Dag 357 van 365- Nahum 1-3 en Openbaring 14

₂MASRA na wan dyarusu Gado,

wan Gado di e pai den feyanti fu En baka.

Nanga bigi atibron MASRA e pai den baka.

MASRA e pai den sma baka di wan feti nanga En,

A e puru En atibron tapu den feyanti fu En.

₃MASRA abi langa pasensi,

ma A abi bigi krakti tu.

MASRA e strafu ala sma di fiti fu kisi strafu.

A e kon ini wan drai winti,

ini wan tranga winti.

Den wolku ondro En futu,

den de leki drei doti di e wai opo.

₄A e komanderi a se,

A e meki a se drei gwe.

Ala liba A e meki drei gwe.

So den wei fu Basan e drei gwe.

Ala san e gro tapu a Karmelbergi e drei gwe tu.

srefi den bromki fu a Libanonbergi e drei gwe.

₅Bergi e beifi gi En,

pikin bergi e seki.

Grontapu e opo gi En,

iya, ala den kondre nanga ala den sma fu den.

₆Suma man kaka futu gi a atibron fu En?

Suma man tan tnapu efu A lusu En atibron?

A atibron fu En de leki wan faya,

wan faya di e broko bigi ston pis'pisi.

₇Ma MASRA bun,

A de leki wan tranga presi pe yu kan go kibri te yu de ini nowtu.

A sabi den sma di e kibri na En.

₈Nanga wan frudu A e wasi a presi fu En feyanti gwe.

A e yagi den go na dungru presi.

₉Awinsi san den prakseri fu du baka,

MASRA e pori den prakseri fu den.

₁₀Bika awinsi den frekti densrefi leki makamaka kon na wan,

awinsi sopi e meki den firi taki den man du ala sani,

leki drei grasi den o bron gwe.

₁₁Na ini yu wan sma kmoto di ben poti na en ede fu du ogri,

di ben sidon prakseri fu du MASRA wan sani di no bun.

₁₂Ne MASRA taki disi: “Awinsi den kon nanga ala krakti,

awinsi den kon bosubosu,

den o wai kmoto na pasi, den o dede gwe.

Mi ben broko yu saka,

ma mi no sa broko yu saka moro.

₁₃Mi o puru den na yu tapu

bika den ben de leki wan ston na yu neki.

Mi o broko den keti di ben tai yu.”

₁₄Ma gi yu, MASRA taki disi:

Yu no sa kisi pikin moro fu tyari yu nen.

Mi o broko ala den popki fu den gado fu yu ini den tempel fu den.

Mi o meki yu grebi klari,

bika yu no warti fu tan na libi.

₁₅Luku, wan knekti e lon kon abra den bergi,

wan di e tyari bun nyunsu fu ferlusu kon.

Yuda, hori den fesa fu yu,

du den sani di yu ben pramisi fu du.

Bika a ogriwan no o hari kon ini yu kondre moro,

A kiri puru na pasi.

₁A wan opo, di o panya den go na ala sei.

Nineve, poti waktiman fu luku a foto,

hori ai tapu a pasi.

Seti yusrefi,

kari ala yu krakti kon na wan.

₂Bika MASRA gi Yakob a glori fu en baka,

leki di fu Israel,

awinsi fa fufuruman ben fufuru den sani fu den tyari gwe,

awinsi fa den ben broko den droifibon fu den.

₃Den schild fu den dyadya fetiman fu en redi,

den srudati weri redi krosi.

Den fetiwagi fu en di a seti e brenki,

den lansri fu en e sori go na fesi kba.

₄Es'esi den wagi e lon psa den strati,

den e frei psa ini den wei.

Den gersi frambo,

den e psa na yu fesi leki a faya di e koti na loktu.

₅A e pusu den ofisiri fu en fu du es'esi,

den futu e frekti fa den e feti fu go.

Den e lon go miti den skotu fu a foto,

den seti wan daki fu kibri densrefi.

₆Den sroisi e opo,

a oso fu kownu e fadon broko.

₇A kba. Sondro krosi den e tyari en gwe.

A krei fu den srafu fu en gersi a babari fu doifi.

Den e naki tapu den borsu fu sori fa den e sari.

₈Nineve ben de ala ten leki wan kriki di ben furu nanga watra,

Now ala a watra lon gwe.

Un tan tnapu! Un tan tnapu.

Ma no wan sma e drai luku.

₉Un fufuru a solfru, un fufuru a gowtu!

So furu de taki a gersi leki wan kba no e kon na en.

Bogobogo gudu de fu teki.

₁₀Ala sani leigi, ala sani broko fadon, ala sani didon panyapanya.

Den ati broko, den kindi e beifi,

pe den tnapu den steifi,

ala den fesi kon weti.

San psa nanga a presi pe den yongu lew ben e nyan?

