Dag 358 van 365- Habakuk 1-3 en Openbaring 15

₂“MASRA, olanga mi e kari Yu kba fu Yu yepi mi,

ma Yu no e piki?

Olanga mi e bari gi Yu: ogri e psa!

ma Yu no e tyari ferlusu.

₃Fu sanede Yu e meki mi si den kruktudu disi?

Fu sanede Yu e tan luku a ogri?

Soso pina nanga ogri mi e si,

trobi nanga pratifasi.

₄Na dati e meki a wèt e lasi en krakti,

na dati meki noiti san e du nanga leti.

Bika den ogriwan e wini ala krutu fu den bun sma.

Sani no e krutu tapu wan leti fasi moro.”

₅“Luku den folku, yu mus luku bun.

Yu o skreki fu san yu o si,

yu no o wani bribi en.

Bika Mi o du wan sani ini a ten fu unu,

di un no o wani bribi te sma ferteri unu.

₆Luku, Mi o gi den Kaldeasma makti.

Wan hogri folku, di no e gi pardon.

Den e lontu heri grontapu,

fu teki presi abra di no de fu den.

₇Ala sma e frede den, ala sma e beifi gi den,

San den feni taki bun, na dati den e du,

den e bow tapu den eigi krakti.

₈Den asi fu den e lon moro tigri,

den gaw moro krab'dagu.

Den e lon kon tapu den asi,

fu fara den e frei kon leki aka,

di e trowe densrefi grabu wan meti.

₉A heri legre e kon fu du ogri,

den wan di de na fesi e kon leki wan draiwinti,

den srafu di den e tyari gwe,

furu leki santi.

₁₀Den e teki kownu meki spotu,

sma di abi makti den e si fu noti.

Den e lafu te den e si den tranga foto.

Den e seti ipi santi sei den skotu,

dan den e kren teki a foto abra.

₁₁Dan es'esi leki winti den e hari go moro fara.”

₁₂“MASRA, ten na ten Yu ben de mi Gado, a Santawan fu mi.

Un no sa dede.

MASRA, Yu poti den fu krutu unu.

Yu, Bergiston pe mi e kibri, Yu teki den fu strafu unu.

₁₃Yu santa tumsi fu si a ogri.

Yu di no man luku fa sma e du kruktudu,

fu sanede Yu e tan luku dan

san den man disi e du di no de fu fertrow?

Fu sanede Yu no e taki noti

aladi den ogriwan e kiri den wan di bun moro den?

₁₄Dan a e gersi leki libisma na a srefi leki den fisi,

nanga den meti di e kroipi na gron,

di no abi wan tiriman.

₁₅Den e fanga den sma nanga aka

srepi den gwe ini den fisinet,

hari den kon na wan ini den maswa.

Dat' meki den breiti èn den e prisiri.

₁₆fu dat'ede den e tyari ofrandi gi den fisinet,

bron wierook gi a maswa fu den.

Bika na den sani disi meki taki den abi wan bun libi

nanga a moro bun nyanyan.

₁₇Dat' meki den e tan go doro

fu leigi den fisinet fu den,

èn fu kiri tra folku sondro pardon.”

₁Mi o kren go tnapu ini mi wakti-oso,

go tnapu tapu a skotu fu a foto.

Mi wani yere san A o taigi mi,

san A o piki mi tapu den kragi fu mi.

₂Ne MASRA piki mi taki: Skrifi den sani di Mi o meki yu si

skrifi den poti tapu ston tafra,

fu sma leisi en te den e waka psa.

₃Bika awinsi den sani san Mi o sori yu

e wakti fu a ten doro fu den psa,

den no e lei, den o psa es'esi.

Efu a e meki yu wakti, tan hori pasensi,

bika kon dati a o kon trutru.

A no sa tan na baka.

₄Arki, a takru-ati sma no sa tan na libi,

ma a sma di e libi bun sa tan na libi

fu di a bribi Gado.

₅Fu tru, gudu e kori den sma di abi bigifasi.

Ma a no o man du san a wani.

Leki fa a no e sari gi dede nanga dedekondre te sma e dede,

na so a no e sari tu gi en

fu hari ala kondre kon na wan,

fu tyari ala folku kon na makandra gi ensrefi.

₆Ma ala sma sa koti odo gi en,

den o singi odo gi en,

èn den o poti den ini lai tori.

Den o taigi den taki:

“A sma di e gudu ensrefi nanga tra sma sani mus luku bun.

O langa yu o man go doro nanga disi?

Yu di e gudu yusrefi

nanga san yu teki leki panti fu trawan.”

₇Ma den wan di o beti yu baka o opo,

den wan o wiki di o meki yu skreki.

Dan yu o de a wan di den o fanga.

₈Yu ben fufuru ala sani fu furu folku

ma tra folku sa fufuru ala sani fu yu baka.

fu a brudu di yu ben meki lon,

nanga fu den ogri di yu ben du

nanga a kondre, a foto nanga den sma fu a kondre.

₉Yu mus luku bun!

Yu di e meki moni tapu wan kruktu fasi,

tyari go na yu oso,

fu meki yu nesi bun hei

fu ogri no miti yu.

₁₀Di yu poti a prakseri na yu ede

fu kiri furu folku,

yu meki syen kon tapu yu eigi oso.

Yu teki yu eigi libi trowe.

₁₁Den ston fu a skotu srefi e krutu yu,

èn den postu fu a oso e taki a srefu sani.

₁₂Yu mus luku bun!

