Dag 355 van 365- Micha 4-5 en Openbaring 12

₁Ma a sa de so taki na a kba fu a ten

a bergi tapu san a oso fu MASRA tnapu,

sa tnapu sondro fu seki,

leki a moro hei bergi.

A sa hei moro ala den tra bergi.

Ala folku sa hari go drape.

₂Sma fu furu kondre o hari go drape. Den o taki:

“Kon meki wi hari go na a bergi fu MASRA,

na a oso fu a Gado fu Yakob,

meki A leri wi fa A wani taki wi mus libi,

fu wi kan waka tapu a pasi fu En.”

Bika na fu Sion a wèt fu En o kmoto,

na fu Yerusalem a wortu fu MASRA o kmoto.

₃A sa koti krutu mindri furu folku,

taigi bigi kondre farawe suma abi leti.

Dan den sa teki den deigri èn meki isri fu en fu drai a gron.

Den sa teki den lansri meki babun-nefi.

No wan kondre o hari deigri gi wan trawan,

den no sa sabi moro san na feti.

₄Iniwan fu den sa sidon na ondro en droifibon

nanga en figabon

sondro fu wan sma meki den skreki.

Bika MASRA fu ala sani taki so.

₅Ibri folku e waka na baka a gado fu den,

ma wi e waka ini a nen fu MASRA, wi Gado,

fu têgo èn ala ten.

₆Na so MASRA taki:

A pisten dati Mi sa tyari ala den malengriwan kon na wan.

Den wan di ben panya go na ala sei

Mi sa tyari kon makandra.

Den wan di Mi ben du ogri,

Mi o moksi kon na wan.

₇Mi sa kibri den malengriwan di tan abra,

meki wan tranga folku fu den wan di den ben yagi gwe.

Dan MASRA sa de den kownu tapu a bergi Sion,

bigin fu now èn fu têgo.

₈Migdal-Eder, bergi fu Sion,

yu sa kisi a makti baka leki bifo,

Yerusalem sa tron kownu baka.

₉Fu sanede yu e bari so dan?

Na fu di yu no abi kownu moro?

Na fu di a sma di e gi yu rai dede?

Na dati e meki yu krempi so fu pen,

leki te wan umasma mus meki wan pikin?

₁₀Krempi fu pen, bari,

Sion, bari leki wan umasma di e meki wan pikin.

Bika yu o abi fu kmoto ini a foto

fu go tan ini a wei.

Yu o go na Babel.

Drape den o ferlusu yu.

Drape MASRA o puru yu na ini a anu fu yu feyanti.

₁₁Nownow furu folku moksi densrefi fu feti nanga yu.

Den e taki: “Meki den du sani nanga en di no fiti

meki un switi un ai.”

₁₂Ma den no sabi san MASRA e prakseri.

Den no e ferstan notinoti fu a besroiti fu En,

taki A tyari den kon na wan

leki fa den e tyari a graan ini bosu kon na wan

fu naki den ai puru na den tiki.

₁₃Sion opo, dan yu e masi den.

Mi o gi yu wan isri tutu

èn den futu fu yu o de fu kopro.

Yu o masi furu folku

èn den sani di den ben puru na sma anu

un mus teki baka èn poti den aparti gi MASRA.

Ala a gudu fu den o de fu Masra fu heri grontapu.

₁₄Now yu kan kot'koti yusrefi,

feyanti lontu a foto fu alasei.

Den naki a tiriman fu Israel

nanga wan tiki na en seifesi.

₁Betlehem Efrata, yu na wan fu den pikinwan

na mindri den famiri fu Yuda,

ma na ini yu wan tiriman o kmoto

di Mi o poti fu tiri Israel.

Den afo fu en na fu bun langa bifo,

na fu ten di didon fara na wi baka.

₂A sa libi den abra te leki a ten doro

fu a uma di de nanga bere kisi a pikin.

Dan den brada fu en di ben tan abra

sa drai kon baka na den sma fu Israel.

₃Dan a sa opo èn tiri den,

leki fa wan skapuman e tiri en skapu.

A o du dati nanga a krakti fu MASRA,

nanga a glori fu a nen fu MASRA,

a Gado fu en.

Dan den sa libi ini freide.

Bika a makti fu En sa de te na a kba fu grontapu,

₄èn a sa tyari freide kon.

Te Asur broko kon ini a kondre,

broko kon ini den kownu-oso fu wi,

wi o teki seibi skapuman

nanga aiti fesiman fu a folku.

₅Dan den sa naki Asur nanga deigri,

nanga brenki deigri den o teki Nimrod abra.

A sa ferlusu wi fu Asur,

te Asur broko kon ini a kondre fu wi

te a kon na tapu wi gron.

₆Dan den sma fu Yakob,

di tan abra na mindri furu folku,

o de leki dow di kmoto fu MASRA,

leki alen di e nati a grun grasi,

di no e ferwakti sani fu sma,

noso wakti fu sma du sani gi en.

₇Den sma fu Yakob di tan abra,

o de na mindri sma fu furu kondre,

mindri sma fu difrenti folku.

Den o de leki wan lew na mindri den meti fu a busi,

leki wan yongu lew na mindri den skapu,

di e naki den trowe èn priti den te a broko kon ini a skapupen,

sondro taki wan sma man yepi den skapu.

₈Yu sa wini ala den sma di wani feti nanga yu,

èn yu sa kiri ala den feyanti fu yu.

₉Na disi MASRA taki:

A pisten dati Mi sa kiri ala den asi puru na unu mindri.

Ala fetiwagi Mi o broko.

₁₀Mi o broko ala den foto ini a kondre fu unu.

ala den tranga kibripresi Mi o broko trowe.

₁₁Ala den tofru sani Mi o puru na un anu.

No wan lukuman o de moro na un mindri.

₁₂Mi o broko ala den ston nanga udu popki puru

fu den kruktu gado fu unu,

nanga den spesrutu ston di un e anbegi.

Un no sa boigi moro gi sani di unsrefi meki.

₁₃Mi sa hari ala den postu puru na un mindri pe un e anbegi den gado,

èn Mi o broko ala den foto fu unu.

₁₄Nanga trutru hebi atibron Mi o strafu den folku

di no ben arki.