Dag 41 van 365- Leviticus 8-10 en Matteüs 25:31-46

₁MASRA taigi Moses taki: ₂“Teki Aaron nanga den manpikin fu en. Teki den krosi di den mus weri, a salfu-oli, a bulu di den o tyari leki ofrandi fu kisi pardon fu sondu, den tu man skapu nanga a mantyi nanga den brede di meki sondro dyesi. ₃Kari a heri folku kon na wan na mofodoro fu a tenti pe yu kan miti nanga Gado.”

₄Moses du leki fa MASRA taigi en fu du. A kari a folku kon na wan na mofodoro fu a tenti pe yu kan miti Gado. ₅A taigi a folku taki: “Disi na san MASRA taki tak' un mus du.” ₆Dan Moses meki Aaron nanga den manpikin fu en kon na fesi dan a wasi den nanga watra fu den kon krin ini Gado ai. ₇Dan a weri a langa ondrokrosi gi Aaron, a tai a banti lontu en bere, èn a weri a langa empi gi en. Baka dati a weri a efod gi en, dan a tai en nanga a banti fu en. ₈A weri a saka gi en di e kon tapu en borsu dan a poti a Urim nanga a Tuminston na ini. ₉A lontu a ede fu Aaron nanga a duku nanga san a ben mus lontu en ede, dan a fasi a gowtu bromki, a santa bromki, na en tapu leki fa MASRA ben taigi en fu du. ₁₀Baka dati Moses teki a salfu-oli dan a salfu a santa tenti nanga ala sani di ben de na ini, fu meki den kon santa. ₁₁A dropudropu a oli seibi leisi tapu a altari dan a salfu a altari nanga ala den wrokosani fu en. A salfu a beki, pe anu nanga futu mus wasi, nanga den futupisi fu en fu meki den kon santa. ₁₂Dan Moses kanti salfu-oli tapu a ede fu Aaron. A salfu en fu poti en aparti. ₁₃Baka dati Moses meki den manpikin fu Aaron kon, dan a weri a langa ondrokrosi gi den. A tai a banti lontu den bere, dan a lontu den ede nanga a duku, leki fa MASRA ben taigi en fu du.

₁₄Moses meki den tyari a bulu kon gi a ofrandi fu kisi pardon fu den sondu, dan Aaron nanga den manpikin fu en poti den anu tapu a ede fu a bulu. ₁₅Dan Moses srakti a bulu. A teki pikinso fu a brudu dan a lobi en nanga en finga na den tutu fu a altari fu krin a altari. A tra brudu a kanti na a futu fu a altari. Tapu a fasi disi a santa a altari fu a ben kan bun fu meki sma kon bun baka nanga Gado. ₁₆A teki ala a fatu fu a inibere, a moro bun pisi fu a lever, den tu niri nanga a fatu fu den niri dan a bron den tapu a altari. ₁₇Ma a buba fu a bulu, a meti fu en nanga a nyanyan san ben de ini a bere ete, Moses bron nanga faya dorosei fu a kampu, leki fa MASRA ben taigi en fu du.

₁₈Baka dati Moses meki den tyari a man skapu kon di den bo bron leki ofrandi, dan Aaron nanga den manpikin fu en poti den anu tapu a ede fu a man skapu. ₁₉Dan Moses srakti a man skapu. A brudu a fringi lontu na a skin fu a altari. ₂₀A koti a skapu ini wantu pisi, dan a bron a ede, den pisi meti nanga a fatu. ₂₁A wasi a inibere nanga den futu nanga watra, dan a bron den makandra nanga den tra pisi fu a man skapu tapu a altari. A ben de wan ofrandi di bron leki wan switi smeri di e gi MASRA prisiri. Wan ofrandi di bron nanga faya, leki fa MASRA ben taigi Moses fu du.

