Dag 354 van 365- Micha 1-3 en Openbaring 11

₁Disi na a boskopu di MASRA gi Mika fu a foto Moreset. Mika kisi a boskopu disi leki wan sani di Gado ben meki a si fu Samaria nanga Yerusalem. A ben si den sani disi ini a ten di Yotam, Akas nanga Yekiskia ben de kownu fu Yuda.

₁Den mus luku bun! Den di e sidon prakseri kruktudu èn di e didon prakseri ogri tapu den bedi. Dan den e du a ogri te dei opo, fu di den abi a makti fu du en. ₂Efu den poti den ai tapu wan pranigron, den e fufuru en teki. Efu na wan oso den wani, den e puru en na a sma anu. Na so den e puru den sma oso na den anu èn teki den sani di den sma abi. ₃Na fu dat'ede MASRA taki: Luku, Mi o du a folku disi wan ogri èn den no o man kibri den ede gi en. A o de wan ogri ten di o meki den bokru den baka. ₄A pisten dati den o teki un leki wan eksempre. Den o singi fu sori fa un lasi ati. Den o singi taki:

₆“No preiki gi unu,” den taki. “Yu no kan taki den sani dati. Tapu now nanga den skempi di yu e skempi unu. ₇Na disi Gado taki o psa nanga a folku fu Yakob? Na so esi MASRA e lasi En pasensi? Na disi na san A o du?” Den sani di Gado taki e sorgu taki ala sani e go bun nanga a sma di e libi leki fa Gado wani. ₈Ala yuru Mi pipel e libi leki feyanti nanga den sma di no wani feti srefsrefi. Den e fufuru den langa dyakti fu den sma di e psa èn di no ben ferwakti srefsrefi taki disi bo miti den. ₉Un e yagi den umasma fu Mi folku puru ini den oso pe den ben e libi switi fu den. A blesi di Mi ben gi den pikin, un e fufuru fu têgo puru na den anu. ₁₀Un opo! Un gwe! Dyaso no de wan presi fu un tan langalanga. Fu di a kondre no krin meki a e tyari soso pori kon na doro. Iya, wan pori di e nyan go moro fara. ₁₁Efu wan sma ben de di e waka e ferteri soso lei nanga sani di no warti srefsrefi tak': “Gado e meki mi si win nanga tranga dringi,” dan a folku ben o si so wan man leki wan trutru profeiti.

₁Dan mi taki: Arki, edeman fu Yakob, fesiman fu a oso fu Israel. Na unu na den sma di mus sabi fa sani mus du tapu wan leti fasi. ₂Ma un no lobi den bun sani. Un lobi a ogri moro. Un e piri a buba puru fu Mi folku, un e puru a meti na den bonyo fu den. ₃Iya, un e nyan a meti fu Mi folku. Un e hari a buba fu den puru, un e broko den bonyo fu den èn un e kapu den leki fa den e meki meti klari fu poti ini wan pan. ₄Te den o kari MASRA na ini begi A no o piki den. A o drai En fesi gi den fu di den no du bun.

₅Na disi MASRA e taki fu den profeiti di e kori Mi folku, di e pramisi freide te yu e gi den nyanyan, ma di e pramisi soso ogri gi den sma di no gi den noti fu nyan: ₆Fu dat'ede ala sani o kon dungru gi unu, un no o si noti moro. Ala sani o blaka, un no o si noti moro fu taki. Neti o fadon gi den profeiti, a dei o kon dungru gi den. ₇Den sma di Gado ben e sori sani o kon na syen. Den wan di e taki na fesi san o psa no o sabi san fu taki. Den o hori den anu fesi den mofo, bika MASRA no o piki den. ₈Ma mi furu nanga a krakti nanga a Yeye fu MASRA. Mi du san bun ini Gado ai èn A gi mi a dek'ati fu taigi Yakob den ogri di a du nanga Israel fu den sondu fu en.

₉Un arki, edeman fu a oso fu Yakob, fesiman fu a oso fu Israel. Un no lobi te sani e du tapu wan leti fasi èn den ogri sani un e si fu bun. ₁₀Un bow Sion nanga brudu èn Yerusalem nanga ogridu. ₁₁Den e gi den edeman kado fu den kan taki tak' sani bun te den e koti krutu. Den priester e teki moni fu gi leri. Gi moni den profeiti e taki san den si èn den e bribi taki MASRA de nanga den. Den e taki: “MASRA de nanga wi. Noti no o miti wi.” ₁₂Ma fu unu ede den o drai Sion leki fa den e drai a doti ini wan gron. Yerusalem sa tron wan broko pranasi, grasi o gro tapu a bergi pe a tempel tnapu.

