Dag 350 van 365- Amos 4-6 en Openbaring 7

₁“Uma fu Samaria un arki. Un di gersi den kaw fu Basan, un di e libi tapu a bergi fu Samaria. Un e pina den swakiwan èn un e trapu den pôtiwan dan un e taigi den man fu unu taki: ‘Tyari wan sani fu dringi gi mi.’ ₂MASRA fu Masra sweri soleki fa A tru taki A santa, taki: Fu tru, luku, den dei e kon taki nanga uku den o hari un kon na loktu. Nanga aka den o hari den wan di ben tan na baka. ₃Wan baka trawan den o pusu unu psa na den bigi olo di den meki ini den skotu, kon na doro. Dan den o tyari un go na Haharmon. Na disi MASRA taki.

₄Un kon na Betel, kon du den sondu fu unu. Un kon du moro furu na Gilgal. Un tyari un meti kon mamanten di un o srakti leki ofrandi. Un tyari un tin prosenti tapu a di fu dri dei. ₅Un tyari wan ofrandi nanga brede di meki nanga dyesi. Un meki bigi taki un e gi ofrandi nanga wan fri wani. Bika na so un lobi fu du, sma fu Israel. Na disi MASRA fu Masra taki. ₆Na Mi meki taki noti ben de fu nyan ini den foto fu unu. Mi meki taki no wan presi pe un e tan brede ben de fu feni. Ma ala di mi du dati un no drai kon baka na Mi, MASRA taki. ₇Na Mi meki taki alen tapu fu fadon dri mun fosi un ben o koti nyanyan. Mi ben e meki alen fadon ini a wan foto, ma a no ben e fadon ini a trawan. Alen ben e nati a wan gron, ma a no ben e nati a trawan, dan a dati drei gwe. ₈Tu noso dri foto ben e srepi densrefi go na wan trawan fu feni pikin watra fu dringi. Ma watra ben e tan kiri den. Ala di Mi du dati un no drai kon na Mi, MASRA taki. ₉Mi meki siki pori a nyanyan ini den gron fu unu. Mi meki den dyari nanga den droifidyari fu unu drei gwe èn Mi meki sprenka nyan den figabon nanga den oleifbon fu unu. Ma ala di Mi du dati un no drai kon na Mi, MASRA taki. ₁₀Mi seni wan takru siki gi unu, leki fa Mi ben du na Egipte. Mi kiri den srudati fu unu nanga den asi di den ben wini ini a feti. Mi meki taki un ben man smeri a tingi fu a kampu fu unu. Ma ala di Mi du dati un no drai kon baka na Mi, MASRA taki. ₁₁Mi figi wantu fu un puru, leki fa Mi ben figi Sodom nanga Gomora puru. Un ben kon gersi wan pisi bron udu di den hari puru na ini faya. Ala di Mi du dati un no drai kon baka na Mi, MASRA taki. ₁₂Fu dat'ede Mi o du disi nanga yu, Israel. Bika na fu di na Mi o du disi nanga yu Israel, yu mus meki yusrefi klari fu miti nanga yu Gado.

₁Israel, arki san mi abi fu taki, arki a dede-oso singi di mi o singi gi yu.

₁₀Den no wan si den sma srefsrefi na ai di e tnapu na den bigi doro fu a foto fu taki tak' sani mus psa tapu wan leti fasi. Den no lobi den sma srefsrefi di e taki sani soleki fa den de. ₁₁Dat' meki, na fu di un e trapu den swakiwan, na fu di yu e puru a karu fu en na en anu, yu no sa tan libi ini den ston oso fu unu di un bow èn un no sa dringi fu den droifibon di un prani so moi ini den droifidyari fu unu. ₁₂Bika Mi sabi o furu sani un du di no bun èn Mi sabi o furu den sondu fu un de. Unu di e pina den sma di e du sani nanga leti, unu di e meki sma pai un ondro tafra, èn di e puru a leti na den pôtisma anu te krutu e hori. ₁₃Dat' meki den koniwan e hori den mofo a ten disi, bika na wan tumsi ogri ten.

