1MASRA kari Moses dan fu a tenti pe yu ben kan miti nanga Gado A taigi Moses taki: 2“Taki nanga den Israelitisma. Taigi den taki: ‘Efu wan fu unu wan tyari wan ofrandi gi MASRA fu wan meti di sma e kweki, dan a mus de wan kaw, wan skapu noso wan krabita.
3Efu na wan kaw a sma wani gi fu bron leki ofrandi, dan a mus de wan bulu. Noti no mus mankeri a meti. A sma mus tyari en kon na mofodoro fu a tenti pe yu kan miti nanga Gado, fu MASRA kan abi prisiri nanga en. 4A sma sa poti en anu tapu a ede fu a meti di o bron leki ofrandi. Dan Gado sa abi prisiri nanga a ofrandi èn a sma sa kon bun baka nanga Gado. 5Baka dati a sma sa srakti a meti na MASRA fesi, dan den priester, den manpikin fu Aaron, sa teki a brudu, dan den fringi en lontu na a skin fu a altari, di de na mofodoro fu a tenti pe yu kan miti nanga Gado. 6Te dati psa, a sma sa hari a buba puru na a meti, dan a kapu a meti ini wantu pisi. 7Den priester, den manpikin fu Aaron, sa meki faya tapu a altari èn seti udu tapu a faya. 8Dan den manpikin fu Aaron, sobun den priester, sa seti den pisi fu a meti, a ede nanga a fatu, tapu a udu di de tapu a faya. 9A sma di tyari a meti kon sa wasi a inibere nanga den futu fu a meti. Dan a priester sa poti ala sani tapu a altari fu bron leki wan ofrandi. A sa de wan ofrandi di bron, wan ofrandi di bron nanga faya leki wan switi smeri di e gi MASRA prisiri.
10Efu a meti di a sma tyari kon fu bron leki ofrandi na wan skapu noso wan krabita, dan a mus de wan manwan. Noti no mus mankeri a meti. 11A sa srakti a meti na MASRA fesi, na noordsei fu a altari. Dan den manpikin fu Aaron, sobun den priester, sa fringi a brudu lontu na a skin fu a altari. 12Te dati psa, a sma sa kapu a meti ini wantu pisi. Dan a priester sa seti den pisi meti, a ede nanga a fatu tapu a udu di de tapu a faya. 13A sma sa wasi a inibere nanga den futu fu a meti di a tyari kon leki ofrandi. Dan a priester sa tyari ala sani go bron tapu a altari. A sa de wan ofrandi di bron, wan ofrandi di bron nanga faya leki wan switi smeri di e gi MASRA prisiri.
14Efu na fowru wan sma tyari kon fu bron leki ofrandi gi MASRA, dan a mus de stondoifi noso yongu doifi. 15A priester sa tyari en go na a altari, dan a drai a neki broko. Baka dati a sa bron a ede tapu a altari. A sa kwinsi a doifi na wan fu den sei fu a altari, fu a brudu lon na a skin fu a altari. 16A sa puru a saka na a gorogoro pe a nyanyan e tan sidon, dan a fringi en go tapu a dot'ipi na oostsei fu a altari. 17A sa hari den frei priti, ma den no mus lusu kmoto na a fowru en skin. Baka dati a priester sa bron a fowru tapu a udufaya, tapu a altari. A sa de wan ofrandi di bron, wan ofrandi di bron nanga faya leki wan switi smeri di e gi MASRA prisiri.
Leviticus 2
Den graan-ofrandi
1Efu wan sma wan gi MASRA wan graan-ofrandi, a ofrandi dati mus meki fu a moro bun blon. A sma sa kanti oli tapu a ofrandi èn a sa poti wierook tu di e smeri switi. 2A sma sa tyari en go na den manpikin fu Aaron, sobun den priester. A priester sa teki wan anu fu a blon dati tapu san a oli ben kanti, nanga ala a wierook, dan a bron en tapu a altari. Dan a sa de leki na a heri ofrandi bron. A ofrandi disi na wan ofrandi di bron nanga faya leki wan switi smeri di e gi MASRA prisiri. 3San tan abra fu a graan-ofrandi, na fu Aaron nanga den manpikin fu en. Na wan tumsi santa sani, fu di a de wan pisi fu a ofrandi di bron nanga faya gi MASRA.