₂₂Baka dati a meki den tyari a tra man skapu kon di den bo tyari leki ofrandi fu gi Aaron nanga den manpikin fu en a frantwortu fu a wroko, dan Aaron nanga den manpikin fu en poti den anu tapu a ede fu a man skapu. ₂₃Dan Moses srakti a skapu. A teki pikinso fu a brudu dan a lobi en na a let' sei yesi fu Aaron, na a doi fu en leti anu nanga a doi fu en leti futu. ₂₄A meki den manpikin fu Aaron kon, dan a lobi a brudu na den let' sei yesi, na a doi fu den leti anu nanga a doi fu den leti futu. A tra brudu a fringi lontu na a skin fu a altari. ₂₅Dan Moses teki a fatu, a tere, ala a fatu fu a inibere, a moro bun pisi fu a lever, den tu niri, a fatu fu den niri nanga a let' sei baka bowtu. ₂₆A teki wan fu den brede di ben meki sondro dyesi ini a mantyi di den ben poti na MASRA fesi, wan kuku gi san den ben lobi oli nanga wan plata kuku. A poti den tapu den fatu pisi fu a meti nanga a let' sei baka bowtu. ₂₇Dan Moses poti ala den sani disi ini anu fu Aaron nanga den manpikin fu en fu den opo en go na loktu leki wan ofrandi na MASRA fesi. ₂₈Baka dati Moses teki en na den anu, dan a bron en tapu a altari tapu den tra sani di ben o bron leki ofrandi. Na so a ben de wan ofrandi nanga wan switi smeri, di bron nanga faya gi MASRA, fu wei den gi a wroko. ₂₉Dan Moses teki a borsu fu a skapu. A opo en go na loktu leki wan ofrandi na MASRA fesi. A borsu fu a skapu disi ben de fu Moses, leki fa MASRA ben taigi en. ₃₀Baka dati Moses teki pikinso fu a salfu-oli nanga pikinso fu a brudu di ben de tapu a altari, dan a dropudropu en tapu Aaron, tapu a krosi fu Aaron, tapu den manpikin fu Aaron nanga tapu a krosi fu den. Tapu a fasi dati a santa Aaron, den krosi fu en, den manpikin fu en nanga den krosi fu den.

₃₁Dan Moses taigi Aaron nanga den manpikin fu en taki: “Bori a meti na mofodoro fu a tenti pe yu kan miti nanga Gado. Drape un mus nyan en makandra nanga a brede di de ini a mantyi leki ofrandi fu wei un gi a wroko. Un nyan en leki fa mi taigi unu fu du. ₃₂San tan abra fu a brede nanga a meti un mus bron nanga faya. ₃₃Un no mus kmoto seibi dei langa na mofodoro fu a tenti pe yu kan miti nanga Gado. Un mus tan te leki den dei psa di de fanowdu fu wei unu. Bika na seibi dei de fanowdu fu wei unu. ₃₄Ala sani di du tide un mus du den tra dei tu. Na so MASRA taki tak' a mus psa, fu un kan kon bun baka nanga En. ₃₅Seibi dei langa un san tan dei nanga neti na mofodoro fu a tenti pe yu kan miti nanga Gado. Un sa hori un na den sani di MASRA komanderi un fu du, fu un no dede. Na so A komanderi mi.” ₃₆Dan Aaron nanga den manpikin fu en du ala sani di MASRA ben meki Moses taigi den.

₁Tapu a di fu aiti dei Moses kari Aaron, den manpikin fu en nanga den fesiman fu Israel kon, dan a taigi Aaron taki: ₂“Un go teki wan yongu kaw kon fu tyari leki ofrandi fu kisi pardon fu sondu, nanga wan man skapu fu bron leki ofrandi, dan yu e tyari den kon na MASRA fesi. Noti no mus mankeri den meti. ₃Taigi den sma fu Israel taki: ‘Un tyari wan bokoboko kon leki ofrandi fu kisi pardon fu sondu. Fu bron leki ofrandi un mus tyari wan yongu kaw fu wan yari nanga wan skapu fu wan yari kon. Noti no mus mankeri den meti. ₄Moro fara un mus tyari wan kaw nanga wan man skapu kon leki freide-ofrandi na MASRA fesi, nanga wan graan-ofrandi di meki nanga oli. Bika tide MASRA sa sori Ensrefi na unu.’ ” ₅Dan den tyari den sani kon di Moses ben taigi den fu tyari. Den tyari den kon na a tenti pe yu kan miti nanga Gado. A heri folku kon tnapu na MASRA fesi. ₆Ne Moses taki: “Disi na san MASRA taigi un fu du, fu un kan si a glori fu En.”