Yu di e meki brudu lon fu bow wan foto,

nanga yu di e seti yu fundamenti tapu kruktudu.

₁₃Luku, na MASRA fu ala sani e meki taki den folku e weri densrefi

gi sani di o bron gwe,

èn taki kondre e haswa fu soso.

₁₄Bika leki fa a se furu nanga watra,

na so heri grontapu o kon sabi

fu a glori fu MASRA.

₁₅A sma mus luku bun

di e gi wan trawan wan sani fu dringi

dan a poti sani na ini fu kiri a trawan,

noso di e drungu wan sma

fu a kan si en sondro krosi.

₁₆Yu lai syen na yu tapu

prefu grani.

Now yu o abi fu dringi

èn sori yu syenpresi.

A leti anu fu MASRA e langa a kan gi yu

di o gi a grani fu yu bigi syen.

₁₇Bika a ogri di yu du nanga a kontren fu Libanon,

sa kon na yu tapu baka

yu kiri den meti,

now den meti sa kiri yu baka,

neleki fa yu ben meki brudu lon,

nanga fu den ogri di yu ben du

nanga a kondre, a foto nanga den sma fu a kondre.

₁₈Fa wan popki o man yepi yu?

Na wan sani di wan libisma meki.

Wan popki di taki soso lei?

Fa wan sma man poti en fertrow tapu wan sani di ensrefi meki?

Den sani di a e meki na sani di no man taki.

₁₉A sma mus luku bun di e taigi wan pisi udu taki: “Opo!”

noso di e taigi wan ston: “Wiki!”

A bo man taigi yu wan sani?

Awinsi a meki fu gowtu noso solfru,

libi no de na ini en.

₂₀Ma MASRA de ini En santa tempel.

Heri grontapu mus de tiri na En fesi.

₂MASRA, mi yere den sani di Yu du.

MASRA, mi abi dipi lespeki gi den sani di Yu du.

Du den baka ini a ten disi,

meki sma kon sabi fu den ini a ten disi.

Ma abi sari-ati nanga wi

ini Yu atibron.

₃Gado e kon fu Teman,

A Santawan e kon fu a Paranbergi.

A glori fu En krin a heri heimel,

heri grontapu e gi En grani.

₄A e brenki leki a son.

Faya e koti kmoto fu En anu,

pe a krakti fu En de.

₅Wan takru siki e go na En fesi,

hebi korsu de leti na en baka.

₆Te A opo tnapu

heri grontapu e seki.

Te A luku lontu

ala den folku e beifi.

Den owru bergi didon mas'masi.

Den pikin bergi di ben de ten na ten kba

e saka gwe.

Disi na den owru pasi di A e waka.

₇Mi e si fa den sma fu Kusan

de ini bigi problema.

Den di fu Midyan e beifi.

₈MASRA, na tapu den liba Yu ati e bron?

Na den liba meki Yu ati bron?

Na a se e meki Yu ati kuku

taki Yu e kon tapu Yu asi,

tapu den fetiwagi fu Yu di e tyari wini.

₉Yu hari Yu bo kba

Yu seti Yu peiri na en tapu.

Yu e priti a gron nanga liba.

₁₀Te den bergi si Yu, den e beifi,

watra e lon psa leki wan liba,

a se e opo en sten,

den skwala e opo hei.

₁₁A son nanga a mun no de fu si moro,

te a faya fu den peiri fu Yu e psa

te a lansri fu Yu e koti faya.

₁₂Nanga atibron Yu e waka psa na grontapu

Yu ati e kuku te Yu e trapu den folku.

₁₃Yu e hari go yepi Yu folku.

Yu e go fu yepi a wan di Yu ben teki.

Yu e broko a daki fu a oso

fu den sma di no e dini Yu.

Yu e meki a heri fundamenti kon fu si.

₁₄Den srudati ben e lon kon

fu panya un go na alasei.

Nanga prisiri den e swari a swakiwan

na ini wan kibripresi.

Ma Yu e boro den ede

nanga den eigi peiri.

₁₅Yu e psa abra a se nanga Yu asi,

abra a skuma fu den bigi watra.

₁₆Di mi yere dati, mi ati bigin naki.

Di a nyunsu doro mi yesi mi bigin beifi.

Mi bonyo bigin pori gwe,

ala mi kindi ben e naki leti pe mi ben e tnapu.

Ma mi sa tan wakti te a dei fu a strafu

o doro gi a folku

di e broko ipi ipi kon na wi tapu.

₁₇Awinsi a figabon no bo gi froktu moro

droifi no de fu si na a droifibon,

awinsi den oleifbon no gi nofo nyanyan,

nyanyan no de fu koti srefsrefi na ini den gron,

awinsi no wan skapu nanga no wan kaw

de ini a skapupen moro,

₁₈mi sa tan abi prisiri nanga MASRA,

breiti nanga a Gado di ferlusu mi.

₁₉MASRA na mi krakti

A e meki mi lon leki wan dia,

A e meki mi waka tapu den bergi fu mi.

Gi a fesiman fu a singigrupu. A mus singi nanga gitara.

Masra Gado di abi Ala Makti,

den wroko san Yu e du bigi

èn den de fu ferwondru.

Yu di e rigeri leki kownu abra ala folku,

Yu e du sani tapu wan leti fasi

èn sondro fowtu.

₄Masra,

suma no sa wani lespeki Yu?

Suma no sa wani gi Yu glori?

Bika na Yu wawan santa.

Ala folku sa kon boigi gi Yu fu anbegi Yu,

bika now ala sma si taki Yu e du sani nanga leti.