₁₄Un suku den bun sani, no suku a ogri, fu un kan libi. Dan MASRA, a Gado fu ala sani, sa de nanga unu, leki fa un e taki. ₁₅Un no mus lobi den ogri sani, ma un mus lobi den bun sani. Dan kande MASRA, a Gado fu ala sani, sa sori sari-ati na den bakapikin fu Yosef di tan abra. ₁₆Fu dat'ede MASRA, a Gado fu ala sani, Masra e taki: Den sa row tapu ala pren. Den sa krei na ini ala strati èn den sa taki: kari den man di e prani gron fu kon krei, kari den sma di sabi dede-oso singi fu den kon singi. ₁₇Na ini den droifidyari srefi krei sa de fu yere te Mi o psa na un mindri. So MASRA taki.

₁₈Den sma di e angri fu a dei fu MASRA kon, mus luku bun. Bika a dei fu MASRA no o tyari leti gi unu, ma dungru. ₁₉A o gersi wan sma di e lon gi wan lew, dan wan beer grabu en. Te a doro oso, dan a tnapu nanga en anu na a skotu, wan sneki e beti en. ₂₀Bika a dei fu MASRA o de wan dungru dei, sondro faya. A o dungru srefsrefi, no wan pikin faya o de fu si.

₂₁Mi no lobi den fesa fu unu srefsrefi. Mi e fisti fu den èn Mi no wani si den konmakandra fu unu. ₂₂Iya, Mi no abi prisiri ini den meti di un e bron leki ofrandi gi Mi nanga den graan-ofrandi. Mi no e luku den pikin skapu na wan ai, di un kweki spesrutu fu tyari leki freide-ofrandi. ₂₃Un kmoto nanga a babari fu den singi fu unu na Mi tapu. Mi no wani yere fa un e prei den harp. ₂₄A ben o moro bun efu un ben e meki taki sani e tan psa tapu wan leti fasi èn un mus tan du sani fa den mus du, leki wan liba di no e tapu fu lon.

₂₅Israel, fotenti yari langa un ben kiri meti leki ofrandi gi Mi èn un ben tyari graan-ofrandi gi Mi ini a sabana. ₂₆Ma un ben tyari den popki tu di unsrefi ben meki fu un kownu Sikut nanga fu Kewan, a gado fu unu fu den stari. ₂₇Fu dat'ede Mi o meki den tyari un gwe leki srafu psa Damaskus. Na disi MASRA taki. A Gado fu ala sani, na En nen.

₁Un mus luku bun, sma fu Sion, unu di e libi sondro fu broko un ede nanga wan sani, unu di e denki taki noti no man miti unu tapu a bergi fu Samaria. Un mus luku bun, unu, fesiman fu a moro bun folku di de, pe a folku fu Israel e kon. ₂Un hari go na Kalne go luku. Fu drape un mus go na a bigi foto Hamat, dan baka dati un mus go na a foto Gat fu den Filistijnsma. Taigi Mi efu un tranga moro den kondre nanga den kownu dati. A kondre fu den bigi moro di fu unu. ₃Un mus luku bun! Un di denki taki a ogri dei de fara ete fu kon, ma dan unsrefi e meki a ogri rigeri na un mindri. ₄Un mus luku bun! Un di didon tapu un bedi di meki fu ivoor, un di e hari lesi fu unu tapu un sribipe, unu di e nyan den moro bun pikin skapu nanga den moro fatu pikin kaw. ₅Un e singi trangatranga te un e prei tapu den harp, dan e prakseri taki un e prei moro betre moro David srefi. ₆Un e dringi win ini bigi komki èn un e wrifi den moro bun oli gi un skin. Ma un no e span srefsrefi taki den bakapikin fu Yosef o dede gwe. ₇Fu dat'ede, un sa de den fosiwan di den o tyari gwe leki srafu na tra kondre. Un o kba meki prisiri èn hari lesi.

₈MASRA fu Masra sweri na Ensrefi. Na so MASRA, a Gado fu ala sani taki: Mi skin e gro fu a heimemre fu den bakapikin fu Yakob. Mi no lobi den oso fu den kownu fu den srefsrefi. Iya, Mi o meki den tyari a foto gwe nanga ala sani di de na ini. ₉Awinsi na tin sma nomo tan abra na ini wan oso, den no sa tan na libi tu. ₁₀Te wan famiri teki a dedeskin fu go bron en, a sa aksi a sma di de ini a oso ete taki: “Wan sma de nanga yu ini a oso ete?” Dan a sma ini a oso sa piki en taki: “Nono, ma tan tiri. No kari a nen fu MASRA.” ₁₁Bika taki wawan MASRA kan taki dan ala oso, bigiwan nanga pikinwan, sa naki broko te na gron.