₇Dan Moses taigi Aaron taki: “Waka kon na a altari, dan yu e tyari a ofrandi fu kisi pardon fu yu sondu nanga a ofrandi di mus bron. Meki en bun nanga Gado gi yu nanga a folku. Baka dati yu mus tyari a ofrandi fu a folku, dan yu e meki den kon bun baka nanga Gado, leki fa MASRA taki tak' a mus du.” ₈Ne Aaron waka kon na a altari dan a srakti a yongu kaw di a ben mus tyari leki ofrandi fu kisi pardon fu sondu. ₉Den manpikin fu en tyari a brudu gi en. Dan Aaron dopu en finga ini a brudu dan a lobi en na den tutu fu a altari. A tra brudu a kanti na a futu fu a altari. ₁₀A fatu, den niri nanga a moro bun pisi fu a lever fu a meti di tyari leki ofrandi fu kisi pardon fu sondu, a bron tapu a altari leki fa MASRA ben taigi Moses fu du. ₁₁A meti nanga a buba a bron nanga faya dorosei fu a kampu. ₁₂Baka dati a srakti a meti di ben o bron leki ofrandi. Den manpikin fu en langa a brudu gi en, dan a fringi en lontu na a altari skin. ₁₃Den langa a meti fu a ofrandi gi en di ben koti ini pisi, nanga a ede, dan Aaron bron den tapu a altari. ₁₄A wasi a inibere nanga den futu, dan a bron den tapu a altari tapu a ofrandi di ben e bron. ₁₅Baka dati a tyari a ofrandi fu a folku. A teki a bokoboko di ben o srakti gi a folku fu den kisi pardon fu den sondu, a srakti en dan a tyari en leki wan ofrandi leki fa a ben du nanga ofrandi di a ben tyari gi ensrefi. ₁₆Di a du dati, a bron den tra meti leki ofrandi leki fa dati ben mus du. ₁₇Baka dati a meki den tyari a graan-ofrandi kon. A teki wan anu fu en dan a bron en tapu a altari makandra nanga a ofrandi di ben mus bron ala mamanten. ₁₈Aaron srakti a kaw tu nanga a man skapu fu a freide-ofrandi gi a folku. Den manpikin fu en langa a brudu gi en, dan a fringi en lontu na a altari skin. ₁₉Den fatu pisi fu a kaw, a tere fu a man skapu, ala a fatu fu a inibere, den niri nanga a moro bun pisi fu a lever, ₂₀a poti tapu den borsu fu den meti, dan a bron den tapu a altari. ₂₁A borsu nanga a let'sei bowtu fu den meti a opo go na loktu na MASRA fesi, leki fa Moses ben taigi en fu du. ₂₂Dan Aaron langa en anu go na a folku, dan a blesi den. Baka dati a tyari a ofrandi fu kisi pardon fu sondu, a tyari a ofrandi di ben mus bron, a tyari a freide-ofrandi, dan a saka kmoto fu a altari. ₂₃Dan Moses nanga Aaron go ini a tenti pe yu kan miti nanga Gado. Di den kmoto ini a tenti den blesi a folku. Dan a glori fu MASRA ben de fu si gi a heri folku. ₂₄Ne a faya fu MASRA bron a ofrandi di ben e bron tapu a altari nanga den fatu pisi meti. Di a folku si dati den alamala bari fu prisiri dan den trowe densrefi nanga fesi na gron.