₁Baka dati mi kisi wan tiki san ben gersi wan doitiki, nanga a komanderi, taki: “Opo go marki a tempel fu Gado nanga a altari, èn teri den sma di de na ini a santa presi e anbegi Gado drape. ₂Ma yu no mus marki a opo presi na dorosei fu a tempel, bika a pisi dati na gi den sma di no sabi Gado. Fotenti-na-tu mun langa den o rigeri na ini a santa foto. ₃Mi o taigi den tu kotoigi fu Mi fu weri rowkrosi èn fu taki san Mi o gi den fu taki, wan dusun tu hondro nanga siksitenti dei langa.” ₄Den tu kotoigi na den tu oleifbon nanga den tu tiki di hori olilampu san tnapu na fesi Masra di abi grontapu. ₅Efu wan sma wani du den ogri, dan faya o kmopo ini den mofo, kiri den feyanti fu den. Na so den sma o dede di wani du den ogri. ₆Den man disi o abi a makti fu tapu a alen fu a no fadon, ini a heri pisten san den o taki san Gado gi den fu taki. Den o abi a makti tu fu kenki watra tron brudu, èn fu meki ala sortu bigi ogri kon na grontapu. Den o man du den sani disi te den wani. ₇Dan te den kba kotoigi, a krasi meti san e kmopo ini a olo san no abi gron sa feti nanga den. A sa wini den, èn a sa kiri den. ₈A dedeskin fu den o tan didon na tapu a strati fu a bigi foto. Yeyefasi den e kari a foto disi: Sodom nanga Egipte. Na ini a foto disi den ben spikri a Masra fu den na a kroisi. ₉Dan sma fu ala folku nanga lo, èn fu ibri tongo nanga kondre, o si fa den dedeskin e tan didon drape dri nanga afu dei langa. Den no wani meki den dedeskin fu den beri. ₁₀Den sma di e libi na grontapu o breiti nanga a dede fu den, èn den o prisiri. Den o seni kado gi densrefi, bika den tu profeiti disi ben pina den sma di e libi na grontapu.

₁₁Ma baka den dri nanga afu dei, Gado gi den tu kotoigi libi baka. Den opo tnapu, èn ala sma di si den bigin frede sote. ₁₂Dan den tu kotoigi yere wan tranga sten taki kmopo fu heimel taki: “Un kon dya na loktu!” Ne den opo go na heimel ini wan wolku, èn den feyanti fu den ben e luku den. ₁₃Dan tapu a srefi momenti dati, a gron bigin seki bun hebi. Efu yu e prati a foto ini tin pisi, dan wan fu den tin pisi broko fadon. Seibi dusun sma dede. Den tra sma di tan na libi ben kon frede srefsrefi èn den gi a Gado fu heimel grani.

₁₄A di fu tu ogri psa. Luku, a di fu dri e kon her'esi!

₁₅Di a di fu seibi engel bro na tapu en tutu, tranga sten taki kmopo fu heimel. Den taki: “A Masra fu unu nanga a Wan di A poti fu tron Kownu, kon rigeri now na grontapu leki Kownu. Na En sa rigeri fu têgo èn ala ten.” ₁₆Dan den tutenti-na-fo fesiman di sidon na fesi Gado na tapu den kownusturu, trowe densrefi langalanga na gron. Den anbegi Gado ₁₇taki: “Masra Gado di abi Ala Makti, Yu di de èn di ben de, wi e taki Yu tangi fu di Yu teki Yu bigi makti dan Yu bigin rigeri leki kownu. ₁₈Den folku ati ben bron. Ma Yu ati e bron now èn a ten doro fu krutu den sma di dede. A ten doro fu gi paiman na den profeiti di ben wroko gi Yu nanga den sma fu Yu nanga den sma di abi lespeki gi Yu, pikinwan nanga bigiwan. A ten doro tu fu wai den sma puru na pasi di e pori grontapu.” ₁₉Dan den opo a tempel fu Gado na ini heimel èn a santa kisi fu a ferbontu ben kon fu si drape. Ne faya bigin koti èn mi yere wan lo sten. Dondru bari, grontapu seki, èn furu tranga pis'pisi-ijs fadon na grontapu.