”

₁₀Meki a sma di srapu, prakseri bun sa mi taki. Meki a sma di koni, taki efu a no so a de. Bika MASRA e du sani tapu wan leti fasi. Den sma di bun ini Gado ai e libi leki fa En wani, ma den sma di no wani libi leki fa En wani e stotu den futu fadon.

₁Baka den sani disi, mi luku, dan mi si wan opo doro na ini heimel. Dan mi yere a fosi sten baka di gersi a babari fu wan tutu. A taigi mi taki: “Kon dya na loktu, dan mi sa sori yu san musu psa bakaten.” ₂Wantron so a Yeye fu Gado ben de na mi tapu. Ne mi si wan kownusturu na ini heimel nanga wan Sma na en tapu. ₃Di mi luku a sma di ben sidon na tapu a kownusturu, a ben brenki leki dyamanti nanga sardiyus. Lontu a kownusturu yu ben abi wan alenbo san ben brenki leki smaragd. ₄Lontu a kownusturu, yu ben abi ete tutenti-na-fo tra kownusturu. Na tapu ibriwan fu den, wan fesiman ben sidon di ben weri weti krosi, èn den ben abi wan gowtu kroon tapu den ede. ₅Faya ben e koti kmopo fu a kownusturu, sten ben de fu yere, èn dondru ben e bari. Seibi frambo ben e bron na fesi a kownusturu, dati na den seibi Yeye fu Gado. ₆Fesi a kownusturu yu ben abi wan sani leki wan se. A gersi leki a ben meki fu grasi san e brenki krin leki fa kristal e brenki.

Na mindrisei, lontu a kownusturu, yu ben abi fo libilibi sani. Fu fes'sei nanga bakasei den ben lai nanga soso ai. ₇A fosiwan ben gersi wan lew. A di fu tu ben gersi wan kaw. A di fu dri ben abi wan fesi leki wan libisma, èn a di fu fo ben gersi wan gonini san e frei. ₈Ala den fo libilibi sani ben abi siksi frei, èn den heri skin ben lai nanga soso ai. Dei nanga neti den e tan taki: “Masra Gado, A santa, A santa, A santa. Na En abi ala makti. Na En ben de, na En de, èn na En sa kon.” ₉Ala leisi te den fo libilibi sani e gi grani, bigi nen nanga tangi na a Wan di e libi fu têgo èn ala ten, èn di e sidon na tapu a kownusturu, ₁₀dan den tutenti-na-fo fesiman e fadon tapu den kindi na fesi a Wan di e sidon na tapu a kownusturu. Den e anbegi a Wan di e libi fu têgo èn ala ten. Den e trowe den kroon gi En na fesi a kownusturu, èn den e taki: ₁₁“Wi Masra nanga wi Gado, na Yu warti fu kisi grani, bigi nen nanga makti. Bika na Yu ben meki ala sani. Na fu di Yu ben wani ala den sani disi sa de, meki Yu meki den.”