₁Dan Nadab nanga Abihu, tu manpikin fu Aaron, teki den pan ini san den e tyari krofaya, den leti a krofaya, dan den bron wierook di e smeri switi na ini. Dan so den tyari faya kon na MASRA fesi di no ben meki leki fa a ben musu. ₂Ne MASRA seni wan faya di bron den èn den dede na MASRA fesi. ₃Dan Moses taigi Aaron taki: “Na disi MASRA ben e taki di a taki: ‘Mi mus sori Mi santafasi na den wan di e kon krosbei fu Mi èn Mi sa meki a heri folku si Mi glori.’ ” Aaron no ben man taki noti.

₄Ne Moses kari Misael nanga Elsafan kon. Den ben de manpikin fu Usiyel, a omu fu Aaron. A taigi den taki: “Un kon puru den famiri fu unu fu a santa presi. Un tyari den go na dorosei fu a kampu.” ₅So den kon dan den tyari den go na dorosei fu a kampu, leki fa Moses ben taigi den. Den ben weri den langa ondrokrosi ete. ₆Dan Moses taigi Aaron nanga Eleasar nanga Itamar, den manpikin fu Aaron, taki: “Un no mus libi un edewiwiri anga èn un no mus priti un krosi noso un o dede. Efu un du dati MASRA ati o bron nanga a heri folku. Den famiri fu unu, den tra sma fu Israel, kan row fu a faya di MASRA ben seni kon. ₇Un no mus kmoto na mofodoro fu a tenti pe yu kan miti nanga Gado, noso un o dede. Bika un salfu nanga a salfu-oli fu MASRA.” So den du san Moses ben taigi den fu du.

₈MASRA taigi Aaron taki: ₉“Yu nanga den manpikin fu yu no sa dringi win noso wan tra dringi di kan meki un drungu, te un e kon ini a tenti pe yu kan miti nanga Gado. Efu un du dati un o dede. Na wan sani di unu nanga den pikin fu unu di e kon na baka, no sa du fu têgo. ₁₀Un mus du disi fu un kan sabi san poti aparti gi Gado nanga san no poti aparti gi Gado, èn san krin ini Gado ai nanga san no krin ini Gado ai. ₁₁Dan un o man leri den Israelitisma ala den sani fu MASRA di den mus tan du. Den sani di A ben meki Moses taigi den sma.”

₁₂Dan Moses taigi Aaron nanga Eleasar nanga Itamar, den manpikin fu Aaron di ben de na libi ete taki: “Teki a graan-ofrandi san tan abra fu den ofrandi fu MASRA di bron nanga faya. Un nyan en sei a altari, leki brede di no meki nanga dyesi, bika na wan tumsi santi sani. ₁₃Nyan en tapu wan santa presi, bika a pisi disi fu den ofrandi fu MASRA di bron nanga faya, na fu yu nanga den manpikin fu yu. Na a komanderi dati mi kisi. ₁₄A borsu nanga a baka bowtu un mus nyan tapu wan spesrutu presi. Unu, den manpikin nanga den umapikin fu unu. Dati na a pisi fu den freide-ofrandi fu den Israelitisma, san de gi yu nanga den pikin fu yu. ₁₅Den sa tyari a baka bowtu nanga a borsu kon, makandra nanga den fatu pisi fu a meti di o bron nanga faya leki ofrandi. Dan den sa opo en go na loktu leki wan ofrandi na MASRA fesi. Disi sa de wan sani di yu nanga den bakapikin fu yu sa tan du fu têgo, leki fa MASRA taki.” ₁₆Di Moses bigin suku ala presi fu a bokoboko di bo bron leki paiman fu kisi pardon fu sondu, a kon si taki den ben bron en. Ne Moses atibron tapu Eleasar nanga Itamar, den manpikin fu Aaron di ben de na libi ete. A aksi den taki: ₁₇“Fu sanede un no nyan a meti di bron leki ofrandi fu kisi pardon fu sondu tapu wan santa presi? Na wan tumsi santa sani. A ben gi na unu fu puru den sondu fu a folku èn fu meki den kon bun baka na MASRA fesi. ₁₈Ma luku, un no tyari a brudu fu en kon ini a santa presi. Un ben mus nyan en tapu wan santa presi leki fa mi ben taigi unu fu du.” ₁₉Ne Aaron taigi Moses taki: “Luku, tide den tyari a ofrandi fu den na MASRA fesi fu kisi pardon fu den sondu nanga a ofrandi di den ben mus bron. Yu sabi tu san miti mi. Yu denki taki a bo de wan bun sani ini MASRA ai efu mi ben nyan tide fu a ofrandi fu kisi pardon fu sondu?” ₂₀Moses ben feni en bun di a yere a sani disi.