4Efu na losi a graan-ofrandi losi ini wan onfu, dan a mus losi nanga a moro bun blon. A mus de kuku di meki nanga oli, ma sondro dyesi, noso plata buskutu gi san den lobi oli, ma di meki sondro dyesi tu. 5Efu na baka a graan-ofrandi baka tapu wan plaat, dan a mus baka nanga a moro bun blon. A mus meki nanga oli èn a no mus abi dyesi. 6A mus brokobroko ini pisi èn oli mus kanti na en tapu. Dan a fiti fu den tyari en leki graan-ofrandi. 7Efu na bori a graan-ofrandi ben bori ini wan pan, dan a mus bori nanga a moro bun blon èn nanga oli. 8Soso te a graan-ofrandi meki nanga den sani disi, yu kan tyari en kon gi MASRA. Den sa tyari en kon gi a priester, di sa tyari en go na a altari. 9A priester sa teki wan pisi fu a graan-ofrandi, dan a bron en tapu a altari. Dan a sa de leki na a heri ofrandi bron. Na wan ofrandi di bron nanga faya leki wan switi smeri di e gi MASRA prisiri. 10San tan abra fu a ofrandi, na fu Aaron nanga den manpikin fu en. Na wan tumsi santa sani, fu di a de wan pisi fu a ofrandi di bron nanga faya gi MASRA.
11No wan graan-ofrandi, di yu e tyari kon gi MASRA, sa meki nanga dyesi. Bika no wan sani di meki nanga dyesi noso oni, yu sa bron nanga faya leki ofrandi gi MASRA. 12Yu kan tyari den kon gi MASRA, te yu e tyari den fosi nyanyan fu a gron kon. Ma den no sa bron tapu a altari leki wan switi smeri. 13Yu sa poti sowtu gi ibri graan-ofrandi, leki wan marki fu a ferbontu fu unu nanga Gado. Un sa poti sowtu gi ala ofrandi.
14Efu yu wan gi MASRA wan graan-ofrandi fu den fosi nyanyan fu yu gron, dan a mus de fu karu di losi tapu faya. Den ai fu a karu mus masi finifini. 15Yu sa kanti oli na en tapu èn yu sa poti wierook di e smeri switi na en tapu tu. Na so yu mus du te yu wani tyari en kon leki graan-ofrandi. 16A priester sa teki pikinso fu a karu di masi fin'fini, pikinso oli nanga ala a wierook, dan a bron en tapu a altari. Dan a sa de leki na a heri ofrandi bron. Na wan ofrandi di bron nanga faya gi MASRA.
Leviticus 3
A freide-ofrandi
1Efu wan sma wan tyari wan freide-ofrandi fu wan meti di a kweki, dan a kan tyari wan bulu noso wan kaw kon gi MASRA. Ma noti no mus mankeri a meti. 2A sma di tyari a meti kon leki ofrandi, sa poti en anu tapu a ede fu a meti, dan a srakti en na mofodoro fu a tenti pe yu kan miti nanga Gado. Dan den priester, sobun den manpikin fu Aaron, sa fringi a brudu lontu na a skin fu a altari. 3A sma di tyari a meti kon leki freide-ofrandi, sa tyari ala a fatu fu a inibere fu a meti kon fu bron nanga faya leki ofrandi gi MASRA. 4A sa du disi tu nanga den niri èn nanga a fatu fu den niri na a lebriki. Makandra nanga den niri a sa puru a moro bun pisi fu a lever tu. 5Dan den manpikin fu Aaron sa bron den tapu a altari makandra nanga den tra ofrandi di mus bron. A sa de wan ofrandi di bron nanga faya leki wan switi smeri di e gi MASRA prisiri.
