Dag 352 van 365- Obadja en Openbaring 9

₁Den sani di Gado meki Obadya si.

Na disi MASRA taki tak' o psa nanga Edom. Wi kisi a boskopu fu MASRA èn a seni wan boskopuman go na ala folku fu taki: “Kon meki wi hari go feti nanga den.”

₈Na so MASRA taki: A dei e kon taki Mi o kiri ala koniman na ini Edom. No wan sma nanga ferstan o de moro tapu den bergi fu Esau. ₉Den dyadya fetiman fu Teman o skreki taki den no o sabi san fu du. Ala sma di e tan tapu den bergi fu Esau sa dede. ₁₀Yu sa kisi syen èn den o figi yu puru na pasi fu a ogri di yu du nanga yu brada Yakob.

₁₁Bika a ten di den feyanti broko go ini Yerusalem, di doroseisma ben e srepi den srudati fu en tyari gwe èn di den ben e fringi lot fu prati a gudu fu den, a ten dati yu ben tnapu e luku èn yu ben e meki leki wan fu den. ₁₂Yu no ben mus firi switi a dei di yu brada ben de ini nowtu. Yu no ben mus prisiri di den ben e kiri den sma fu Yuda. Yu no ben mus taki bigitaki di den ben de ini bigi benawtu. ₁₃Yu no ben mus kon ini a foto fu Mi folku. Yu no ben mus prisiri di den ben de ini problema, di a ongoloku ben e miti en. Yu no ben mus langa yu anu teki den gudu fu en di a ongoloku ben e miti en. ₁₄Yu no ben mus tnapu wakti tu tapu den sma di ben e lowe fu kiri den. Yu no ben mus grabu den sma tu di ben lon di den ben de ini a benawtu, fu gi den abra na den feyanti fu den. ₁₅A dei fu MASRA de fu kon gi ala folku. Den o du den srefi sani nanga yu leki fa yu ben du. Den sani san yu du o fadon tapu yu eigi ede baka.

₁₆Mi pipel, leki fa unu ben tesi Mi atibron tapu Mi santa bergi, na so ala folku sa tesi en tu. Den o dringi fu en te den no man moro èn a o de leki noiti den no ben de na grontapu. ₁₇Ma un sa feni kibripe tapu a bergi Sion. A sa de wan santa presi. Den bakapikin fu Yakob sa kisi baka san ben de fu den. ₁₈Den bakapikin fu Yakob sa de leki wan faya, den di fu Yosef sa de leki wan fayatongo, di fu Esau sa de a drei grasi. Den o bron en. A faya o nyan en, èn no wan bakapikin fu Esau sa tan na libi. Na MASRA taki tak' dati o psa.

₁₉Den sma di e libi na a zuidsei sa teki a bergi pe Esau e tan abra, den wan di e tan ini a kontren na den bergifutu sa teki a kondre fu den Filistijnsma abra. Den o teki a kontren tu fu Efraim nanga di fu Samaria abra, èn Benyamin sa teki Gilead abra. ₂₀Den sma fu Israel di den ben tyari gwe nanga tranga, sa tron wan legre di o teki a kondre fu den Kananitisma abra te go miti Sarefat. Den di fu Yerusalem di den ben tyari gwe nanga tranga, den di e libi na ini Sarefat, sa teki ala den foto na zuidsei abra. ₂₁Sma o kren a Sionbergi fu tyari ferlusu, fu tiri den bergi fu Esau èn MASRA sa de kownu.

₁Di a di fu feifi engel bro na tapu en tutu, mi si wan stari san ben fadon kmopo fu heimel kon na grontapu. Dan a kisi a sroto fu opo a olo san no abi gron. ₂Di a opo a olo, wan deki smoko kmopo na ini, leki te yu e bron bigi ipi drei grasi. A smoko disi ben tapu a heri loktu, taki a son no ben de fu si moro. ₃Dan sprenka kmopo ini a smoko kon na grontapu. Den ben kisi a makti san kruktutere abi. ₄Ma den sprenka kisi fu yere taki den no mus pori a grasi na grontapu noso wan tra grun wiwiri, èn den no mus pori den wiwiri fu den bon. Ma na dyuku den mus dyuku den sma di no abi a stampu fu Gado na den fes'ede. ₅Den ben kisi a makti fu gi den sma skin-ati feifi mun langa, ma den no ben mus kiri den. Den sma skin ben hati den neleki te kruktutere dyuku yu. ₆Ini den dei dati, den sma sa suku dede, ma dede no o de fu feni. Den sa angri fu dede, ma dede sa lon gi den.

₇Den sprenka ben gersi asi san den sma ben meki klari fu go na feti. Na tapu den ede den ben weri wan sani san gersi wan gowtu kroon, èn den fesi ben gersi libisma fesi. ₈Den wiwiri ben langa leki di fu umasma, èn den tifi ben de leki di fu lew. ₉Den ben weri wan sani leki wan isri bosroko, èn te den e frei, a frei fu den e bari leki te wan lo asi e hari fetiwagi go na feti. ₁₀Den ben abi wan tere nanga wan maka neleki kruktutere. Èn den ben abi makti ini den tere fu gi sma skin-ati feifi mun langa. ₁₁A kownu fu den sprenka ben de a takruyeye fu a olo san no abi gron. Ini Hebrewtongo den e kari en Abadon, ini Grikitongo den e kari en Apolion.

₁₂A fosi ogri psa kba. Luku, ete tu ogri de fu kon!

₁₃Di a di fu siksi engel bro na tapu en tutu, mi yere wan sten taki kmopo fu den fo uku fu a gowtu altari san de na fesi Gado. ₁₄A taigi a di fu siksi engel di abi a tutu taki: “Lusu den fo engel di tai pe a bigi Eufratliba de.” ₁₅So a engel lusu den fo engel san ben drape e wakti a yari, a mun, a dei nanga a yuru fu den ben kan kiri wan fu ala dri libisma. ₁₆Dan den taigi mi omeni srudati ben rei tapu den asi: na tu hondro milyun. ₁₇Ini a sani san Gado meki mi si, mi si den asi nanga den wan di ben rei na den tapu. Den ben weri isri bosroko san ben redi, blaw, nanga geri. Den ede fu den asi ben gersi di fu wan tigri, èn den ben puru faya, smoko nanga kroiti na ini den mofo. ₁₈Den dri ogri disi: a faya, a smoko, nanga a kroiti san ben kmopo na ini den mofo, ben kiri wan fu ala dri libisma. ₁₉Bika a makti fu den asi de na ini den mofo nanga ini den tere. A tere fu den ben de leki wan takru sneki, èn a ben abi wan ede. Nanga den tere den ben gi den sma mankeri. ₂₀Ma toku den sma di no ben dede fu den dri bigi ogri disi, no drai den baka gi den sani san den srefi meki. Den no tapu fu anbegi den takruyeye, nanga den afkodrei popki san ben meki fu gowtu, solfru, kopro, ston nanga udu. Den no tapu fu anbegi den sortu sani disi san no e si, san no e yere, èn san no e waka. ₂₁Èn den no tapu fu kiri sma, fu du tofruwroko, fu gi densrefi abra na takru lostu, nanga fu fufuru.