₃₁Dan Yesus taigi den sma moro fara taki: “A Manpikin fu Libisma sa drai kon baka nanga glori makandra nanga ala den engel fu En. Dan A o go sidon tapu En kownusturu san e sori taki A abi ala makti. ₃₂Ala sma fu grontapu o kon na En fesi. Dan A o prati den ini tu grupu leki fa wan skapuman e prati den skapu fu den bokoboko. ₃₃Den skapu A o poti na En let'anu sei, èn den bokoboko A o poti na En kruktu-anu sei. ₃₄Dan a Kownu sa taigi den sma na En let'anu sei taki: ‘Un kon, unu di Mi P'pa blesi. Kon teki den bun di Gado poti klari gi den sma di A e tiri, den bun di A ben poti klari sensi di A meki grontapu. ₃₅Bika di angri ben kiri Mi, un gi Mi nyanyan. Di watra ben kiri Mi, un gi Mi fu dringi. Di Mi ben kon leki wan doroseisma, un gi Mi wan presi fu tan. ₃₆Di Mi no ben abi krosi, un gi Mi fu weri. Di Mi ben siki, un sorgu gi Mi. Di Mi ben de na straf'oso, un kon luku Mi.’ ₃₇Dan den sma di bun ini Gado ai, sa aksi En taki: ‘Masra, oten wi si Yu nanga angri, dan wi gi Yu nyanyan? Oten wi si taki watra ben kiri Yu, dan wi gi Yu fu dringi? ₃₈Oten Yu kon leki wan doroseisma, dan wi gi Yu wan presi fu tan? Oten wi si taki Yu no ben abi krosi, dan wi gi Yu fu weri? ₃₉Oten Yu ben siki noso Yu ben de na straf'oso, dan un go luku Yu?’ ₄₀Dan a Kownu sa piki den taki: ‘Fu tru Mi e taigi un taki: Di un du en gi wan fu den sma fu Mi, awinsi a no ben de wan prenspari sma, un du en gi Mi.’ ₄₁Ma A sa taigi den sma na En kruktu-anu sei taki: ‘Un kmoto na Mi fesi, bika a fluku fu Gado de na un tapu. Un go ini a faya san Gado meki klari gi didibri nanga den takruyeye fu en! A faya di e bron fu têgo! ₄₂Bika di angri ben kiri Mi, un no gi Mi nyanyan. Di watra ben kiri Mi, un no gi Mi fu dringi. ₄₃Di Mi ben kon leki wan doroseisma, un no gi Mi wan presi fu tan. Di Mi no ben abi krosi, un no gi Mi fu weri. Di Mi ben siki, èn di Mi ben de na straf'oso, un no kon luku Mi.’ ₄₄Dan den sa piki En taki: ‘Masra, oten wi si Yu nanga angri, noso taki watra ben kiri Yu? Oten Yu kon leki wan doroseisma? Oten wi si taki Yu no ben abi krosi? Oten Yu ben siki, noso Yu ben de na straf'oso? Oten wi si Yu ini sowan nowtu dan wi no du noti?’ ₄₅Dan A sa piki den taki: ‘Fu tru Mi e taigi un taki: Efu un no du en gi wan sma fu Mi, un no du en gi Mi tu, awinsi a sma dati no ben de wan prenspari sma.’ ” ₄₆Dan Yesus taki: “Den sma disi o go pe den o kisi strafu fu têgo. Ma den sma di bun ini Gado ai, o kisi a libi fu têgo.”