₁₂Asi no e lon abra bergiston. Sma no e meki kaw drai gron fu den bergi tu, fu di a lai nanga ston. Ma un dati meki taki den tru sani tron sani di e kiri sma èn taki den bun sani e abi wan bita tesi na ini sma mofo. ₁₃Un e prisiri fu di un wini a feti nanga a foto Lo Debar èn un e taki tak' nanga un eigi krakti un teki Karnaim abra. ₁₄Fu tru, na so MASRA, a Gado fu ala sani taki: Israel, arki, Mi o seni wan folku kon na un tapu, di o pina unu fu Hamat go te na a Arabakriki.

₁Baka dati mi si fo engel tnapu na den fo uku fu grontapu. Den ben e hori a winti san ben mus wai kmopo fu den fo uku, fu no wan dropu winti wai abra grontapu, abra a se, èn a no ben mus wai den bon tu. ₂Dan mi si wan tra engel opo kon fu a sei pe a son e opo, nanga a stampu fu a libilibi Gado. A bari nanga tranga sten gi den fo engel di ben kisi makti fu du ogri nanga grontapu nanga a se, taki: ₃“Un no du noti nanga grontapu, a se, noso den bon, te leki wi poti a stampu fu wi Gado na tapu a fes'ede fu den knekti fu En.”

₄Dan mi yere omeni sma kisi a stampu: a ben de wan hondro nanga fotenti-na-fo dusun sma, èn den ben kmopo fu ala den lo fu a folku Israel. ₅Fu iniwan fu den twarfu lo fu Israel yu ben abi twarfu dusun sma di ben kisi a stampu. Fu a lo fu Yuda twarfu dusun sma, fu a lo fu Ruben twarfu dusun sma, fu a lo fu Gad twarfu dusun sma, ₆fu a lo fu Aser twarfu dusun sma, fu a lo fu Naftali twarfu dusun sma, fu a lo fu Manase twarfu dusun sma, ₇fu a lo fu Simeon twarfu dusun sma, fu a lo fu Lefi twarfu dusun sma, fu a lo fu Isakar twarfu dusun sma, ₈fu a lo fu Sebulon twarfu dusun sma, fu a lo fu Yosef twarfu dusun sma, èn fu a lo fu Benyamin twarfu dusun sma.

₉Baka dati mi luku, dan mi si wan bigi grupu sma di no wan sma ben kan teri, e tnapu na fesi a kownusturu nanga a Lam. Den ben kmopo fu ala kondre nanga ibri lo, èn fu ibri folku nanga tongo. Den ben weri weti krosi, èn den ben abi palmtaki na ini den anu. ₁₀Den bari nanga tranga sten taki: “Na wi Gado di sidon tapu a kownusturu, nanga a Lam, na den ben ferlusu wi.” ₁₁Ala den engel ben e tnapu lontu a kownusturu, nanga den fesiman nanga den fo libilibi sani. Den trowe densrefi langalanga na gron fesi a kownusturu. Dan den anbegi Gado ₁₂taki: “Amen! A nen fu wi Gado mus opo! Ala grani nanga sabi, tangi nanga bigi nen, makti nanga krakti, na fu wi Gado fu têgo èn ala ten! Amen.”

₁₃Dan wan fu den fesiman aksi mi taki: “Yu sabi suma na den sma disi di weri weti krosi, èn fu pe den kmopo?” ₁₄Mi piki taki: “Masra, mi no sabi, ma yu sabi.”

Dan a fesiman piki mi taki: “Den sma disi na den sma di kmopo fu a bigi pina san kon na grontapu. Den ben wasi den krosi ini a brudu fu a Lam fu den kon weti. ₁₅Dat' meki den e tnapu na fesi a kownusturu fu Gado. Dei nanga neti den e dini En ini En santa presi. A Wan di e sidon na tapu a kownusturu sa de na den mindri èn A sa kibri den. ₁₆Angri nanga watra no sa kiri den moro èn a faya son no o bron den. ₁₇Bika a Lam di de na mindri fu a kownusturu, A sa sorgu gi den. A o tyari den go pe watra san e gi libi e lon èn Gado sa drei ala den watra-ai.”