A presi pe a lew, a umalew nanga den pikinwan,

ben e waka sondro fu wan sma trobi den.

₁₂Pe a lew de di ben e fufuru fu den pikin fu en kan nyan,

di ben e kiri gi den uma fu en,

di ben e furu den olo pe a ben e tan,

nanga a nesi fu en,

nanga meti di a ben kiri.

₁₃Ma arki, Mi o feti yu now,

MASRA fu ala sani taki.

Mi o bron ala den fetiwagi fu yu.

Deigri o kiri ala den yongu lew fu yu.

Mi o figi ala sani gwe di yu ben wini ini den feti fu yu,

èn noiti moro sma o yere a sten fu den boskopuman fu yu.

₁Yu, foto di e meki brudu lon,

yu mus luku bun!

Bika soso lei yu sabi,

yu furu nanga sani di yu wini ini feti.

Yu no e tapu fu fufuru.

₂Arki, wipi e naki.

Arki, a babari fu wagiwiel.

Asi e lon,

fetiwagi e seki.

₃Asi e dyompo,

deigri e brenki,

lansri e koti faya.

Den wan di kisi mankeri no de fu teri,

dedesma na ala sei,

dedeskin, so fara leki yu ai man si.

Yu e stotu yu futu na den dedeskin.

₄Nineve, na a hurulibi fu yu meki ala den sani disi psa.

Yu ben man drai sma ede nanga a moi di yu moi.

Yu sabi du tofruwroko bun di e tyari sma go na den grebi.

Yu meki heriheri folku tron srafu nanga a huru libi fu yu,

heriheri lo nanga a tofruwroko fu yu.

₅Ma arki, Mi o feti yu now,

MASRA fu ala sani taki.

Mi o opo yu krosi te abra yu ede,

meki ala folku si yu sondro krosi.

Mi o sori ala kownu yu syenpresi.

₆Mi o trowe doti na yu tapu,

Mi o gi yu syen na ala sma fesi.

₇Dan ala sma di si yu sa drai den fesi gi yu èn taki:

Nineve broko pis'pisi.

Suma sa firi sari gi en?

Suma mi o feni fu trowstu yu.

₈Yu no betre moro Thebe, di didon na a Nijl-liba,

pe watra lontu en na ala sei.

Na a se ben e kibri en,

watra ben de leki wan skotu lontu en.

₉Etiopia nanga Egipte ben e hori baka gi yu,

ala ten.

Put nanga Libia ben e hari kon yepi yu.

₁₀Ma srefi den sma fu a foto dati yu ben tyari gwe leki srafu.

Den nyunyun pikin fu en yu ben e naki kiri

tapu den uku fu den strati.

Yu ben e fringi lot

fu luku suma bo teki den guduman fu a kondre.

Ala den fesiman yu naki poti na bui.

₁₁Ma yusrefi o drungu tu,

yusrefi no o man denki krin moro,

yusrefi o abi fu kibri gi yu feyanti.

₁₂Den tranga foto fu yu,

den gersi figabon nanga froktu di lepi fosi den ten.

Efu yu seki a bon,

den e fadon langalanga ini a mofo fu a sma di o nyan den.

₁₃Luku, na soso umasma de ini a legre fu yu.

Den bigi doro fu a kondre bradi densrefi opo gi den feyanti fu yu.

Faya bron den bowtu nanga san den e tapu den doro fu a foto.

₁₄Kibri watra poti fu te feyanti lontu a foto.

Meki den foto fu yu moro tranga.

Stampu a kleidoti,

masi a smenti,

teki yu wrokosani fu meki ston.

₁₅Ma dati no o hori a faya fu no bron yu,

a deigri fu no kiri yu.

A o nyan yu,

leki fa wan grupu sprenka no e libi noti na baka fu san den nyan.

Yu kan furu leki den sprenka srefi,

yu kan meki pikin so furu srefi leki den.

₁₆Den bai nanga seriman fu yu,

den furu moro den stari na heimel.

Den gersi wan ipi sprenka di e opo den frei èn frei gwe.

₁₇Den srudati fu yu furu leki sprenka,

den wrokoman fu yu leki freifrei.

Solanga a kowru den e kibri na mindri den ston fu a skotu.

Te a son opo den e frei gwe.

No wan sma no sabi pe den go.

₁₈Kownu fu Asiria, den tiriman fu yu dede.

Den bigiman fu kondre tapu den ai fu têgo.

A folku fu yu panya tapu den bergi.

No wan sma de fu tyari den kon na wan.

₁₉Dresi no de gi a mankeri fu yu,

a soro fu yu no o kon betre.

Ala sma di yere san psa nanga yu e naki anu fu prisiri.

Bika yu no ben abi no wan firi gi trawan

èn ala sma ben e firi dati dorodoro.