6Efu na wan skapu noso wan krabita a sma tyari kon leki freide-ofrandi gi MASRA, dan a no sa abi trobi efu na wan manwan noso wan umawan. Ma noti no mus mankeri a meti. 7Efu na wan skapu a sma tyari kon leki ofrandi gi MASRA, 8a sa poti en anu tapu a ede fu a meti, dan a srakti en fesi a tenti pe yu kan miti nanga Gado. Dan den manpikin fu Aaron sa fringi a brudu lontu na a skin fu a altari. 9A sa tyari den fatu pisi fu a meti kon, di a tyari leki freide-ofrandi, fu den bron en leki wan ofrandi nanga faya gi MASRA. Dati na: a tere nanga a fatu fu en di a koti puru na a bakabonyo, nanga ala a fatu fu a inibere. 10Moro fara den niri nanga a fatu fu den na a lebriki. Makandra nanga a niri a mus puru a moro bun pisi fu a lever tu. 11A priester sa bron den tapu a altari. A sa de nyanyan di bron nanga faya leki wan ofrandi gi MASRA. 12Efu na wan krabita a sma tyari kon leki ofrandi gi MASRA, 13a sma sa poti en anu tapu a ede fu a meti, dan a srakti en fesi a tenti pe yu kan miti nanga Gado. Dan den manpikin fu Aaron sa fringi a brudu lontu na a skin fu a altari. 14A sma sa tyari ala a fatu fu a inibere fu a meti kon fu bron nanga faya leki ofrandi gi MASRA. 15A sma sa du disi tu nanga den niri èn nanga a fatu fu den niri na a lebriki. Makandra nanga den niri a sa puru a moro bun pisi fu a lever tu. 16Dan a priester sa bron en tapu a altari. A sa de nyanyan di bron nanga faya leki ofrandi nanga wan switi smeri di e gi MASRA prisiri. 17Disi na wan sani di ala den pikin fu unu di e kon na baka mus tan du fu têgo, awinsi pe den e tan. Un no sa nyan fatu nanga brudu srefsrefi.’ ”
1Baka di Yesus kba taki ala den sani disi, A kmoto ini a tempel. Di A e gwe, den man di ben e teki leri fu En bigin sori En tapu den bigi oso di ben de ini a dyari fu a tempel. 2Ne Yesus taigi den taki: “Un e si ala den sani disi? Fu tru Mi e taigi un taki: Den alamala o broko te na gron. No wan ston o tan na tapu wan trawan.”
3Baka dati Yesus ben sidon tapu a Oleifbergi, dan den man di ben e teki leri fu En kon den wawan na En. Den aksi En taki: “Masra, taigi unu: Oten a sani dati o psa? San o de a marki di o sori taki Yu e kon baka, èn taki a kba fu a ten disi doro?” 4Yesus piki den taki: “Un mus luku bun taki no wan sma no kori unu! 5Bika furu sma o du leki den na Mi. Den o taki tak' den na a Mesias, èn den o kori furu sma. 6Un o yere tak' kondre e feti nanga densrefi èn taki bigi feti de fu broko, ma un no mus skreki, bika den sani disi mus fu psa. Ma dati a no a kba ete. 7Bika a wan folku o feti nanga a tra folku, èn a wan kondre o feti nanga a trawan. Na difrenti presi angriten o de èn a gron o seki hebi tu. 8Ma ala den sani disi na soso a bigin fu a tranga ten di o kon. 9Den o grabu unu, dan den o gi un abra na sma di o pina unu, èn di o kiri unu. Fu Mi ede no wan sma fu no wan folku o man si un na ai. 10Ini a ten dati furu sma o lasi bribi ini Mi, a wan sma o tyari a trawan gi lanti èn den no o man si makandra na ai. 11Furu sma o du leki den na profeiti èn den o kori furu sma. 12Libisma o kon takru sote taki furu sma no sa lobi trawan moro. 13Ma Gado sa ferlusu a sma di sa hori doro te na a kba. 14A bun nyunsu disi taki Gado bigin tiri libisma, sa panya na heri grontapu fu ala folku kan kisi a okasi fu yere en. Dan fosi grontapu o kba.”
A groskin sani di o pori a tempel
15“A profeiti Danyel ben taki tak' den o poti wan groskin sani ini a santa presi di o pori a heri tempel. Suma e leisi a sani disi mus suku fu ferstan en. Te un si a sani disi, 16dan den sma di de ini Yudea mus lon go na den bergi. 17A sma di de tapu a daki fu en oso, no mus saka go na gron fu go teki sani ini en oso. 18Èn a sma di de ini en gron, no mus drai go baka fu go teki en krosi. 19Den uma di de nanga bere, nanga den di abi pikin na bobi a pisten dati, o de fu sari. 20Un mus begi taki un no o abi fu lowe ini a kowruten noso tapu wan sabatdei. 21Bika wan bigi pinaten o kon. Noiti ete sowan ten ben de sensi grontapu meki te leki now, èn noiti moro sowan ten o kon baka. 22Efu Gado no ben syatu a ten disi, no wan sma ben o tan na libi. Ma Gado o syatu a ten fu den sma ede di A ben teki gi Ensrefi.
